DUKU 19
19
Chisɔsi‑a Sakayɔsi tan
1Mbɛ Chisɔsi don‑da Chɛiko duu ɔ, ɛ ben‑da, ɛ ta‑a Chuusaɛn duu ɔ. 2Yatina, pawa kain mɔɛ n ya ɔ sɔɛ ni wan nɔ Chɛiko, min tɔ ni Sakayɔsi. Nyan tɔ wa ni a a. 3A toen ni a ni mɔɛ chɛ gbu yen, an ni min chee Chisɔsi. Chɛɛ a ni wuu, a nii che Chisɔsi yen‑da, koe min na mu, fanka da a ni koo. 4Chɛ fɛ, a ta‑a wan bui a fanka chɛ ya ɔ, mbɛ a sɛ‑a kɔnɛ ɔ, ɛ to kaina a ni Chisɔsi yen ben‑da. An ni kɔn chɛ chee, an dɔ, sikamɔ kɔnɛ. 5Chisɔsi che‑a kɛn an kaina chɛ, a‑a a ya a sɛ wan kɔn chɛ ɔ, mbɛ a‑a Sakayɔsi yen. Mbɛ a ɔ, “Sakayɔsi, a a gbandia, i ni puin, a mu min na, n mbe bi i wan 'na sondaya a.”
6Sakayɔsi‑a a a gbandia wan, mbɛ a puin‑da kɔn chɛ ɔ. A ta‑a wan Chisɔsi a a 'a chenɛ a, a bu ɔ diaen ba ɛ. 7Mɔɛ miin gbɛɛ‑a koe chɛ ɔ yen ka, an bun‑da gbonyɛ‑a, an dɔ, “A yen bɛ, ɛ ta‑a kamin chɛ 'a sondaya a, min mbe ee sɔ ɔ Yataa 'a chia ma.”
8Chɛɛ Sakayɔsi sɔ‑a wan Mansa Chisɔsi ya kɔɔ, mbɛ a ɔ, “Fa, n yen ko, n boo fenɛ gbɛɛ, n mbe a du‑a wan si tena fea a, mbɛ n‑na a kaka dɔndɔɛ be yɔn tɔɛ n ma. A sin, ni n‑na mɔ ɔ mɔ kafa fen kɔ fen na, n mbe a a yɛ‑a wan a ma, si tena naanin dɔ.”
9Mbɛ Chisɔsi‑a a fɔ a ye, a ɔ, “A ka bi ma, i 'a chenɛ‑a bauncha ma sɔn. A mu min na, i dan‑da gbɛ Yataa a, yɔ Ebeami danden ni a a buɛ min dɔ. 10N fan, Mɔ Gbu 'a Denɛ, n naen mu dunya chɛ ɔ mɔɛ n fan yan koe a, miin toen mu a ɔ Yataa ma, n ni an kun ka.”
Chisɔsi‑a tai tɛ, a si bɔi den tanɛ n ma
(Matiu 25:14-30)
11Mɔɛ n‑na an too ma sɔ wan Chisɔsi da a bai chɛ n ma. A to‑a wan koɔ‑a an tena, mbɛ a‑a tai tɛ an ye. Koe min na mu, Chuusaɛn duu ɔ nii ma yansan to. A sin, a ni wan mɔɛ chɛ n yii ma, mbɛ Yataa ni ka gbɛ na‑a na a 'a mansaya ɔ yian‑da. 12Chɛ‑a a ma wan, a‑a a fɔ, a ɔ, “Mansa den dɔndɔ bɔ‑a wan a 'a chɛnyɛ ɔ, mbɛ a ta‑a gboo mansa chɛnyɛ dɔ mende ɔ pɔɔ. A toen ni kun ti wa min ni nɔ, a ni a si mansa a, mbɛ a yɛ‑a a waa a. 13A e na to ta‑a, a‑a a 'a bɔi den tanɛ n chee wan, mbɛ a‑a sanu gbɛnsɛn#19:13 A tima chɛ a, sanu gbɛnsɛn chɛ nɛnɛ, a dɔndɔɛ ni debea pawa ya wan tee chɛmɛ dɔndɔ ko a. tanɛ du an ma dɔndɔ dɔndɔɛ a, a ɔ, ‘Wo a ɔ yen, wo e fen nyɔn na sɛ‑a kɔpɔɛ chɛ kun ma, n‑na miin be ka wo ma, n mbe na ka tachɛ chɛ ɔ.’ 14Chɛɛ a 'a chɛnyɛ ɔ mɔɛ n nii ma to ni a a. Chɛ an‑na a fɔ, kɛn a‑a chia bia ta koe a, an‑na mɔɛ n sɔ wan a san‑da chɛnyɛ chɛ ɔ. An dɔ, an ni a fɔ kun ti wa chɛ ye, mbɛ an ma to ni mansa den chɛ a, a ni ma an 'na mansa a.
15“Chɛ gbɛɛ ma‑a wɛɛ, an‑na kamin chɛ ma wan mansa a, mbɛ a yɛ‑a a waa a. A ya kɔɔɛ a, a‑a a ma wan, an‑na a 'a bɔi den tanɛ chɛ n chee a chen kɔɔ. A toen ni a ni a ɔ sɔn, ni bɔi den chɛ n‑na fen nyɔn ma sɔn dɔndɔ dɔndɔɛ a. 16Bɔi denɛ saa na‑a wan, mbɛ a ɔ, ‘Fa, i 'a sanu gbɛnsɛn dɔndɔɛ chɛ, i‑a min be n ma, n‑na sanu gbɛnsɛn tan fan na sɛ a kun ma.’ 17Mbɛ mansa chɛ ɔ, ‘En wai, en wai, wai chɛ mɔ chɛndɛ mu i a. I‑a danaya min bɔ ka fen denɛ kun ma, n mbe i ma‑a wan ya ɔ sɔɛ a, duu tan kun ma.’ 18Mbɛ bɔi denɛ fean bɔɛ chɛ wɛɛ na‑a, a ɔ, ‘Fa, i 'a sanu gbɛnsɛn dɔndɔɛ chɛ, i‑a min be n ma, n‑na sanu gbɛnsɛn duu an na sɛ a kun ma.’ 19Mbɛ a‑a a fɔ chɛ wɛɛ ye, a ɔ, ‘N mbe i ma‑a wan ya ɔ sɔɛ a, duu kun duu kun ma.’
20“Mbɛ bɔi denɛ dɔ mende na‑a, a ɔ, ‘Fa, i 'a sanu gbɛnsɛn dɔndɔɛ chɛ yen ko, i na‑a min be n ma. N‑na a a chii wan pɔchitanɛ ɔ, mbɛ n‑na a sa tena ɔ bɛn. 21N chian‑da wan i ma, a mu min na, i faa a kɔɔen ba mu. E mɔɛ n kuu kɔ gba an ma i ta a, a yɛ to, i ta ma chin fenɛ min na, e an ya.’ 22Mansa chɛ ɔ, ‘I wan, wai chɛ mɔ yama mu i a. I wandi gbu da a kuiɛ chɛ, n mbe an ya‑a, mbɛ n‑na chiti tɛ i wakoe ma. I‑a a fɔ, i ɔ, i na‑a a ɔ sɔn fan, mbɛ n faa a kɔɔen ba mu, mbɛ n mbe mɔɛ n kuu kɔ gba an ma n ta a, mbɛ n mbe ee chin fenɛ min chin, n mbe an ya. 23Ni i na‑a chɛ ɔ sɔn fan a si n ma, fen‑na a ma, i ma n 'na kɔpɔɛ sa ni banchi ma? N ni n na‑a yɛ tima min na, n ni chini sima tan‑da wan a kun ma.’
24“Mbɛ a‑a a fɔ mɔɛ chɛ n ye, miin ni ka a 'a tindanɛ, a ɔ, ‘Wo sanu gbɛnsɛn dɔndɔɛ chɛ wɛɛ bia a boo ɔ, mbɛ wo‑a a be bɔi den chɛ ma, sanu gbɛnsɛn tan chɛ ɛ ka min boo ɔ.’ 25Chɛɛ an dɔ, ‘Fa, sanu gbɛnsɛn tanɛ ɛ gbɛ a boo ɔ.’ 26Mbɛ mansa chɛ ɔ, ‘N ni a ma din wo tena, mbɛ mɔɛ min mbe a 'a wai ma ti bia chɛndɛ chɛ, ɛ wai ma munda sɔn fan. Chɛɛ mɔɛ min mbe ee a 'a wai ɛnden chɛ ma ti bia, ɛ fo‑a wan an wai ɛnden chɛ wɛɛ a. 27Mbɛ a si n chɛɛ ma nyɔɛ chɛ n sin ma, miin nii ma to ni, n ni ma an 'na mansa a, wo na an na nɛ, mbɛ wo‑a an fa n ya kɔɔɛ ma.’ ”
Chisɔsi‑a a ma bɛn don koe a Chuusaɛn duu ɔ
(Matiu 21:1-11; Maki 11:1-11; Chɔn 12:12-19)
28Chisɔsi ban‑da kɛn tai chɛ tɛ‑a mɔɛ chɛ n tena, a sɔ‑a wan a fɛ den chɛ n ya ɔ, a sɛ Chuusaɛn duu ɔ. 29Mbɛ an che‑a Bɛfachi konko baima, a basan Bɛtani a. Konko chɛ n ni kɔnkɔɛ chɛ an kaa a, min tɔ ni Wodifi kɔnkɔɛ. Nɔ ni, mbɛ a‑a a fɛ den fea n na ta a ya ɔ. 30A ɔ, “Wo ta konko chɛ ɔ wo ya ɔ. Ni wo che‑a nɔ, wo e sofɛ tɔngbɔɛ tan‑da wan, mɔ ɔ mɔ ma si nin bɛ min kɔ, a chiienɛ ɛ. Wo a fuin, mbɛ wo na‑a a a nɛ n tena. 31Ni mɔ ɔ mɔ‑a wo ɔ tisa, fen mu wo e a fuin‑da, wo a fɔ a mɔɛ chɛ ye, wo ɔ, mansa an mbe a ma gbɔsɔɛ bɔ tena a a.”
32Mbɛ an‑na chia bia, mbɛ an ta‑a, an‑na a tan, yɔ Chisɔsi‑a a fɔ buɛ min dɔ an ye. 33An to‑a sofɛ tɔngbɔɛ chɛ fuin tena wan, mbɛ a ti n‑na an dɔ tisa, an dɔ, “Fen mu, wo e sofɛ chɛ fuin tena?”
34An bɛɛ, an dɔ, “Mmɔ 'a mansa an mbe a ma gbɔsɔɛ bɔ tena a a.” 35Mbɛ an na‑a sofɛ tɔngbɔɛ chɛ a a tena. Mbɛ an‑na an 'na doma kai n bɔ wan, mbɛ an‑na an dɔ sa sa sofɛ tɔngbɔɛ chɛ kun ma, Chisɔsi si koe a a ma. Chɛ maenɛ gbakɔ, an basan‑da wan a ma a sɛ koe a sofɛ chɛ gbu kɔ. 36A ni kɛn sofɛ chɛ kɔ ɛ ta‑a, mɔɛ n‑na an 'na doma kai n dɔ fuin fan chia a.
37Ɛ gbɛ gbɛn‑da Chuusaɛn baima, chia kunɛ a yiienɛ ni kaina min ɛnden na, Wodifi kɔnkɔɛ kaa a, a fɛ den fanka fanka chɛ nu, an‑na a kuu sɔ wan Yataa tando‑a, an kuiɛ ma sɛenɛ a. An bu ɔ ni di kaka kamaya koe chɛ n gbɛɛ ko a, an‑na miin dɔ yen. 38An dɔ, “Mansa Yataa ni mansa chɛ dua, min na‑a a tɔɛ ɔ. Mɔɛ n ni ma kuiɛ dɔndɔɛ ɔ Yataa a, a sin tando ni ma Yataa ma.”
39Mbɛ Chu mɔɛ chɛ dɔ nu fanka chɛ ɔ, miin ni Fayisii n na, an dɔ, “Ticha, a fɔ i fɛ denɛ n ye, an ni sɛmbɛ bai bonda chɛ sima fɔ‑a.”
40Mbɛ Chisɔsi ɔ, “N ni a ma din wo tena, mbɛ ni an‑na an ma maun bɛɛ, sen chɛ n bɛɛ, an mbe a kuu sɔ‑a wan yee tɛ‑a.”
Chisɔsi‑a ya yii ma di chɛ Chuusaɛn duu ko a
41Chisɔsi gbɛn‑da kɛn gbɛ gbɛdɛn Chuusaɛn duu baima, mbɛ a‑a nɔ yen, mbɛ a puyɛ‑a di a a ko a. 42Mbɛ a ɔ, “A ni nyan‑da wan wo ko a, ni wo wan Chuusaɛn mɔɛ nu, wo na‑a a ɔ sɔn fan bi, wo e min ma, wo ni ma kuiɛ dɔndɔɛ ɔ Yataa a. Chɛɛ sanche chɛ ɔ, a ɔ nunden fan mu wo ma. 43Chɛ an‑na a fɔ, tima ɛ che‑a wan, wo chɛɛ ma nyɔɛ n ni wo a tindan. An mbe gbuu tɛ‑a wan wo ma, mbɛ an‑na wo a bɛn piɔ. Wo dɔndɔ wɛɛ kun mbe ee che‑a bɔ‑a a ɔ. 44An mbe wo 'a duu chɛ te‑a wan gbɔkɔɔ, mbɛ an‑na wo wandi sa a kun ma. Wo 'a chen kan kɔ kan mbe ee to‑a sɔ ɔ. Wo 'a chenɛ n sɔ sen kan kɔ kan mbe ee to‑a sa ɔ a nyɔn kundu a. Chɛ n mbe ma‑a koe min na, wo nii ma a ɔ sɔn ni, mbɛ tima an nii nɛ, tima min na Yataa na‑a na wo baun koe a.”
Chisɔsi ta‑a Yataa 'a kata ɔ
(Matiu 21:12-17; Maki 11:15-19; Chɔn 2:13-22)
45Mbɛ Chisɔsi don‑da Yataa 'a kata ɔ, nɔ Chuusaɛn duu ɔ. Mbɛ a‑a mɔɛ n tan nɔ fee fen ma tachɛ‑a, mbɛ a bun‑da an gbain‑da. 46A ɔ, “A nyɛnden fan mu Yataa 'a gboo ɔ, mbɛ Yataa‑a a fɔ wan, a ɔ, a 'a chenɛ ɛ samun chɛ koe an na. Chɛɛ wo‑a a 'a chen chɛ mun gbɛ kanka n nun tena an na.”
47Tee ɔ tee a gbɛ, Chisɔsi ni kanɛ chɛ wan Yataa 'a kata chɛ ɔ. Mɔɛ miin ni Chu n tɛ ɔ Yataa a, an 'na mansa nu, an toen ni an ni Chisɔsi fa. An bɛ Chu n 'na sawa kan mɔɛ n na, a basan ya ɔ sɔɛ gbakoo n na, an yiima ni dɔndɔ. 48Chɛɛ an nii ma chia kan kɔ kan sɔn ni a ma koe a, a mu min na, mɔɛ n gbɛɛ na‑a an too be wan Chisɔsi ma a tima chɛ a. An nii ma to ni a da a bai dɔndɔ wɛɛ ni fo an too a.
Iliyochaguliwa sasa
DUKU 19: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.