Bɔ-Koe-Iyipiti 23
23
Tɔn Donu Telenbagayɛla Ko La
1 #
Bɔ-Koe-Iyipiti 20.16; Saraka-Masɔlɛnuta Tɔnnu 19.11-12; Tɔn-Fɔɛ-Fila-Nyɔgɛ 5.20 “Wo kana foninyɛ ranyɛnsɛn mɔgɛnu tɛma. Mɔgɛ ka sɔ wunduyoge fɛ foninyɛ rɔ.
2“Wo kana bila sɛrɛ fɛ ko-yogoma-kɛ-tinɛ. Mɔgɛ kana a radu sereya bɔ tinɛ ka sɔ nyama fɛ kumɛ rɔ. 3#Saraka-Masɔlɛnuta Tɔnnu 19.15 Wo kana kinikini bolo-kolɔnnu ma ka anu yilikiyi ma anu yoe la kuma tinɛ bawo fen sa anu bolo.
4 #
Tɔn-Fɔɛ-Fila-Nyɔgɛ 22.1-4
“Ni mɔgɛ do bɛnta a yogela ninki la, ni wo ma, ala sofɛlɛ binyɛ rɔ min bara to-a-rɔ a ma nun, a ni a bira ka ta a don a yoge wo bolo. 5Ni mɔgɛ ya a yogela sofɛlɛ taran sani dunɛ kɔrɔ kilɛ la, hali a dɛnbɛn-sɔgɔ sa a la, a ni a dɛnbɛ yati!
6 #
Saraka-Masɔlɛnuta Tɔnnu 19.15; Tɔn-Fɔɛ-Fila-Nyɔgɛ 16.19 “Wo kana bolo-kolɔnnu yoe ma anu yilikiyi la kumɛ rɔ bawo fen sa anu bolo. 7Mɔgɔ kana tɔgɛ sa a ta-nyɔgɛ la. Wo kana mɔgɔ-magbalanɛnu faga. Ni min ya wo sufa ma, nde, Mari si wo tigi yiliki.
8“Wo kana dogonta-fan bira kamasɔrɔn dogonta-fan si a ma, mɔgɛ ti ke tonyɛ yenna, ado dogonta-fan wo si mɔgɔ-telennɛnuna kumɛ ladon gbɔfɛ la.
9 #
Bɔ-Koe-Iyipiti 22.21; Saraka-Masɔlɛnuta Tɔnnu 19.33-34; Tɔn-Fɔɛ-Fila-Nyɔgɛ 24.17-18; 27.19 “Wo kana sundannu tɔrɔ kamasɔrɔn wo ya a lɔn sundanyɛ ye nya min. Wo ni a lɔn ko wole fanan bi sundanyɛ la Iyipiti nyamanɛ rɔ nun.
Tɔn Donu Dugu-Sulen-Koela Ko La
10 #
Saraka-Masɔlɛnuta Tɔnnu 25.1-7
“Mɔgɛ bɛɛsi ni to sɛnɛ sala a gba kelan rɔ san wɔrɔ kɔrɔ. 11Kɔnɔ a san wɔrɔnfila nyɔgɛ ma, wo bɛɛsi ni wola wɔli-kɛ-tinɛ wonu to nyɔ alako wola dugi ni a rasulen. Wo le si a ma, bolo-kolɔnnu ni a mabunsannu tɛgɛ. Bolo-kolɔn wonu fanan bi minnu tola, sogenu si wo dɔn. Wo si wola ki-fannu fanan ma wo nya.
12 #
Bɔ-Koe-Iyipiti 20.9-11; 31.15; 34.21; 35.2; Saraka-Masɔlɛnuta Tɔnnu 23.3; Tɔn-Fɔɛ-Fila-Nyɔgɛ 5.13-14 “Wo si wola wɔlɛnu kɛ tele wɔrɔ kɔrɔ ka wo sulen a tele wɔrɔnfila nyɔgɛ ma. Wola yɔɔnnu wo, wola sundan minnu bi wo dɛnbɛna wo, anubɛ wola kolo-fan minnu bi wɔlila wo ye wo, wo bɛɛsi ni wo sulen a tele wɔrɔnfila nyɔgɛ wo ma.
13“Wo kana bɛsɛnu kɔ, hali anu wara-ko-kumɛ kana taran wo da rɔ. N bara min bɛɛsi fɔ wo ye kɛ la, wo ni a ma wo fɛrɛma wonuna ko la.”
Marita Ladɛn Sawɛ
(Bɔ-Koe-Iyipiti 34.18-26; Tɔn-Fɔɛ-Fila-Nyɔgɛ 16.1-17)
14“San-bo-san, wo ni ladɛn-belebele sawɛ kɛnu kɛ n ye.
15-16 #
Bɔ-Koe-Iyipiti 12.14-20; Saraka-Masɔlɛnuta Tɔnnu 23.6-8; Yilan-Yilan Koe 28.17-25, 26-31 #Saraka-Masɔlɛnuta Tɔnnu 23.15-21, 39-43“Wo ni Biredi-Yɛlɛbɛlɛ-Dɔn-Ladɛn kɛ. Wo ni to biredi-yɛlɛbɛlɛ dɔnna tele wɔrɔnfila kɔrɔ wo wati-latɛgɛnɛ rɔ Abibu#23.15 Abibu: Anuta Abibu karɛ wo mara anuta karɛ fɔlɛ la san la. Kurankɔɛnu si a fɔ ko “Bafuyi,” ni wo ma, “Taraba-tele.” Tubabu-kan rɔ, “April.” karɛ la iko n ya a fɔ wo ye nya min. Wo si ladɛn wo kɛ karɛ wo ma kamasɔrɔn wo bɔra Iyipiti nyamanɛ rɔ karɛ wo le la.
“Wo ni Dɔn-Fen-Kun-Fɔlɛ-Ladɛn fanan kɛ, sɛnita-fen fɔlɔtɛ tɛgɛ-wati. Wo wa ban wola ki-fannu kerila wati min, wo ni Lele-Sɔɛ-Ladɛn kɛ.
“Mɔgɔ-wo-mɔgɔ bolo lakolɔn kana na ladɛn kɛnu kuma.
17“Kei bɛɛsi ni ta nde, Mari Allata ladɛn sawɛ kɛnu tɔ ka nde, Mari Sɛnbɛ-Bɛɛ-Tigi bato.
18“Isiti kenɛ fenfen tɔ, wo kana wonubɛ kolo-fen-sarakɛ di n ma anu nyɔgɔn fɛ.
“Wo ye sarakɛ minnu bɔla ladɛn kɛnu tɔ, wo kana wonu kɛɛn namara ha sɔgɔma.
19 #
Bɔ-Koe-Iyipiti 34.26; Tɔn-Fɔɛ-Fila-Nyɔgɛ 14.21; 26.2 “San-bo-san, wo ni ta wola dɔn-fen-kun-fɔlɔ-hakikɛnu na nde, Mari Alla bato tinɛ.
“Saga-den wo, baa-den wo, wo kana wonu do-wo-do te anu na kin-yi#23.19 Kin-yi: Sibolo-gbɛrɛkɛ-mɔgɛnu denu si a ma wo nya, woletɔ a ti bɛn Allata mɔgɛnu ni wo fanan ma. la.
Yili-Madiyɛ anubɛ Kuma-Birɛ Wara-Koe
20“N si melika sɔ wo yarɔ ka wo kandan kilɛ la ha wo si don kan tinɛ wo rɔ n bara min tabɛn wo ye. 21Wo ni wo tolo masɔ melika wo la ka a kuman-kan bira. Wo kana murutiya a ma. Ni wo ya wo ma, a ti wo makoto muk, bawo a ye tala nde le gbɛ rɔ. 22Kɔnɔ ni wo ya wo tolo masɔ a kuman-kan la ka a latɔnbagaya, wo yogenu si ma n yogenu na. Wo kɛlɛ-nyɔgɛnu si ma n kɛlɛ-nyɔgɛnu na. 23Nta melika si ta wo yarɔ ka wo ladon nyamanɛ wo rɔ Amoranu anubɛ Hɛtinu anubɛ Pɛrasanu anubɛ Kenannu anubɛ Hefanu anubɛ Yebusinu bi kan min. Nde, Mari si ta wonu kasara. 24Wo kana mɔgɛ wonuna bɛsɛnu kɔ. Wo kana wɔlɛ kɛ anuna bɛsɛnu ye. Wo kana sibole wonu kɛ-nya bi, fɔ anu bi anuna kuri minnu kɔla, wo ni anuna bɛsɛ wonu halaki pɔɔ, ka wonu takerikeri. 25Ni wo ya nde, Mari Alla bato, n si dɔn-fan anubɛ yi di wo ma duk, ka kiraya kuntan bɛɛsi bɔ wo tɛma. 26Wola musinu ba buyi bi, anu buyi wo fenfen ti tinya. Gbanda ti taran anu tɔ. Wo si taran wo diya wo siyi-tele-bɛɛ kɔrɔ.
27“N si wo yogenu takilan wo yarɔ. Anu kɔndɔ si fili pirikali! Wo yoge bɛɛ si anu buri wo kɔrɔ. 28N si a ma, anu kun ma ni kɔ wo yarɔ. N si to Hefanu anubɛ Kenannu anubɛ Hɛtinu gbenna wo yarɔ 29kɔnɔ n ti ban wo yoge wonu gbenna wo yarɔ san kelen kɔrɔ alako gbɔfɛ kana yɛlɛ ki-fannu na nyamanɛ wo rɔ. Firarɔ-sogenu kana yiri ka siyaya wo ko nyɔ. 30N si to mɔgɛnu gbenna wo yarɔ doni-doninyɛ ma ha wole ni siyaya, ha nyamanɛ wo bɛɛsi ni ma wotɛ la.
31“N si wola nyamani-dan dabira Kɔgɔ-Yi-Wulen bolɔn doi ma ha ka ke Mɛdetereniyan kɔgɔ-yi ma Filisitinu bi kan min. Dan min bi a fɔlɔla wulɛ ma, wo le ye tala ha ka ke Yufereti bɛ ma. N si nyamanɛ wo duguran kunyɛnu don wo bolo. N si anu gben-sɛnbɛ di wo ma. 32Wobɛ wonu kana lanyiri kiri wo nyɔgɔn tɛma. Wo kana lanyiri kiri bɛsɛnu ye. 33Wo ka sɔn sibole wonu ni sigi wola nyamanɛ wo rɔ. Ni wo ya wo ma, anu si wo ladon hakɛ rɔ nde, Mari kan ma. Ni wo ya anuna bɛsɛnu kɔ, wonu si ma gbɛrɛ la wo ye ka wo faga.”
Iliyochaguliwa sasa
Bɔ-Koe-Iyipiti 23: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.