PIENCILNA 35
35
Bethel-ah Jacob Kilekia
1Pasien in Jacob kungah, “Dingin Bethel-ah peito inlen khum munah va teng in. Na sanggampa Esau kung panin na taimang lai-in na kunga ang kilah Pasien adingin khum munah maitam khat bawl in,” a ci hi.#Pien 28:11-17 2Tuaci’n Jacob in a innkuonpite le a zawpi zosiete kungah, “Na lah vua om gamdang pasien-te paimangin no le no kisiensuo unlen na puonsilte uh khel un; 3tua ciengin ka lungkham huna ei dawng, ka peina cintenga ei ompi Pasien adingin khum munah maitam khat ka bawl thei nadingin Bethel-ah peito vai,” a ci hi. 4Tuaci’n amate in a nei uh gamdang pasien-te zosie, le a bila a ba uh bilbate, Jacob tungah a pie uh hi. Jacob in Shechem khuo gei gangpi sing phungah tuate a phuol hi.
5Amate khuolzinin a pei laitahun koima in a nuadel lo nadingin Pasien kung panin a kimvel vua om khuopite tungah zauhuoina khat tung hi. 6Jacob le a zawpi mi zosie Canaan gam sunga om Luz (Bethel) ah a tung vua, 7ama in khum munah maitam khat lamin a min Elbethel,#35:7 “Bethel’ Pasien” a cina ahi hi. phuo hi. Azieh pen a sanggampa kung panin ama a taimang lai-in tua mun ama kungah Pasien mama a kilang hi. 8Rebekah a cingnu Deborah si a, Bethel hlanglam gangpi sing nei khatah kivui hi. Tuaci’n khum mun Allonbakuth,#35:8 “Kaana gangpi sing” a cina ahi hi. kici hi.
9Paddan-aram pan a pei ciengin Jacob kungah Pasien kilangkia a, ama thupha a pie hi. 10Pasien in ama kungah, “Na min Jacob ahi hi; Jacob ang kici nawn sih ding hi, na min Israel hi ta ding hi,” a ci hi. Tuaci’n ama Israel kici hi.#Pien 32:28 11Pasien in ama kungah, “Keima Vanglien Pasien ka hi hi.#35:11 Heb’ zah ngaina ah “El Shaddai” kici hi. Pung inlen tampi pha in; na sung panin minam khat le minam honkhat pieng ding a, na sung panin kumpite pieng ding hi. 12Abraham le Isaac tunga ka pieh tua leitang nang kang pie ding a, nang zaw cienga na suonlehlahte tungah zong tua leitang ka pie ding hi,” a ci hi.#Pien 17:4-8 13Tua ciengin ama tawh a kihona mun panin Pasien a peito hi. 14Jacob in ama tawh a kihona munah suong khuom khat a phut hi; tuale ama in tua tungah dawn thei biehna a sung hi, tua tungah sathau zong a sung hi. 15Tuaci’n Jacob in Pasien tawh a kihona mun pen a min Bethel, a ci hi.#Pien 28:18-19
Benjamin Suona le Rachel’ Sina
16Tua ciengin Bethel panin amate khuol a zin uhi; Ephrath panin a gamla sim lai mun a gei ciengun Rachel a nau suo hun tung a, takei-in a gim mama hi. 17Ama nu takei-in a thuohla mama laitahin naudom nu in ama kungah, “Zau sin. Azieh pen tu-in nang in tapa adang khat na nei ding hi,” a ci hi. 18Tua nu’ hlagau a peikhiet laitahin, (bangzieh ahei cile ama a si hi) tua nu in a min Benoni#35:18 “Ka lungkhamna tapa”a cina ahi hi. ci-in phuo hi; ahi vangin a pa in ama’ min pen Benjamin#35:18 “Zietlam khut’ tapa” ahi sihle “Leitaw lam’ tapa” hisah hi. 19Tuaci’n Rachel si-in Ephrath (Bethlehem) zuotna lampi-ah kivui a, 20Jacob in tua nu’ hankhuh ah khuom khat phut hi; tuni dongin khum muna om pen Rachel’ han muolsuong ahi hi. 21Israel in a khuolzin zom a, Eder tausang galkhat ah a puonbuh a lam hi.
22Khum gamah Jacob a ten laitahin Reuben in a pa’ meinu Bilhah luppi hi; tua thu Israel in a za hi.
Tu-in Jacob’ tapate sawm le ni ahi hi.#Pien 49:4 23Leah’ tapate: Reuben (Jacob’ ta masa pen), Simeon, Levi, Judah, Issachar, le Zebulun ahi hi. 24Rachel’ tapate: Joseph le Benjamin ahi hi. 25Rachel’ nasem nu Bilhah’ tapate: Dan le Naphtali ahi hi. 26Leah’ nasem nu Zilpah’ tapate: Gad le Asher ahi hi. Tam teng pen Paddan-aram gama a nei Jacob’ tapate ahi hi.
Isaac’ Sina
27Abraham le Isaac pemta banga a tenna Mamre, ahi sihle Kiriath-arba (tua pen Hebron)-a om a pa Isaac kungah Jacob a va haw ta hi.#Pien 13:18 28Tu-in Isaac’ khan kum pen kum za le kum sawmgiet ahi hi. 29Tuale Isaac in a hu nukhia pen a sang hi; ama vuoi-in a kum tam a, a mite kungah a kigawm hi; a tapa Esau le Jacob in ama a vui uhi.
Iliyochaguliwa sasa
PIENCILNA 35: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.