Ko-Dabirɛnu 21
21
Isiyaka Sɔrɔn-Koe
1Mari duwara Sira ye iko a ya lanyiri kiri a ye nya min nun. 2#Hiburunu 11.11 Hali Iburayima kɔrɔyanɛ, Sira ya buyi bi a ma ka den-kei sɔrɔn a ye a wati-latɛgɛnɛ rɔ iko Alla ya lanyiri kiri anu ye nya min nun. 3Iburayima ya dan wo tɔgɔ sa Isiyaka. 4#Ko-Dabirɛnu 17.12; Kɛwɔlɛnu 7.8 A sɔrɔn-tele segin nyɔgɛ ma, Iburayima ya a lakemininya iko Mari ya a fɔ a ye nya min nun. 5Isiyaka ye sɔrɔnna tumɛ min, wo ya a taran, Iburayima sɔrɔn ara san kɛmɛ bɔ.
6Sira ko, “Alla ara yɛlɛn#21.6 Yɛlɛn: Sirala dan wo tɔgɛ le Isiyaka. Wo kɔrɛ le, “A yɛlɛnta.” di n ma ka n nasewa, woletɔ min bɛɛ wa kɛ lamɔɛn, wonu si sewa n fɛ.” 7A ko, “Yon si a miri a ma lefan ko nde, Sira, si kin-yi di le dan ma nun Iburayima warɛ bɔn la? Hali wo, n kɔrɔyanɛ ara den-kei sɔrɔn a ye.”
8Isiyaka koloyara. Dennɛ wo da-ka tumɛ, Iburayima ya ladiyɛ kɛ a ye.
Hega anubɛ Sumanyila Gben-Koe
9Lunyɛ do, Iyipiti kɛ Hega ya dan min sɔrɔn Iburayima ma, Sira ya wo yen yɛlɛnna ala dan Isiyaka ma. 10#Kalesiya 4.29-30 Woletɔ Sira ya a fɔ Iburayima ye ko, “Yɔɔn-musi kɛ anubɛ ala dan gben alako yɔɔn-musi kɛla dan anubɛ nna dan kana kɛɛ ratala anu nyɔgɔn tɛma.”
11Kumɛ wo ma diya Iburayima ye mumɛ bawo den filɛ wo bɛɛ rakɛn a ye. 12#Romu 9.7; Hiburunu 11.18 Alla ya a fɔ Iburayima ye ko, “I yisi kana tɔrɔ ila yɔɔn-musi anubɛ ala dan gben-koela ko la. Sira ya min fɔ, i ni wo ma kamasɔrɔn n bara lanyiri min bɛɛsi kiri, lanyiri wo bɛɛ si kanbali Isiyaka anubɛ a bɔnsɔn le ye. 13N si yɔɔn-musi wola dan bɔnsɔn fanan nasiyaya bawo ile Iburayimala dan le ale la fanan.”
14Woletɔ Iburayima ya a lasɔ subaga dɛ ma ka a fandɛ anubɛ yi-gbolo-bɔrɛ don Hega bolo. Wo ya yi-bɔrɛ dun a kɛɛ la. Iburayima ya Hega anubɛ ala dan Sumanyila lata anu kun fɛ. Anu tara ka to yilan-yilanna Biri-Siba wulɛ rɔ. 15Anuna yi banta gbolo-bɔrɛ wo rɔ tumɛ min, Hega ya ala dan wo to sani kɔlɔma-nɛ do kɔrɔ. 16A tara a sigi wula-yan la#21.16 Wula-yan la: Ka a bi Hega ma, ka ke ala dan ma, nunkan-nya kɛmɛ fila nyɔgɔn le. kamasɔrɔn a ko, “N kana nna dan kɛ yen fagala.” A tora dila nyɔ dan wola ko la biribiri!
17Alla ya Sumanyila fanan di-kɛ-kan lamɔɛn. Allata melika kuman-kan bɔra san-kole rɔ ka Hega rakele ko, “Hega, i yisi tɔrɔnɛ i ma nfenna? I kana kilan kamasɔrɔn i ya ila dan to sanɛ kan min, Alla ye a di-kɛ-kan lamɔɛnna nyɔ. 18Ta ila dan lasɔ ka a bolo bira kamasɔrɔn Alla si a bɔnsɔn lasiyaya.” 19Alla ya musi wo yɛ laka kɔlɔn ma. Yi ye a rɔ. A tara ka gbolo-bɔrɛ wo lafa yi la ka a di ala dan wo ma. 20Alla ye keminɛ wo fɛ nun. A koloyara ka a sigi wulɛ rɔ. A mara kalabɛn-nakɛ-donse la. 21A sigira Paran wulɛ rɔ. A na tara musi do furu a ye Iyipiti nyamanɛ rɔ ka na wo don a bolo wulɛ rɔ nyɔ.
Lanyiri Kiri-Koe Abimɛlɛki anubɛ Iburayima Tɛma
22 #
Ko-Dabirɛnu 26.26
Wo wati rɔ, Kirari mansɛ anubɛ ata kɛlɛ-kurugbɛ Fikoli tara Iburayima wara. Mansɛ wo ya a fɔ Iburayima ye ko, “I ye koe min bɛɛsi mala, Alla ye i fɛ wonu tɔ. 23Woletɔ i keli Alla yala ko ni i ti mabɛ nna dannu yanfa anubɛ n mamanɛnu. Kɔnɔ iko n bara ko-nyimɛ kɛ i ye nya min, i yandi, i ni a kɛ mabɛ nna dannu ye wo nya na le. Fananta i ye nyamanɛ kɛ rɔ, i ni to a fɛ-birala a kilɛ fɛ.”
24Iburayima ya a fɔ a ye ko, “A ye mabɛ Alla tɛma.”
25Iburayima ya mansɛ wola wɔli-kɛlɛnu yasere-masa a la bawo anu bara ala kɔlɔn bi a bolo. 26Mansɛ wo ya a fɔ ko, “Kɔnɔ i ma kɛ fɔ n ye wɛ nun. N ma a lɔn min ya kɛ ma. Fɔ bi, n bara kumɛ kɛ lamɔɛn.” 27Wo kɔma, Iburayima ya sagɛ anubɛ ninki do bi ka wonu di mansɛ wo ma. Anu mɔgɔ filɛ bɛɛ ya lanyiri kiri anu nyɔgɔn tɛma. 28Kɔnɔ Iburayima ya saga-den-musuma wɔrɔnfila bɔ saga-kulɛ rɔ ka anu sɔ anu dan na. 29Mansɛ wo ya a fɔ Iburayima ye ko, “Nfenna ko la i wara saga-den-musuma wɔrɔnfilɛ kɛnu sɔ anu dan na?”
30Iburayima ya a fɔ a ye ko, “Nba, sagɛ kɛnu bira n bolo. Anu ni ma sereyɛ la mabɛ nyamanɛta mɔgɛnu tɛma ko nde le ya kɔlɔn kɛ sin, ado n halalɛ le.” 31Woletɔ kan tinɛ wo tɔgɛ sara ko Biri-Siba#21.31 Biri-Siba: Ni i ya a lamɔɛn Hiburu-kan rɔ ko, “Biri-Siba” wo kɔrɛ le ko, “Lanyiri-kɔlɔn.” kamasɔrɔn anu mɔgɔ filɛ bɛɛsi ya anu keli Alla yala nyɔ.
32Anu ban lanyiri kirila anu nyɔgɔn tɛma, mansɛ wo anubɛ ala kɛlɛ-kurugbɛ Fikoli ya anu nasɔ ka sɛgi anu barɛ Kirari soe burɔ Filisitinu bi kan min. 33Iburayima ya kɔlɔma-nɛ do ki Biri-Siba dafɛ ka habadan-Mari-Alla bato nyɔ. 34Iburayima ya tele siyaman bɔ Filisitinuna nyamanɛ rɔ.
Iliyochaguliwa sasa
Ko-Dabirɛnu 21: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.