MATIU 19
19
Chisɔsi‑a mɔɛ n kan, a si fuu ma
(Maki 10:1-12)
1Chisɔsi ban‑da kɛn koɔ‑a mɔɛ chɛ n tena, a bɔ‑a Kadidi chɛnyɛ ɔ, mbɛ a yɛ‑a Chudia chɛnyɛ ɔ. A na‑a Chɔdan yii an tɛ, mbɛ a ta‑a Chudia. 2Mɔ sɛsɛ bea‑a wan a fɛ nɔ, a sin‑na mɔɛ chɛ n gbɛɛ baun fan, miin gbandien ni an tɛ ɔ.
3Chu mɔɛ chɛ dɔ nu, miin ni Fayisii n na, an na‑a wan a tena. An toen ni an ni a bia a chen kɔ. Mbɛ an dɔ, “Nn toen mu nn ni a ɔ sɔn, ni mmɔ 'a sawa dɔnden fan mu musu si kai ni a boo ka a 'a musu a, yɔ a toen mu a a buɛ min dɔ.”
4Mbɛ Chisɔsi ɔ, “Ɛ wan n yii ma, mbɛ wo‑a a kan fan Yataa 'a gboo ɔ, mbɛ dunya a dan tima a, Yataa‑a mɔ gbu nyan fea an na, kai an fea musu a. 5Chɛ an fɛ mu, Yataa‑a a fɔ, a ɔ, ‘Ni mɔ kaima‑a musu fuu, ɛ a de to wan, a basan a fa a, mbɛ an chɛ‑a an nyɔn dɔ, an fea a 'a musu a. A sin, an fea chɛ, an mbe ma‑a wan mɔ dɔndɔɛ a.’ 6Chɛ‑a a ɔ yian fan, mbɛ mɔ fea ma to an na, chɛɛ mɔ dɔndɔ gbe mu gbɛ an na. Chɛ an fɛ mu, fuu ɔ, ni Yataa‑a mɔ fea chɛ an nyɔn dɔ, mɔ ɔ mɔ kan kɔ kan ma an tɛ du.”
7Mbɛ Fayisii chɛ n dɔ te to, “Chɛɛ Mosisi‑a sawa min sa, a dɔnden fan mu, nn ni nn 'na musu n boo ka. Koe min na mu, sawa chɛ ɔ te, mɔɛ e i 'a musu boo ka wan, ni i‑a siiya gboo be a ma, min mbe a ɔ yian, mbɛ i wan‑na i boo ka a a. Fen ko a mu, chɛ ɛ ma?”
8Chisɔsi ɔ, “Wo 'a tooɔgbɛa, an‑na a ma, Mosisi dɔn‑da wo ni wo boo ka wo 'a musu n na. Chɛɛ a nii ka wan Yataa yii ma, tima min na a‑a dunya a dan. 9A sin, n ni a ma din wo tena, mbɛ ni mɔ ɔ mɔ‑a a boo ka a 'a musu a, ko dɔ mende ko a, min ma waa ma basan koe a kai dɔ mende a, mbɛ a‑a musu dɔ gbɛɛ si, a‑a waa ma basan musu a, a ee fuu ɔ min na, Yataa ya a.”
10Mbɛ a fɛ denɛ n‑na a fɔ a ye, an dɔ, “O, ni musu si ɛ ka wan, mbɛ a nyin mɔ ma musu si.”
11Mbɛ Chisɔsi ɔ, “Mɔɛ gbɛɛ an mbe ee bai chɛ ɔ bia, mɔɔ dechee Yataa basan‑da miin ma. 12A mu min na, ko sɛsɛ ɛ wan nɔ, min mbe a ma, mɔ kaima dɔ n mbe ee che musu si‑a. Mɔ kaima dɔ n mbe wan nɔ, an‑na an suun an kai chiayaenɛ an na. Mɔɛ dɔ n sin 'na kai chiaya kaen mu an fian mɔ gbu n fan na. Mɔɛ dɔ n sin ma dɔn ni an ni musu si, a mu min na, an toen mu an ni an fɔɛ gbɛɛ be Yataa 'a mansaya ta koe a ya ɔ ma. Mɔɛ miin mbe kun an ni bai chɛ ɔ bia, an ni a ɔ bia.”
Chisɔsi‑a den mɛsɛ n dua
(Maki 10:13-16; Duku 18:15-17)
13Mbɛ mɔɛ dɔ n na‑a wan an 'na den mɛsɛ n na Chisɔsi tena. An toen ni a ni a boo bun an kun ma, a ni samunɛ chɛ an ko a. Chɛɛ a fɛ denɛ chɛ n‑na chɛ ɔ yen kɛn, an‑na mɔɛ chɛ n na gban fan. 14Chɛɛ Chisɔsi ɔ, “Wo ma an ma bai. Wo a ma den mɛsɛ n ni na n tena. Koe min na mu, mɔɛ miin maen mu yɔ den mɛsɛ chɛ nu, Yataa an mbe ma‑a an 'na mansa a.”
15Mbɛ Chisɔsi‑a a boo bun den mɛsɛ chɛ n ma, dɔndɔ dɔndɔɛ a, ɛ ta‑a an dua‑a. Mbɛ a ka‑a an kaina chɛ, a ta‑a.
Nyan tɔ dɔndɔ‑a Chisɔsi tan
(Maki 10:17-31; Duku 18:18-30)
16Tima dɔndɔ a, kamin dɔndɔ na‑a wan Chisɔsi tena, mbɛ a ɔ, “Ticha, n mbe ko chɛndɛ minan nyɔn sima ma, min mbe a ma, n ni kuɔ fɔ fɔɛ ma sɔn?”
17Mbɛ Chisɔsi ɔ, “Fen mu i toen mu n fan ni a ɔ yian i a, ni koe min nyin a ma koe a? Yataa dɔndɔ gbe an mu mɔ chɛndɛ a. Ni i toen mu i ni kuɔ fɔ fɔɛ ma sɔn, mbɛ don a 'a sawa n kɔɔ.”
18Mbɛ kamin chɛ ɔ, “Sawa minan nu mu?”
Chisɔsi ɔ, “Yataa ɔ te, wo ma mɔ fa, ni sawa ma min fɔ ni, a ɔ, wo ee waa ma basan mɔɛ a, wo ee fuu ɔ min na, a ɔ, wo ma kanka chɛ, a ɔ, wo ma fania fɔ mɔ ɔ mɔ ma, 19a ɔ, wo ni kooya be wo fa ma, a basan wo de a, mbɛ a ɔ, wo ni to wo 'a mɔɛ n na, yɔ wo toen mu buɛ min dɔ wo wandi a.”
20Mbɛ kamin tɔngbɔɛ chɛ ɔ, “Sawa chɛ n gbɛɛ biaen fan mu gbɛ n boo ɔ. Fen to‑a to, n mbe min ma, a ka sawa chɛ n ma, i‑a miin ma dan ka?”
21Mbɛ Chisɔsi ɔ, “Ni i ma to ni tɔmbɛ sima wɛɛ ni ma i ma Yataa tena, ta, i ni i boo fenɛ n gbɛɛ ma tachɛ. Mbɛ i‑a a kɔpɔɛ chɛ ya, i‑a a be yɔn tɔɛ n ma. Chɛ‑a a ma wan, i ni nyanɛ ma sɔn banda bu ɔ. Ni i‑a chɛ ma, mbɛ i na‑a i ma‑a n fɛ denɛ a.”
22Kamin tɔngbɔɛ chɛ‑a bai chɛ a min kɛn, mbɛ a ta‑a faayɔnɛ ɔ. Koe min na mu, nyan tɔ wa ni a a.
23Kamin tɔngbɔɛ chɛ ta‑a kɛn, mbɛ Chisɔsi‑a a fɔ a fɛ denɛ n ye, a ɔ, “N ni a ma din wo tena, mbɛ a ɔ gbɛ nyan tɔɛ n ko a, an ni don Yataa 'a mansaya kɔɔ. 24Ka wɛ n mbe a ma din to wo tena, mbɛ a ɔ gbɛ kaka nyan tɔɛ ko a, a ni don Yataa 'a mansaya kɔɔ, a ni ben ninchi don koe ma miichi woe a.”
25An‑na bai chɛ a min kɛn, a‑a an da a fa wan gban. Mbɛ an dɔ, “Mbɛ nyɔn mbe bauncha chɛ ma sɔn‑da gbɛ?”
26Mbɛ Chisɔsi‑a an gbɛɛ ma fɛn, mbɛ a‑a a fɔ an ye, a ɔ, “Mɔ gbu ee che koe chɛ n ma‑a, chɛɛ Yataa ɛ che wan ko ɔ ko ma‑a.”
27Mbɛ Pita ɔ, “A yen ko, nn‑na nn kan kɔ sɔ fen kɔ fen na, mbɛ nn bea‑a i fɛ. Yataa ɛ tɔnɔnɛ minan nyɔn sima be‑a nn ma?”
28Mbɛ Chisɔsi ɔ, “Wo dan a a, mbɛ a tɔnɔnɛ ɛ koa‑a wan. Tima min na Yataa 'a dunya nama chɛ ɔ na tena, n fan, Mɔ Gbu 'a Denɛ, n mbe si‑a n 'na mansa sea a. Wo wɛɛ wo mɔ tan kun ma fea chɛ nu, wo e si‑a wan mansa sea tan kun ma fea n na. Mbɛ wo ma‑a mansa n na dambi tan kun ma fea chɛ n ko a Chu mɔɛ n tɛ ɔ. 29Chenɛ, suun ma nyɔɛ nu, woo mɔɛ nu, denɛ nu, a basan sɛnɛ n na, an nyin fan. Chɛɛ mɔɛ min mbe an dɔndɔ wɛɛ to‑a n ko a, Yataa ɛ a kɔ‑a wan an fen chɛ a, a si tena chɛmɛ dɔndɔ ni a kun ma a a. A sin, Yataa ɛ kuɔ fɔ fɔɛ be‑a wan to a ma. 30Chɛɛ mɔ sɛsɛ nu, miin mbe sɔ ɔ ya ɔ sanche, Yataa ɛ an na yɛ‑a wan gbaa a. Mɔɛ miin mbe gbaa sanche, Yataa ɛ an sɔ‑a wan ya ɔ dunya nama chɛ ɔ.”
Iliyochaguliwa sasa
MATIU 19: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.