Luk 13
13
1Alɔm aŋ bəpər ka ȧŋlɔkɔ ŋati aŋa kanɛ kɔ ta aŋKalili aŋa Paylet ɔ kuluŋ mȧtir maŋ yi asathka ta ŋaŋ. 2Ka Yisɔsȧŋ ɔ lasia ŋa ɔ pa, Nə nanɛ aŋKalili aŋe aŋ yi aləs pəthasi aŋKalili bɛ-i pəkasifɛ aŋ nakasi mȧtȧy ame-i? 3I kanɛ nu, sako, kɛrɛ thambe nə thupi-e, naŋ bɛ nə tə dinɛ yaŋ. 4Ɔwa aŋtɔfɔt tamthərɛsas, aŋa ȧŋseth abɔli rəkɔm ro Silɔm aŋ fumpər ŋa, aŋ dif ŋa, nə nanɛ kəpa aŋ yi aləs pəthasi aŋfəm alɔm bɛ aŋa yirȧ ro Yerusalɛm-i? 5I kanɛ nu, sako, kɛrɛ thambe nə thupi-e, naŋ bɛ nə tə dinɛ yaŋ.
6Ɔ fɔf sɔ aŋlomɔ aŋe, Wuni lɔm ɔ ba ŋənt ŋa aŋgbɔnɔ ro kuŋk kɔŋ, kɔ der tə kəthɛns məkomi kɛrɛ ɔ fir hɛ ma. 7kɔ pa ka ȧŋbɔy ŋɔŋ, Kəla, təren təsas i der tə kəthɛns məkomi ka aŋənt aŋe kɛrɛ i fir hɛ ma. Tap ŋi. To pə som aŋ ləsər sɔ aŋthɔf-e? 8kɔ lasianɛ kɔ ɔ pa, Pa, ter ŋi kəren ake sɔ, ɔwa i ti bɛsər ŋi, i ti bɛmpar ŋi finɔ. 9Bepi aŋ kom məkomi kətəp ka ȧŋlɔkɔ ŋati, ɔfinɔ. Bepi mən aŋ kom hɛ-e, mə gbəli tap ŋi. 10Ɔwa ɔ bɔ thəksa ka aseth agbanɛ alɔm ka ȧŋrey ŋa aŋsabath. 11Ɔwa kəla, wuni bom ɔ yi ri ɔwe ba rətu təren tɔfɔt tamthərɛsas. Ɔ po nuthnɛ bɛ, ɔ gbəli hɛ sɔ təmȧ toloŋ. 12Ɔwa ma Yisɔs ɔ nənk kɔ, ɔ tela kɔ ro rɔŋɔŋ, kɔ pa, Ya, a po səli mu ka ratu ra mu. 13kɔ reŋ kɔ mȧta mɔŋ, ɔwa ɔlɛmp wati ɔya ɔ təmȧ toloŋ, ɔ thɔkəs Kuru. 14Ɔwa rȧbomp ka ȧŋseth agbanɛ ɔ bansȧ pəkasifɛ Yisɔsȧŋ ɔ po yenkəs ɔya ka aŋsabath, kɔ pa ka aŋfəm, Mərey tamthərukin mə yi ta afəm tə kəyɔ məpanth; tiyȧŋ der ka mȧrey mati kȧmȧ a ramər nu, kɛrɛ ka aŋsabath thahɔ. 15Ka ɔMarki ɔ lasia kɔ ɔ pa, Naŋ amunafaki, wuni o wuni ka nu ɔ səli hɛ ɔna yi aŋsofali ŋɔŋ ka ȧŋsabath-i, ɔ kera kɔ tə kəmun-i? 16Ɔwa ɔwuni bom ɔwe, ma ɔ yi wan ubɛra ka Ebraham-e, ɔwe Sethani ɔ po sek ta təren tɔfɔt tamthərɛsas-e, pə mar hɛ tə kəsəli kɔ ka ȧŋsabath-i? 17Ma Yisɔs ɔ fɔf mȧtȧy ame-e, aŋtheranɛ ŋɔŋ bɛ aŋ lap. Ɔwa aŋfəm alɔm bɛ aŋ ba məbɔnɛ ta mȧtȧy məkabanɛ ama ɔ yɔ.
18Ka Yisɔs ɔ pa, Ko rəka rȧbȧy ra Kuru rə bȧlȧnɛ-e? Ɔwa ko rəka rə i gbəli lomɔ ri-e? 19Rə bȧlȧnɛ aluka ŋa amustard aŋa wuni ɔ gbasi ɔ tɛp ŋi ro kuŋk kɔŋ, kaŋ lɔkɔ, aŋ səkɛ ŋənt. Ɔwa ɛbȧmp aŋ der yirȧ ka mara mati. 20Yisɔs ɔ pa sɔ, Ko rəka rə mə i lomɔ rȧbȧy ra Kuru-e? 21Rə bȧlȧnɛ mɔ ɛgbith ɛyɛ wuni bom ɔ gbasi ɔ maŋk yi ka arɛkɛ ɛthunth ɛsas, haŋ ɛgbith ɛ kuf ti bɛ.
22kɔ thas ka təpet yi təgbɔm, ɔ thəksa mɔ mə ɔ kɔth kɔth kəkɔ ro Yerusalɛm. 23Ka wuni lɔm ɔ pa ro ŋɔŋ, Pa, afəm athȧn gbo ŋa mə kisi-i? 24kɔ pa ro ŋaŋ, Timnɛ nu tə kəwɔŋ ka kadare kəthiŋkanɛ, ȧtesoma-e i kanɛ nu, agbȧthi aŋ tə thɛns aroŋ tə kəwɔŋ ri, kɛrɛ aŋ gbəli hɛ. 25Ma ɔthem ka ȧŋseth ɔ po yokanɛ-e, ɔ po kantha kadare-e, ɔwa nə təp kətəma rokaŋ, nə gbȧtgbȧt ka kadare, nə pa, Pa, kanthɛ su; ɔ tə wosȧnɛ nu kəpa, I tɛ hɛ nu. Nia tha yi aŋyathki a mi. 26Ka mə nə təp kəpa, Saŋ sə la di, sə la mun ro der ka mu kədi, ɔwa munɔ mə la thəksa ka takaŋ ta su. 27Kɛrɛ ɔ tə pa, I kanɛ nu, i tɛ hɛ ro nə wur; tɔnɛ mi raŋ, naŋ aŋyɔ məkənȧ. 28Kəkulɔ yi kəŋȧkŋȧk ɛsek kə tə yi ma mə nə nənk Ebraham, Aysak, Yekɔb, yi aŋnabi bɛ ka rȧbȧy ra Kuru, ɔwa naŋ a fitha nu rokaŋ. 29Aŋ tə wur ro thɔrɔŋ yi ro pil, yi ka aŋdiɔ yi ka ȧŋmɛrɔ, aŋ tə yirȧ ka rȧbȧy ra Kuru. 30Ɔwa, kəla, aŋləpsɔ aŋ yi aŋa mə re yi aŋtɔtɔkɔ, ɔwa aŋtɔtɔkɔ aŋ yi aŋa mə re yi aŋləpsɔ. 31Ka ȧŋlɔkɔ ŋati gbeŋ aFaresi alɔm aŋ der aŋ pa ro ŋɔŋ, Wur, mə wur nɔ; kotȧy-e Hɛrɔdȧŋ ɔ yema dif mu. 32kɔ pa ro ŋaŋ, Kɔnɛ nu, nə kanɛ aŋgbogboro ŋati kəpa, kəla, minɛŋ i wurɔ akərəfi, i ramər tətu thonɔŋ yi ninaŋ, ɔwa ka ȧŋrey aŋa bekȧ məsas-e, i ti gbenthis mapanth ma mi. 33Kɛrɛ i ba tə kəkɔnɛ thonɔŋ, ninaŋ yi rəsɔkɔŋ; kotȧy-e pə gbəli hɛ yi kəpa unabi ɔ fi thambe ro Yerusalɛm. 34O Yerusalɛm, Yerusalɛm, munɔ ɔwe mə dif aŋnabi, ɔwe mə ləmər ŋa məsar aŋa a som ro rɔmu; ɛlɔkɔ ɛgbathi i yema naŋ thoŋkla aŋwuth a mu rɔkin, mɔ kȧbɛt mɔ thoŋkla aŋfɛth ŋɔŋ ka ɛkufna yɔŋ roratha, kɛrɛ nə selɔ hɛ. 35Ɔwa a tey ȧŋseth a mu yeŋ; ɔwa i kanɛ mu, mə ba hɛ kənəŋk mi haŋ mə pa, Uruba wɔŋ ɔwe mə der ka ȧŋes ŋa ɔMarki.
Iliyochaguliwa sasa
Luk 13: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.