PIENCILNA 41
41
Joseph in Pharaoh’ Mang Khiehpieh
1Tua zaw kum ni bih a cin ciengin Pharaoh in mang man a, a mangin Nile gun gei-ah a din laitahin, 2Nile gun panin a zol thau sepsop bawngpi sagi pusuoh a, phai lopate a mai uhi. 3Tua ciengin Nile gun sung panin a melsie le a gawngtam bawngpi dang sagi pusuoh a, Nile gun gei-a bawngpi dangte kungah a ding uhi. 4A melsie le a gawngtam bawngpi sagite in a thau a zol sepsop bawngpi sagite a netum uhi. Tuale Pharaoh khanglo hi. 5Tua ciengin ama kimu-in a ni veina mang a mankia hi; a tahsa a hoi buvui sagi kung khatah vui hi. 6Tua ciengin nisuona hui in a semdaang gawp buvui hawm sagi a po hi. 7Buvui hawmte in a tahsa buvui sagite a valtum hi. Pharaoh a khanglo a, tua pen a mang a na hi hi. 8Zingmawngin Pharaoh a lungkham hi; tuaci’n ama in Egypt mitphiel siem zosie le a mipil zosie hlansah hi. Pharaoh in amate kungah a mang gen a, hinanle Pharaoh kungah a mang khie thei koima a om sih hi.#Dan 2:2
9Tua ciengin haitawi makaipa in Pharaoh kungah, “Tuni-in ka khielnate ka phawhkia hi. 10Khatvei lai-in Pharaoh, a nasemte tungah lungthah a, kumpi inncing galkap mangpa’ inn sungah kei le an huon makaipa ei khum hi. 11Ka ni gelin zan khat thu-in mang ka man gel a, ka mangte gel in khietna a tuom tuoh nei hi. 12Kumpi inncing galkap mangpa’ nasem Hebrew tangval khat tawh ka omton vua, ka mang uh ka gen ciengun ka mang om dan tuoh uh dung zui-in ei khiehpieh hi. 13Ama in ka tung vua ei khiehpieh ma bangin ang tung mintah hi; kei ka za-ah ei kikoikia a, an huonpa pen kikhailum hi,” a ci hi.
14Tua ciengin Pharaoh in Joseph hlansah a, ama thong mielpi sung panin mallang tahin kipeipi hi. Ama in a khamul heu-in a puon a khel zaw ciengin Pharaoh mai-ah a pei hi. 15Pharaoh in Joseph kungah, “Mang khat ka nei a, tua ka mang a khie thei koima a om sih hi. Nang in mang kigen khat na zah leh tua mang na khie thei hi, ci-in ei kigen ka za hi,” a ci hi.
16Joseph in Pharaoh a dawng a, “Ka pilna tawh mang khie thei ka hi sih hi. Pharaoh tungah Pasien in a hoi lamin hing dawng na va,” a ci hi. 17Tua ciengin Pharaoh in Joseph kungah, “Ka mangin Nile gun gei-ah ka ding hi; 18Nile gun panin a thau a zol sepsop bawngpi sagi ang pusuoh a, phai lopate a mai uhi. 19Tua ciengin a hepi huoi, a melsie mama le a gawngtam adang bawngpi sagi ang pusuoh kia hi. Egypt gam sung zosie-ah tam bang ganhing melsie ka mu ngai nai sih hi. 20A gawngtam le a melsie bawngpite in amasa bawngpi thau a zol sepsop sagite a netum vua, 21ahi vangin tuate a neh zaw ciengun, koima in a neh lam uh a thei sih hi. Bangzieh ahei cile amate a thau tuom sih vua, amasa lai bangin melsie lai veve uhi. Tua ciengin ka khanglo hi. 22A ni veina#41:22 Gk Syr Vg: Heb ah “A niveina ka kimu hi” ci om lo hi. ka kimukia a, ka mangin buvui hoi sagi kung khat tungah a vui ka mu hi. 23Nisuona lam hui in semdaangin a gawtasah buvui hawm sagi ang po hi; 24tua buvui hawmte in buvui hoi sagite a valmang hi. Mitphiel siemte kungah ka gen a, ahi vangin ka kunga ei gencien thei koima a om sih hi,” a ci hi.
25Tua ciengin Joseph in Pharaoh kungah, “Pharaoh’ mang tegel pen khat ahi bo a, a khietna kibang ahi hi; Pasien in Pharaoh kungah a bawl dingte ang lah zo hi. 26A hoi bawngpi sagite, kum sagi ahi a, a hoi buvui sagite pen kum sagi ma ahi hi. A mang khietna a kibang ahi hi. 27Tuate zaw cienga ang pusuoh a gawngtam le a melsie bawngpi sagite khu kum sagi ahi a, nisuona lam huipi in a semdaang buvui hawm sagite pen kielpi kum sagi ahi hi. 28Pharaoh kunga kang gen bangin Pasien in Pharaoh kungah a sil bawl ding ang lah zo hi. 29Egypt gam sung zosie-ah kum sagi sung an kihau ding hi. 30Tuate zaw ciengin kum sagi kielpi tung ding a, Egypt gam sunga hauna zosie kimangngil ding hi; tua kielpi in gam sung teng a netum ding hi. 31A nuazui kielpi a natsiet seng ziehin gam sung hau hunlaite a kithei kha ta sih ding hi. 32Pharaoh’ mangmat a kithuop pen khu Pasien’ sesa hi, a cinopna hi a, Pasien in bakhat sungin ang tungsah ding hi. 33Tua ahi ziehin tu-in Pharaoh in mi pilvang le misiem khat kitel inlen, Egypt gam sung vaisai dingin koi in. 34Pharaoh in gam sungah makaite se inlen, an a kihauh kum sagi sungin Egypt leitanga pieng ante nga-a-khat la in. 35Ang tung ding tami kum hoi sunga an zosie amate khawmsah inlen, neh dingin khuopite sunga Pharaoh’ uhna nei-a khuopite sungah kholsahin kemcingsah in. 36Tua an pen kielpi zieha gam sung a siet lo nadingin Egypt gam sunga ang tung ding kum sagi kielpi dal nadinga a kikoicing an hi ding hi,” a ci hi.
Joseph’ Zakhanna
37Tami a thugel dan pen Pharaoh le a nasem zosie in hoi a sa uhi. 38Pharaoh in a nasemte kungah, “ Ama sunga Pasien’ hlagau a opna, tam bang midang i mu zo ding uh amah?” a ci hi. 39Tuaci’n Pharaoh in Joseph kungah, “Pasien in nang tungah tam teng zosie pi hing lah zo ahi ziehin, nang banga mi pilvang le mi siem koima dang a om sih hi. 40Ka inn sungah na vaihawm ding a, ka mite zosie in na thupieh bangin a gamta ding uhi; kumpi topha tawh kisai-in ahileh nang sangin kei ka lienzaw beh ding hi,” a ci hi.#Sawl 7:10 41Pharaoh in Joseph kungah, “En in, Egypt gam zosie-ah thunei vaihawmin kang koi zo hi,” a ci hi. 42Pharaoh in a suoikaina khutsip a khut panin sutin Joseph bunsah a, puon hoi tawh zemin a ngawngah kham khainieng khat a awsah hi.#Dan 5:29 43Ama in sakol leeng a nina pen tungah ama’ nei-a pa a tosah hi; tuale a masanga pei mite kiko-in, “Khupdin un!” #41:43 “Abrek” pen Egypt-te’ kammal dan khat hi a, “khupdin ding” ci a khietna nei Hebrew kammal tawh a awsuo kibang hi.a ci uhi. Tua ahi ciengin Egypt gam zosie tungah ama a vaihawmin a pang hi. 44Tua tham loin Pharaoh in Joseph kungah, “Keima Pharaoh ka hi a, Egypt gam sung zosie-ah nangma’ thu loin koima khut lehin vai a hawm thei sih ding hi,” a ci hi.
45Pharaoh in Joseph min Zaphenath-paneah a phuo hi. Ama in On khuo siempu Potiphera’ tanu Asenath tawh a kinungsah hi. Tuaci bangin Joseph in Egypt gam sungah thuneina nga hi.
46Egypt kumpipa Pharaoh’ nasemin a lut lai-in Joseph kum sawm thum pha hi. Pharaoh’ opna panin Joseph pusuohin Egypt gam zosie-ah a zin kawikawi hi. 47An hau kum sagi sungin leitang in an tampi a piengsah hi. 48Egypt gamah kum sagi an a kihau#41:48 Sam Gk: MT “ kum sagi ahi tuate” sungin ama in an zosie khawm a, khuopite-ah a khol hi; tuale ama in khuopi zosie-ah a kima lote sunga a pieng ante a khol hi. 49Tuaci’n Joseph in tuipi-a senel za-in antang tampi khol a, te zawh ding ahi lo ziehin ama in a te ding a khawl vawt hi.
50Kielpi a tun masangin Joseph in On khuo siempu Potiphera’ tanu Asenath tawh tapa ni a nei hi 51Joseph in a tapa masa’ min Manasseh#41:51 “A mangngil dingin bawl”a cina ahi hi. hisah hi. Ama in, “Pasien in ka hamsatna zosie le ka pa’ innkuon zosie ei mangngilsah hi,” a ci hi. 52A nina pen Ephraim#41:52 “cipha-in pun nading” ci a khietna nei Hebrew kammal pana kila ahi hi. a phuo hi. “Ka hamsietna gam sungah Pasien in keima a pung dingin ei siem hi,” a ci hi.
53Egypt gamah kum sagi sung anhau hun a tawp ta hi; 54tuale Joseph’ gensa bangin kum sagi kielpi kipan hi. Gam zosie-ah kielpi a tun vangin Egypt gam sung tengah an a om hi.#Sawl 7:11 55Egypt gam zosie a kiel ciengin Pharaoh kungah an ngenin mite a kiko uhi. Pharaoh in Egypt mi zosie kungah, “Joseph kungah pei un; ama ci bangin gamta un,” a ci hi.#Jhn 2:5 56Gambup ah kielpi a tunkim bepin Joseph in ansalte#41:56 Syr tawh a kitekah Gk le Vg: Heb “a sunga om zosie a unin kihong hi” (ahi sihle “lahah” “tuate” phetin Egypt-te a leisah hi, azieh pen Egypt leitangah kielpi a nasie mama hi. 57Tua tham loin leitung zosie-ah kielpi nasie mama ahi ziehin antang lei dingin leitung mi zosie Joseph kungah a pei uhi.
Iliyochaguliwa sasa
PIENCILNA 41: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.