Baɗitari 5
5
Mjir Nyarmbwar Adam Har Ka Ləghəi Aka Maɗashilər Nuhu
1Ngəni an kakaɗər thləma mjir nyarmbwar Adam. Sakatə Hyel alaktə mda, tsa namtə ni akwa dludzər Hyel. 2Tsa alaktə ɗa mdə sal ka mdə mwala, ka vədza ala ɗa barka. Sakatə tsa alaktə ɗa, antə tsa vəta ala ɗa thləm Mda. 3Sakatə Adam ka məvari aru ka makkumari, antə tsa yaɓəla ɓzər sal na dludzər ni, tsu apa tsa, ka vəta alari thləm Seth. 4Aghəla tə tsa yaɓəla Seth, antə Adam jaktə hara məva aru ncisu, tsuwa tsa ku jaktə wutə maɗankyar damwa shili ka mwanki. 5Antə hangkur shanga məvar Adam an aru əmdla ka makkumari, antə tsa ku mti.
6Sakatə Seth ka məvari aru ka ntəfu, antə tsa yaɓəla ɓzərni Enosh. 7Antə Seth ku hara məva aru ncisu ka murfa aghəla tə tsa yaɓəla Enosh. Tsuwa tsa ku jaktə wutə maɗankyar damwa shili ka mwanki. 8Antə hangkur shanga məvar Seth an aru əmdla ka kumnya suɗa, antə tsa ku mti.
9Sakatə Enosh ka məvari əmdləkumari antə tsa yaɓəla ɓzərni Kenan. 10Aghəla tə Enosh ku yaɓəla Kenan, antə tsa jaktə hara məva aru ncisu ka kumnya ntəfu, tsuwa tsa ku jaktə wutə maɗankyar damwa shili ka mwanki. 11Antə hangkur shanga məvar Enosh an aru əmdla ka ntəfu, antə tsa ku mti.
12Sakatə Kenan ka məvari murfəkumari, antə tsa yaɓəla ɓzərni Mahalalel. 13Aghəla tə Kenan ku yaɓəla Mahalalel, antə tsa jaktə hara məva aru ncisu ka nfwarkumari, tsuwa tsa ku jaktə wutə maɗankyar damwa shili ka mwanki. 14Antə hangkur shanga məvar Kenan an aru əmdla ka kuma, antə tsa ku mti.
15Sakatə Mahalalel ka məvari ngkwakumari ka ntəfu, antə tsa yaɓəla ɓzərni Yared. 16Aghəla tə Mahalalel ku yaɓəla Yared, antə tsa jaktə hara məva aru ncisu ka makkumari, tsuwa tsa ku jaktə wutə maɗankyar damwa shili ka mwanki. 17Antə hangkur shanga məvar Mahalalel an aru ncisu ka əmdləkumari ka ntəfu, antə tsa ku mti.
18Sakatə Yared ka məvari aru ka ngkwakumari ka suɗa, antə tsa yaɓəla ɓzərni Enok. 19Aghəla tə Yared ku yaɓəla Enok, antə tsa jaktə hara məva aru ncisu, tsuwa tsa ku jaktə wutə maɗankyar damwa shili ka mwanki. 20Antə hangkur shanga məvar Yared an aru əmdla ka ngkwakumari ka suɗa, antə tsa ku mti.
21Sakatə Enok ka məvari ngkwakumari ka ntəfu, antə tsa yaɓəla ɓzərni Methlusela. 22Aghəla tə Enok ku yaɓəla Methlusela, antə tsa jaktə hara məva aru makər akwa mwa ka Hyel, tsuwa tsa ku jaktə wutə maɗankyar damwa shili ka mwanki. 23Antə hangkur shanga məvar Enok an aru makər ka ngkwakumari ka ntəfu. 24Enok ku mwa ka Hyel, antə mda aɗi wutə ni kəra wa, kamnyar Hyel ku kətə ni.
25Sakatə Methlusela ka məvari aru ka nciskumari ka murfa, antə tsa yaɓəla ɓzərni Lamek. 26Aghəla tə Methlusela ku yaɓəla Lamek, antə tsa jaktə hara məva aru murfa ka nciskumari ka suɗa, tsuwa tsa ku jaktə wutə maɗankyar damwa shili ka mwanki. 27Antə hangkur shanga məvar Methlusela an aru əmdla ka ngkwakumari ka əmdla, antə tsa ku mti.
28Sakatə Lamek ka məvari aru ka nciskumari ka suɗa, antə tsa yaɓəla ɓzərni, 29ka vətə thləmari Nuhu, kamnyar tsa pəla, “Ndzi ka ɓzər ngəni səntə ala mburu shambar akwa kəthlər ar mburu, ka akwa bwaniyir kəthlər tə mburu ana hara ka tsiya mburu ata di tə MTHLAKU ku shuwumta ni.” 30Aghəla tə Lamek ku yaɓəla Nuhu, antə tsa jaktə hara məva aru ntəfu ka əmdləkumari ka ntəfu, tsuwa tsa ku jaktə wutə maɗankyar damwa shili ka mwanki. 31Antə hangkur shanga məvar Lamek an aru murfa ka murfəkumari ka murfa, antə tsa ku mti.
32Aghəla tə Nuhu ku hara məva aru ntəfu, antə tsa yaɓəla Shem, ka Ham, ka Yafeth.
Iliyochaguliwa sasa
Baɗitari 5: KNB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.