MAKI 8
8
Chisɔsi‑a mɔ wu naaninɛ n da kɔ
(Matiu 15:32-39)
1A tima chɛ a, mbɛ mɔ fanka dɔ gbɛɛ n na sɔn‑da Chisɔsi ma. Daun fen nii kɛn to nɔ, mɔɛ chɛ n mbe min daun, Chisɔsi na‑a a fɛ denɛ n chee wan, mbɛ a koɔ‑a an tena, a ɔ, 2“Mɔɛ chɛ n ma chinchinden mu n ye. Tee sawa an nɛ ka gbɛ, an mbe nɛ mmɔ fɛ, daun fen mbe ee to nɔ. 3Ni n‑na a ma sunɛ an ni ta an kɔnkɔ tɔɛ a, an mbe ka‑a wan an chenɛ kɔɔ chia a, an ni bɔn a ma. Koe min na mu, an dɔ nu, an ka‑a kaina min nu, an dɔ yansan.”
4Mbɛ a fɛ denɛ n dɔ, “Mɔ ee che daun fenɛ sɔn‑da nɛ kan kɔ kan, fuin bonda chɛ ma, mɔ ɛ mɔ fanka chɛ da kɔ min na, bufa ni chɛ.”
5Mbɛ Chisɔsi ɔ, “Biidi yuu ɛ nɛ, wo boo ɔ?”
Mbɛ an dɔ, “Gbugbu wɔnfea.”
6Mbɛ a‑a a fɔ mɔɛ chɛ n gbɛɛ tɛtɛ ye, a ɔ, an ni si duu ma, mbɛ an gbɛɛ si‑a. Mbɛ a‑a biidi wɔnfea chɛ ya, mbɛ a‑a Yataa wai bɔ, daun fen chɛ ko a. A‑a a ɔ kai kai wan, mbɛ a‑a a be a fɛ denɛ n ma, a ɔ du du koe a mɔɛ chɛ n ma. An sin‑na a ɔ du du wan an ma. 7Nyɛ ɛndenɛ wɛɛ ni wan to nɔ an boo ɔ. Chisɔsi‑a tando be wan Yataa ma, a wɛɛ ko a, mbɛ a‑a a be a fɛ denɛ n ma, a du koe a to mɔɛ chɛ n ma. 8Mɔɛ n gbɛɛ‑a an bu fa daunɛ chɛ wan. Mbɛ a fɛ denɛ n‑na mɔɛ chɛ n da tɔɛ a sɔn sɔn, a bɛn‑da wan samba sɛmbɛnden wɔnfea da a faenɛ ma gban. 9Mɔɛ miin‑na an daun chɛ chɛ, an taen fan ni mɔ wu naaninɛ nyɔn sima ɔ. Mbɛ Chisɔsi‑a a saa mɔɛ chɛ n na. 10Mbɛ a ya kɔɔɛ a, a si‑a wan dɛndɛ ɔ, an bɛ a fɛ denɛ n na. Mbɛ an‑na yii wa chɛ tɛ, a ta Damanuta kaka ma.
Fayisii n‑na Chisɔsi ɔ tisa, kamaya koe ma koe a
(Matiu 16:1-4)
11Tima ɛnden gbakɔ, Chu mɔɛ nu, miin ni Fayisii n na, an na‑a wan Chisɔsi tena, an bun‑da a kaa ɔ gbaa‑a. An toen ni, an ni a bia a chen kɔ. Chɛ‑a a ma wan, an‑na a ɔ tisa, an dɔ, a ni kamaya koe ma an ye, min mbe a ɔ yian, mbɛ a 'a gbasaya kaen ni Yataa an tena. 12Chɛɛ Chisɔsi kuun‑da a ɔ yansama a, mbɛ a ɔ, “Bi tee chɛ a mɔɛ nu, an toen mu kamaya koe n fan dɔ yen koe a, dan koe a mɔɛ a. N ni a ma din wo tena, chɛ ee ma tena. N mbe ee kamaya ko kan kɔ kan ma tena, an mɔ bonda chɛ n ye.”
13Mbɛ Chisɔsi‑a an to, mbɛ a yɛ‑a dɛndɛ ɔ. Mbɛ a‑a a kuu sɔ yii tɛ‑a, a yɛ a kaka dɔndɔɛ ma.
Chisɔsi‑a dasi be, a si kan yama chɛ ma
(Matiu 16:5-12)
14Chisɔsi fɛ denɛ n na‑a nyina wan, ta koe a daun fenɛ a an boo ɔ. A sin biidi dɔndɔ gbe, an ni an boo ɔ, dɛndɛ chɛ ɔ. 15Mbɛ Chisɔsi‑a an na si, a ɔ, “Yisinɛ min mbe Chu mɔɛ chɛ n boo ɔ, miin mu ka Fayisii n na, ni Mansa Ɛdɔdi 'a yisinɛ, wo wo kun ma fɛn a boo ɔ.”
16Mbɛ an bun‑da a tɛnsɛ‑a an nyɔn tɛ ɔ, an dɔ, “A‑a chɛ fɔ, a mu min na, mmɔ nyina‑a mmɔ ma na ni biidi a mmɔ boo ɔ.”
17Chɛɛ Chisɔsi na‑a a ɔ sɔn fan an ni fen tɛnsɛ tena an nyɔn tɛ ɔ. Mbɛ a ɔ an ma, “Wo ee ma chia ɔ bɔɛ chɛ‑a sanche, a si biidi an ma, min mbe ee wo boo ɔ. Wo gbu ma n sɔn nin bɛ, wo ma n dɔ gbɛ ni. Wo yiima a ma sɛn ni, koe ɔ gbɛ koe a. A ee? 18Wo wan, ya ɛ wo ma, chɛɛ wo ee kaina yen. Too ɛ wo kun fɛ, chɛɛ wo ee koe a min. A gbu sin to‑a wan wo yii ma, koe min na‑a ma. 19N na‑a biidi gbugbu duu ɔ kai kai buɛ min dɔ, mɔ wu duu da kɔ koe a. An da tɔɛ min na‑a to, samba fa yuu na‑a to?”
Mbɛ an dɔ, “Samba tan kun ma fea.”
20Mbɛ Chisɔsi ɔ, “N na‑a mɔ wu naanin chɛ n bɛɛ da kɔ tima min na biidi gbugbu wɔnfea a, samba fa yuu na‑a to, an da tɔɛ ɔ?”
Mbɛ an dɔ, “Samba wɔnfea.”
21Mbɛ a ɔ te gbɛ, “Chɛɛ chɛ gbɛɛ ɔ, wo ma a ɔ gbɛ nin bɛ. A e?”
Chisɔsi‑a ya te tɔɛ ya a ka Besaida
22Mbɛ Chisɔsi na‑a Besaida duu ɔ, an bɛ a fɛ denɛ n na. Mɔɛ dɔ nu nɔ, an na‑a kaminɛ a, min fionden ni, Chisɔsi tena. Mbɛ an‑na a disa, tu koe a an kamin chɛ a. 23Mbɛ Chisɔsi‑a ya te tɔɛ chɛ bia a boo ma, mbɛ a bɔ‑a a a duu chɛ ɔ. Chisɔsi ban‑da kɛn a da a yii chɛ‑a kamin chɛ ya a, mbɛ a‑a a boo bun a ma. Mbɛ a ɔ, “Ɛ ka ma, e kaina yen tena wan?”
24Mbɛ kamin chɛ‑a a kunɛ kɔɔ sɔ, a ɔ, “Mm. N mbe mɔɛ n yen tena wan. Chɛɛ an maen fan mu, yɔ kɔnɛ n fan mbe ka tachɛ tachɛ‑a ben‑da.”
25Chisɔsi tu‑a ka wan to kamin chɛ ya a. Chɛ nɛnɛ ɔ gbɛ, kamin chɛ a kaina fɛn fan tidan, a ya ta yɛ‑a ɔ, mbɛ a‑a fen kɔ fen yen gbadan. 26Mbɛ Chisɔsi‑a kamin chɛ boo ka, ta koe a a waa a. Chɛɛ a ɔ a ma, “I ma yɛ to konko chɛ ɔ.”
Pita dɔn‑da, mbɛ Chisɔsi an mu Chasi a
(Matiu 16:13-20; Duku 9:18-21)
27Mbɛ Chisɔsi ta‑a, an bɛ a fɛ denɛ n na, konko dɔ n dɔ, miin ni nɔ Sisayea Fiipai duu baima. An mbe kɛn ta‑a, mbɛ a‑a an dɔ tisa, a ɔ, “Wo a fɔ wɛ n ye, wo ta yiima ɔ, mɔɛ min nyɔn sima mu n na.”
28Mbɛ an dɔ, “Mɔɛ dɔ n mbe a fɔ tena wan, mbɛ i mu Chɔn fan na, min ni yii chɛ mɔɛ n kunɛ ɔ, Yataa chia a. Dɔ n sin mbe a fɔ wan, mbɛ i mu Yataa 'a gbonka chɛ mɔ dɔndɔ an na suun, min tɔ mu Idaicha. Dɔ n mbe ta‑a a fɔ‑a, an dɔ, Yataa 'a gbonka chɛ mɔɛ dɔ gbɛɛ mu i a.”
29Mbɛ a‑a a fɔ to, a ɔ, “Chɛɛ wo wandi gbu, wo ta yiima ɔ, n mu nyɔn na?”
Mbɛ Pita ɔ, “I mu Chasi an na, nn kun ka mansa.”
30Mbɛ a‑a an na si gbau gbau, mbɛ an ma chɛ ɔ yian mɔ ɔ mɔ a, mbɛ a wan mu Chasi a, mɔɛ n kun ka mansa.
Chisɔsi‑a a 'a mɔnɛ kɔɔ fɔ, a basan a 'a saya a
(Matiu 16:21-28; Duku 9:22-27)
31Mbɛ Chisɔsi‑a a kuu sɔ a fɛ denɛ n kan‑da, a ɔ, “N fan, Mɔ Gbu 'a Denɛ, n mbe tɔɔ‑a wan kaka. Mmɔ 'a chɛnyɛ gbakoo nu, an bɛ mɔɛ miin mbe Chu n tɛ ɔ Yataa a, an 'na mansa n na, an mbe an kan kɔ sɔ‑a wan n na. Mmɔ 'a sawa kan mɔɛ n bɛɛ, an mbe toa si‑a wan an kɔɔ. N mbe fa‑a wan mɔ boo ɔ. Chɛɛ n mbe n kɔɔ sɔ‑a wan a ka saya ɔ, tee fea a sawan bɔɛ ma.” 32A sin na‑a chɛ fɔ wan, an ni a da a kuiɛ ɔ gbɛ gbadan.
Mbɛ Pita‑a Chisɔsi pɛn, a ɔ, an ni sɔ an fea a. An sɔ‑a kɛn, mbɛ Pita‑a a fɔ a ye, a ɔ, a ma bai kaina chɛ fɔ.
33Chɛɛ Chisɔsi‑a a ya a mun fan, a‑a a fɛ denɛ tɔɛ n ma fɛn, mbɛ a ɔ Pita ma, “Ka n fɛ, e ka Sitana 'a wai an chɛ tena. E ka mɔ gbu yiinachii an chɛ tena, Yataa ta yiinachii ma chɛ a.”
34Mbɛ Chisɔsi‑a mɔ fanka fanka chɛ n chee a tena, ni a fɛ denɛ n bɛɛ. Mbɛ a ɔ, “Ni mɔ ɔ mɔ toen mu a ni bea n fɛ, an mɔɛ chɛ ni nyina a faa ma koe n ma. Mbɛ a‑a a ma bɛn mɔnɛ ɔ bia koe a n ko a, a basan fa koe a. 35Koe min na mu, ni mɔ ɔ mɔ ban‑da bea koe a n fɛ, a wandi fɔɛ ma kanda koe a, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ, n ko a, ni sakana bai chɛndɛ chɛ ko a, an mɔɛ chɛ ɛ kuɔ fɔ fɔɛ ma sɔn‑da wan. 36Dunya chɛ ma nyanɛ gbɛɛ, min mbe a ma, mɔ ni a sɔn bɛɛ, mɔ ni fo kuɔ fɔ fɔɛ a, tɔnɔn ma a a. 37Fen kɔ fen mbe ee nɔ, mɔ gbu e che min be‑a, kuɔ fɔ fɔɛ ko a. 38Sanche, mɔ yama yama bonda chɛ n tɛ ɔ, miin mbe ee dan ko a, ni mɔ ɔ mɔ ban‑da n dɔ, a basan n da a kuiɛ a, n bɛɛ, n mbe na‑a wan banda a ɔ. N fan, Mɔ Gbu 'a Denɛ, n mbe na‑a tima min na mansaya ɔ, n mbe ban‑da wan a ɔ. A tima chɛ a, n mbe ma‑a wan man‑da, Fa Yataa 'a manɛ a, nn bɛ maeka n na.”
Iliyochaguliwa sasa
MAKI 8: KONONT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kono © The Bible Society of Sierra Leone, 2006.