Jɛnɛsis 17
17
Di Kɔvinant Ɛn Fɔ Sakɔmsayz
1We Ebram bin ol naynti-nayn ia, PAPA GƆD apia to am ɛn tɛl am se, “Mi na PAPA GƆD Ɔlmayti. Obe mi ɛn du wetin rayt ɔltɛm. 2A go mek Kɔvinant wit yu ɛn a go gi yu bɔku gret grampikin.” 3Ebram lidɔm flat wit in fes na grɔn wantɛm. PAPA GƆD se, 4“A de mek dis Kɔvinant wit yu naw ɛn a de prɔmis yu se yu go bi di papa fɔ bɔku neshɔn. 5Yu nɔ go nem Ebram igen, naw yu nem go bi Ebraam#17:5 Ebraam Dis nem tan lɛkɛ di Ibru wɔd fɔ: Di papa fɔ bɔku neshɔn dɛm. bikɔs a dɔn mek yu di papa fɔ bɔku neshɔn dɛn. 6A go mek yu jɛnareshɔn dɛn so bɔku, dat dɛn go bi difrɛn difrɛn neshɔn dɛn ɛn sɔm pan dɛn go bi kiŋ.”
7“A de mek dis Kɔvinant bitwin mi ɛn yu ɛn bitwin mi ɛn yu jɛnareshɔn dɛn we nɔ bɔn yet. Dis Kɔvinant go de sote go ɛn a go bi yu PAPA GƆD ɛn ɔl yu jɛnareshɔn dɛn PAPA GƆD. 8Dis land we yu de so naw lɛkɛ trenja go blant yu ɛn yu jɛnareshɔn dɛn. A go gi yu jɛnareshɔn dɛn dis wanol Kenan. I go bi dɛn yon sote go, ɛn a go bi dɛn PAPA GƆD.”
9PAPA GƆD tɛl Ebraam se, “Yusɛf ɛn yu jɛnareshɔn dɛn, ɛn ivin dɛn wan we nɔ bɔn yet gɛt sɔntin fɔ du fɔ kip di Kɔvinant. 10Una yon pat we una fɔ kip pan di Kɔvinant na dat ɔl di man dɛn fɔ sakɔmsayz. 11Frɔm naw sote go, ɔl di man dɛn fɔ sakɔmsayz we nain go sho se Kɔvinant de bitwin mi ɛn una. 12Ɔl bɔypikin fɔ sakɔmsayz we i dɔn ol et de; wɛda i bɔn na yu os ɔ yu bay am frɔm ɛni trenja, 13as lɔŋ as na bɔypikin yu fɔ sakɔmsayz am. Na dis go mek di Kɔvinant de sote go. 14Ɛni man we nɔ sakɔmsayz dɔn brok mi Kɔvinant. I nɔ fɔ de wit in pipul dɛn.”
15PAPA GƆD tɛl Ebraam igen se, “Fɔ yu wɛf Seray in yon say, yu nɔ fɔ kɔl am Seray igen; frɔm naw sote go in nem na Sera.#17:15 Sera Dis nem na Ibru min: Di kiŋ in gyal pikin 16A go blɛs am, ɛn a go mek i bɔn bɔypikin fɔ yu. A go blɛs am, ɛn i go bi di mami fɔ bɔku neshɔn dɛn, ɛn kiŋ dɛn go kɔmɔt nain bɛlɛ.”
17Ebraam lidɔm flat wit in fes na grɔn, i bɔs laf ɛn aks insɛf se, if man kin bɔn pikin we i ol wan ɔndrɛd ia. Ɛn if Sera go ebul bɔn pikin we i ol naynti. 18Ebraam beg PAPA GƆD se, “Duya, mek Ishmɛl bi di pikin we go gɛt di blɛsin.”
19Dɛn PAPA GƆD se, “Nɔ-o! Yu wɛf Sera go bɔn bɔypikin fɔ yu ɛn yu fɔ gi am nem Ayzak.#17:19 Ayzak Dis nem na Ibru min: I laf. A go mek mi Kɔvinant wit am ɛn wit insɛf yon jɛnareshɔn dɛn, we go bi Kɔvinant we gɛt fɔ de sote go. 20Fɔ Ishmɛl in yon say, a dɔn yɛri wetin yu se. A go blɛs insɛf, ɛn gi am bɔku pikin dɛn ɛn mek insɛf yon jɛnareshɔn bɔku. I go gɛt twɛlv bɔypikin dɛn we go rul, ɛn a go mek am bi di papa fɔ big big neshɔn dɛn. 21Bɔt mi Kɔvinant go bi wit yu bɔypikin Ayzak, we Sera gɛt fɔ bɔn dis sem tɛm nɛks ia.” 22We PAPA GƆD dɔn tɔk to Ebraam dɔn, i lɛf am.
23Ebraam obe PAPA GƆD in kɔmand ɛn sakɔmsayz in bɔypikin Ishmɛl ɛn ɔl di ɔda man dɛn nain os. I sakɔmsayz di wan dɛn we bɔn nain os ɛn dɛn wan dɛn we i bin bay. Dɛn ɔl sakɔmsayz da sem de de jɛs lɛkɛ aw PAPA GƆD bin tɛl am. 24Ebraam bin ol naynti-nayn ia we i sakɔmsayz, 25ɛn in bɔypikin Ishmɛl in bin ol tɔtin ia. 26Dɛn ɔl tu bin sakɔmsayz da sem de de. 27Ɔl di man dɛn we tap nain os, di wan dɛn we bɔn nain os, ɛn di wan dɛn we i bin sakɔmsayz wit am.
Iliyochaguliwa sasa
Jɛnɛsis 17: KRIO13
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Krio Bible © The Bible Society of Sierra Leone, 2013.