Ko-Dabirɛnu 25
25
Iburayimala Musi Ketura Sɔrɛ
(1 Ko-Kɔrɔta-Karan 1.32-33)
1Wo kɔma, Iburayima ya musi do furu a nyɛrɛ ye. Wo tɔgɛ le Ketura. 2Wo ya den mɔgɔ wɔrɔ sɔrɔn Iburayima ye. Wonu tɔgɛ le kɛnu na, Simiran wo, Yokisan wo, Midan wo, Midiyan wo, Isibaki wo, anubɛ Suwa. 3Kɔnɔ ala dan Yokisan wo ya den mɔgɔ filɛ sɔrɔn, Siba anubɛ Didan. Didan fanan ya den mɔgɔ sawa sɔrɔn. Den mɔgɔ sawɛ wonu bɔnsɔn tɔgɛ le kɛnu na, Asurinu wo, Letusinu wo, anubɛ Luminu. 4Iburayimala den Midiyan ya den mɔgɔ loli minnu sɔrɔn, wonu tɔgɛ le kɛnu na, Ɛfa wo, Ɛferi wo, Hanoki wo, Abida wo, anubɛ Ɛlida. Iburayimala musi Ketura sɔrɛ le kɛnu na.
5Iburayima ya a fɔ ko, “Ni n fagara tumɛ min, n kɛɛ mumɛ bɛɛsi, Isiyaka letan.” 6Kɔnɔ yanni Iburayima ni faga, ala musi doinu ya dan minnu sɔrɔn, a ya wonu kɔ a bolo-fan wonu tɔ. Wo kɔma, a ya dan wonu nata nyamani-gbɛrɛ rɔ tele-bɔɛ wara la alako anu ni bɔ ala dan Isiyaka dafɛ.
Iburayimala So-Sɛgi-Koe
7-8Iburayima sɔrɔn ya san kɛmɛ san bi-wɔrɔnfila ani san loli (175) bɔ, a nara to so-sɛgi-kɛla. 9-10#Ko-Dabirɛnu 23.3-16 Ale Iburayima ya kaburu-soe min san Hɛti do ma Soharila dan Ɛfirɔn, kɔni, ale Iburayimata dannu Isiyaka anubɛ Sumanyila ya a togon faran wo la ala musi Sira kaburu dafɛ. Faran wo ye Makipela tɛngbɛnya rɔ Mamireta kɔlɔmanu tele-bɔɛ. 11Iburayima fagara tumɛ min, Alla tora ata duwɛ layigila ala dan Isiyaka kuma. Isiyaka sigira kɔlɔn wo dafɛ Hega ya min kele nun ko, “Alla Min Kolonkɛ Ye N Na, Wota Kɔlɔn.”
Sumanyila Sɔrɛ Sigira Kan Min
(1 Ko-Kɔrɔta-Karan 1.28-31)
12Nba, Iburayimala dan Sumanyila Sirala yɔɔn-musi Hega, Iyipiti kɛ ya min sɔrɔn Iburayima ye, wo bɔnsɔn le kɛnu na, 13Sumanyilala den-keinu tɔgɛ le kɛnu na iko anu sɔrɔnta nya min. Ala den-kei-sarɛ tɔgɛ le Nebayɔti. Nebayɔti dɔgɛ le kɛnu na, Kedari wo, Adibɛli wo, Mibisan wo, 14Misima wo, Duma wo, Masa wo, 15Hedadi wo, Tema wo, Yetura wo, Nafisi anubɛ Kedɛma. 16Kɔnɔ den tan-ni-filɛ kɛnu denu mara bɔnsɔn tan-ni-fila kebila-kunyɛ la. Anu tɔgɛnu sara anuna soenu kuma. 17Sumanyila ya san kɛmɛ san bi-sawa ani san wɔrɔnfila (137) le bɔ, wo kɔma, a nara to fagala. Kɔnɔ nyamanɛ wo kan tinɛ min tora Sumanyilata mɔgɛnu ye, wo le kɛnu na. 18#Ko-Dabirɛnu 16.12; 17.20 Ala mɔgɛnu bɔra sigila Sura wulɛ dɛ la min bi Iyipiti wara la ha ka ta ke Hafila soe ma min bi Asiriya nyamanɛ wara la. Sumanyila bɔnsɔnnu anubɛ Isiyaka bɔnsɔnnu ti sigi kan-tina-kelen tun sɔndɔma-finteyɛ bolo.
Yakoba anubɛ Isɔ Sɔrɔn-Koe
19Iburayimala dan Isiyaka bɔnsɔn wara-koe le kɛ la. 20Isiyaka sɔrɔn ya san bi-nani bɔ tumɛ min, a ya Bɛtuwɛlila den Rebɛka furu. Aram kɛ le anu denu na min bi Mɛsopotemiya nyamanɛ rɔ. A kɔrɔ-kei tɔgɛ le Leban.
21Isiyaka ya Mari madiya ala musi ye kamasɔrɔn gbandɛ le. Mari ya ala madiyali-kan yabi. Ala musi ya buyi bi fɛrannu na. 22Fɛran wonu taranta anu nyɔgɔn kɛlɛla anu na burɔ. Rebɛka ya a fɔ ko, “Nfen bi a tola, kɛ ye mala n na?” Woletɔ a tara Mari manyinika.
23 #
Romu 9.12
Mari ya a fɔ a ye ko,
“I si fɛrannu sɔrɔn.
Wonu si ma bɔnsɔn-kun-tiginu na.
A kinamɛ si wɔli a dɔgɔmɛ ye.”
Bɔnsɔn wonu si to anu nyɔgɔn kɛlɛla.
Bɔnsɔn doi sɛnbɛ si koloya doitɛ ko.
24-26A mui-wati kera tumɛ min, a ya fɛrɛn-keimɛnu sɔrɔn. Fɛran min fɔlɔn bɔra fɔnyɔ la, a fɛrɛ wulennɛ a ma. A fɛrɛma-siyi siya iko gbɔɔn. Anu ya a tɔgɔ sa Isɔ.#25.24-26 Isɔ: Ni i ya a lamɔɛn “Isɔ” Hiburu-kan rɔ, wo mani de iko anu ba a fɔ, “Fɛrɛma-siyi.” Kɔnɔ a ye anu sɔrɔnna wati min, min tora kɔma, wo bole biranɛ a kɔrɔ kin-tintiran la. Wo tɔgɛ sara Yakoba.#25.24-26 Yakoba: Ni i ya a lamɔɛn “Yakoba” Hiburu-kan rɔ, wo mani de iko anu ba a fɔ, “Kin-tintirin-biralɛ.” A kɔrɛ le fanan “Yanfanteyɛ.” Fɛran kɛnu bi sɔrɔnna tumɛ min, wo ya a taran, Isiyaka ara san bi-wɔrɔ bɔ.
Isɔta Sɔ Tinɛ Mayira-Koe
27Fɛran kɛnu koloyara tumɛ min, Isɔ wo mara donso-hɛnkilimɛ la, ado donso-firɛ di a ye. Yakoba wo mara mɔgɔ-lafɛrɛnɛ la. Bon-nasigi di ale ye. 28Kɔnɔ Isɔ diyara a fa Isiyaka ye bawo firarɔ-soge di a ye. Yakoba wo diyara a na ye le kati!
29Lun kelen, Isɔ kɔnkɔto-wɛ bɔra firɛ rɔ. A ya a taran, Yakoba ara sɔsɛ te. 30Isɔ ya a fɔ Yakoba ye ko, “I yandi, n kɔ dɔnta-wulennɛ kɛ rɔ, n kana kirɔn-a-la.” (Woletɔ Isɔ tɔgɛ sara Idɔm nyamanɛ kun na min kɔrɛ, “Fen-Wulan.”)
31Kɔnɔ Yakoba ko, “Bawo den-kei-sarɛ le ile la, ita sɔ tinɛ mayira n ma.”
32Isɔ ko, “Sɔ tinɛ kɛ si nfen nyinya nde ma. N fagamatoe le kɛ la kɔnkɛ bolo.”
33 #
Hiburunu 12.16
Yakoba ko, “I keli n ye fɔlɔn ni i si ita sɔ tinɛ di n ma.” Woletɔ Isɔ ya a keli a ye. A ya a bolo bɔ ata sɔ tinɛ rɔ ka a mayira a dɔgɛ Yakoba ma.
34Woletɔ Yakoba ya biredi anubɛ sɔsɔ-tenɛ wo di a kɔrɔ Isɔ ma. Isɔ ban wonu dɔnna, a tara a ye.
Isɔ ya ala sɔ tinɛ bɔrɔbɔ wo nya na le.
Iliyochaguliwa sasa
Ko-Dabirɛnu 25: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.