Luk 8
8
1Ka pə re yi kədarəŋ kati ɔthan-e, Yisɔs ɔ kɔnɛ ka tapet yi tagbɔm bɛ, ɔ taməs, ɔwa ɔ tɔri ȧkɛra kəfinɔ ka rȧbȧy ra Kuru, ka aŋkarande ŋɔŋ tɔfɔt ŋarəŋ aŋ paya kɔ, 2yi afəm abom alɔm aŋa a po ramər rə akərəfi aləs yi ka tətu; Meri ɔwe a bont Makdala, ka ɔwe akərəfi tȧmthədɛrəŋ aŋ wur, 3Yoana ɔrani ka Kusa, ȧŋbɔy ŋa Hɛrɔd, yi Susana, yi agbȧthi alɔm sɔ, aŋa mar kɔ yi ɛyɛt yaŋ.
4Ma afəm agbȧthi aŋ thoŋklanɛ rɔkin, aŋfəm ŋa kəpet o pet aŋ kɔ ka Yisɔsȧŋ, kɔ fɔf rə alomɔ, ɔ pa, 5Usak ɔ wur tə kəsak mater mɔŋ; ma ɔ sak məlɔm mə fumpɔ ro roŋ, ka a nas ma, ɔwa ɛbȧmp ya aŋfena aŋ gbaməs ma. 6Məlɔm mə fumpɔ rə agbalaŋ; ma mə lɔkɔ-e, ɔlɛmp wati mə wela, ȧtesoma-e mə ba hɛ mȧnt. 7Ka məlɔm mə fumpɔ rə təbaŋk ratɔŋ; ɔwa tabaŋk tə lɔkɔ yi mȧterȧŋ, ɔwa tə tɔkər ma. 8Məlɔm mə fumpɔ rə athɔf afinɔ, mə lɔkɔ, mə kom məkomi mɔlɔ ma kɛmɛ kin. Ma Yisɔs ɔ po fɔf mȧtȧy ame-e, ɔ ŋata ȧrim rɔŋ, kɔ pa, Ɔwe ba ɛləns ta ɔ təl.
9Aŋkarande ŋɔŋ aŋ yif kɔ, To aŋlomɔ aŋe an yi-e? 10kɔ pa, Ro rɔnu a sɔŋ ti tə kətara aŋgbundu ŋa rȧbȧy ra Kuru, kɛrɛ alɔm-e, a thəksa ŋa rə ɛlomɔ, kȧmȧ hali aŋ kəli aŋ nənk hɛ; hali aŋ təl-e, pə sɔk hɛ ŋa. 11Aŋlomɔ ŋi aŋe. Mater mə yi ȧrim ra Kuru. 12Ŋaŋ ka aroŋ ŋa yi ŋaŋ aŋa təl. Ȧŋlɔkɔ ŋati Sethani ɔ der, ɔ nɔy ȧrim ka ɛmerȧ yaŋ kȧmȧ aŋ te lanɛ, ɔwa aŋ te sɔthɔ kakisi. 13Ŋaŋ ka aŋgbalaŋ, maŋ təl-e, aŋ malanɛ ȧrim yi məbɔnɛ, kɛrɛ maŋ te ba ɛthənk-e, aŋ lanɛ alɔkɔ agbut gbo; ma aŋgbɔnsanɛ aŋ bek-e, aŋ bȧrȧ kəmuth. 14Ama fumpɔ rə tabaŋk ratɔŋ, mə yi ŋaŋ aŋa po təl. Ɔwa maŋ kɔnɛ ka asoŋ ta ŋaŋ-e, ɛsoli, yi rayola, yi mabɔthi ma ȧdȧru, ɛye bɛ ɛ thiŋkanɛ ŋa, ɔwa aŋ kom hɛ məkomi məgbenthis. 15Kɛrɛ ama ka ȧŋthɔf afinɔ-e, mə yi ŋaŋ aŋa po təl ȧrim, ɔwa maŋ təl-e, aŋ wop ri ɔbaksər ka tȧteŋ dɛ yi ka ȧmerȧ ȧferȧ, kaŋ kom məkomi rə kəmuyu.
16Bepi wuni ɔ moth kəmulɛ, ɔ gbəpər hɛ ki yi rəka, ɔwa ɔ bot hɛ ki ka kəfənt ratha, kɛrɛ ɔ tə bot ki ka ɔtəmər kȧmȧ ŋaŋ aŋa mə wɔŋ ro seth aŋ gbəli nənk ɔwaŋ wati. 17kotȧy-e, tȧy təmaŋknɛ tə yi hɛ, ȧte mə a te ŋaibi; amurare aŋ yi hɛ aŋa mə a te tȧrȧ, ɔwa mə a te wurɔ gbəraŋ. 18Tiyȧŋ bot nu ȧmerȧ ka mȧtəl ma nu, kotȧy-e wuni o wuni ɔwe ba, a tə bȧr sɔŋ kɔ; ɔwa wuni o wuni ɔwe te ba, a tə nɔy kɔ hali ara ɔ ba.
19Ka ɔkara kɔŋ yi aŋwɔnt ŋɔŋ aŋ der ro ŋɔŋ, kɛrɛ aŋ gbəli hɛ fatər kɔ salata ȧruniya. 20Ɔwa a kanɛ kɔ kəpa, Ɔkara ka mu yi aŋwɔnt a mu aŋ təmȧ rokaŋ, aŋ yema nənk mu. 21kɔ lasi ɔ pa ro ŋaŋ, Ɔkara kȧmi yi aŋwɔnt mi aŋ yi aŋa mə təl ȧrim ra Kuru-e, ɔwa aŋ wop ri.
22Ka pə re yi ka ȧŋrey alɔm, Yisɔs yi aŋkarande ŋɔŋ aŋ bȧkȧ ka ȧŋbil, kɔ pa ro ŋaŋ, Maŋ fəsi nu ȧŋbonka. Kaŋ wur kəkɔ romɔri. 23Mɔ mə aŋ ŋas-e, mərey mə wop kɔ, ɔwa kəŋkəl kə thor ka ȧŋbonka. Ka ȧŋbil aŋ la mȧnt, kaŋ təmȧ ɔləs. 24Ɔwa aŋ der ro ŋɔŋ, aŋ thəmi kɔ, aŋ pa, Pa, Pa, sə dinɛ. Kɔ thəmɛ, ɔ ŋal aŋfef yi rabaŋ ra ȧmȧnt. Ka ɔlɛmp wati-e, pə thɔfəla. 25kɔ pa ro ŋaŋ, Kiya kȧlanɛ ka nu-a? Ɔwa rənes yi kəkabanɛ kə wop ŋa, aŋ pa kətɔŋ ka ŋaŋ, Kanɛ ɔwe mən, ma ɔ yamari hali aŋfef yi ȧmȧnt, ɔwa ɛ təlȧ kɔ-e?
26kaŋ bek ka ȧŋthɔf ŋa aŋKadarin aŋa lomanɛ ro Kalili. 27Ma Yisɔs ɔ wur ka ȧŋbil-e, ɔ bəp ulaŋgba ka ro pet ɔwe ba ukərəfi. Ɔwa ɔwoni thɔŋ ɔ yi gbo utiŋ, ɔ yi hɛ rə aseth, ɔ yi gbo ka taboma. 28Ma ɔ nənk Yisɔsȧŋ, ɔ sel ɛrɔŋ, kɔ fumpɔ rodi kɔŋ, ɔwa yi rim rəbana ɔ pa, Ko tȧy tȧŋ i ba tə kəyɔ yi munɔ-ə Yisɔs, munɔ ɔWan ka Kuru ɔBɔli rəkɔm-e? Ɔmari mu, te sɔmpa mi. 29Ȧtesoma-e ɔ po yamari ɔkərəfi uləs tə kəwur ka ɔlaŋgba. Kotȧy-e ɔ la gbip kɔ katkat; ka a tand kɔ yi tɔrɛntha yi ɛgbete, kɛrɛ ɔ piməs atɔrɛntha, ɔwa ɔkərəfi ɔ bȧlər kɔ ro wula. 30Ka Yisɔs ɔ yif kɔ, Aŋes a mu-a? kɔ pa, Runia, ȧtesoma-e akərəfi agbȧthi aŋ wɔŋ kɔ. 31kaŋ nɛmthɛnɛ kɔ kȧmȧ ɔ te yamari ŋa tə kəkɔ ka ȧŋbi aŋa te ba ɔthȧlnɛ. 32Ȧŋlɔkɔ ŋati kuthi ka təsɔp təgbȧthi kə bɔ wɔnth ri ka kateŋ, kaŋ nɛmthɛnɛ kɔ kȧmȧ ɔ ter ŋa kȧmȧ aŋ wɔŋ ŋa. Kɔ selɔ. 33Ka aŋkərəfi aŋ wur ka ɔlaŋgba aŋ wɔŋ ka tasɔp; ka akuthi kə gbuŋ kətəlpɛ aŋtəmp ŋa ro bonka, kaŋ mɔta. 34Ma aŋfəm aŋa bumər ŋa aŋ ŋəŋk ti-e, aŋ gbukɛ, aŋ kanɛ ti ro pet, yi ka ȧŋthɔf. 35Ɔwa aŋfəm aŋ wur kȧmȧ aŋ nənk ȧtȧ po yɔnɛ, ka aŋ der ka Yisɔsȧŋ, aŋ bəp ɔlaŋgba ɔwe aŋkərəfi aŋ po wur-e, ulopra, utempi, ɔ yirȧ ka ȧtȧtək ta Yisɔs. Kaŋ nesa. 36Ɔwa, ŋaŋ aŋa nənk ti-e, aŋ tɔri aŋlɔm mɔ ɔ yɔ ɔ yenkəs kɔnɔ ɔwe la ba akərəfi. 37Maŋ təl ti-e, aŋfəm ka ȧŋthɔf bɛ aŋ nɛmthɛnɛ Yisɔs kȧmȧ ɔ wur ro ŋaŋ, pəkasifɛ rənes rəbana rə wop ŋa; kɔ bȧkȧ ka ȧŋbil ɔ kȧlanɛ. 38Ɔwa, ɔlaŋgba ɔwe la ba aŋkərəfi ɔ nɛmthɛnɛ Yisɔs kȧmȧ ɔ yi ro ŋɔŋ, kɛrɛ ɔ som kɔ, ɔ pa, 39Kȧlanɛ ro seth ka mu, ɔwa tɔri ŋa ko mȧtȧy məbana ama Kuru ɔ po yɔna mu. Kɔ kɔnɛ, ɔ taməs ka kȧpet bɛ mȧtȧy məbana ama Yisɔs ɔ po yɔna kɔ. 40Ma Yisɔsȧŋ ɔ kalanɛ-e, aŋfəm bɛ aŋ binya kɔ; ȧtesoma-e ŋa bɛ aŋ bɔ kar kɔ.
41Ɔwa kəla, ulaŋgba ɔwe yi rȧbomp ka ȧŋseth agbanɛ, ɔ ba ȧŋes ŋa Yairɔs, ɔ der, kɔ fumpɔ ka ȧtȧtək ta Yisɔs, ɔ nɛmthɛnɛ kɔ kȧmȧ ɔ wɔŋ ka ȧŋseth ŋɔŋ, 42kotȧy-e ɔ ba wan ubɛra ukin gbo, ɔ bȧk mɔlɔ ma təren tɔfɔt tərəŋ, ɔ fənthȧ tə kəfi. Kɛrɛ mɔ mɔ kɔ-e, ȧsuniya tə thiŋkanɛ kɔ.
43Ka wuni bom ɔwe mətir mə wur təren tɔfɔt tərəŋ-e, ɔ po sɔŋ ara ɔ ba bɛ ka aŋbolomba, kɛrɛ hali ukin ɔ gbəli hɛ ramər kɔ, 44ɔ der rodarəŋ kɔŋ, kɔ gboŋ amɛsɛ ma aruma rɔŋ. Ɔlɛmp wati mȧtir mɔŋ mə tey kəwur. 45Ka Yisɔs ɔ yif, Kanɛ gboŋ mi-e? Ma ŋaŋ bɛ aŋ pɛnsa-e, Pita yi ŋaŋ aŋa yi yi kɔnɔ aŋ pa, Pa, ȧsuniya tə thiŋkanɛ mu, mə kȧl yif kanɛ gboŋ mu-e? 46Yisɔs ɔ pa, Wuni lɔm ɔ gboŋ mi, ȧtesoma-e i təlnɛ afɔsɔ aŋ po wur mi. 47Ma ɔya ɔ nənk kəpa ɔ gbəli hɛ maŋknɛ-e, ɔ der yi kəyɛr, ɔ sanɛ rodi kɔŋ, ɔ kanɛ ka kabəpər ka aŋfəm bɛ ȧŋsabu aŋa yɔ ɔ gboŋ kɔ, ɔwa to ɔ sɔthɔ kəyeŋk mədɛr ka ɔlɛmp wati. 48Ɔwa ɔ pa ka ɔya, Wan kȧmi ubɛra, kȧlanɛ ka mu kə po mu yenkəs. Kɔ yi məthɔfəl.
49Ma Yisɔs ɔ yi ras ka kəfɔf-e, wuni ɔ der, ɔ wur ka ȧŋseth ŋa ɔwe yi rȧbomp ka ȧŋseth agbanɛ, ɔ pa ro ŋɔŋ, Ɔwan ka mu bɛra ɔ po fi. Te sɔ kira ɔkarmɔkɔ. 50Kɛrɛ Yisɔsȧŋ ma ɔ təl ti-e, ɔ pa, Te nesa, lanɛ gbo. Ɔwa ɔ tə kȧl sɔthɔ ŋesəm. 51Ɔwa ma ɔ bek ka ȧŋseth-e, ɔ selɔ hɛ wuni ɔ wɔŋ yi kɔnɔ thambe Pitaŋ, Yɔnȧŋ, Yeməsȧŋ, ɔkas ka ɔwath ubɛra yi ɔkara kɔŋ. 52Aŋfəm bɛ aŋ bok, aŋ kulɔ ta atɔŋ, kɛrɛ kɔnɔ ɔ pa, Te bok, ɔwath ɔ fi hɛ, ɔ dirȧ gbo. 53kaŋ sel kɔ finɔ maŋ tȧrȧ kəpa ɔ po fi. 54Kɛrɛ ɔ wurɔ ŋa bɛ, ɔ gbasi kȧta ka ɔwath, ɔ tela, Wath bɛra, yokanɛ. 55Ka aŋesəm ŋɔŋ aŋ kȧlanɛ, ka ɔlɛmp wati ɔ yokanɛ; ɔwa Yisɔs ɔ yamari ŋa tə kəsɔŋ kɔ ra rədi. 56Ka ŋaŋ aŋa kom kɔ aŋ kabanɛ, kɛrɛ Yisɔsȧŋ ɔ yamari ŋa kȧmȧ aŋ te kanɛ wuni o wuni ȧte ɔ po yɔ.
Iliyochaguliwa sasa
Luk 8: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.