Bɔ-Koe-Iyipiti 3
3
Musa Kilaya-Koe Alla Bolo
1Wo tumɛ Musa ye a biran-kei, Yɛtirola sagɛnu makandanna, Midiyan saraka-masɔlɛ, kɔni, a tara sagɛ wonu nagbengbenna wulɛ rɔ ha ka ta ke Marita kɔnkɔ-sɛnimɛ ma, Sinayi, kɔni. 2#Kɛwɔlɛnu 7.30-34 Mari nara melikala muninyɛ rɔ. A ya a sigi kɔlɔma-nɛ do rɔ iko ta-mɛlan. Musa ya a mafɛlɛn, tɛ ye kɔlɔma wo la kɔnɔ a sa a mintanna. 3Musa ko, “Sɔ wa, n ni ta ka ko-makawanɛ kɛ ragbɛ. Kɔlɔma-nɛ kɛ sa mintanna minna ko la, n ni wo lɔn.”
4Mari ya a yen min kɛ ko ale Musa ara ta ko ragbɛ tinɛ nyɔ, Alla ya a kan nabɔ a ma ka bɔ kɔlɔma wo rɔ. A ko, “Musa, Musa.”
Musa ko, “Yon bi n takelela?”
5Alla ko, “I kana i madon yan na. Ila sanbarɛ bɔ i kian rɔ kamasɔrɔn i sɔnɛ kan tinɛ min tɔ kɛ la, dugu-sɛnimɛ le wo la.” 6A ko tun, “I benba Iburayima wo, i benba Isiyaka wo, anubɛ i benba Yakoba wo, anuta Alla le nde la.” Musa ya a yakɔrɛ yamatogon kamasɔrɔn a kilanta ka Alla ragbɛ.
7Mari ya a fɔ ko, “Nta mɔgɛ minnu bi Iyipiti, n bara wonuna tɔrɔyɛ yen yati! Anuna wɔli-kunyɛnu bi min mala anu na, n bara wo lɔn ka anu di-kɛ-kannu namɔɛn. N bara anuna yisi-lafinyɛ lɔn. 8N bara na anu kunyɛ bɔ tinɛ yɔɔnyɛ rɔ ka anu bɔ Iyipiti kɛnu bolo. N si ta anu na Kenan nyamani-hakikɛ rɔ, Kenannu anubɛ Hɛtinu anubɛ Amoranu anubɛ Pɛrasanu anubɛ Hefanu anubɛ Yebusinu siginɛ kan min. Nyamani-diyamɛ le Kenan nyamanɛ wo la. 9Isirɛla mɔgɛnu di-kɛ-kan ara ke n ma nkɛkuna, ado Iyipiti kɛnu bi anu tɔrɔla nya min, n bara wo bɛɛsi yen. 10Woletɔ n bi i latala mansɛ wo ma ka Isirɛla mɔgɛnu kunyɛ bɔ gbaran rɔ Iyipiti nyamanɛ rɔ.”
11Musa ya a fɔ Alla ye ko, “Nfen bi nde la? Nde si ke n sɔla mansɛ yakɔrɔ ka Isirɛla mɔgɛnu kunyɛ bɔ gbaran rɔ Iyipiti nyamanɛ rɔ, wa?”
12Alla ko, “N si to i fɛ yati! I wa na nta mɔgɛnu na ka bɔ Iyipiti nyamanɛ rɔ tumɛ min, anu si n bato kɔnkɛ kɛ nyɛrɛ kuma. Wo si ma tamasere la i ye ko nde le ya i kilaya.”
13 #
Bɔ-Koe-Iyipiti 6.2-3
Musa ya a fɔ Alla ye ko, “Kɔnɔ n ba ke Isirɛla mɔgɛnu ma tumɛ min ka a fɔ anu ye ko anu benbanuta Alla ara n kilaya anu ma, anu si i tɔgɛ manyinika nde la. Nba, nde si nfen fɔ wo rɔ?”
14 #
Lankɛnimayɛ 1.4, 8 Alla ya a fɔ Musa ye ko, 15“Ta a fɔ Isirɛla mɔgɛnu fanan ye ko nde, anu benbanuta Mari Alla, Iburayimata Alla, anubɛ Isiyakata Alla, anubɛ Yakobata Alla, kɔni, wo le ya i kilaya anu ma. N tɔgɛ le ‘N bi nya min, n bi wo nya na le.’ I ni a fɔ Isirɛla mɔgɛnu ye wo nya le ko min tɔgɛ NDE LE,#3.15 NDE LE: Ni i ya a lamɔɛn “NDE LE,” wo kɔrɛ le Hiburu-kan rɔ ko, “Yehofa.” Mari tɔgɛ le wo la Hiburu-kan rɔ. Hiburunu si a sɛbɛ ko, “YHWH.” wo le ara i kilaya anu ma.
Nta habadan-tɔgɛ le wo la.
N tɔgɛ wo si ma tamasere la kebilɛ bɛɛ ye.
16“Ta, i ni Isirɛla mɔgɔ-banu nadɛn ka a fɔ anu ye ko anu benbanuta Mari Alla, Iburayimata Alla, anubɛ Isiyakata Alla, anubɛ Yakobata Alla, wo le nara i wara ta-mɛlan rɔ. N bara a fɔ i ye ko min bɛɛsi ye mala anu na Iyipiti, ko n bara wo bɛɛ lɔn. 17N si anu nabɔ Iyipiti tɔrɔyɛ rɔ ka ta anu na Kenan nyamanɛ wo le tɔ, bɔnsɔn kɛnu siginɛ kan min, Kenannu wo, Hɛtinu wo, Amoranu wo, Pɛrasanu wo, Hɛfanu wo, anubɛ Yɛbusinu. Wonu bɛɛsi siginɛ Kenan nyamanɛ wo le tɔ. Nyamani-diyamɛ le nyɔ la.”
18Alla ya a fɔ tun ko, “Isirɛla mɔgɔ-banu si i kuman-kan bira yɔ! Wobɛ wonu ni ta ke Iyipiti mansɛ ma. Wo ni a fɔ a ye ko nde, Hiburunuta Mari Alla ko n nara n nyɛrɛ yira wo la. Wo ni a madiya ko a ni wo boloka alako wo ni tele sawa tagama kɛ wulɛ rɔ woletɔ wo si ke ka sarakɛnu bɔ nde, Mari ye. 19N ya a lɔn ko nta fɔrɔsɛ le si a ma, Iyipiti mansɛ ni wo boloka. 20N si nta ko-makilannɛnu yira Iyipiti mɔgɛnu na ka anu tɔrɔ. Wo kɔma, ale mansɛ si wo boloka.
21 #
Bɔ-Koe-Iyipiti 12.35-36
“N si a ma, wole, nta mɔgɛnu ni gbiliyɛ sɔrɔn Iyipiti kɛnu bolo ka diya anu ye kati! Wo wa wuli bɔla Iyipiti nyamanɛ rɔ tumɛ min, wo bolo-kolɔn ti bɔ nyɔ. 22Isirɛla musinu si ta anu sigi-nyɔgɛ Iyipiti musinu matara fen-kolomɛnu anubɛ fɛrɛya-bɔɛnu ma hali Iyipiti musi minnu siginɛ anu ma anuna bɔnnu na. Anu bi fɛrɛya-bɔɛ wonu don anuna dannu kan na. Anu bi Iyipiti kɛnu bolo kolonyala wo nya na le.”
Iliyochaguliwa sasa
Bɔ-Koe-Iyipiti 3: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.