NƐHIMAYA 4
4
Nɛhimaya i Tewema Gɛnga a nasia tii Looni Gengei i wie
1Kiahuna ji Sanibalati humɛnini kɛ mua bundi looma, ngi lileweilɔ waa kɛ i gbengbanga, kɛ i hɛlɛnga Juubleisia ma. 2I ndeilɔ ngi mbaangeisia kɛ Samelia gɔgugbeisia yama yɛɛ, “Gbɔɔ Juublaa hawangɔi jisia ti pie ma? Ta gulɔ ti hindei jisia yangama? Ta saagbualɔ? Ta kpɔyɔlɔ folo yakpe gohu? Ta gulɔ ti kɔtii nasia majɔɔ ta gbua kaa wɔɔ mbimbiisia hu kɛ yee nasia ti mɔngɔ?” 3Tobaya Amɔnimɔi yɛ lɔ ngi yakama kɛ i ndenga yɛɛ, “Kɔtu bundi na ti tooma ndandakui gbi lɛma ma a gololɔ i gula!” 4Humɛni O mu Yewɔi, ajifa ti baagbuanga mu ma; ti baagbuameisia yama ti mahu, tawao bi ti ve kɔhou lɔɔlei hu ti ti hunyani. 5Baa ti jumbuisia mawɛlɛ, tawao baa ti hinda nyamuisia lufe bi yama; ajifa ti bi bundi loobleisia yɛlinga.
6Fale mu bundi loonga gbɔma, tawao bundi gbi ndaloongɔ yɛla hinda yila i foo yee gaguhayii lia; gbamaile ngenge mani yɛlɔ nungeisia ma.
7Kɛɛ ji Sanibalati kɛ Tobaya kɛ Alabibleisia, kɛ Amɔnibleisia kɛ Asidɔdibleisia ti humɛnini kɛ Jelusalɛmi bundi loolei lɔ lima gulɔ tawao ti tatonga a yee foleimeisia gbɔwula, ti lii leweilɔ waa. 8Kɛ ti kpɛlɛɛ ti hinda nyamu hugbatɛnga kɔɔ ti waa ti kɔ wɛlɛ Jelusalɛmi ma tawao ti hinda huwungɔ wie na. 9Fale mu hɛlɔ mu Yewɔi ma kɛ mu numu heinga mahugbee wie va a foloi kɛ kpindii.
10Kɛɛ Juda ndeilɔ yɛɛ, “Ngengebleisia ti gahuin lɔ gbɔyɔma, tawao ka gbotolɔ na nahi muɛɛ gu a yengela bundi ma.” 11Kɛ mu gɔnyɔuisia ti ndenga tɛɛ, “Tɛɛ kɔ tawao tɛɛ hinda gbi hu lɔ, pɛiŋ ma yaa kɔ wɛlɛ ti ma, kɛ mu ti waanga kɛ mu ngengei gɛlɛnga.” 12Ji Juublei nasia ti yɛ heini ti gblanga ti waani ti ndeilɔ mu ma hema puu tɛɛ, “I gbua ma hindei nasia gbi lekee ti heini na ta kɔ wɛlɛlɔ mu ma.” 13Fale hinda yayeingɔ wai nasia bundi wooma, hinda lawudawungɔisia, ngi nungeisia heilɔ na kia ti mbondeisia ti yɛ na, taa ti gɔboweisia, ti jɔɔlisia, kɛ ti likpeisia. 14Ji ngi yahujiani hindei jisia ma, ngi hiyenilɔ kɛ ngi ndenga samangeisia ma kɛ tokulɔisia kɛ nungeisia kpɛlɛɛ ngɛɛ, “Wua luwa ti ma. A ngili a Ndemɔi, na ngi wɔlɔngɔ, tawao ngi maluwangɔ, tawao wu lapi wu ndeweingaa va, wu hingalengeisia va, wu nyahalengeisia va, wu nyahangeisia va, kɛ wu heimeisia va.”
15Ji mu gɔnyɔuisia ti humɛnini kɛ mu ti giliya nyamuisia hungɔnga, tawao Ngewɔ i gbekpanga kulɔ, mu kpɛlɛɛ mu yamailɔ bundi gama numui gbi ngi yengemei. 16I hiye watii na ma, nya bɔilopoisia kaka yila ti yengeilɔ pɛlɛ loolei ma, tawao kaka yila sɔlisia ti yɛnilɔ ti yeya, kɔvɛleisia, ndikpeisia kɛ kɔgɔlomangaa; kɛ yee tokulɔisia ti tiayekpe loonga Juda wɛlei kpɛlɛɛ wooma, 17nasia ti yɛ a bundi loo. Haka belɛbleisia ti linilɔ a ti hakeisia a pelei na nyikɔ hu wee, nahi numu gbi lekee i yɛ haka belɛ hakei houilɔ a loko yila kɛ yee pekei i houni kɔ hakei ma. 18Tawao bundi loomɔ yee ngila gbi ngi gɔ bowei yɛ gbulɔngɔ ngi yakama ji i yɛ a bundi loo. Hindoi na a bului ve yɛlɔ nya yakama. 19Kɛ ngi ndenga samangeisia ma, kɛ tokulɔisia kɛ nungeisia gbi ngɛɛ, “Ngengei wɔlɔngɔ tawao ngavanyangɔ waa, tawao mu mahuguhangɔ a mu nyɔunyɔu bundi ma. 20A lɛma mu gama mia gbi wua bulu vɛwoi humɛni na. Mu Yewɔi a lapilɔ mu va.”
21Fale mu yɛlɔ a yenge, tawao ti lɛnga ti sɔɔlisia houilɔ i hiye ngenda tɛtei ma i too kpindii ma. 22Ngi ndeilɔ gbɔma nungeisia ma a watii na ngɛɛ, “Hindo gbi kɛ ngi bɔilopoi ti yii Jelusalɛmi, kɔɔ wɔi ti yɛ a mu mahugbee a kpindii kɛ ti yenge a foloi.” 23Fale nya ɔɔ nya ndewehingeisia ɔɔ nya bɔilopoisia ɔɔ mahugbee hingei ti tooni nya wooma, mu mu guleisia gbuani mu ma; numui gbi ngi gɔhani houilɔ ngi yejama lokoi ya.
Iliyochaguliwa sasa
NƐHIMAYA 4: RMB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Mende Bible Portions © Bible Society in Sierra Leone and Lutheran Bible Translators, 2020.