FAYLIMƆN 1
1
1Pɔl, nɔ kekay ŋa Krayst Jisɔs, ni pɛnte hiɛ Timothi.
Ko Faylimɔn nɔ hi chɔŋmalen wɔ hi haman mpanthɛ 2ni Afia wante hiɛ ni Akhippɔs thɔm hi kugbanɔɛ, ni kump Hɔbatokɛ kilɛ mɔ ko:
3Wɔŋɔ Hɔbatokɛ komɔko ni mbɔs hiŋg Hɔbatokɛ Baa hi ni Bɛɛ Jisɔs Krayst.
Nchɔŋmalen ma Faylimɔn dɛ ni laanɛ
4Ya chɔŋɔ Hɔbatokɛm dɛ sɛkɛ mɛŋk gbi yɛ ya mɔ tɛniɛni sɛlimdayɛ, 5Haliwɔ ya theɛ ha chɔŋmalen ma mɔɛ ni laanɛ kɔ mbi ha Bɛɛ Jisɔs ni ko anya charaŋ 6ni ya sɛliɛ lɛ laanɛ kɔ ŋa poɔniɛ kɔ bɔ yɔk jalisi che ni ikɛlɛŋ hiɛ gbi Kraystayɛ. 7Haliwɔ ya koŋ sɔthɔ mɛmini bom ni thɛthɛ hiŋg chɔŋmalen ma mɔɛ, pɛnte mi, haliwɔ gbɔl thi anya che charaŋ tha koŋ che thɛ-thɛni ka hɔmay.
Yimani ŋa Onisimɔs
8Ŋɔ la ŋa cheɛ, yɛ la bɛ ya gbɔl kathli Kraystay ŋa gbɔnda mɔ ŋa mɔn ha lanɛ la mɔ ŋa haɛ, 9kɛ ŋa satokin chɔŋmalen ya yema ha thɛlɛmɔni, yaŋ Pɔl, nɔbɛn ni yɛlayowɛ nɔ kekay ha Krayst Jisɔs. 10Ya mɔ thɛlɛni ha komɔmiyɛ Onisimɔs, wɔ ya koŋ cheɛ baa ha wɔn kekamindayɛ. 11Ka che yay-yay komɔko kɛ yɛlayowɛ wɔ ni yegbe komɔko ni komiko.
12Ya wɔ pɛ muni wom komɔko, ni gbɔl miɛ fuli kɔ ya womɛ. 13Ya na che mɛmiɛni ha wɔn che komka, chelɛ wɔ mi haa mpanth ha satokin hɔm mɛŋk mi kekayɛ ha womdi yegbeɛ; 14kɛ ya la ke li kɛlɛŋ ha ha len ni hɔm nsilani chelɛ ikɛlɛŋ mɔɛ ŋɔ chen ha che ka gbɔka kɛ la ha che hiŋk gbɔl mɔay.
15Kɛŋga lanɔki labi ka hok hiŋk hɔm ha gbath kith, chelɛ wɔ pɛ muni komɔko ŋa chɔŋgba, 16chen pɛ che kendɛ wonɔ kɛ chaŋ wonɔ, mɔ wɔ ke kendɛ pɛnte mɔ chɔŋmalen, kaka komiko kɛ ni komɔko pɛ, jallay ni Bɛɛay.
17Ni yɛ ŋkweyɛ mi gbo kendɛ thɔm mɔ mpanthi mbul, yoŋ wɔ kendɛ hɔ mɔmi yoŋɛ: 18yɛ koŋmɔ gbo ha iwɛi gbi, o ni bi ha paka mɔ yen gbi, bɛ mi la bol. 19Yaŋ, Pɔl, ya gbala ki ka piyamdɛ, yabi ha paka la, chen ŋa theli, kɛ mbi mi iro hɔm ayɛn. 20Rɔŋ, pɛnte, ya yema sɔthɔ ja yegbe hiŋk hɔm Bɛɛay. Ha thɛ-thɛ gbɔl miɛ Kraystay.
21Ya bi kithgbɔl hini mɔ lɛɛay, ya gbala ko mɔ ko, haliwɔ ya siɛ mɔ bi ha ha len chaŋ lanɛ la ya hɔɛ. 22Meŋk mbulɛ, mbɛmpa mi ayena yiani, haliwɔ ya bi kithgbɔl hiŋk sɛli nɔɛ kɔ che yomɔ haliwɔ ya bi ŋa muni konɔko.
Lɛyŋ mɛkindɛ
23Ɛpafras, thɔm mi kekay Krayst Jisɔsay wɔŋɔ mɔ lɛyŋ, 24Ni kendɛ Mak, Aristakɔs, Demas, ni Luk, anaymi mpanth mbul.
25Ha wɔŋɔ Bɛɛ hiɛ Jisɔs Krayst che ni min mɔ ihɔlɔŋdɛ.
Iliyochaguliwa sasa
FAYLIMƆN 1: SNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sherbro New Testament Portions © Bible Society in Sierra Leone, 2020.