Mȧyɔs ma aŋsom 16
16
1Pɔlȧŋ ɔ der sɔ ro Dabi yi ro Listra. Ɔwa kəla, ukarande ulɔm ɔ yi ri, ȧŋes ŋɔŋ ŋə yi Timɔthi, ɔwan runi ka uYuda ubɛra ɔwe lanɛ, kɛrɛ ɔkas kɔŋ ɔ yi uKrik. 2Ɔwe, ɔ ba ŋes afinɔ ka aŋwɔnt aŋa yi ro Listra yi ro Ikoniɔm. 3Ka Pɔlȧŋ ɔ yema kȧmȧ ɔ paya kɔ ka ȧŋbiyas ŋɔŋ tiyȧŋ ɔ birons kɔ salata aŋYuda aŋa yi ka mȧgbȧp mati, kotȧy-e ŋa bɛ aŋ tȧrȧ kəpa ɔkas kɔŋ ɔ yi uKrik. 4Ɔwa maŋ gbəkinɛ tapet-e, aŋ laŋklia ŋa magbək ama aŋsom yi aŋbȧki aŋa yi ro Yerusalɛm aŋ po gbək. 5Ɔwa ɛchɔch ɛ bȧr sɔthɔ afɔsɔ ka kȧlanɛ, yi kagbath ka ŋaŋ kə bȧrnɛ ȧrey o rey.
6Ɔwa maŋ po gbəkinɛ ro Frikia yi ro Kaletia-e, ɔYina məsəm ɔ bɛnt ŋa kətɔri ȧrim ro Asia. 7Maŋ po bek ka ɔlomanɛ wa ro Misia-e, aŋ mɛm tə kəkɔ ro Bithiniya, kɛrɛ ɔYina ka Yisɔs ɔ selɔ hɛ. 8kaŋ thas ro Misia, aŋ thor ro Troas. 9Ka Pɔlȧŋ ɔ nənk mənəŋk tȧtȧk; ulaŋgba ka ro Masidoniya ɔ təmȧ, ɔ nɛmthɛnɛ kɔ, ɔ pa, Fəsi ro Masidoniya, mə mar su. 10Ma ɔ po nənk manəŋk ame-e, ka ɔlɛmp wati sə thɛns roŋ tə kəkɔ ro Masidonya-e, ma sə lanɛ yathi kəpa ɔMarki ɔ tela su tə kətɔri ȧkɛra kəfinɔ ro rɔŋaŋ.
11Tiyȧŋ sə bȧkȧ ka abil ro Troas, sə kɔ toloŋ ro Samothresi, ɔwa ka ȧŋrey ȧtandȧ, ro Niapolis. 12Kəwur ri sə kɔ ro Filipay, ȧke yi kȧpet kətɔtɔkɔ ka ȧŋgbȧp ŋa ro Masidoniya, ȧŋbomp ŋa ro Rom; ka sə yirȧ ka kȧpet kati ta mərey məlɔm. 13Ɔwa ka aŋsabath sə wur ro pet, sə kɔnɛ ro baŋ dayɛr ro sə nanɛ a gbanɛ tə kəramnɛ; rə sə yirȧ, sə fɔfȧnɛ aŋfəm abom aŋa gbanɛ ri. 14Ka ubɛra ulɔm, ȧŋes ŋɔŋ ŋȧ yi Lidya, uthila totha təyim-e, ɔ yi ka kȧpet ȧke a bont Thiatira, ɔwe bȧtho Kurɔŋ; kɔnɔ təlȧ su. Ɔwa ɔMarki ɔ kanthi ȧŋmerȧ ŋɔŋ kȧmȧ ɔ botər ȧmerȧ ta mȧtȧy ama Pɔlȧŋ ɔ fɔf. 15Ma a po baftays kɔ yi kabɔr kɔŋ-e, ɔ nɛmthɛnɛ su ɔ pa, Bepi nə gbək kəpa minɛ i yi ubɔthi lanɛ ka ɔMariki-e, der nu ka ȧŋseth a mi, nə yianɛ ri. Kɔ kithinɛ su.
16Ka pə re yi ma sə kɔnɛ ka ɔdɛr ɔramnɛ-e, uwath bɛra ulɔm ɔwe ba ukərəfi ka kȧthupəs ɔ bəp su, ɔwa ɔmarki kɔŋ ɔ la sɔthɔ amunafa afinɔ ka kathupəs kɔŋ. 17Ɔwe-əŋ, ɔ tȧŋ Pɔlȧŋ yi saŋ rə kəsel ɛrɔŋ kəpa, Afəm aŋe aŋ yi ɛbɔy ya ɔKuru ɔwe yi rokɔm kɔm, aŋa mə tɔri nu aroŋ ra kȧkisi. 18Ɔ po yɔ ȧte ta mərey məgbȧthi gbȧthi, kɛrɛ ma pə kɛtha Pɔl rə amera-e, ɔ lafthɛ ɔ pa ka ɔkərəfi, I yamari mu ka ȧŋes ŋa Yisɔs Krayst, wur ka ɔwath ubɛra. Kɔ wur ka ɔlɛmp wati.
19Ɔwa ma amarki ŋɔŋ aŋ nənk kəpa ȧŋsabu ŋa kamunafa ka ŋaŋ aŋ poŋ-e, aŋ wop Pɔlȧŋ yi Sailas-əŋ, aŋ kera ŋa ka ɔdɛr ɔthila rodi ka aŋgbəka. 20Ɔwa maŋ kȧrȧ ŋa ka aŋbȧy aŋ pa, Aŋfəm aŋe, maŋ yi aYuda, aŋ bora kəsɔmpa kȧpet kȧsu, 21ɔwa aŋ thəksa ɛsiraŋ ɛyɛ sə te gbəli malanɛ, thalɔm wop, ma sə yi aRom. 22Ka ȧruniya rə yokar ŋa, ka aŋbȧy aŋ bus ȧsuma taŋ rə kəpiməs ti, kaŋ yamari kȧmȧ a sapa ŋa təsɛthɛ. 23Maŋ po sap ŋa-e, aŋ bot ŋa ka ȧŋseth ŋa tȧrəŋka, kaŋ yamari ɔbumər kȧmȧ ɔ bɛnɛ ŋa ɔbaksər. 24Ɔwa kɔnɔ-e, ma ɔ po sɔthɔ ayamari awunɔŋ-e, ɔ bot ŋa ka ȧŋkonko rokor, ɔ tand ŋa ka ȧŋkuy.
25Kɛrɛ mɔlɔ ma kəren datɔŋ Pɔl yi Sailas aŋ ramnɛ aŋ lensir Kuru rə məleŋ, ɔwa antɛndɛbira aŋ təlȧ ŋa. 26Ɔwa ka ɔlɛmp wati ȧŋthɔf aŋ yɛr kəyɛr kəbana haŋ ɔtəma wa ȧŋseth ɔ yiŋkthanɛ. Ka ɔlɛmp wati tadare bɛ tə kanthɛ, ɔwa məsekəranɛ ma wuni o wuni mə səlɛ. 27Ɔwa ma ɔbumər ɔ thəmɛ-e, ɔ nənk tarare ta ȧŋseth ŋa tȧrəŋka bɛ tə kanthɛ, kɔ tali aŋgbathɔ ŋɔŋ, ɔ yema difnɛ pəkasifɛ ɔ nanɛ kəpa atɛndɛbira aŋ po toŋk. 28Kɛrɛ Pɔlȧŋ ɔ ŋata rim ɔ pa, Te yɔnɛ ɔbaŋ, kotȧy-e saŋ bɛ sə yi nɔ. 29kɔ tela ta amotha, ɔ wɔŋ, ɔ gbəpsa rodi ka Pɔl yi Sailas-əŋ yi kəyɛr, 30kɔ wurɔ ŋa rokaŋ, ɔ pa, Pa-ŋaŋ, to mə i yɔ kȧmȧ i kisi-e? 31kaŋ pa, Lanɛ ka ɔMarki Yisɔs Krayst, ɔwa mə tə kisi, munɔŋ yi kabɔr ka mu bɛ. 32kaŋ fɔfȧnɛ kɔ ȧrim ra ɔMarki, yi ŋaŋ bɛ aŋa yi ro seth kɔŋ. 33Ɔwa ka aŋhawa ŋati gbeŋ ka tȧtȧk, ɔ gbasi ŋa, kɔ yak tȧsam taŋ, ka a baftays kɔ yi aŋfəm ŋɔŋ sɛŋk. 34Kərarəŋ kati ɔ kȧrȧ aŋsom ro seth kɔŋ, ɔ bot ɛyɛt ɛdi rodi ka ŋaŋ, kɔ sel məbɔnɛ yi kabɔr kɔŋ bɛ, ma ɔ po lanɛ Kuru.
35Kɛrɛ ma pə po sɔk-e, aŋbȧy aŋ som ɛbɔy yaŋ tə kəpa, Ter aŋfəm aŋaŋ kȧmȧ aŋ kɔnɛ. 36Ka ɔbumər ɔ kanɛ Pɔlȧŋ, aŋbȧy aŋ som tə kəter nu nə kɔnɛ, tiyȧŋ wur nu, kɔnɛ nu yi məthɔfəl. 37Kɛrɛ Pɔl ɔ pa ro rɔŋaŋ, Aŋ po sap su gbafəth kəte fɔf ȧŋpa a su, ma sə yi aRom, kaŋ bot su ka ȧŋseth ŋa tərəŋka. Ɔwa ka-ake aŋ yema wurɔ su gbo sɔi-i? Yi thahɔ. Thambe ŋaŋ gbeŋ aŋ der wurɔ su. 38Ka ɛbɔy aŋ kanɛ aŋbȧy ȧsim ȧte, ɔwa aŋ nesa maŋ təl kəpa aŋ yi aRom. 39kaŋ der aŋ nɛmthɛnɛ ŋa, ɔwa maŋ po wurɔ ŋa aŋ yif ŋa kȧmȧ aŋ wur ka kȧpet. 40Ma Pɔlȧŋ yi Sailas-əŋ aŋ wur ka ȧŋseth ŋa tərəŋka-e, aŋ wɔŋ ka ȧŋseth ŋa Lidia. Ɔwa maŋ po nənk aŋwɔnt-e, aŋ bɛfəth ŋa, kaŋ kɔnɛ.
Iliyochaguliwa sasa
Mȧyɔs ma aŋsom 16: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.