Luk 24
24
1Ɔwa ka ȧŋrey ȧtɔtɔkɔ ŋa ȧŋyik, ma pə yema sɔk-e, aŋfəm abom aŋ der ka ȧŋpȧli, aŋ kȧrȧ ɛyɛt ɛfɔlfɔl ɛyɛ aŋ po bɛnɛnɛ. 2kaŋ bəp a po bənkli aŋsar kəwur ka ȧŋpȧli. 3Maŋ wɔŋ ri-e, aŋ bəp hɛ kabel ka ɔMarki Yisɔs. 4Ka pə re yi-e, ma pə sɔkanɛ ŋa ta ti-e, kəla afəm aruni ŋarəŋ aŋ təmȧ rayɛr ka ŋaŋ rə suma təgbɛntha. 5Ɔwa ma rənes rə wop ŋa-e aŋ saŋ aser taŋ ro thɔf, aŋ pa ro ŋaŋ, To som mə nə thɛns ɔkəli kətɔŋ ka aŋfi-e? 6Ɔ yi hɛ nɔ, ɔ po yokanɛ. Kala nu ɛmerȧ ta ȧte ɔ kanɛ nu ma ɔ yi ras ro Kalili, 7kəpa a ba kəlaŋkli ɔWan ka wuni ka mȧta ma aŋfəm aləs, a tə tȧŋ kɔ ka akənt kəpəŋkinɛ, ɔwa ɔ tə kȧl yokanɛ ka ȧŋrey aŋa bekȧ məsas. 8kaŋ kala ɛmerȧ ka ȧsim tɔŋ, 9ɔwa aŋ kȧlanɛ kəwur ka ȧŋpȧli, aŋ kanɛ mȧtȧy ame bɛ ka aŋkarande tɔfɔt ukin yi ka aŋlɔm bɛ. 10Ɔwa aŋ yi Meri ɔwe ro Makdala, Yoana, yi Meri ɔkara ka Yeməs; ŋaŋ yi aŋfəm abom alɔm aŋ kanɛ mȧtȧy ame ka aŋsom. 11Ɔwa aŋ nənk ȧsim ȧte mɔ məgbati; aŋ lanɛ hɛ ti. 12Ka Pita ɔ yokanɛ, ɔ gbukɛ, ɔ bȧlər ȧŋpȧli. Kɔ sanɛ ɔ kəli rokor, ɔ nənk atotha təfera tə fənthȧ thɔkɔ, kɔ kȧlanɛ, ɔ kabanɛ ta ȧte po yɔnɛ.
13Ɔwa kəla, ka ȧŋrey ŋati gbeŋ afəm ŋarəŋ aŋ bɔ kɔ rə kəgbɔm a bont ki Emeus, kə yi ɛmail tȧmthədɛrəŋ kəwur ro Yerusalɛm. 14Aŋ fɔfȧnɛ ta mȧtȧy ame ama po yɔnɛ. 15Ka pə re yi, mɔ mə aŋ fɔfȧnɛ-e, ɔwa aŋ yifəthanɛ-e, Yisɔsȧŋ, kɔn kɔnɔnɛ ɔ fat ŋa. 16Kɛrɛ a wop ɛfɔr yaŋ kȧmȧ aŋ te tȧrȧ kɔ. 17kɔ pa ro ŋɔŋ, Ko məfɔf maŋ ama nə ba ukin yi ulɔm mɔ mə nə kɔth-e? kaŋ təmȧ son, aŋ kəli ɔnɔsinɛ. 18Ka ukin ka ŋaŋ ɔwe a bont Kleopasȧŋ, ɔ lasia kɔ, ɔ pa, Mun utik ro Yerusalɛm-i? Mə tɛ hɛ ȧte po yɔnɛ ri ka mȧrey ame-i? 19Ɔ pa ro ŋaŋ, Ko tai-e? kaŋ pa ro ŋɔŋ, Mȧtȧy salata Yisɔs ɔwe ro Nasarɛth, ɔwe la yi unabi uba afɔsɔ ka məyɔs yi təfɔf rodi ka Kuru yi ka aŋfəm bɛ: 20Ɔwa aŋfode abana yi aŋgbəka a su aŋ lȧnki kɔ kȧmȧ a dif kɔ, ɔwa a po tȧŋ kɔ ka akənt kəpəŋkinɛ. 21Kɛrɛ saŋ sə gbak ȧmerȧ naŋ kəpa kɔnɔ yi ɔwe mə bani Isrɛl, ɔwa ma pə thas ri-e, aŋe ŋə yi ȧŋrey aŋa bekȧ məsas kȧbi ma mȧtȧy ame mə po yɔnɛ. 22Ma pə kȧl thas ri-e, afəm abom alɔm ka aŋniŋki a su aŋ yɔ su sə kabanɛ. Maŋ bɔra kɔnɛ ka ȧŋpȧli-e, 23maŋ te nənk kabel kɔŋ-e, aŋ der, aŋ pa aŋ po nənk amaleka rə mənəŋk aŋa pa ɔ yi ukəli. 24Ɔwa aŋfəm a su alɔm aŋ kɔnɛ ka ȧŋpȧli, kaŋ bəp ti mɔ mə aŋfəm abom aŋ pa, kɛrɛ aŋ nənk hɛ kɔ. 25Ka Yisɔs ɔ pa ro rɔŋaŋ, O naŋ apənk, nə ba ɛmerȧ ɛlel tə kəlanɛ bɛ ȧte aŋnabi aŋ po pa. 26ƆKrayst ɔ mar hɛ tə kənakasi mȧtȧy ame dɛ yi tə kəwɔŋ ka aŋyiki ŋɔŋ-i? 27Ɔwa, kətəp ka Mosis yi aŋnabi bɛ, ɔ sɔkəs ɛmerȧ yaŋ ka mȧgbal bɛ ama a gbal ta atɔŋ. 28Maŋ fatər ka aŋgbɔm ro mə aŋ kɔ-e, Yisɔs ɔ yɔ mɔ ɔ yema thas rodi 29kɛrɛ aŋ thɔnthɔ kɔ, aŋ pa, Yirȧ ras ro rɔsu, ȧtesoma-e ȧŋsum aŋ yema wɔŋ, ɔwa ȧŋrey aŋ bora kəpoŋ. Kɔ wɔŋ tə kəyianɛ yi ŋaŋ. 30Ka pə re yi ma ɔ yirȧ yi ŋaŋ tə kədi-e, ɔ gbasi kəbo, ɔ ruba ki, ɔ sim ki, kɔ yerəs ŋa. 31Ka a kanthi ɛfɔr yaŋ, kaŋ tȧrȧ kɔ; kɛrɛ ɔ dinɛ ŋa. 32kaŋ pa ukin ka ɔlɔm, Tabuth ta su tə mara hɛ rokor kȧsu ma ɔ bɔ fɔfȧnɛ su ro roŋ-i, ɔwa ma ɔ tɔri su mȧgbal-i? 33Ka ɔlɛmp wati aŋ yokanɛ aŋ kȧlanɛ ro Yerusalɛm, kaŋ bəp aŋsom tɔfɔt ukin yi aŋkos ŋaŋ dɛr rɔkin, 34kaŋ pa, ƆMariki ɔ po yokanɛ tɛntɛnɛ, ɔ po tɔrinɛ ka Saymɔn. 35kaŋ kanɛ ŋa mȧtȧy ama yɔnɛ ro roŋ, ɔwa to aŋ peski kɔ-e ka kasiməth kabo.
36Ɔwa mɔ mə aŋ fɔf mȧtȧy ame-e, Yisɔsȧŋ kɔn kɔnɔnɛ ɔ təmȧ kətɔŋ ka ŋaŋ, kɔ pa ro rɔŋaŋ, Ta məthɔfəl mə yi ro rɔnu. 37Kɛrɛ aŋ nesa yi rənes rəbana, aŋ nanɛ kəpa aŋ nənk amɔmpila. 38kɔ pa ro ŋaŋ, kɔyɛŋ mə nə sɔmpanɛ-e? To som ɛsikɛ ɛ der ka ɛmerȧ ɛ nu-e? 39Kəli mȧta ma mi yi ȧtȧtək ta mi kȧmȧ mə tȧrȧ ti minɛŋ! Gboŋ mi nu, ɔwa kəli mi nu, ȧtesoma-e amɔmpila aŋ ba hɛ adɛr yi təbȧnth mɔ mə nə nənk minɛ i ba. 40Ma ɔ po pa ȧte-e, ɔ tori ŋa mȧta mɔŋ yi ȧtȧtək tɔŋ. 41Ɔwa maŋ kabanɛ, aŋ gbəli hɛ lanɛ ras hali təsalata mȧbɔnɛ, ɔ yif ŋa, Nə ba hɛ nɔ da rədi-i? 42kaŋ sɔŋ kɔ kəlop kəthɔyis. 43kɔ gbasi kɔ ɔ di kɔ rodi ka ŋaŋ.
44kɔ pa ro rɔŋaŋ, Ȧsim ta mi ti ȧte, ȧte i la kanɛ nu ka ȧŋlɔkɔ aŋa i yi ras yi naŋȧŋ kəpa mȧtȧy bɛ mə ba tə kəlasər ama a gbal ta ȧtȧ mi ka aŋthɔ ŋa Mosis, yi ka aŋnabi, yi ka ȧŋSams. 45kɔ kanthi ɛmerȧ yaŋ kȧmȧ mȧgbal mə sɔk ŋa. 46Ɔwa ɔ pa ro ŋaŋ, Ya a po gbal kəpa ɔKrayst ɔ yi tə kənakasi dɛ yi tə kəkal yokanɛ ka rəfi ka ȧŋrey aŋa bekȧ məsas, 47kȧmȧ a taməs kathupi yi katerɔ ka ɛhakɛ ka ȧŋes ŋɔŋ ka tȧbona bɛ, kətəp ro Yerusalɛm. 48Naŋ nə yi məseri ta mȧtȧy ame. 49Ɔwa kəla, i som ro rɔnu aŋlahiri ŋa ɔKas kȧmi, kɛrɛ te nu bɔnɛ ro pet haŋ a lonsər nu afɔsɔ kəwur rokɔm.
50Ɔwa Yisɔsȧŋ ɔ kera ŋa haŋ aŋ lomanɛ ro Bɛthani, kɔ ŋata mȧta mɔŋ, ɔ ruba ŋa. 51Ka pə re yi-e, ma ɔ yi ka karuba ŋa-e, ɔ tey ŋa, a ŋata kɔ rokɔm ro riyana. 52kaŋ bȧtho kɔ, ɔwa aŋ kȧlanɛ ro Yerusalɛm yi məbɔnɛ məbana. 53Ɔwa aŋ yi ka ȧŋseth ŋa Kuru alɔkɔ o lɔkɔ, aŋ thɔkəs Kuru Məsaba.
Iliyochaguliwa sasa
Luk 24: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.