Tekang Kbuten 15
15
Yóm fasad Dwata ke Abram
1Kogolen bè yó, tódô hegfan bè Abram Dwata, ne gungol Abram yóm udél Dwata ebéléen, monen, “Ó Abram, hol béi abay hlikò. Tendo kenlungu uu anì laen dù tau hemsidek kóm ne angat wen tey ofol blayu kóm.”
2Okóm yó balà Abram du, monen, “Ó Dwata yóm hol dandónen geta, tedu se tô muhu du yóm ofol blayem dou yó ke laen dù ngau? Tek són angat gemfun du yó kem kendengenu, són Ilisér#15:2 Yóm Ilisér monen ni, tau hol snalig Abram bè kdê yó kem tau tóbóng lówóhen. yóm tau lemwót bè Damaskus. 3Laen kô dù ngà blayem dou. Yó gónóm mon, angat sotu bè yó kem tau tóbóng lówóhu fen gemfun du yó kem dou kendengen.”
4Bud gungol Abram yóm udél Dwata ebéléen, monen, “Yóm tau tóbóng lówóhem yó, là kô angat gfunen du kun yó kem kendengenem. Hol kóm ngà logi yóm angat mfun du.” 5Omin Dwata mit du hewà, ne monen mò du, “Temngeli ebè longit dé bè yó kem blotik, tilów nsóhem lu. Yóm alì kwen le yó, hol lómón yó se angat kwen yó kem semfu gu béléem.” 6Tódô hentahu Abram yóm mon Dwata mò du yó. Ne lemwót bè yóm kehtahuhen du yóm udél Dwata, yó gónón tedeng kton Dwata du. 7Ne yó bud mon Dwata mò du, “Ou se yóm Dwata hol gónó mogot. Ou se yóm deng semgalak kóm gu bè Ur, yóm benwu snakuf Babilun, nitu uu ebè nim benwu ni mò hol kóm nfun.”
8Okóm yó snólók Abram bè Dwata, monen, “Ó Dwata yóm hol dandónen geta, tedu kmò ketngónu du ke dou se funen nim tonok ni?”
9Yó balà Dwata du, monen, “Miti ebéléu dini sotu safì libun ne sotu kambing ne sotu ubiha logi, yóm deng tlu halay le. Hmungem du sotu obun ne sotu kfati.” 10Tahu se, gotu nit Abram ebè Dwata yó kem ógóf hnihen yó koni, ne omin Abram hmatay kul, sket hensóól sendolihen lu, ominen bud semdolol hmasà kul, lewu ktolen du. Okóm yó kem onuk koyu, là dog sendolihen kul. 11Lemwót yó kem onuk gel mken matay, deng le mom mdef bè lówó yó kem ógóf deng hlasà Abram, okóm gotu hlikò Abram lu. 12Timbow nolunen sdef kdaw, gleket bè Abram yóm tey kengahen tungô. Tódô gnómen yóm tey sidek klikoen lemwót bè yóm tey kget kkifuhen.
13Ne yó mon Dwata mò du, “Yó kem sfuhem, angat le milo ebè tólóng benwu. Botong fat latu halay kegen le ghesek ditu, ne tey sidek kehlayam le kul. 14Okóm angat tnafaku yóm benwu hmesek kul yó. Ne bè yóm kdaw angat ktebel le yóm benwu yó, angat gotu nwit le yó kem tey kendengen gu ditu. 15Okóm kóm, angat gsengel ktuhahem ne menek kegnómem du bè yóm katayem ne hyu kebeng le kóm. 16Okóm yó kem sfuhem yó, yó he kulék le edini bè yóm benwu ni ke deng fat bud lugod le bè yó, abay se là tagad hdóhu kul he yó kem tau Amurayt menwu bè yóm benwu ni. Yó he kehdóhu kul ke sok deng gulé yóm sidek nmò le, ne là gbeku du ke là tnafaku kul.”
17Timbow deng lemneb kdaw ne deng kifu, tódô ton Abram yóm kkuleng ofi tendo kmebel ne wen solok mung du mlan gu lem blóng yó kem ógóf sendolol hlasaen bè yó. 18Bè yóm igoen mton du yóm yó koni, tódô gungol Abram yóm fasad Dwata du, monen, “Yó fasadu kóm, angat blayu bè yó kem bólem yóm klamang yóm tonok ni, lenwóten ditu bè kilil Idyip efet kól ditu bè Él Yufratis, 19gomong lemen yóm kul tonok yóm kdéen tau nô tahen, tonok yó kem tau Kinayt ne yó kem tau Kinisayt ne yó kem tau Kadmunayt, 20ne yó kem tau Hitayt ne yó kem tau Pirisayt ne yó kem tau Rifaim, 21ne yó kem tau Amurayt ne yó kem tau Kanan ne yó kem tau Girgasayt ne yó kem tau Jibusayt.”
Iliyochaguliwa sasa
Tekang Kbuten 15: tbl
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2007, Wycliffe Bible Translators, Inc. All rights reserved.