Ko-Dabirɛnu 41
41
Mansɛta Kiyo Kɔrɛ Fɔ-Koe
1San fila tenbinɛ wo kɔma, mansɛ wo kiyora a sɔnɛ Nayɛli bɛ dafɛ. 2A ya ninki wɔrɔnfila yen bɔla bɛ rɔ ka yɛlɛ gbele ma. Anu kin, anu tɔlɔnɛ. Anu ya bin dɔn dabira ba-lɛɛ wo rɔ. 3Wo kɔma, n ya ninki wɔrɔnfila-gbɛrɛ yen yɛlɛla ka bɔ bɛ wo rɔ. Anu baranɛ kɔnkɔlɔnyɔ! Anu nara anu sɔ ninki doinu fɛ kɔnkɔn la. 4Ninki-baranɛ wonu bɔra ninki-tɔlɔnɛ wonu kɔma kilɛ la ka ninki-tɔlɔnɛ wonu dɔn saa! Mansɛ kundenta.
5Wo kɔma, kinɔgɛ tenbira a ma tun. A ya kiyo fila nyɔgɛ sa. A kiyora nyɔ-sɔngbɔn wɔrɔnfila la. Anu bi nyɔ-gbaga kelen ma. Anu kunba, anu kin. 6Wo kɔma, a ya nyɔ wɔrɔnfila yen bɔla nyɔɛ doi wonu kɔma. Anu worowarɛ! Fɔnyɔ tugura. Anu mara sɔnfɔlɔn! 7Nyɔ-sɔnfɔlɔn wɔrɔnfilɛ wonu ya nyɔ-kunba wɔrɔnfilɛ wonu nakunu. Mansɛ kundenta tun, a ko, “Yaga, n bi kiyo la nun kɛ?”
8 #
Daniyɛli 2.2
Kiyo wonu ya mansɛ lafili pirikali! Wo wulun sɔgɔma, mansɛ wo ya kilayɛnu tanyɛnsɛn ala nyamanɛ rɔ ka hɛnkilimɛnu anubɛ nya-nyini-kɛlɛnu kele. Ale Iyipiti mansɛ ya ala kiyo rakaran anu ye kɔnɔ ala nyamanita-mɔgɛ wonu fenfen ma ke ala kiyo wonu kɔrɛ fɔla a ye.
9Ala baan-bɔlɛ ya a fɔ a ye ko, “N na ara bila bi. N bara ko-yogomɛ le ma bawo n na ara nyina. 10Seren-kɔ, ile mansɛ diminyara mabɛ ila biredi-mintannɛ ma min kɛ, i ya ma sa yele la i makandannɛ kun-tigi Pɔtifala bɔn dafɛ. 11Lunyɛ do, mabɛ wo kiyora suyi rɔ. Kɔnɔ mala kiyonu, kelen ma anu na. 12Hiburu-keminɛ do ye ma fɛ nyɔ nun yele la. Pɔtifala yɔɔn le ale la nun. Ma ya mala kiyo wonu takaran a ye. A ya mala kiyo wonu kɔrɛ fɔ ma ye. 13Mala kiyo wonu bɔra-a-la iko a ya a fɔ ma ye nya min. Nde sɛgira n gbɛ rɔ wɔli-kɛ-tinɛ. Biredi-mintannɛ wo donta kɔlɔma ma.”
14Mansɛ ya kilayɛ lata ale Yusufu kele tinɛ yele la. Anu ya a labɔ yele-bon-pinpinɛ wo la tiriya! Yusufu ya a dɛ masii ka a mayɛlɛma. A tara a sɔ mansɛ yakɔrɔ.
15Mansɛ wo ya a fɔ Yusufu ye ko, “N bara kiyo min sa, mɔgɔ-wo-mɔgɔ ma ke nna kiyo wo kɔrɛ fɔla n ye. Kɔnɔ n bara ile wara-koe lamɔɛn ko ile si ke le ka mɔgɛnuna kiyo kɔrɛ rakaran.”
16Kɔnɔ Yusufu ya a fɔ mansɛ ye ko, “Nde ti ke kiyo kɔrɛ fɔla n nyɛrɛ ma fɔ Alla. Wo le si ke a kɔrɛ fɔla alako i yisi ni kimɛ.”
17Mansɛ ya a fɔ Yusufu ye ko, “N kiyora n sɔnɛ Nayɛli bɛ dafɛ. 18N ya ninki-tɔlɔni wɔrɔnfila yen yɛlɛla gbele ma. Anu ya bin-dɔn dabira lɛɛ wo rɔ. 19Wo kɔma, n ya ninki wɔrɔnfila-gbɛrɛkɛ yen yɛlɛla gbele ma ninki-tɔlɔnɛ wonu kɔma. Anu baranɛ kɔnkɔlɔnyɔ! N ma ninki-yogoyanɛ yen ka ke wonu tɔ Iyipiti nyamanɛ rɔ. 20Ninki-baranɛ wonu ya ninki-tɔlɔnɛ wonu dɔn saa! 21Hali anu bara ninki-tɔlɔnɛ wonu dɔn, anu ma bɔ anu su la. Anu baranɛ kɔnkɔlɔnyɔ iko fɔlɔn. N kundenta.
22“Wo kɔma, n kinɔgɔra tun. N kiyora nyɔ-sɔngbɔn wɔrɔnfila la. Anu bi nyɔ-gbaga kelen ma. Anu kunba, anu kin. 23Wo kɔma, n ya nyɔ wɔrɔnfila yen bɔla nyɔɛ doi wonu kɔma. Anu worowarɛ! Fɔnyɔ tugura. Anu mara sɔnfɔlɔn! 24Nyɔ-sɔnfɔlɔn wɔrɔnfilɛ wonu ya nyɔ-kunba wɔrɔnfilɛ wonu nakunu salon! Kɔnɔ n ya kiyo kɛnu takaran hɛnkilimɛ anubɛ nya-nyini-kɛlɛnu ye kɔnɔ anu fenfen ma ke kiyo kɛnu kɔrɛ fɔla n ye.”
25Yusufu ya a fɔ mansɛ ye ko, “Ila kiyo filɛ kɛ bɛɛsi, kɔrɔ kelen. Alla ye nala min mala, a ya wo le tamasere yira i la wo la. 26Ninki-tɔlɔni wɔrɔnfilɛ wonu, anubɛ nyɔ-kunba wɔrɔnfilɛ wonu, san wɔrɔnfila le wonu na. Wonu kɔrɛ, kelen. 27Ninki-barani wɔrɔnfilɛ anubɛ nyɔ-sɔnfɔlɔn wɔrɔnfilɛ wonu, san wɔrɔnfila le wonu fanan na. Wo kɔrɛ le, kɔnkɔ-fitinɛ si na nyamanɛ kɛ rɔ san wɔrɔnfila.” 28Yusufu ko, “A si ma iko n bara a fɔ ile mansɛ ye nya min kɛ la. Alla ye nala min mala nyamanɛ kɛ rɔ, a ara wo le yira ile mansɛ la kiyo rɔ wo la. 29San wɔrɔnfila, dɔn-fan ye warala Iyipiti nyamanɛ kɛ rɔ. Kurukurun ti a ban, tarali ti a ban. 30Wo kɔma san wɔrɔnfila, kɔnkɔ-fitinɛ burunnɛ Iyipiti nyamanɛ kuma bɛff! San wɔrɔnfilɛ wonu, kɔnkɛ wo si a ma, mɔgɛnu ni nyina san wɔrɔnfila diyanɛ wonu ko. Kɔnkɔ-fitinɛ si nyamanɛ kɛ tinya. 31Wo wati rɔ, wo ya dɔn-fan minnu sɔrɔn nun san wɔrɔnfila diyanɛ wonu kɔrɔ, wo fenfen ti to wo bolo nyamanɛ kɛ rɔ gbɛlɛyɛ bolo. 32I kiyora ko filɛ minnu na kɛ la, Alla ara ban a latɛgɛla. A sa mɛla tun kiyo kɛ damasi kɔrɛ si bɔ-a-la.
33“Nba, woletɔ mansɛ, i ni hɛnkilimɛ do nyini min ya ko-lɔn ka wo sigi Iyipiti nyamanɛ kɛ kun na. 34I ni mɔgɔ-ba donu sigi nyamanɛ kɛ kun na minnu si ila nyamanɛ kɛ lata yarɔ. San wɔrɔnfila diyanɛ kɛ kɔrɔ, ni mɔgɔ-wo-mɔgɔ ya dɔn-fen wo dɔn-fen sɔrɔn, a ni a dan nani, a loli nyɔgɔn, mɔgɔ-ba wonu ni wo bi anu bolo ka wonu namara. 35I ni a fɔ anu ye ko anu ni to fui-fannu kundɛnna san wɔrɔnfilɛ kɛnu kɔrɔ wo nya na le. Mɔgɔ-ba wonu ni anu namara so-wɛnu burɔ ka a makandan. 36Dɔn-fan wonu na ni mara nyamanɛ ye san wɔrɔnfilɛ kɔnkɔ-fitinɛ min bi nala wo yarɔ Iyipiti nyamanɛ rɔ alako nyamanita-mɔgɛnu kana halaki kɔnkɔ-fitinɛ wo bolo.”
Yusufu Ma-Koe Kandɛ La
37Yusufula kumɛ wonu diyara mansɛ anubɛ ala mɔgɔ-banu ye. 38Mansɛ ya a fɔ ala mɔgɔ-banu ye ko, “Ma si ke mɔgɔ-kɛndɛ-gbɛrɛkɛ sɔrɔnna Allata sɛnbɛ ye min tɔ iko Yusufu kɛ?”
39Mansɛ ya a fɔ Yusufu ye ko, “Alla ara kɛ dama yira ile min na kɛ la, ma ara a lɔn ko i hɛnkili kolo mɔgɛ bɛɛtɛ ko. 40#Kɛwɔlɛnu 7.10 Nba, woletɔ n si ile Yusufu ma kun-tigi la nyamanɛ kɛ bɛɛsi kun na. I ya kuma-wo-kuma fɔ, nyamanita-mɔgɛnu si wo bira. Ile si ma nna kandɛ la. Fɔ nde kelen pe, nde le i yarɔ nyamanɛ kɛ rɔ. 41N bara i sigi Iyipiti nyamanɛ bɛɛ kun na.” 42#Daniyɛli 5.29 Ale mansɛla mandan ye ala dɛɛn-kɔlɔnɛ min ma, a ya wo bɔ a bole la ka a don Yusufu bole la. A ya fɛrɛya-bɔ-hakikɛnu di a ma ka sɛnɛ-yɔlɔkɛ don a kan na. 43A ya mansɛla kandɛya-kirindi don a bolo ka ale Yusufu yira ala nyamanita-mɔgɛnu na. Anu tara kan-bo-kan, anu si a mayon ko, “Wo ni wo nyɛnkin! Wo ni wo nyɛnkin!” Yusufu taranta kun-tigiyɛ la wo nya na le Iyipiti nyamanɛ rɔ.
44Mansɛ ya a fɔ Yusufu ye ko, “Mansɛ le nde la kɔnɔ ni ile Yusufu ma sɔn koe minnu ma mɔgɛnu bolo, nde fanan ti sɔn wonu ma.” 45-46Mansɛ ya tɔgɔ-kurɛ di ale Yusufu ma, a ko, “I tɔgɛ le gbɛ ‘Duninya-Kisilɛ.’ ” Mansɛ ya Asɛnati furu Yusufu ye ka a di a ma. Asɛnati wo fa Pɔtifɛra le saraka-masɔ-wɔlɛ kɛla Iyipiti bɛsɛnu ye Hɛliyapolisi soe burɔ.
Yusufu-sɔrɔn ya san bi-sawa bɔ tumɛ min, a nara to sɔ tinɛ wo sɔrɔnna Iyipiti nyamanɛ rɔ. Yusufu ya ala wɔlɛ dabira ka Iyipiti nyamanɛ ratagama. 47San wɔrɔnfila diyanɛ wonu kɔrɔ, nyamanɛ wo dɔn-fannu mara-a-la. 48Yusufu tora dɔn-fan wonu kundɛnna ka anu namara. A wa dɔn-fan minnu sɔrɔn soe minnuna foolɛ rɔ, a ni wonu namara soe wonu tɔ. 49Yusufu ya dɔn-fan minnu nadɛn san wɔrɔnfilɛ wonu kɔrɔ, a ma ke anu sumanna ala siyayɛ bolo.
50Yanni san wɔrɔnfilɛ wonu kɔnkɔ-fitinɛ ni na Iyipiti nyamanɛ rɔ, Asɛnati ya den-kei fila sɔrɔn Yusufu ye. 51A fɔlɔtɛ sɔrɔnta tumɛ min, Yusufu ko, “Alla ara a ma, n fala denbayɛnu ya koe min ma anubɛ nta tɔrɔyɛ, n bara nyina wonu ko. Woletɔ nna den-kei-sarɛ kɛ tɔgɛ le Manasa bawo tɔgɛ wo kɔrɛ le iko mɔgɔ wa a fɔ ko, ‘Ka nyina.’ ” 52Den-kei fila nyɔgɛ sɔrɔnnɛ, Yusufu ko, “Alla ara a ma, n bara yiri tɔrɔya-nyamanɛ kɛ rɔ.” Woletɔ a ya dan wo tɔgɔ sa Ifɛrɛm bawo tɔgɛ wo kɔrɛ le iko mɔgɔ wa a fɔ ko, “Yiri.”
53San wɔrɔnfila diyanɛ wonuta wati tenbira Iyipiti nyamanɛ rɔ. 54-56#Kɛwɔlɛnu 7.11 San wɔrɔnfilɛ kɔnkɔ-fitinɛ ya a dabira iko Yusufu ya a fɔ nya min. Dɔn-fen wo dɔn-fen sa nyamanɛnu tɔ minnu bi Iyipiti nyamanɛla foolɛ rɔ kɔnɔ kɔnkɛ ya Iyipiti nyamanita-mɔgɛnu bira tumɛ min, anu dira mansɛ dala dɔn-fen-koe rɔ. Mansɛ ya a fɔ anu ye ko, “Wo ta Yusufu wara. Ni ale ya min fɔ wo ye dɔn-fen-koe rɔ, wo ni wo ma.” #Yɔni 2.5
Kɔnkɔ-fitinɛ wo gbɛlɛyara nyamanɛ bɛɛ rɔ tumɛ min, Yusufu ya bondɔnnu dɛ laka ka a mayira Iyipiti kɛnu ma. Dɔn-fan minnu namaranɛ nun, wonu tagbayara Iyipiti nyamanita-mɔgɛnu ma. 57Duninya-mɔgɛ bɛɛsi tara Yusufu wara Iyipiti nyamanɛ rɔ dɔn-fen nyini tinɛ bawo kɔnkɔ-fitinɛ ara duninya-mɔgɛ bɛɛ tɔrɔ wati wo rɔ.
Iliyochaguliwa sasa
Ko-Dabirɛnu 41: KCLB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kuranko Common Language Bible © The Bible Society in Sierra Leone, 2006.