Tekang Kbuten 17
17
Ilô yóm kesfasad le Dwata ne Abram
1Timbow deng syóm folò syóm ne halay Abram, bud hegfan béléen Dwata ne monen mò du, “Ou se yóm Dwata laen dù là gbeken du. Hol tendo nimónem ou ne hol nmoem yóm tedeng. 2Ni, wen senfasad te yóm lewu te. Yó fasadu kóm, hol hwenu yó kem bólem.” 3Tódô hegdufok ebè tonok Abram. 4Yó bud mon Dwata mò du, “Yó hol fasadu kóm, uu se angat gónó le menmà yó kem dê but tau talak tonok. 5Là bud Abram du ne boluyem. Yó tles boluyu kóm Abraham abay se uu gónó le menmà yó kem tey dê but tau talak tonok. 6Angat tey kehbólu kóm ne wen bè yó kem bólem yó baling tau hol geta. Ne tey kbólem efet tey dê kay but tau semfu gu béléem.
7Nim fasadu kóm ni ne yó kem angat sfuhem,” mon Dwata, “là kóen bud mulék elem baku, hol fasad laen kô dù tul sónen. Yó fasadu kóm, ou se hol kóm Dwata ne bud ou se hol kul Dwata yó kem angat sfuhem. 8Nim tonok hanà tolo gónóm milo ni, blayu kóm ne bè yó kem sfuhem. Nim klamangen benwu Kanan ni, yó kem sfuhem funen ne laen kô dù sónen yóm kfun le du. Ne bud ou se hol kul Dwata.”
9Bud mon Dwata mò ke Abraham, “Dalang se kóm Abraham, hol loloem se kóm yóm senfasad te ni, kkólen bè yó kem angat bólem elem hulin kdaw. 10Yó mò kóm hol fasad dou, kdéen logi bélê ye gotu htulì. 11,12Lenwóten ni, gotu tnulì ye yó kem ngà logi bélê ye deng wolu buteng le sut. Homong ye yó kem kul ngà logi yó kem hesek ye sut lem gónô ye, ne kem ngà logi yó kem hesek benli ye lemwót bè tólóng benwu. Yóm nmò ye ni mò ilô yóm deng kesfasad te. 13Tódô kdéen ngà logi bélê ye gotu tnulì ye lu. Ni se ilô bè lówó ye mò gónón gfan yóm klaen dù sónen yóm deng kesfasad te. 14Ke wen logi là dengen tnulì, là bud dou tau du ne yóm tau yó abay se là loloen du yóm deng senfasad te.”
15Yó bud mon Dwata mò ke Abraham, “Lenwóten ni, béem bud boluy ke yehenem Saray. Yó tles boluyen Sara.#17:15 Yó lan yóm boluy Sara, ngà boi.Angat tey któbóngu du ne mlan béléen yóm ngà logi blayu kóm. Angat tey któbóngu du ne du yê yó kem tey dê kay but tau talak tonok. Ne wen se bè yó kem bólen baling tau hol geta. 16Angat tey któbóngu du ne mlan béléen yóm ngà logi blayu kóm. Angat tey któbóngu du ne du yê yó kem tey dê kay but tau talak tonok. Ne wen se bè yó kem bólen baling tau hol geta.”
17Tódô bud hegdufok ebè tonok Abraham. Okóm mom knulihen, yó hendemen, “Là kóen bud mngà ne yóm tau deng lematu halayen. Sélétem mom tô Sara ne igoen deng syóm folò halayen.” 18Ne yó bud monen mò ke Dwata, “Yake bè Ismaél dé gónóm hlan du yóm fasadem dou.”
19Okóm yó balà Dwata du monen, “Là. Angat wen hol ngà ye logi Sara ne yó boluyem du Isak. Béléen gónóhu hlan du yóm deng senfasad te laen dù tul sónen ni, kkólen bè yó kem angat semfu gu béléen. Ni se yóm hol fasad laen kô dù tul sónen. 20Deng gungolu yóm hnihem gbak ebè Ismaél. Yó gónóm mon, nuyagu ne bud hwenu se kun ngà ne yó kem angat semfu gu béléen. Angat du mà yóm sfolò lewu kem tau mogot benwu ne yó kem semfu gu béléen bud nmou sotu but tau alì mbegel. 21Okóm bè yóm ngaem Isak, yóm ngà angat sut gu bè Sara halay hulin, béléen gónóhu hlan du yóm fasadu.”
22Timbow deng kudél Dwata ebè Abraham, ominen tmagak du. 23Bè yóm kdaw yó, tódô henmung nimón Abraham Dwata, tnulien Ismaél yóm ngaen ne kdê yó kem logi nô béléen. 24Deng syóm folò syóm ne halay Abraham bè yóm kehtulien 25ne fen hanà sfolò tlu kun halay Ismaél. 26Slomong le tnulì lewu le bè yóm kdaw yó, 27gomong yóm kdê hesek Abraham logi, yó kem sut lem gónóen ne yó kem deng benlihen.
Iliyochaguliwa sasa
Tekang Kbuten 17: tbl
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2007, Wycliffe Bible Translators, Inc. All rights reserved.