Ko-Dabirɛnu 29
29
Yakoba Ta-Koe A Berin Barɛ
1Nba, Yakoba tara tagamana ka ta ke nyamanɛ do ma min bi tele-bɔɛ wara la. 2A ya a yɛ lata ka saga-kurun sawa sanɛ yen kɔlɔn do dafɛ gbɛkole ma. Sagɛnu min tinɛ le nyɔ la. Kɔlɔn wo dɛ latogonnɛ fara-belebele do la. 3Saga-fɛ-biralɛnu si na anuna sagɛnu na nyɔ ka kɔlɔn wo dɛ laka ka yi di sagɛnu ma. Wo kɔma, anu si kɔlɔn wo dɛ latogon farɛ wo la tun.
4Yakoba ya saga-fɛ-biralɛ donu taran nyɔ. A ya anu manyinika ko, “N bɔnu, wole bɔra mintɔ?”
Anu ya a yabi ko, “Male bɔra Hɛran soe le tɔ.”
5Yakoba ya anu manyinika tun ko, “Wo ya Nehori mamanɛ Leban lɔn, wa?”
Anu ko, “Ɔn, ma ya a lɔn.”
6A ya anu manyinika tun ko, “A kɛndɛ?”
Anu ko, “Ɔn, a kɛndɛ. I ma ala dunmusi Resɛli yen nala sagɛnu na kɛ la?”
7Yakoba ko, “Tele ye nyɔ fɔlɔn. Sagɛnu nadɛn tumɛ ma ke wɛ. Nfen ya a to, wo sa yi dila sagɛnu ma ka anu nata anu de-nyini tinɛ?”
8Saga-fɛ-biralɛ wonu ko, “Ma ti wo ma fɔ ma wa sagɛnu damasi kundɛn fɔlɔn. Wo kɔma, ma si farɛ bɔ kɔlɔn dɛ la ka yi di anu ma.”
9Yakoba ye kɛ fɔla tumɛ min, Resɛli nara sagɛnu na a bolo kamasɔrɔn a fata saga-fɛ-biralɛ le ale la. 10Yakoba ya a berinna dan wo yen tumɛ min, a ya farɛ bɔ kɔlɔn wo dɛ la ka yi di a berinna sagɛ wonu ma. 11Yakoba ya Resɛli kɔndɔn ka di sewɛ bolo. 12Yakoba ya a fɔ Resɛli ye ko, “I fa berinnɛ le nde la, Rebɛkala dan, kɔni.” Resɛli burimatoe tara wo fɔ a fa ye.
13Leban ya a berinnɛ Yakoba wara-koe lamɔɛn tumɛ min, a burimatoe tara a labɛn ka a kɔndɔn ka a ramɔnsɔn. Anu tara bɔn la. Koe min bɛɛ ara ma nun, Yakoba ya wo fɔ a berin Leban ye. 14Leban ya a fɔ a ye ko, “Nna den-bɛrɛbɛrɛ le ile la.”
Yakobala Wɔli-Koe Resɛli anubɛ Liyala Ko La
Yakoba tora Leban fɛ karɛ kelen. 15Leban ya a fɔ ale Yakoba ye ko, “Kamasɔrɔn n berinnɛ le ile la, a ma di n ye i ni wɔli-fui kɛ n ye. Ni a sɔgɛ ye i la, n ni i sara min nyɔgɔn na, wo fɔ n ye.”
16A ya a taran, dunmusu fila ye Leban bolo. A kinamɛ tɔgɛ Liya. A dɔgɔmɛ tɔgɛ Resɛli. 17Fɛɛ ye Liya yɛ la. A yɛ manɛ panpulan! Kɔnɔ Resɛli kin dɔgɔma-ma-de! Fɛɛ-wo-fɛɛ sa a la! 18Resɛli diyara Yakoba ye. A ya a fɔ a berin ye ko, “N si wɔli i ye ila dunmusu-dɔgɔmɛ Resɛlila ko la san wɔrɔnfila kɔrɔ.”
19Leban ko, “Yanni n ni a di mɔgɔ-gbɛrɛ ma, ni n ya a di ile ma, wo si diya nde ye. To n fɛ yan.” 20Woletɔ Yakoba wɔlita Resɛlila ko la san wɔrɔnfila. Wo mara a yala iko tele fila kamasɔrɔn a ya Resɛli keni ha ka a dan-natenbi.
21San wɔrɔnfilɛ wo banta tumɛ min, Yakoba ya a fɔ Leban ye ko, “Nna musi don n bolo kamasɔrɔn nna wati ara ban. N ni a ma nna musi la.”
22Leban ya kɔɛn-masɔ-ladiyɛ kɛ Resɛli anubɛ Yakoba ye ka nyɔ-mɔgɛ bɛɛ kele. 23Kɔnɔ wo suyi rɔ, a ya ala dunmusu-fɔlɔtɛ Liya bi ka ta wo latenbi Yakoba ma. A mara Yakobala musi la. 24Leban ya ala yɔɔn-musi Silipa bi ka a di ala dunmusi Liya ma ka a ma ala solo-dununɛ la.
25Sɔgɔma gbɛ, Yakoba ya a mafɛlɛn. A ya yon yen? Liya! Yakoba ya a fɔ Leban ye ko, “N berin, i wara nfen ma n na kɛ la? N ma wɔli Resɛlila ko la? Nfen ya a to, i wara n yanfa wo rɔ gbɛ?”
26Leban ya a fɔ a ye ko, “A ti ma wo nya mata nyamanɛ kɛ rɔ. Mala namu ma wo la. Ma ti dunmusu-dɔgɔmɛ di kei ma a kinamɛ fɔlɔn ma kei sɔrɔn. 27Ni a sɔgɛ ye i la i ni a dɔgɛ Resɛli sɔrɔn, i ni a nyɔgɔn san wɔrɔnfila wɔlɛ kɛ n ye tun. Kɔnɔ a makɔni ha Liyata kɔɛn-masɔ-ladiyɛ-lɔgɔkunyɛ da ni fa. Wo kɔma, n si Resɛli fanan don i bolo.” Yakoba sɔnta kumɛ wo ma.
28Liyata kɔɛn-masɔ-lɔgɔ-kunyɛ dafanɛ, Leban ya ala dunmusi Resɛli fanan bi tun ka a di Yakoba ma ka wo ma ala musi la. 29Leban ya ala yɔɔn-musi Biliha bi ka a di Resɛli fanan ma ka wo ma ala solo-dununɛ la. 30Yakoba ya Resɛli fanan latenbi a kɔma. Resɛli diyara Yakoba ye Liya ko. Wo kɔma, a wɔlita a berin ye san wɔrɔnfila tun.
Yakoba anubɛ Liya ya Den Nanɛ Minnu Sɔrɔn
31Mari ya a yen tumɛ min ko Liya ma ara gboya kei-wara-sigi rɔ, woletɔ a ya a ma, Liya yirita Yakoba warɛ. Kɔnɔ Resɛli mara gbandɛ la. 32Liya ya buyi bi ka den-kei-sarɛ sɔrɔn. A ya a tɔgɔ sa Rubɛn bawo tɔgɛ wo kɔrɛ le iko mɔgɔ wa a fɔ ko, “Mari ara nna tɔrɔyɛ yen.” Liya ya a fɔ ko, “Tumado nna den-sɔrɔn si a ma, nna kei ni n keni.”
33A ya buyi do bi tun ka den-kei-gbɛrɛ sɔrɔn. Liya ya a fɔ ko, “Mari ara a lamɔɛn ko n ma di nna kei ye, woletɔ a ara dan kɛ fanan di n ma.” A ya wo tɔgɔ sa Simiyɔn bawo tɔgɛ wo kɔrɛ le iko mɔgɔ wa a fɔ ko, “A ara a lamɔɛn.”
34Liya ya buyi do fanan bi tun ka den-kei-gbɛrɛ sɔrɔn. A ko, “Nba kaka, nna kei si n bira a bolo filɛ la gbɛ bawo n bara ala den-kei sawa nyɔgɔn sɔrɔn.” Woletɔ a ya dan wo tɔgɔ sa Lifayi bawo tɔgɛ wo kɔrɛ le iko mɔgɔ wa a fɔ ko, “A si n bira.”
35Liya ya buyi bi tun ka den-kei do fanan sɔrɔn, a ko, “Kaka, n si Mari tanto.” Woletɔ a ya a tɔgɔ sa Yuda bawo tɔgɛ wo kɔrɛ le iko mɔgɔ wa a fɔ ko, “Tantolɛ.” A ya a sulen den-sɔrɔn ma.
Iliyochaguliwa sasa
Ko-Dabirɛnu 29: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.