JƆN NSENDƐ 2
2
1Apuma mi atataɛ, ya gbal lanɛ ki konɔ ko chelɛ ha chen ha iwɛi; kɛ yɛ nɔ gbi ha gbo iwɛi, hi bi nɔ thɛlɛni Baa, Jisɔs Krayst nɔ tiŋtiŋdɛ; 2ni wɔn wɔɛ nɔɛ wɔ thenɛki ha iwɛi hiɛ, ni chen gbo ha ha hiɛ kɛ ha iwɛi hɔlɔɛ hɔn gbi.
3Ni ka lanɔki hi bɔ bi lanɛɛ lɛ hi si wɔ, yɛ hi thɔŋgul saba thi wɛ. 4Wɔnɛ wɔ hɔɛ “ya si wɔ” kɛ yɛthiyɛni saba thi wɛ wɔ nɔ mbol, ni tiŋtiŋdɛ chen wɔnay; 5kɛ nɔɛ gbi wɔ thɔŋgulɔ gbo hɔk wɔɛ, rɔŋ nɔɛ kiyay chɔŋmalen ha Hɔbatokɛ ma mpɛɛ. Ka lanɛ ki hi bɔ lanɛɛ lɛ hi wɔnay: 6nɔɛ wɔ hɔɛ wɔ che wɔnayɛ wɔ ha gbɛɛ paopa nay thin bulay tha Jisɔs bɛ gbɛɛ.
Saba Sanaɛ
7Anya ŋchɔmalen, ya che nɔ gbala saba sana, kɛ saba bɛn ŋɔ ŋa bi hiŋg tipɛkɛ; saba bɛn dɛ kɔ hɔkɛ kɔ ha koŋ theɛ. 8Kɛ ya nɔ gbala saba sana, kɔ rɔŋ Wɔnay ni ŋanay, haliwɔ rithiɛ kɔ chaŋ ni cheche rɔŋdɛ kɔ bɛ mithil.
9Nɔɛ wɔ hɔɛ wɔ checheayɛ ni mith pɛnte wɔɛ wɔ rithiay thuŋ. 10Nɔɛ wɔ chɔŋ pɛnte wɔɛ len dɛ wɔ checheay, ni kɔnay len gbi chen bɔ ha ha pɛmplɛ. 11Kɛ nɔɛ wɔ mith pɛnte wɔɛ wɔ rithiay ni wɔ gbɛ rithiay, ni sini ko lɔ wɔ kɔɛ, haliwɔ rithiɛ koŋ gbiŋgith hɔl thi wɔɛ.
12Ya ni gbal konɔko, apuma tata, haliwɔ iwɛi nɔɛ koŋ may ni satokin wɔn. 13Ya gbal konɔko, mbaa, haliwɔ ŋa si wɔ wɔ hiŋg tipɛkɛ. Ya gbal konɔko, ndaŋgbaŋ, haliwɔ ha koŋ buŋ nɔ wɛiyɛ. Ya gbal konɔko, apuma, haliwɔ ŋa si Baaɛ.
14Ya gbal konɔko, mbaa, haliwɔ ŋa si wɔ wɔ hiŋg tipɛkɛ. Ya gbal konɔko, ndaŋgbaŋ, haliwɔ ha adumɔ, ni hɔk Hɔbatokɛ kɔnɔ ŋanay, ni ŋa koŋ buŋ nɔ wɛiɛ.
15Ŋa ma chɔŋ hɔlɔɛ len o yensɛ ŋɔ hɔlɔayɛ. Yɛ nɔ gbi chɔŋ gbo hɔlɔɛ len, ŋchɔmalen ha Baaɛ cheni wɔniay. 16Haliwɔ yendɛ gbi ŋɔ hɔlɔayɛ, ŋgbel-ŋgbel ma jalɛ ni ŋgbel-ŋgbel ma hɔlthɛ ni thɛŋgthihɔl ihɔlɔŋdɛ, hɔ cheni ha Baaɛ kɛ ŋɔ ha hɔlɔɛ. 17Ni hɔlɔɛ ŋɔ chaŋ, ni ŋgbel-gbel ma lan; kɛ wɔnɛ wɔ ŋa la Hɔbatokɛ yemaɛ bi ha che ha chɔŋgba
Nɔ ŋchenkɛ ha Krayst
18Apuma, mɛŋk mɛkin dɛ hɔɛ; ni kendɛ ŋɔ ŋa koŋ theɛ kɛ boŋsua Kraystɛ wɔ hunɛ, kɛ yɛlayoɛ aboŋsua Kraystɛ agbe ŋa koŋ hun; labiyɛ hi siɛ lɛ mɛŋk mɛkindɛ ŋɔɛ. 19Ŋa hokɔ hinay, kɛ ŋa ka cheni ha hin; haliwɔ yɛ ha ka gbo koŋ che ha hin, ha ma kan koŋhi kɔmani; kɛ ha ka koŋ kɔni, lɛ labɔ toŋginiɛ lɛ ŋan gbi ŋa cheni ha hin.
20Kɛ Nɔ Charaŋdɛ koŋ nɔ pɔlɔ, ni ŋan gbi ŋa sila. 21Ya gbal ko nɔ ko, la chendɛ haliwɔ ŋa sini rɔŋdɛ, kɛ haliwɔ ŋa si kɔ, ni ŋa siɛ lɛ be mbol ma cheni rɔŋday.
22Hina wɔɛ nɔ mbola kɛ wɔnɛ wɔ hɛmɛ lɛ Jisɔs wɔɛ Kraystɛ? Ki wɔɛ boŋsua Kraystɛ, nɔɛ wɔ hɛm Baaɛ ni Taaɛ. 23Nɔɛ wɔ hɛm Taaɛ biyɛni Baaɛ. Nɔɛ wɔ si gbo Taaɛ bi Baaɛ bɛ.
24Ha lanɛ la koŋ theɛ hiŋg tipɛkɛ la che mɔay, yɛ la koŋ theɛ hiŋg tipɛkɛ la mɔ gboay, ni mɔ ye che Taay ni Baay. 25Ni lanɛ ki la wɔ koŋ kweyɛ kaŋgbe ŋa hin, ihɔlɔŋ chɔŋgba.
26Ya gbal lanɛ ki konɔko ha ŋanɛ ŋa nɔ dik bolmindɛ; 27kɛ pɔlɔɛ kɔ ŋa sɔthɔɛ hiŋk wɔndɛ kɔnɔay. Ni pɔ chenɔ pɛ toŋgi, haliwɔ kendɛ pɔlɔ wɔɛ kɔ nɔ toŋgi len gbi, ni la rɔŋ, ni kɔ cheni mbol, kendɛ hɔ kɔ koŋ nɔ toŋgiɛ, ŋa che wɔnay.
28Ni yɛlayowɛ, apuma tata, ha che wɔnay, chelɛ yɛ bi ha toŋginiɛ hi bɔ bi kithgbɔl ni hi chen chokulni hiŋg wɔn ka ndap yɛ wɔ hundɛ. 29Yɛ si gboɛ lɛ wɔn wɔ tiŋtiŋday, mɔ bɔ bi lanɛ lɛ nɔɛ gbi wɔ ha gbo jali tiŋtiŋdɛ gbemni wɔnay.
Iliyochaguliwa sasa
JƆN NSENDƐ 2: SNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sherbro New Testament Portions © Bible Society in Sierra Leone, 2020.