PIENCILNA 25
25
Abraham in Keturah Kinunpi
(1Khg 1:32-33)
1Abraham in zi dang khat la a, a min Keturah ahi hi. 2Tua nu in ama tawh Zimran, Jokshan, Medan, Midian, Ishbak, le Shuah nei hi 3Jokshan pen Sheba le Dedan’ pa ahi hi. Dedan tate pen Asshurim, Lethusim, le Leummim ahi hi. 4Midian’ tate pen Ephah, Epher, Hanoch, Abida, le Eldaah ahi hi. Tam teng zosie, Keturah’ suonlehlahte ahi hi. 5Abraham in a neisa zosie Isaac tungah a pie hi. 6Ahi vangin a zi dang tawh a nei a tate zong ama dam sungin letsongte pie a, a tapa Isaac kung panin nisuona lam manaw-in nisuona gamah amate a sawlmang hi.
Abraham’ Sina
7Tam pen Abraham khankum ahi a, kum za le kum sawmsagi le nga ahi hi. 8Abraham in a nukhia pen a hu sang a, a vuoi, kum tampi a pha, a khanghamin si a, a mite tawh kigawm hi. 9A tapa Isaac le Ishmael in Mamre nisuona lam Hit mi Zohar’ tapa Ephron’ logam Machpelah leihawm sungah ama a vui vua, 10tua mun pen Abraham in Hit-te kung pana a lei ahi hi.#Pien 23:3-16 11Abraham si nua-in Pasien in a tapa Isaac thupha a pie hi. Tuale Beer-lahai-roi ah Isaac a teng hi.
Ishmael’ Suonlehlahte
(1Khg 1:29-31)
12Tam teng pen Abraham in Sarah’ sila numei, Egypt mi Hagar tawh a nei Abraham’ tapa Ishmael’ suonlehlahte ahi hi. 13Tam teng pen a suona dungzui-in a kiminvaw Ishmael tate’ min ahi hi: A suoh masapen Nebaioth ahi hi; tuale Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, le Kedemah ahi uhi. 16Tam teng pen Ishmael’ tate ahi vua, a khuo, a giephuol, le a be utawh kizui-in ulien sawm le nite ahi uhi. 17(Tam pen Ishmael’ khankum ahi a, kum za le kum sawmthum le sagi ahi hi; ama in a hu tawpna sangin si a, a mite tawh kigawm hi.) 18Amate, Havilah panin Assyria lam zotna Egypt tawh kigalsai Shur khuo-ah a teng uhi; ama’ mite zosie gei-ah#25:18 Heb “a langpan dingin” ama a teng#25:18 Heb “ama a kie hi” hi.
Esau le Jacob Suona le a Khangno Hun
(Rom 9:10-12)
19Tam teng pen Abraham tapa Isaac’ suonlehlahte ahi uhi: Abraham pen Isaac’ pa hi a, 20Isaac kum sawmli a phahin Paddan-aram gama Aram mi Bethuel’ tanu Laban’ sanggamnu Rebekah tawh kinung hi. 21Isaac in a zi adingin Topa kungah thu ngen hi, azieh pen ama in ta nei lo hi; Topa in a thungetna dawngin a zi Rebekah a gai hi. 22A sunga nausen gel kibuonbuon uhi. Tuale ama in, “Tam bang ahi mawh leh bang dinga nungta bep ka diei?”#25:22 Syr: Heb ah a khietna kicien lo hi. a ci hi. Tuaci’n Topa dong dingin ama a pei hi. 23Topa in ama kungah,
“Na gil sungah minam ni om a,
na sunga pieng mihing nite
a kikhen ding hi;
khat pen a khat sangin hatzaw ding a,
a uzaw in a nauzaw’ na sem ding hi,” a ci hi.#Rom 9:12
24A suo hun a tun ciengin a gil sungah takop a om hi. 25A suoh masa pen a cisan sa-in suoh a, a pum tung zosie mul nei tawh kibang hi; tuaci’n amate in a min Esau phuo uhi. 26Tua ciengin a khutin Esau’ ketul tu kawmin a sanggampa a suoh hi; tuaci’n ama pen a min Jacob#25:26 “Ama in ka ketul ei tukon hi” ahi sihle “Ama in ei sol hi” a cina ahi hi. kiphuo hi. Ama in tuate a nei hunin Isaac kum sawmguh a pha hi.
27Naupangte a khangliet ciengun Esau pen gamsung mi sabeng siem khat hi a, Jacob pen mi kamtawm, puonbuh sunga teng mi ahi hi. 28Isaac in a samat a neh ziehin Esau a it hi; ahi vangin Rebekah in Jacob a it hi.
Esau in A Innluoza Zua
(Heb 12:16)
29Khatvei Jacob in ancim a huon laitahin Esau a gamvana pan a gilkielsa-in a tung hi. 30Esau in Jacob kungah, “Ka gil nah kiel seng ahi ziehin tua na ancim san halkhat ei nesah in!” a ci hi. (Tua ahi ziehin ama’ min Edom#25:30 “San” cina kici hi.) 31Jacob in, “Na innluoza ei zua masa in,” a ci hi. 32Esau in, “A si ding ka hi ta hi; innluoza banga ka man ding ahei?” a ci hi. 33Jacob in, “Amasa-in#25:33 “Tuni” ka mai-ah hing kiciem in,” a ci hi. Tuaci’n a kungah ama kiciem a, Jacob kungah a innluoza a zua hi.#Heb 12:16 34Tua ciengin Jacob in Esau an le beme pie a, ama in ne-in dawn a, tuale dingin a lampi-ah a pei hi. Hi ci bangin Esau in a innluoza a simmaw bawl hi.
Iliyochaguliwa sasa
PIENCILNA 25: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.