Mȧyɔs ma aŋsom 11
11
1Ka aŋsom yi aŋwɔnt ro Yudia aŋ təl kəpa tȧbona təlɔm sɔ tə po malanɛ ȧrim ra Kuru.
2Ɔwa ma Pitaŋ ɔ bek ro Yerusalɛm-e, ŋaŋ aŋa yi asema aŋ thɛkɛ kɔ, 3kaŋ pa, Mə wɔŋ ka aŋfəm aruni aŋbilakoro, mə kȧl di yi ŋaŋ. 4Ka Pitaŋ ɔ təp kətɔri ŋa ȧŋpa kətəp ka ɔtəpɛr, ɔ pa, 5I yi ka kȧpet ka ro Yɔpa, i ramnɛ; ɔwa ka marey i nənk mənəŋk, rəka rəlɔm rə thor kəwur ka ȧkȧriyana mɔ abɛla abana aŋa a kotər ka ɛkoŋ yanlɛ, ka aŋ der ro rɔmi. 6Ma i kəli ŋi təŋ-e, i nənk ɛsɛm aŋa ba tatək tanlɛ ma raru-o, ɛsɛm ya ro kȧnth-o, ɛyɛt ɛwɔrkȧ-o, yi ɛbȧmp ya ȧŋfena. 7Kȧ i təl ȧrim ara kanɛ mi, Pita yokanɛ, fai kȧmȧ mə di. 8Kɛrɛ i pa, Sako Pa, kotȧy-e rəka o rəka ara te yi rəsəm thalɔm ara yi rəyifa rə tha wɔŋ hɛ ka kȧsəŋ kȧmi. 9Kɛrɛ ȧrim rə kȧl sɔ kanɛ mi kəwur ka ȧkȧriyana, Ara Kuru ɔ po fethər-e, te bont ri rəyifa. 10Ka a yɔ ȧte haŋ məsas, ka a kȧl liŋ ŋi bɛ ka ȧkȧriyana. 11Ɔwa kəla, ka ɔlɛmp wati afəm asas aŋ der ka ȧŋseth ro sə yi, a som ŋa ro rɔmi kəwur ro Sisaria. 12Ka ɔYina ɔ kanɛ mi tə kəkɔ yi ŋaŋ kəte ba asikɛ. Ɔwa pə thas ri aŋwɔnt tamthərukin aŋe aŋ paya mi, ka sə wɔŋ ka ȧŋseth ŋa ɔthem. 13kɔ kanɛ su to ɔ po nənk ɔmaleka ɔ təmȧ ka ȧŋseth ŋɔŋ, ɔ pa, Som ro Yɔpa kətela Saymɔn ɔwe ba ȧŋgbȧnthir ŋa Pita; 14ɔ tə kanɛ mu sim ka ȧtȧ mȧ mə kisi, munɔ yi kabɔr ka mu bɛ. 15Ɔwa, ma i təp kəfɔf-e, ɔYina məsəm ɔ thorər ŋa hali mɔ ro rɔsu ka katəp. 16Ka i kȧl nanɛ ȧrim ra ɔMarki ma ɔ pa, Tɛntɛnɛ Yɔnȧŋ ɔ baftays yi mȧnt, kɛrɛ a tə baftays nu yi ɔYina məsəm. 17Tiyȧŋ ma Kuru ɔ sɔŋ ŋa ȧŋboya ŋin mɔ mɔ sɔŋ su ma sə lanɛ ka ɔMarki Yisɔs Kraist-e, min kanɛ kəpa i gbəli timanɛ Kuru-i? 18Maŋ təl mȧtȧy ame-e, aŋ taŋk, kaŋ yikis Kuru, aŋ pa, Ɔwa Kuru ɔ po sɔŋ tȧbona təlɔm sɔ kathupi ka aŋesəm.
19Tiyȧŋ ŋaŋ aŋa sakanɛ salata ȧŋsɔmpanɛŋ aŋa yokanɛ ta Stifɛn-əŋ aŋ kɔth haŋ kəkɔ ro Finisia, ro Saiprɔs yi ro Antiɔk, aŋ fɔf hɛ ȧrim ka wuni o wuni thambe aŋ Yuda gbo. 20Kɛrɛ aŋlɔm kətɔŋ ka ŋaŋ aŋ yi afəm aruni ŋa ro Saiprɔs yi ro Sirini. Aŋe, maŋ bek ro Antiɔk-e, aŋ fɔfȧnɛ aŋKrik sɔ, aŋ fɔf ta ɔMarki Yisɔs. 21Ka kȧta ka ɔMarki kə yi yi ŋaŋ, ka afəm agbȧthi aŋ lanɛ aŋ lafthɛ ka ɔMarki. 22Ka tȧgbuŋ taŋ tə bek ka ɛləns ya aŋchɔch ro Yerusalɛm, kaŋ som Barnabas kȧmȧ ɔ kɔ haŋ ro Antiɔk. 23Ɔwa kɔnɔ ma ɔ bek-e, ɔwa ɔ nənk ȧŋboŋa ŋa Kuru-e, pə bɔnɛ kɔ. Kɔ maŋ ŋa bɛ tə kəgbȧpsȧ ɔMarki rə məbotəs ma ȧmerȧ. 24kotȧy-e ɔ yi wuni finɔ, ɔ la ɔYina məsəm yi kəlanɛ; ka afəm agbȧthi aŋ bȧrnɛ ka ɔMarki. 25Kədarəŋ kati ɔ kɔnɛ ro Tarsɔs tə kəthɛns Sɔl-əŋ. 26Ɔwa ma ɔ po fir kɔ-e ɔ kȧrȧ kɔ ro Antiɔk. Ka pə re yi ka kəren kəlolok aŋ gbanɛ yi aŋchɔch, aŋ thəksa afəm agbȧthi. Ɔwa ro Antiɔk, rə a mɔtha bont aŋkarande aKristiɛn.
27Ɔwa ka marey ame anȧbi aŋ thor ro Antiɔk kəwur ro Yerusalɛm. 28Ka ukin ka ŋaŋ ɔwe a bont Akabɔs, ɔ təmȧ, kɔ tɔri ŋa ka aŋfɔsɔ ŋa ɔYina kəpa dor rəbana rə tə yi ka ȧdȧru bɛ; are rə yɔnɛ ka marey ma Klɔdiɔs. 29Ka aŋkarande, ukin o kin mɔ kagbəli kɔŋ kə yi, aŋ botəs tə kəsomra kəmar ka aŋwɔnt aŋa yi ro Yudia. 30Ȧte aŋ yɔ, kaŋ somra ki ka aŋbȧki ka mȧta ma Barnabas yi Sɔl.
Iliyochaguliwa sasa
Mȧyɔs ma aŋsom 11: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.