MATIU 25
25
Chisɔsi‑a tai tɛ, a si sunkun tɔngbɔ tanɛ n ma
1Chisɔsi ɔ, “Yataa 'a mansaya ɔ yian tima, ɛ ma‑a ka wan, yɔ koe min ma‑a sunkun tɔngbɔ tanɛ n na. Yɛɛ dɔndɔ ma, an‑na dambo ya wan, ta koe a mɔ kaima chɛ tan‑da, min ni na tena musu si tena. 2An mɔ tan chɛ tɛ ɔ, mɔ duu ni nɔ, an yiima tɛen ni kaka, duu sin yiima nii ma tɛ ni. 3Mɔ duu chɛ nu, miin yiima nii ma tɛ ni, an ta‑a wan dambo n na an boo a, chɛɛ tu nii ma koo an dɔ, man koe a. 4Chɛɛ yiimatɛ tɔ duu chɛ n tana, an ta‑a wan tu sani a faenɛ a an boo a. 5Kaminɛ min ni na tena musu si‑a, a ma fua ni na‑a. Chɛ‑a a ma wan, sunkun tɔngbɔɛ chɛ n gbɛɛ bun‑da ta‑a chinɔɛ a.
6“Su tɛ ɛ che‑a, mbɛ mɔ dɔndɔ‑a yee tɛ. A ɔ, kai gbu na‑a, an mbe min ma kɔn tena, a ɔ, mɔ ɔ mɔ ni bɔ baa ma, an ni a tan. 7Mbɛ sunkun tɔngbɔ tan chɛ n kunɛ‑a, mbɛ an‑na an 'na saaba n na sɛ. 8Chɛɛ sunkun tɔngbɔ duu chɛ nu, miin yiima nii ma tɛ ni, an dɔ yiimatɛ tɔɛ chɛ n ma, ‘Wo dimu, nn 'na dambo n mbe e na dufɛn‑da, wo nn kɔ tu sima ɔ.’ 9Chɛɛ an bɔɛ chɛ n dɔ, ‘Ni nn‑na chɛ ma, tu min mbe nn boo ɔ, a ee na‑a kun‑da mmɔ gbɛɛ ko a. Chɛ an‑na a fɔ, wo ta tu ma tachɛ mɔɛ n tena, wo ni wo ta san.’ 10Mbɛ sunkun tɔngbɔɛ chɛ nu, miin yiima nii ma tɛ ni ka, an ta‑a tu san tena. An ta‑a kɛn, mbɛ mɔ kaima min ni na tena ka musu si‑a, a na‑a an gbaa. Sunkun tɔngbɔ duu chɛ nu, miin ma bɛnden ni ka, an fan don‑da an bɛn chɛ ɔ, an bɛ kai chɛ n na. An don‑da kɛn, mbɛ an‑na chenɛ da a tɔn an gbaa chia a.
11“Chɛ gbakɔ, mbɛ sunkun tɔngbɔɛ chɛ nu, miin ta‑a ka tu san tena, an na‑a, mbɛ an‑na chenɛ chɛ da a tɔndenɛ tan. Mbɛ an‑na a kuu sɔ chenɛ gbu da tu‑a, an dɔ, ‘Fa, Fa, chenɛ da a ka nn ye, nn mbe don.’ 12Chɛɛ kamin chɛ ɔ, ‘N mbe ee dɔn. N ma a ɔ sɔn ni nyɔn mu wo a.’ ”
13Mbɛ Chisɔsi ɔ te gbɛ, “Chɛ an‑na a fɔ, wo wo kun ma fɛn. Koe min na mu, n fan, Mɔ Gbu 'a Denɛ, wo ma tee chɛ sɔn, n mbe na‑a min ma, n mbe ee baa tima chɛ ma, n mbe na‑a min kɔɔ.”
Chisɔsi‑a tai tɛ, a si sɛn dɔ kamin sawa ma
(Duku 19:11-27)
14Chisɔsi ɔ te to, “Tima min na Yataa ɛ ma‑a a 'a mansaya ɔ yian‑da, ɛ ma‑a ka wan, yɔ min ma‑a tai chɛ ɔ. Kun ti dɔndɔ ni wan nɔ, min toen ni a ni ta tachɛ ɔ yansama ɔ. Mbɛ a‑a a 'a sɛn dɔ kamin sawa an chee, a ɔ, an ni to a boo fenɛ gbɛɛ kun ma. 15Kamin chɛ na‑a a 'a sɛn dɔ kamin chɛ n sɔn fan chɛndɛ chɛ. A‑a kɔpɔ sɛmbɛnden to wan an boo ɔ. A‑a a be dɔndɔ ma kain gbɛnsɛn wu duu, dɔndɔɛ wu fea, a sawan bɔɛ sin, wu dɔndɔ. Mbɛ a ta‑a tachɛ chɛ ɔ. 16Mbɛ a ya kɔɔɛ a, sɛn dɔ kaminɛ, min na‑a kain gbɛnsɛn wu duu chɛ ma sɔn ka, a ta‑a. Mbɛ a bun‑da fee fenɛ san‑da, ɛ a ma tachɛ. A‑a chɛ ma kɛn, a kun‑da wan kain gbɛnsɛn wu duu dɔ mende ma. 17Sɛn dɔ kamin fean bɔɛ chɛ wɛɛ, a‑a a ma ka wan. Mbɛ a wɛɛ‑a kain gbɛnsɛn wu fea a sɛ a ta kun ma. 18Chɛɛ sɛn dɔ kaminɛ sawan bɔɛ chɛ tana, a ma fen na sɛ ni a 'a wu dɔndɔɛ chɛ kun ma. A‑a min ma, a ta‑a wan, a‑a sonɛ sin, mbɛ a‑a kɔpɔɛ chɛ nun a ɔ.
19“A ɔ mɛenɛ gbakɔ, an kun ti chɛ yɛ‑a, a ka a 'a tachɛ ɔ. A‑a a fo kɛn, mbɛ a‑a an chee, a ɔ, an ni a ɔ yian a a, an‑na fen ma kɔpɔɛ chɛ a, min to‑a an boo ɔ. 20Mbɛ sɛn dɔ kamin chɛ, min na‑a wu duu chɛ ma sɔn, a don‑da. Mbɛ a‑a wu tanɛ be a kun ti chɛ ma. A‑a a fɔ, a ɔ, ‘Fa, i‑a wu duu min be n ma, n‑na wu duu an na sɛ a kun ma.’ 21Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’
22“Mbɛ sɛn dɔ kaminɛ fean bɔɛ chɛ don‑da, min na‑a wu fea ma sɔn. A ɔ, ‘Fa, i‑a wu fea min be n ma, n‑na wu fea an na sɛ a kun ma.’ 23Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’
24“Mbɛ sɛn dɔ kaminɛ sawan bɔɛ chɛ don‑da, kain gbɛnsɛn wu dɔndɔɛ be‑a min ma. Chɛɛ a ma fen na sɛ ni a kun ma. A ɔ, ‘Fa, n‑na a ɔ sɔn fan, mbɛ i faa a kɔɔen mu kaka. A sin, mɔɛ mu i a, min mbe mɔɛ n kuu kɔ gba ma i ta a. Mbɛ i yɛ‑a, i‑a chin fenɛ ya, i ma min chin ni. 25N chian‑da wan i ma. Chɛ an‑na a ma, n‑na i 'a kɔpɔɛ chɛ nun duu gboo ɔ. A yen ko, n na‑a a a.’ 26Mbɛ kun ti chɛ ɔ, ‘Mɔ yama mu i a. A sin, i gboo ɔ faen mu. I na‑a a ɔ sɔn fan, mbɛ n faa a kɔɔen mu, mbɛ n mbe mɔɛ n kuu kɔ gba an ma n ta a, a yɛ to, n mbe ee chin fenɛ min chin, n mbe an ya. 27I na‑a chɛ gbɛɛ ɔ sɔn fan a si n ma, chɛɛ i ma n 'na kɔpɔɛ sa ni banchi ma. Ni n na‑a yɛ tima min na, n ni chini sima tan‑da wan a kun ma.’ 28Mbɛ a ɔ, ‘Wo kain gbɛnsɛn wu dɔndɔɛ chɛ wɛɛ bia a boo ɔ, mbɛ wo‑a a be sɛn dɔ kaminɛ saa chɛ ma, kain gbɛnsɛn wu tan chɛ ɛ ka min boo ɔ. 29Koe min na mu, mɔɛ min mbe a 'a wai ma ti bia chɛndɛ chɛ, ɛ wai ma munda sɔn fan. Chɛɛ mɔɛ min mbe ee a 'a wai ɛnden chɛ ma ti bia, ɛ fo‑a wan an wai ɛnden chɛ wɛɛ a. 30Min sien mu sɛn dɔ kamin fufafuu chɛ ma, wo a a dɛ baa ma pimbi pimbi ɔ. Ɛ ma‑a kaina di chɛ‑a, a basan a nyinɛ a daunɛ a tɔɔya a.’ ”
Chisɔsi ɛ mɔɛ n gbɛɛ gbɛmbo‑a wan, tee dankama ma
31Chisɔsi ɔ, “N fan, Mɔ Gbu 'a Denɛ, n mbe na‑a wan to dunya chɛ ɔ, nn bɛ maeka n gbɛɛ a. Ni n sin ma‑a na‑a, n mbe ma‑a wan man‑da, mbɛ n si‑a n 'na mansa sea chɛ a, Yataa 'a manɛ ɔ. 32A sin, mɔɛ miin gbɛɛ an mbe dunya ma, an na ɛ kan‑da wan n chen kɔɔ. Ni an na kan‑da, n mbe an tɛ du‑a wan fea a, yɔ sɔ fen kun ma fɛn mɔɛ, ɛ sa n tɛ du buɛ min dɔ, an bɛ ba n na. 33A tima chɛ a, mɔɛ miin maen mu ka yɔ sa nu, n mbe an na yɛ‑a wan n boo nyima ɔ. Mbɛ chɛ nu, miin maenɛ ɛ yɔ ba nu, n‑na an sin na yɛ n manɛ ɔ. 34Mbɛ n fan mansa chɛ, n mbe a fɔ‑a wan mɔɛ chɛ n ye, n boo nyima ɔ, n dɔ, an ni na. N dɔ, Fa Yataa‑a an dua. N dɔ, an ni na, an ni Yataa 'a mansaya tɔnɔnɛ ma sɔn, min dɔ bɛn‑da suun an ko a, a ka dunya a dan tima ma. 35N dɔ, koe min na mu chɛ ma‑a, tima min na kɔnkɔɛ ni n na, an‑na daun fenɛ be wan n ma, a daun koe a. N dɔ, n kanɛ a gbaaen ni kɛn, an‑na yii be wan n ma, a min koe a. N dɔ, sonda wɛɛ ni n na, an na‑a n yia wan buɔdia ɔ. 36N dɔ, fai‑a n bia kɛn, an‑na n fai bɔ wan. N dɔ, n gbandi‑a wɛɛ, an‑na an boo a si wan n kɔɔ. N dɔ, n ni pimbi chenɛ min bɛɛ a, an ta‑a wan nɔ, an‑na n deman. 37Mbɛ mɔɛ chɛ nu, miin tanden mu Yataa tena, an mbe a fɔ‑a wan, an dɔ, ‘Mansa, tima minan na mu, nn‑na i kɔnkɔ tɔɛ yen, mbɛ nn‑na daun fenɛ be i ma, a daun koe a? Nn‑na i kanɛ a gbaaenɛ yen sɔyɔ, mbɛ nn‑na yii be i ma, a min koe a? 38I na‑a tima minan na sonda ni i a, mbɛ nn‑na i yia? I faienɛ to, mbɛ nn‑na i fai bɔ? 39Tima minan na mu, i gbandi‑a? Nn‑na i deman sɔyɔ pimbi chenɛ a?’ 40Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an na‑a koe chɛ n gbɛɛ chɛ wan n fɛ mɔɛ den tachɛen bɛɛ ye, baa ee miin ma an tɛ ɔ, n dɔ, an nii ma a chɛ ni ka an fan ye, an na‑a a chɛ ka n fan ye.
41“Mbɛ n fan mansa chɛ, mɔɛ chɛ nu n manɛ ɔ, n mbe a fɔ‑a wan an ye, n dɔ, an ni ka n ya a. N dɔ, Yataa‑a an danka. N dɔ, an ni ta pan kuɔ fɔ ta man chɛ ɔ, Yataa‑a min dɔ bɛn Sitana ko a, nyina yama n kun ti, an bɛ a 'a nyina yama n na. 42N dɔ, koe min na mu, tima min na kɔnkɔɛ ni n na, an ma daun fen be ni n ma, a daun koe a. N dɔ, n kanɛ a gbaaenɛ ni wɛɛ, an ma yii be ni n ma, a min koe a. 43N dɔ, n na‑a wɛɛ sondaya ɔ, an ma dɔn ni an ni sa tena be n ma an 'na chenɛ a. N dɔ, fai‑a n bia tima min na, an ma n fai bɔ ni. N dɔ, tima min na n gbandienɛ ni, n mbe sa ɔ pimbi chenɛ a, an ma ta ni nɔ, an ni n deman. 44Mbɛ an bɛɛ, an mbe n dɔ tisa‑a wan, an dɔ, ‘Mansa, tima minan na mu, nn ma i deman ni, koe chɛ n gbɛɛ ɔ, min‑na i tan fɔɛ ɔ?’ 45Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an ban‑da wan koe chɛ n chɛ koe a, n fɛ mɔɛ den tachɛen bɛɛ ye, mbɛ an ban‑da ka a chɛ koe a n fan ye. 46A sin, Yataa ɛ mɔ bonda chɛ n na ta‑a wan kaina, an mbe ma‑a kaina mɔnɛ ɔ bia‑a kuɔ fɔ ko a. Chɛɛ mɔɛ tɔɛ chɛ nu, miin tanden mu Yataa tena, an mbe kuɔ fɔ fɔɛ ma sɔn‑da wan.”
Iliyochaguliwa sasa
MATIU 25: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.
MATIU 25
25
Chisɔsi‑a tai tɛ, a si sunkun tɔngbɔ tanɛ n ma
1Chisɔsi ɔ, “Yataa 'a mansaya ɔ yian tima, ɛ ma‑a ka wan, yɔ koe min ma‑a sunkun tɔngbɔ tanɛ n na. Yɛɛ dɔndɔ ma, an‑na dambo ya wan, ta koe a mɔ kaima chɛ tan‑da, min ni na tena musu si tena. 2An mɔ tan chɛ tɛ ɔ, mɔ duu ni nɔ, an yiima tɛen ni kaka, duu sin yiima nii ma tɛ ni. 3Mɔ duu chɛ nu, miin yiima nii ma tɛ ni, an ta‑a wan dambo n na an boo a, chɛɛ tu nii ma koo an dɔ, man koe a. 4Chɛɛ yiimatɛ tɔ duu chɛ n tana, an ta‑a wan tu sani a faenɛ a an boo a. 5Kaminɛ min ni na tena musu si‑a, a ma fua ni na‑a. Chɛ‑a a ma wan, sunkun tɔngbɔɛ chɛ n gbɛɛ bun‑da ta‑a chinɔɛ a.
6“Su tɛ ɛ che‑a, mbɛ mɔ dɔndɔ‑a yee tɛ. A ɔ, kai gbu na‑a, an mbe min ma kɔn tena, a ɔ, mɔ ɔ mɔ ni bɔ baa ma, an ni a tan. 7Mbɛ sunkun tɔngbɔ tan chɛ n kunɛ‑a, mbɛ an‑na an 'na saaba n na sɛ. 8Chɛɛ sunkun tɔngbɔ duu chɛ nu, miin yiima nii ma tɛ ni, an dɔ yiimatɛ tɔɛ chɛ n ma, ‘Wo dimu, nn 'na dambo n mbe e na dufɛn‑da, wo nn kɔ tu sima ɔ.’ 9Chɛɛ an bɔɛ chɛ n dɔ, ‘Ni nn‑na chɛ ma, tu min mbe nn boo ɔ, a ee na‑a kun‑da mmɔ gbɛɛ ko a. Chɛ an‑na a fɔ, wo ta tu ma tachɛ mɔɛ n tena, wo ni wo ta san.’ 10Mbɛ sunkun tɔngbɔɛ chɛ nu, miin yiima nii ma tɛ ni ka, an ta‑a tu san tena. An ta‑a kɛn, mbɛ mɔ kaima min ni na tena ka musu si‑a, a na‑a an gbaa. Sunkun tɔngbɔ duu chɛ nu, miin ma bɛnden ni ka, an fan don‑da an bɛn chɛ ɔ, an bɛ kai chɛ n na. An don‑da kɛn, mbɛ an‑na chenɛ da a tɔn an gbaa chia a.
11“Chɛ gbakɔ, mbɛ sunkun tɔngbɔɛ chɛ nu, miin ta‑a ka tu san tena, an na‑a, mbɛ an‑na chenɛ chɛ da a tɔndenɛ tan. Mbɛ an‑na a kuu sɔ chenɛ gbu da tu‑a, an dɔ, ‘Fa, Fa, chenɛ da a ka nn ye, nn mbe don.’ 12Chɛɛ kamin chɛ ɔ, ‘N mbe ee dɔn. N ma a ɔ sɔn ni nyɔn mu wo a.’ ”
13Mbɛ Chisɔsi ɔ te gbɛ, “Chɛ an‑na a fɔ, wo wo kun ma fɛn. Koe min na mu, n fan, Mɔ Gbu 'a Denɛ, wo ma tee chɛ sɔn, n mbe na‑a min ma, n mbe ee baa tima chɛ ma, n mbe na‑a min kɔɔ.”
Chisɔsi‑a tai tɛ, a si sɛn dɔ kamin sawa ma
(Duku 19:11-27)
14Chisɔsi ɔ te to, “Tima min na Yataa ɛ ma‑a a 'a mansaya ɔ yian‑da, ɛ ma‑a ka wan, yɔ min ma‑a tai chɛ ɔ. Kun ti dɔndɔ ni wan nɔ, min toen ni a ni ta tachɛ ɔ yansama ɔ. Mbɛ a‑a a 'a sɛn dɔ kamin sawa an chee, a ɔ, an ni to a boo fenɛ gbɛɛ kun ma. 15Kamin chɛ na‑a a 'a sɛn dɔ kamin chɛ n sɔn fan chɛndɛ chɛ. A‑a kɔpɔ sɛmbɛnden to wan an boo ɔ. A‑a a be dɔndɔ ma kain gbɛnsɛn wu duu, dɔndɔɛ wu fea, a sawan bɔɛ sin, wu dɔndɔ. Mbɛ a ta‑a tachɛ chɛ ɔ. 16Mbɛ a ya kɔɔɛ a, sɛn dɔ kaminɛ, min na‑a kain gbɛnsɛn wu duu chɛ ma sɔn ka, a ta‑a. Mbɛ a bun‑da fee fenɛ san‑da, ɛ a ma tachɛ. A‑a chɛ ma kɛn, a kun‑da wan kain gbɛnsɛn wu duu dɔ mende ma. 17Sɛn dɔ kamin fean bɔɛ chɛ wɛɛ, a‑a a ma ka wan. Mbɛ a wɛɛ‑a kain gbɛnsɛn wu fea a sɛ a ta kun ma. 18Chɛɛ sɛn dɔ kaminɛ sawan bɔɛ chɛ tana, a ma fen na sɛ ni a 'a wu dɔndɔɛ chɛ kun ma. A‑a min ma, a ta‑a wan, a‑a sonɛ sin, mbɛ a‑a kɔpɔɛ chɛ nun a ɔ.
19“A ɔ mɛenɛ gbakɔ, an kun ti chɛ yɛ‑a, a ka a 'a tachɛ ɔ. A‑a a fo kɛn, mbɛ a‑a an chee, a ɔ, an ni a ɔ yian a a, an‑na fen ma kɔpɔɛ chɛ a, min to‑a an boo ɔ. 20Mbɛ sɛn dɔ kamin chɛ, min na‑a wu duu chɛ ma sɔn, a don‑da. Mbɛ a‑a wu tanɛ be a kun ti chɛ ma. A‑a a fɔ, a ɔ, ‘Fa, i‑a wu duu min be n ma, n‑na wu duu an na sɛ a kun ma.’ 21Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’
22“Mbɛ sɛn dɔ kaminɛ fean bɔɛ chɛ don‑da, min na‑a wu fea ma sɔn. A ɔ, ‘Fa, i‑a wu fea min be n ma, n‑na wu fea an na sɛ a kun ma.’ 23Mbɛ a ɔ, ‘En wai. Mɔ chɛndɛ mu i a, i sin‑na a ɔ yian n na, mbɛ i danayaen mu kɔpɔ ɛnden bɛɛ kun ma. Chɛ ko a, n mbe kɔpɔ sɛmbɛnden be‑a wan i ma, i ni a kun ma fɛn. Na, mɔ ni buɔdia bɔ.’
24“Mbɛ sɛn dɔ kaminɛ sawan bɔɛ chɛ don‑da, kain gbɛnsɛn wu dɔndɔɛ be‑a min ma. Chɛɛ a ma fen na sɛ ni a kun ma. A ɔ, ‘Fa, n‑na a ɔ sɔn fan, mbɛ i faa a kɔɔen mu kaka. A sin, mɔɛ mu i a, min mbe mɔɛ n kuu kɔ gba ma i ta a. Mbɛ i yɛ‑a, i‑a chin fenɛ ya, i ma min chin ni. 25N chian‑da wan i ma. Chɛ an‑na a ma, n‑na i 'a kɔpɔɛ chɛ nun duu gboo ɔ. A yen ko, n na‑a a a.’ 26Mbɛ kun ti chɛ ɔ, ‘Mɔ yama mu i a. A sin, i gboo ɔ faen mu. I na‑a a ɔ sɔn fan, mbɛ n faa a kɔɔen mu, mbɛ n mbe mɔɛ n kuu kɔ gba an ma n ta a, a yɛ to, n mbe ee chin fenɛ min chin, n mbe an ya. 27I na‑a chɛ gbɛɛ ɔ sɔn fan a si n ma, chɛɛ i ma n 'na kɔpɔɛ sa ni banchi ma. Ni n na‑a yɛ tima min na, n ni chini sima tan‑da wan a kun ma.’ 28Mbɛ a ɔ, ‘Wo kain gbɛnsɛn wu dɔndɔɛ chɛ wɛɛ bia a boo ɔ, mbɛ wo‑a a be sɛn dɔ kaminɛ saa chɛ ma, kain gbɛnsɛn wu tan chɛ ɛ ka min boo ɔ. 29Koe min na mu, mɔɛ min mbe a 'a wai ma ti bia chɛndɛ chɛ, ɛ wai ma munda sɔn fan. Chɛɛ mɔɛ min mbe ee a 'a wai ɛnden chɛ ma ti bia, ɛ fo‑a wan an wai ɛnden chɛ wɛɛ a. 30Min sien mu sɛn dɔ kamin fufafuu chɛ ma, wo a a dɛ baa ma pimbi pimbi ɔ. Ɛ ma‑a kaina di chɛ‑a, a basan a nyinɛ a daunɛ a tɔɔya a.’ ”
Chisɔsi ɛ mɔɛ n gbɛɛ gbɛmbo‑a wan, tee dankama ma
31Chisɔsi ɔ, “N fan, Mɔ Gbu 'a Denɛ, n mbe na‑a wan to dunya chɛ ɔ, nn bɛ maeka n gbɛɛ a. Ni n sin ma‑a na‑a, n mbe ma‑a wan man‑da, mbɛ n si‑a n 'na mansa sea chɛ a, Yataa 'a manɛ ɔ. 32A sin, mɔɛ miin gbɛɛ an mbe dunya ma, an na ɛ kan‑da wan n chen kɔɔ. Ni an na kan‑da, n mbe an tɛ du‑a wan fea a, yɔ sɔ fen kun ma fɛn mɔɛ, ɛ sa n tɛ du buɛ min dɔ, an bɛ ba n na. 33A tima chɛ a, mɔɛ miin maen mu ka yɔ sa nu, n mbe an na yɛ‑a wan n boo nyima ɔ. Mbɛ chɛ nu, miin maenɛ ɛ yɔ ba nu, n‑na an sin na yɛ n manɛ ɔ. 34Mbɛ n fan mansa chɛ, n mbe a fɔ‑a wan mɔɛ chɛ n ye, n boo nyima ɔ, n dɔ, an ni na. N dɔ, Fa Yataa‑a an dua. N dɔ, an ni na, an ni Yataa 'a mansaya tɔnɔnɛ ma sɔn, min dɔ bɛn‑da suun an ko a, a ka dunya a dan tima ma. 35N dɔ, koe min na mu chɛ ma‑a, tima min na kɔnkɔɛ ni n na, an‑na daun fenɛ be wan n ma, a daun koe a. N dɔ, n kanɛ a gbaaen ni kɛn, an‑na yii be wan n ma, a min koe a. N dɔ, sonda wɛɛ ni n na, an na‑a n yia wan buɔdia ɔ. 36N dɔ, fai‑a n bia kɛn, an‑na n fai bɔ wan. N dɔ, n gbandi‑a wɛɛ, an‑na an boo a si wan n kɔɔ. N dɔ, n ni pimbi chenɛ min bɛɛ a, an ta‑a wan nɔ, an‑na n deman. 37Mbɛ mɔɛ chɛ nu, miin tanden mu Yataa tena, an mbe a fɔ‑a wan, an dɔ, ‘Mansa, tima minan na mu, nn‑na i kɔnkɔ tɔɛ yen, mbɛ nn‑na daun fenɛ be i ma, a daun koe a? Nn‑na i kanɛ a gbaaenɛ yen sɔyɔ, mbɛ nn‑na yii be i ma, a min koe a? 38I na‑a tima minan na sonda ni i a, mbɛ nn‑na i yia? I faienɛ to, mbɛ nn‑na i fai bɔ? 39Tima minan na mu, i gbandi‑a? Nn‑na i deman sɔyɔ pimbi chenɛ a?’ 40Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an na‑a koe chɛ n gbɛɛ chɛ wan n fɛ mɔɛ den tachɛen bɛɛ ye, baa ee miin ma an tɛ ɔ, n dɔ, an nii ma a chɛ ni ka an fan ye, an na‑a a chɛ ka n fan ye.
41“Mbɛ n fan mansa chɛ, mɔɛ chɛ nu n manɛ ɔ, n mbe a fɔ‑a wan an ye, n dɔ, an ni ka n ya a. N dɔ, Yataa‑a an danka. N dɔ, an ni ta pan kuɔ fɔ ta man chɛ ɔ, Yataa‑a min dɔ bɛn Sitana ko a, nyina yama n kun ti, an bɛ a 'a nyina yama n na. 42N dɔ, koe min na mu, tima min na kɔnkɔɛ ni n na, an ma daun fen be ni n ma, a daun koe a. N dɔ, n kanɛ a gbaaenɛ ni wɛɛ, an ma yii be ni n ma, a min koe a. 43N dɔ, n na‑a wɛɛ sondaya ɔ, an ma dɔn ni an ni sa tena be n ma an 'na chenɛ a. N dɔ, fai‑a n bia tima min na, an ma n fai bɔ ni. N dɔ, tima min na n gbandienɛ ni, n mbe sa ɔ pimbi chenɛ a, an ma ta ni nɔ, an ni n deman. 44Mbɛ an bɛɛ, an mbe n dɔ tisa‑a wan, an dɔ, ‘Mansa, tima minan na mu, nn ma i deman ni, koe chɛ n gbɛɛ ɔ, min‑na i tan fɔɛ ɔ?’ 45Mbɛ n fan mansa chɛ, n mbe a fɔ‑a wan, n dɔ, n ni a ma din an ye, mbɛ ni an ban‑da wan koe chɛ n chɛ koe a, n fɛ mɔɛ den tachɛen bɛɛ ye, mbɛ an ban‑da ka a chɛ koe a n fan ye. 46A sin, Yataa ɛ mɔ bonda chɛ n na ta‑a wan kaina, an mbe ma‑a kaina mɔnɛ ɔ bia‑a kuɔ fɔ ko a. Chɛɛ mɔɛ tɔɛ chɛ nu, miin tanden mu Yataa tena, an mbe kuɔ fɔ fɔɛ ma sɔn‑da wan.”
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.