MAKI 4
4
Chisɔsi‑a tai tɛ, a si chin fen nyan duu gboo ma
(Matiu 13:1-9; Duku 8:4-8)
1Mbɛ tima dɔndɔ a, Chisɔsi‑a a kuu sɔ to mɔɛ n kan‑da, Kadidi yii wa fɛ. Mɔɛ miin na sɔn‑da a ma, an kɔ ni koo. Chɛ‑a a ma wan, a sɛ‑a dɛndɛ ɔ, mbɛ a si‑a nɔ. Dɛndɛ chɛ ni si ɔ yii an na, mɔ fanka chɛ n gbɛɛ sin to‑a tindi ma. 2A‑a an kan fan ko sɛsɛ ma, tai n dɔ. A‑a a fɔ wan an ye, a ɔ, 3“Wo wo too ma sɔ! Tee dɔndɔ a, kamin dɔndɔ ta‑a wan a 'a sɛnɛ ɔ chin fen fasi tena. 4-8Ɛ a fasi chɛ an na, mbɛ dɔ bea‑a chia kuu a. Mbɛ dɔ n bɛɛ bea‑a faa gban duu gboo ma, dɔ n yɛ‑a an bea‑a wai duu gboo ma, mbɛ dɔ n sin bea‑a duu gboo chɛndɛ ma. Chin fen kuu miin bea‑a ka chia kuu a, konde n‑na an sogban sogban fan. Miin sin bea‑a ka faa gban duu gboo chɛ ma, an tana, an fɛn‑da wan bui chɛ wandi a, a mu min na, fii sima ni wan nɔ. Chɛɛ tee winɛ ma kun ni an dɔ, an gbaa‑a wan, koe min na mu, an suu nii ma yii ni chɛndɛ duu gboo ɔ. Miin sin bea‑a ka wai duu gboo chɛ ma, an bɛɛ fɛn‑da wan, a basan wai chɛ a dɔndɔ a, chɛɛ wai chɛ n koa‑a wan a ben chin fen chɛ n ma. Chɛ‑a chin fen fɛn chɛ n na kɔnya wan, mbɛ an gbaa‑a. Miin bea‑a ka duu gboo chɛndɛ chɛ ma, a danka a, an gbɔ‑a wan wɔsɔkɔɔ. Dɔ n gbaa ni wan an kansanɛ ma bi sawa, bi wɔdɔ, ni chɛmɛ sɛsɛ.”
9Mbɛ Chisɔsi ɔ, “Wo wɛn too ɛ koe a min, wo chɛ a min.”
Koe min ni a ma, Chisɔsi ni tai n tɛ
(Matiu 13:10-17; Duku 8:9-10)
10Chisɔsi dɔndɔ gbe to‑a kɛn, mbɛ mɔɛ miin ni ka a 'a tindanɛ, an bɛ a fɛ denɛ n na, an‑na a ɔ tisa. An dɔ, a ni a ɔ yian an na, tai chɛ n fasai buɛ. 11Mbɛ a ɔ an ma, “Mɔɛ gbɛɛ nii ma min dɔ sɔn tee a si Yataa 'a mansaya ma, a‑a an dɔ yian wo a. Chɛɛ mɔɛ tɔɛ chɛ nu, mmɔ bɛ ma miin na, n mbe koɔ an tena tai an dɔ. 12Chɛ ɛ a ma‑a wan, yɔ a nyɛnden mu buɛ min dɔ Yataa 'a gboo ɔ, mbɛ
‘an ya a kaenɛ ɛ ma‑a wan, an ni kaina fɛn,
chɛɛ an mbe ee ko ɔ ko ɔ yen‑da.
Mbɛ an mbe an too ma sɔ‑a wan,
chɛɛ an mbe ee ko ɔ ko ɔ gbɛ‑a.
Ni chɛ ma, kɔkɔɛ an mbe na‑a an ya a mun‑da wan Yataa ma,
mbɛ a‑a a boo bɔ an 'na ko yama n dɔ.’ ”
Chisɔsi‑a tai chɛ fasai, a si chin fen nyan duu gboo ma
(Matiu 13:18-23; Duku 8:11-15)
13Mbɛ Chisɔsi ɔ an ma, “A ni nyan fan gbu, wo ni tai chɛ ɔ gbɛ. Ni wo ma tai chɛ ɔ gbɛ ni, wo e ma ka ma gbɛ, wo ni tai dɔ mende ɔ gbɛ? 14Chin fen fasi mɔɛ chɛ, a na‑a Yataa 'a sakana bai an fasi ka. 15Mɔɛ dɔ n mbe wan yɔ chia kuu 'a duu gboo chɛ, chin fen kuu n bea‑a min ma. Ni an‑na Yataa 'a sakana bai a min, mbɛ Sitana ɛ na wan a ya kɔɔɛ a, mbɛ a‑a bai chɛ bɔ an yiima ɔ, a ta‑a a a. 16Mɔɛ dɔ n sin mbe wan yɔ faa gban duu gboo chɛ, chin fen kuu n bea‑a min ma. Ni an‑na sakana bai chɛ a min, an mbe an boo si wan a kɔɔ, buɔdia wandi gbu a, a ya kɔɔɛ a. 17Chɛɛ Yataa 'a bai chɛ ee si an yiima ɔ, tima ɔ yansama ko a. An mbe dan dechee a a tima kundu ɛnden fan ko a. Ni an‑na ko ma gbaaenɛ sa an ma dechee, sakana bai chɛ wako a, an mbe an boo bɔ wan a kɔɔ. 18Mɔɛ dɔ n sin mbe wan nɔ yɔ wai duu gboo chɛ, chin fen kuu chɛ n bea‑a ka min ma. An mbe sakana bai chɛndɛ chɛ a min fan. 19Chɛɛ dunya chɛ ɔ faagbaa, a basan faagbaa a si an mbe ma buɛ min dɔ an ni nyan, a basan faagbaa tɔɛ gbɛɛ a, an mbe sakana bai chɛ kɔ din fan, fanka ee ma to a a an tena. 20Chɛɛ mɔɛ dɔ n sin mbe wan yɔ duu gboo chɛndɛ chɛ, chin fen kuu n bea‑a ka min ma. An gbɔ‑a wan wɔsɔkɔɔ. Dɔ n gbaa ni wan an kansanɛ ma chɛmɛ dɔndɔ, dɔ nu bi wɔdɔ, dɔ n sin ni bi sawa. Mɔɛ chɛ n bɛɛ ɛ ka wan, miin mbe sakana bai chɛndɛ chɛ a min, mbɛ an‑na a sa an faa ɔ chɛndɛ chɛ, mbɛ an‑na a ma, yɔ sakana bai chɛ‑a a fɔ buɛ min dɔ an ye, a ma koe a.”
Chisɔsi‑a tai tɛ, a si dambo manɛ ma
(Duku 8:16-18)
21Chisɔsi‑a kan chɛ a tun, a ɔ, “Ni mɔ ɔ mɔ‑a dambo a man, a ee samba bun a kun ma, chɛ ma, a ni a a don sofa kɔɔ. Chɛɛ ni mɔ‑a dambo a man, e a si kaina wan, min mbe a ma, ni mɔɛ n don‑da dechee i 'a chenɛ a, an mbe kun fan an ni kaina ɔ yen gbadan. 22Koe min na mu, ko ɔ ko min dɔ nunden mu, ɛ bɔ‑a wan ya a ma. Koe min bɛɛ ma bunden mu, a wɛɛ ɛ bɔ‑a wan ya a ma tee dɔndɔ a. 23Wo wɛn too ɛ koe a min, wo chɛ a min.”
24Mbɛ a yɛ‑a, a ɔ an ma, “Wo wo too ma sɔ bai chɛ n ma, wo e miin na min. Ni wo to‑a nɔ, wo ni wo too ma sɔ chɛndɛ chɛ Yataa 'a bai ma, wo e to‑a wan nɔ, wo ni a ɔ gbɛ chɛndɛ chɛ. A sin, Yataa wɛɛ ɛ a tɔnɔnɛ be‑a wan wo ma. 25Mɔ ɔ mɔ min mbe bai chɛ n dɔ gbɛ‑a chɛndɛ, a ta yiimatɛ kun ma ɛ sa wan. Chɛɛ mɔ ɔ mɔ min mbe ee bai chɛ n dɔ gbɛ‑a, min bɛɛ ɛ a yii ma, ɛ bɔ‑a wan a yii ma.”
Chisɔsi‑a tai tɛ, a si chin fen kuu ma, ɛ koa buɛ min dɔ
26Mbɛ Chisɔsi‑a a fɔ to, a ɔ, “Tai chɛ, ɛ a ɔ yian tena wan Yataa 'a mansaya ɛ buɛ min dɔ. A maen fan mu, yɔ kaminɛ min na‑a chin fen kuu fasi a 'a sɛnɛ ɔ. 27Ɛ chinɔ wan yɛɛ ma, mbɛ a kunɛ‑a sau ma, ɛ ben ben. A sin, ɛ ma chɛ ma‑a su ɔ tee a, chin fen chɛ sin mbe ta‑a fɛn‑da, ɛ ta‑a koa‑a. Chɛ gbɛɛ ɔ, a ee a ma a ni a ɔ sɔn, a gbu ɛ ma buɛ min dɔ. 28Duu gboo wandi, an mbe a ma, chin fenɛ ɛ nyan, a ni gbɔɛ be. Koe saa mu min na, chin fenɛ ɛ gbungbu pɛn, mbɛ a bɔ‑a duu kun ma, a pɔndɛn pɔndɛnɛ. A dankama a, mbɛ a gbɔɛ si‑a a a, a ma‑a wɔsɔkɔɔ. 29Ni chin fen chɛ che‑a a ya tena, mbɛ kamin chɛ‑a a 'a chin fen tɛ mɛ ɔ bɛn, koe min na mu, chin fen ya tima che‑a.”
Chisɔsi‑a tai tɛ, a si chin fenɛ ma, min gbɔɛ ma koo
(Matiu 13:31-32, 34; Duku 13:18-19)
30Mbɛ Chisɔsi ɔ, “N mbe tai dɔ mende an tɛ tena to, n mbe kun n ni Yataa 'a mansaya siman min ma. Ka wɛ n mbe a bɔ nyɔɛ yian wo a. 31Ɛ ka wan yɔ chin fen kuu dɔma ɛndenɛ, kamin dɔndɔ na‑a min ya, mbɛ a‑a a chin a 'a yadi ɔ. Chin fen kuu chɛ ni dɔɔ chin fen kuu gbɛɛ ma dunya ɔ. 32Chɛɛ chɛ gbɛɛ ɔ, a fɛn‑da kɛn, a ma‑a wan chin fen chenama wa a, a ben chin fenɛ tɔɛ gbɛɛ ma. A pimbi bun‑da wan chin fenɛ tɔɛ n kun ma yadi chɛ ɔ. Konde n na‑a wan, an‑na an nyanɛ n sa a bonɛ n dɔ.”
33Chisɔsi ni ma Yataa 'a bai sa‑a an tena, a ni a sa tai sɛsɛ bonda chɛ n fan dɔ. An sin ni che buɛ min dɔ a ɔ gbɛ‑a, a ni a fɔ ka wan an ye. 34A nii bai sa mɔɛ n tena, ni a ma tai tɛ ni. Chɛɛ ni an dechee na‑a to, an bɛ a fɛ denɛ n na, a ni tai chɛ n gbɛɛ ɔ yian fan an na.
Chisɔsi‑a fia wa a gban, min ni bɔ tena yii a
(Matiu 8:23-27; Duku 8:22-25)
35Tee dɔndɔ gbe chɛ ma, tee bea‑a kɛn, mbɛ Chisɔsi‑a a fɔ a fɛ denɛ n ye, a ɔ, “Mmɔ yii wa chɛ tɛ tindi dɔndɔɛ ma.” 36Mbɛ Chisɔsi fɛ denɛ chɛ n‑na mɔ fanka chɛ n to, mbɛ an sɛ‑a dɛndɛ chɛ ɔ, ɛ ka si ɔ min dɔ. Mbɛ an bun‑da dɛndɛ gbu wii‑a, an mbe ta‑a Chisɔsi a. A sin, dɛndɛ dɔ mende n bea‑a wan Chisɔsi ta fɛ. 37A yen ko, fia wa dɛgbɛ‑a a kuu sɔ bɔ‑a yii chɛ a, min‑na a kuu sɔ yii chɛ‑a dɛndɛ gbu ɔ. Ɛnden fan to‑a, yii ni a a fa. 38Chisɔsi ni dɛndɛ gbaa wan pɔɔ, fenɛ ɛ sa ɔ a kunɛ kɔɔ, ɛ chinɔɛ ɔ. Mbɛ a fɛ denɛ n ta‑a, an‑na a a kunɛ bui chɛ a, an dɔ, “Kan mɔ, mmɔ ɛ ka fa an na, a gbɔsɔ ee i ma ɛnden bɛɛ a.”
39Chisɔsi‑a a kɔɔ sɔ, mbɛ a ɔ fia gbu ma, “Sɛmbɛ ka!” Mbɛ a‑a a fɔ yii wɛɛ ma, a ɔ, “A ɔ maun gbɛ!” Mbɛ fia sɛmbɛ‑a bɔ‑a, yii wɛɛ ɔ maun‑da. 40Mbɛ Chisɔsi ɔ a fɛ denɛ n ma, a ɔ, “Wo nii chian. Tima an nɛ gbɛ, wo ni wo kai fa n na.”
41Chɛɛ chiandia ni koo an dɔ. An bun‑da an nyɔn dɔ tisa‑a, an dɔ, “Fen kamin nyɔn sima mu chɛ a? Fia wɛɛ, a basan yii a, an mbe a kuiɛ a min fan!”
Iliyochaguliwa sasa
MAKI 4: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.