TIMOTHI MƆƐKƐ TIŊDƐ 2
2
Kugba nɔ yegbe ha Krayst Jisɔs
1Ni hɔm bɛ, tami, che dumɔ wɔŋɔ Hɔbatokay kɔ Krayst Jisɔsayɛ, 2ni la nkoŋ the hiŋg yaŋdɛ nsei agbe che kaŋ anya tiŋtiŋ ŋa bi ha bɔ kaŋ atilaŋdɛ.
3Poɔni ngbathilay kendɛ kugbanɔ Krayst Jisɔs yegbe. 4Kugbanɔ cheni wɔ che chɔthay yɛ si wɔ ye binthima chɔthɛ ni ja tilaŋdɛ, chelɛ wɔ hini nɔɛ wɔ bɛ wɔ kugbalayɛ gbɔl. 5Pɔ chen pɔlɔ nɔ gbikɛni chaŋ ni koŋ gbikini ka sabathɛ. 6Nɔ bɔ ha mpanth ma chɛkɛ wɔ ha peŋkɛ sɔthɔ ngbemaŋ ma sendɛ. 7Lonbolɛ la ya hɔɛ, haliwɔ Bɛɛ bi ŋa ha si len samɔ nten len o len.
8Lonbolɛ kɛ Jisɔs Krayst, po hiŋg wullay, hokɔ hiŋg ram Devidɛ, sɔŋgɔma ya thɛkɛsiɛ la Womdi Yegbeay 9ha Womdi Yegbeɛ la ya theyɛ nɛki ni yae tuɛ gbekte kendɛ nɔ ha iwɛi. Kɛ hɔk Hɔbatokɛ chendɛ gbekte. 10Labi ya muyu len o len ha satɔkin ŋanɛ ha Hɔbatokɛ kweyɛ, chelɛ hanbɛ ha sɔthɔ lol Krayst Jisɔsay ni gbɛŋ chɔŋgba lan. 11Theliaŋ dɛ kɔ tiŋtiŋ:
“Yɛ hi koŋgbo wu ni Wɔn,
ipɛ bi ihɔlɔŋ ni Wɔn
12yɛ hi muyuɔ gbo,
hi pɛ bi ha che bɛɛlay ni Wɔn,
yɛ hi hɛm Wɔ gbo,
Wɔn bɛ Wɔ hi hɛm,
13yɛ hi biyɛn gbo laanɛ,
Wɔn wɔ le laanɛay haliwɔ,
chen bɔ hɛm niŋkɛn.”
Nɔ haa mpanth kɛlɛŋ
14Hok ŋa lanɔki bolɛ, ni mɛy ha Bɛɛ che ni ŋa kɛŋgiɛni thoŋga ha hɔkɛ, ma chen chi ja yegbe, chanŋgbo ha shimi ŋanɛ ŋama theyɛ. 15Chɔ kathba ni Hɔbatokɛ bi hinigbɔl ha mɔm, kendɛ nɔ ha mpath wɔ cheni ha lapɛ, wɔ yɛthi hɔk tiŋtiŋdɛ yɛŋkɛlɛŋ. 16Kɛŋgiɛni theliaŋ ibiɛ jali Hɔbatokɛ, haliwɔ kɔ gbo lam yɔk anyin iche Hɔbatokɛay, 17ni theliaŋ ŋay kɔ sɔŋgɔma thothoɛ kɔ sɔmɔ jallɛ. Han thiyeŋ ŋa Hymenɔs ni Filetɔs. 18Ŋa koŋ kɛŋgiɛni tiŋtiŋdɛ ni ŋae sɛm kath lɛ po hiŋg wullay koŋ chaŋ. Ŋa sɔkba laanɛ aŋya pum. 19Kɛ ŋkibaŋ ma Hɔbatokɛ ma sɛmɛ kath, ni maye bi fɔsa wɔɛ: “Bɛɛ si a ŋawɔɛ” ni “Ŋa nɔ gbi wɔ velɛ ilel Bɛɛ hok hiŋg iwɛiay.”
20Kil bomdɛ kunɛ chen gboɛ ndɔŋ ni fe dinthɛ ma lɔɛ kɛ ni hathi beth ni thibɛ, ni thipum ha li mani thipum ha ibiɛ limani. 21Yɛ nɔ gbi thɔni gbo charaŋ hiŋg lanɛ la biɛni limani wɔ bi ha ha mpanth ma limani, pɔ wɔ ye dinthi che charaɛ ni pɔɛ wɔ ye ka mpanth ha sɛmthache killɛ, bɛmpani ha mpanth yegbe gbi. 22Labiɛ may jali fonikeyɛ ni nten ma mɔɛ ko jali tiŋtiŋdɛ, laanɛ, chɔŋmalen, ni mbɔs, binthimani ŋanɛ ŋa vel ilel Bɛɛ ka gbɔl charaŋdɛ. 23Ma bi len ha hamani bolmin, thoŋga ibiɛ nten; nsiɛ lɛ la chi ŋhɔ. 24Ni womnɔ Bɛɛ chen ha cheɛ nɔ ha ŋhɔ kɛ che ikɛlɛŋay ko nɔ-o-nɔ, nɔ toŋgiɛ ayin yegbe, nɔmuyuɔ, 25wɔ bɛ anya wɔ cheŋkɛ naythin tiŋtiŋ day ka limani. Hɔbatokɛ yɔn ha ni ŋa thekɛni ni ŋa ye muniveleŋ, ŋa ye hun si tiŋtiŋdɛ, 26ni ha yɔn hɛthni chokoth min wɛi yɛ, yɛ koŋ ŋa gbo kɔnth ŋa han ha la wɔn yemaɛ.
Iliyochaguliwa sasa
TIMOTHI MƆƐKƐ TIŊDƐ 2: SNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sherbro New Testament Portions © Bible Society in Sierra Leone, 2020.