Ko-Dabirɛnu 23
23
Sira Faga-Koe
1Sira siyi ya san kɛmɛ ani san mogan-ni-wɔrɔnfila (127) le bɔ, a nara to fagala. 2A fagara Hiburɔn soe burɔ Kenan nyamanɛ rɔ. Iburayima dira Sirala ko la.
3Iburayima ya a lasɔ ka bɔ ala musi furi dafɛ ka ta a fɔ dugurannu ye ko, 4#Hiburunu 11.9, 13; Kɛwɔlɛnu 7.16 “Sundan le nde la min siginɛ wole Hɛtinu tɛma. Wo ni dugu-kundu-nɛ di n ma alako n ni nna furi togon nyɔ.”
5Duguran wo do ya a fɔ Iburayima ye ko, 6“I wɔlɔ matɔlɔ ma la bawo ma ya a lɔn ko Allata-mɔgɔ-yabɔnɛ le ile la ma tɛma. Kanba-hakikɛ minnu bi ma bolo yan tɔ, i ya lakalan. I ni wo kelen bi ka ila furi togon nyɔ. Ma fenfen ti ma ban kanba-sinnɛ dila i ma.”
7Iburayima ya a madu duguran wonu kɔrɔ. 8A ya a fɔ anu ye ko, “Ni wo ara sɔn ko n ni nna furi togon wo warɛ yan tɔ, nba, wo yandi, wo ta Soharila dan Ɛfirɔn madiya n ye 9alako a ni ata faran di n ma min bi ala dugi dan la Makipela tɛngbɛnya rɔ. Ale si a mayira n ma dɛ min na, a ni a da-bɛrɛbɛrɛ fɔ wo ye, woletɔ a si ma nna kaburu-soe la wo tɛma.”
10Nba, wo ya a taran, Ɛfirɔn siginɛ mɔgɔ-banu tɛma soe tara-dɛ la. Ale ya a fɔ Iburayima ye mɔgɛ wonu tɛma nyɔ ko, 11“Nba, n tigi, i wɔlɔ matɔlɔ n kan la. N si faran wo di i ma anubɛ nna dugi min bi faran wola foolɛ rɔ. N si nyɔ di i ma mɔgɛ kɛ bɛɛ yala bi. I si ila furi togon nyɔ.”
12Iburayima ya a madu Hɛti mɔgɔ-ba wonu kɔrɔ. 13A ya a fɔ Ɛfirɔn ye mɔgɛ bɛɛ yala ko, “I ni i tole masɔ a kila-bɛrɛbɛrɛ fɛ. N si a san iko i ye a mɔlɔn tɛgɛla nya min. I yandi, i ni sɔn dugi wo sɔnkɛ la alako n ni nna furi togon nyɔ.”
14Ɛfirɔn ya Iburayima yabi ko, 15“N tigi, i wɔlɔ matɔlɔ nde le la. Nna dugi wo sɔnkɛ le wodi-gbɛ-gbu kɛmɛ nani#23.15 Wodi-gbɛ-gbu kɛmɛ nani: Wola gbiliyɛ wo mani de iko yi kalɔn kelan. Kɔnɔ Ɛfirɔn ya Iburayima bolo labira ka a da le fɔ a ye ka dugu dɛ lagbɛlɛya Iburayima kuma bawo nɔnfulu-tigi le Iburayima la. na. Kɔnɔ hali wo, n ya a di i ma le. A da ma wo la. Ta ila furi togon nyɔ.”
16Iburayima sɔnta wo ma. Ɛfirɔn ya wodi-gbɛ minna ko fɔ mɔgɔ-ba wonu yala, Iburayima ya wodi-gbɛ-gbu kɛmɛ nani (400) wo suman a ye iko yilanu si fan suman nya min.
17Ɛfirɔnta dugi anubɛ ata faran anubɛ nyɔ-kɔlɔma minnu bi Makipela tɛngbɛnya rɔ, Mamireya dafɛ, anu ya wo bɛɛ latenbi Iburayima ma ka a ma a halalɛ la 18soe tarɛ dɛ la nyɔ Hɛti mɔgɔ-ba wonu yala. 19Wo kɔma, Iburayima ya ala musi Sira togon faran wo la min bi Makipela tɛngbɛnya rɔ Hiburɔn soe telen tɔ Kenan nyamanɛ rɔ Mamireta kɔlɔmanu bi kan min. 20Wo le ya a ma, faran wonubɛ dugi min bi ala foolɛ rɔ Hɛtinuna nyamanɛ rɔ, wonu mara Iburayimata kaburu-soe la.
Iliyochaguliwa sasa
Ko-Dabirɛnu 23: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.