PIENCILNA 38
38
Judah le Tamar
1Khum hun lai-in a sanggamte kung panin Judah a peisuh a, Adullam mi Hirah kici pa khat kungah a teng hi. 2Khum munah Judah in Canaan mi khat’ tanu Shua mu hi; tua nu tawh ama kinungin a luppi hi. 3Tua nu gai-in tapa khat nei a, a min Er phuo hi. 4Tua nu gaikia-in tapa khat nei a, ama in a min Onan phuo hi. 5Tua nu in tapa khat nei leuleu a, a min Shelah phuo hi. Ama a pien laitahin Chezib gamah tua nu#38:5 Gk: Heb “Tua pa” a om hi. 6Judah in a ta masa Er adingin zi khat a lahpieh hi; tua nu’ min Tamar ahi hi. 7Ahi vangin Topa muna-ah Judah’ ta masa Er khu a gilo a, Topa in ama that hi. 8Tua ciengin Judah in Onan kungah, “Na sanggampa’ zi luppi inlen, tua nu tungah pasal’ sanggampa tavuon sem in; na sanggampa adingin suonlehlah piengsah in,” a ci hi. 9Ahi vangin Onan in tate pen ama ading ahi lo lam thei ahi ziehin a sanggampa’ zi a luppi sielin a sanggampa’ khang a kizop lo nadingin a bawtui tuolah a buosuh hi. 10Topa muna ah ama’ gamtat a lungkimhuoi lo ziehin ama zong a that hi. 11Tua ciengin Judah in a monu Tamar kungah, “Ka tapa Shelah a gol masangsie na pa’ inn ah meigongin va om in,” a ci hi. Azieh pen a sanggamte bangin ama zong a si ding a zau hi. Tuaci’n a pa’ inna om dingin Tamar a pei hi.
12Hun phabep khat zaw ciengin Judah’ zi, Shua’ tanu a si hi; Judah a dan a hun a ven ciengin#38:12 Heb “Judah a kihenem ciengin” Adullam mi a guolpa Hirah tawh Timnah khuo-a ama’ tuumul heute kungah a peito hi. 13“Tuumul heu dingin Timnah ah na innpipa ang peito hi,” ci-in Tamar kungah a kigen ciengin, 14a meigong puonte suo-in a lu puon khu-in ama kituom a, Timnah khuo peina lampi gei-a om Enaim khuo lutna munah ama na to hi. Azieh pen ama in Shelah a khan kihlit lam a thei a, hizongle ama tawh a kinungsah tuom sih uhi. 15Judah in ama a mu bepin ama in a mai a na tuom ziehin numei pahtat ding khatin a ngaisun hi. 16Lampi gei ama kungah va pei a, a monu ahi lam a thei lo ziehin, “ Hing pei in, kei tawh lumton vai,” a ci hi. Khum nu in, “Kei nei luppi thei nadingin bang nei pie diei?” a ci hi. 17Ama in dawng a, “Ka ganhonte lah panin ganno khat hing puoh vang,” a ci hi. Tuale ama in, “Tuami nei puoh masangin vankhap khat nei pie diei mah?” a ci hi. 18Ama in, “Bang vankhap kang pie diei?” a ci hi. Tua nu in a dawng a, “Na seal le a awna khau le na khut sunga om na ciengkhut,” a ci hi. Tuaci’n ama in tua teng a pie a, ama tawh lumtonin tua nu a gai hi. 19Tua ciengin tua nu dingto-in a peikhie a, a kikhuna puon suodawhin a meigong puonte a silkia hi.
20Numei nu tung panin vankhap lakia dingin Judah in Adullam mi a guolpa a ganno tawh a sawl ciengin ama in tua nu a mu zo ta sih hi. 21Ama in khuo mite kungah, “Enaim lam gei biehinnpi sunga numei pahtat nu hei sunga om ahiei ?” ci-in a dong hi. Amate in, “Tami munah numei pahtat koima om ngai sih,” a ci uhi. 22Tuaci’n Judah kungah ama kilekia a, “Ama ka mu sih hi; tua banah khuo mite in, ‘Tami munah numei pahtat om ngai sih,’ ei ci bo vuh,” a ci hi. 23Judah in a dawng a, “Ka vante ama-a’ bangin kem ta mai heh. Tua hi si leh ei kinuisan ding hi; ken tami ganno ka puoh a, nang in tua nu na mu lo lam na thei hi,” a ci hi.
24Tua zaw hla thum bang ciengin Judah kungah, “Na monu a pahtat ahi bo hi; tham loin a pahtatna zieha gai ahi hi,” ci-in kigen hi. Tuale Judah in, “Kaiphit unlen ama kihaltum heh,” a ci hi. 25Ama a kipusuopi laitahin ama in a innpipa kam vaihlah a, “Kei tam teng a nei pa tawh kigai ka hi hi,” a ci hi. Ama in, “Hepina tawh ciemte in, tami seal le a awna khau le ciengkhut, tam teng koi-a’ ahiei?” a ci hi. 26Tua ciengin Judah in tua vante ama-a’ ahi lam a thei a, “Ka tapa Shelah tawh ka kinunsah lo lang kalsie ama pen kei sanga a thudih zaw ahi hi,” a ci hi. Ama pen tua nu tawh lumton kia nawn lo hi.
27Tua nu a kinisuo hun a tun ciengin a naubu sungah takop a om hi. 28Ama takei-in na a sah laitahin khat in a khut a dawhsah hi; tuale naudom nu in vau sandup khat la-in a khut tungah khi a, “Tami khu ang dawh masa ahi hi,” a ci hi. 29Hizongle ama in a khut a nuakaih zaw lienin a sanggampa a suoh hi; tuale ama in, “ Nang adinga a vang na kibawltawm!” a ci hi. Tua ahi ziehin ama’ min Perez#38:29 “A vang khat” a cina ahi hi. kiphuo hi. 30Tua ciengin a khut tungah vauzam dupsan kikhisa-in a sanggampa a suoh hi; ama’ min Zerah#38:30 “A vang tanna” a cina ahi hi; vau sandup a cinopna hi thei kha ding hi. kiphuo hi.
Iliyochaguliwa sasa
PIENCILNA 38: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.