Mathiu 27
27
1Ɔwa, ma pǝ sɔk-e, aŋkərbomp kǝtɔŋ ka aŋfode bɛ yi aŋbȧki ŋa aŋfǝm aŋ kɔ nǝŋkanɛ ta Yisɔs tǝ kǝdif kɔ. 2Maŋ po sek kɔ-e, aŋ kera kɔ, kaŋ lȧnki kɔ ka Paylet ɔgbǝka.
3Ȧŋlɔkɔ ŋati-e, Yudasȧŋ ɔwe sɔnd kɔ-e, ma ɔ nənk kǝpa a po sɔŋ kɔ mǝtheri-e, ɔ thupinɛ kɔ kala ɛbɛm ya aŋkala ȧferȧ kǝgba tɔfɔt ka aŋkərbomp kǝtɔŋ ka aŋfode yi aŋfǝm abȧki, 4ɔ pa, I po yɔ ahakɛ pǝkasifɛ i po sɔnd mǝtir mǝpaŋi tȧy. Kɛrɛ ŋaŋ, aŋ pa, To ȧte tǝ yi ro rɔsu-e? Munɔ ba kǝkǝlȧnɛ ti. 5kɔ fitha ɛbɛm ya ȧŋkala ȧferȧ kǝgba tɔfɔt ka ȧŋseth ŋa Kuru, ɔ wur, ɔ kɔ gbaknɛ. 6Ka aŋkərbomp kǝtɔŋ ka aŋfode aŋ gbasi aŋkala ȧferȧ, aŋ pa, Pǝ lomp hɛ tǝ kǝbot ŋi rǝ ɔbɛnɛ, ȧtesoma-e aŋkala ŋa mǝtir ŋaŋ. 7kaŋ nǝŋkanɛ, aŋ wai ȧkay ka ɛyɔftha tǝ kǝmaŋk ri atik. 8Tasom a bont ɔdɛr wati, Akay ka mǝtir, haŋ thonɔŋ. 9Ka a lasǝr ȧte Yɛrimaya ɔnȧbi ɔ fɔf-e, ma ɔ pa, A gbasi ɛbɛm ya aŋkala ȧferȧ kǝgba tɔfɔt, amɔlɔ ma ɔwe aŋwuth ŋa Isrɛl aŋ bot mɔlɔ, 10aŋ sɔŋ yi ta ȧkay ka ɛyɔftha, mɔ mǝ ɔMarki ɔ tɔri mi.
11Ka Yisɔsȧŋ ɔ tǝma rodi ka ɔgbǝka, ka ɔgbǝka ɔ yif kɔ, ɔ pa, Munɔ yi ɔbȧy ka aŋYuda-i? Ka Yisɔsȧŋ ɔ pa ro ŋɔŋ, Munɔ mǝ po ti thɔ pa. 12Ma aŋkərbomp kǝtɔŋ ka aŋfode yi aŋbȧki aŋ gbanthir kɔ-e, ɔ wosa hɛ tȧy o tȧy. 13Ka Paylet ɔ pa ro ŋɔŋ, Mǝ tǝl hɛ mȧtȧy mǝgbathi ama a seri ta ȧtȧ mu-i? 14Kɛrɛ ɔ wosa hɛ hali rim rin, haŋ ɔgbǝka ɔ kabanɛ ti. 15Ɔwa ka ȧŋlɔkɔ ŋa amet mati ɔgbǝka ɔ la tera ȧruniya wuni tand ukin, ɔwe aŋ yema. 16Ka ukǝrǝŋka ugbuŋi ɔ yi ri ka ȧŋlɔkɔ ŋati, ȧŋes ŋɔŋ aŋ yi Barabas. 17Tiyȧŋ, maŋ po thoŋklanɛ dɛr rɔkin-e, Pailatȧŋ ɔ pa ro rɔŋaŋ, Kanɛ nǝ yema i tera nu-e, Barabasȧŋ thalɔm Yisɔsȧŋ ɔwe a bont Kraist-e? 18kotȧy-e ɔ tȧrȧ kǝpa ta kǝtut tǝ aŋ lȧnki kɔ. 19Ma ɔ yirȧ ka kawaŋ ka kǝthoŋkas-e, ɔrani kɔŋ ɔ somǝr kɔ, kɔ pa, Te ba tȧy o tȧy tǝ kǝyɔ ɔlaŋgba ulompi ɔwɔŋ, kotȧy-e i sɔmpanɛ mətȧy mǝgbathi thonɔŋ rǝ kǝwɔrǝp ta sala tɔŋ.
20Ka aŋkərbomp kǝtɔŋ ka aŋfode yi aŋbȧki aŋ pǝr ȧruniya kȧmȧ aŋ thola Barabasȧŋ, dɛ yi kȧmȧ aŋ dif Yisɔsȧŋ. 21Ka ɔgbǝka ɔ pa ro rɔŋaŋ, Ureke ka ŋa ŋarǝŋȧŋ nǝ yema kȧmȧ i tera nu-e? kaŋ pa, Barabasȧŋ. 22Ka Paylet ɔ pa ro ŋaŋ, To mǝ i yɔ thɔŋ Yisɔsȧŋ-e, ɔwe a bont Krayst-e? kaŋ pa ro ŋɔŋ, Tȧŋ kɔ ka akǝnt kǝpǝnkinɛ! 23Ka ɔgbǝkȧ ɔ pa, kɔyɛŋ, ko ɔlǝs wɔŋ ɔ po yɔ-e? Kɛrɛ aŋ bȧr gbo woŋa, aŋ pa, Ta a tȧŋ kɔ ka akǝnt kǝpǝŋkinɛ. 24Ka Pailatȧŋ ma ɔ nənk kǝpa ɔ gbǝli hɛ koko-e, kɛrɛ atotok aŋ tǝp kǝfumpɔ-e, ɔ gbasi mȧnt ɔ yak mȧta mɔŋ rodi ka ȧruniya bɛ, ɔ pa, Minɛ min paŋi tȧy ka mȧtir ma ɔwuni lompi ɔwe. Kǝlɛnɛ ti nu. 25Ka aŋfǝm bɛ aŋ wosa, aŋ pa, Ta mȧtir mɔŋ mǝ rensa su, yi aŋwuth a su. 26kɔ tera ŋa Barabasȧŋ; kɛrɛ ɔ sap Yisɔsȧŋ kɔ lȧnki kɔ tǝ kǝtaŋ tȧŋ kɔ ka akǝnt kǝpǝŋkinɛ. 27Ka aŋtim ŋa ɔgbǝka aŋ kȧrȧ Yisɔsȧŋ ro seth ro aŋ gbanɛ, kaŋ thoŋkla aŋtim bɛ ro ɔ yi. 28kaŋ bus kɔ ȧsuma tɔŋ, aŋ wɔns kɔ ruma rǝyim. 29Maŋ po ru ȧniyɔ ŋa tǝbȧnk-e, aŋ reŋ ŋi ro bomp rɔŋ, kaŋ sɔŋ kɔ kǝthȧnkɛ ka kȧta kɔŋ kǝdiyɔ, aŋ sɔna kɔ tǝwu, aŋ sel kɔ, aŋ pa, Kori mu-o, ɔbȧy ka aŋYuda! 30kaŋ thufǝr kɔ, aŋ nɔy kɔ kǝthȧnkɛ, aŋ gbantha gbantha kɔ ro bomp. 31Ɔwa maŋ po sel kɔ-e, aŋ bus kɔ aruma, aŋ kala kɔ ȧsuma tɔŋ, aŋ kera kɔ tǝ kǝtaŋ kɔ ka akǝnt kǝpǝŋkinɛ.
32Maŋ wur-e, aŋ nənk ulaŋgba ka ro Sirini, a bont kɔ Saymɔn. Kɔnɔ aŋ fɔs kȧmȧ ɔ gbanɛ akǝnt kɔŋ kǝpǝŋkinɛ. 33Ɔwa maŋ bek ka ɔdɛr mǝ a bont Kɔlkɔtha-e, ara a tepa tǝ kǝpa, Ɔdɛr wa kǝgbɛŋkǝt-e, 34aŋ sɔŋ kɔ afinika tǝ kǝmun-e, a kuluŋanɛ ma yi ɔroŋkǝth. Ma ɔ tham ma-e, ɔ selɔ hɛ sɔ mun ma. 35Maŋ po tȧŋ kɔ ka akǝnt kǝpǝnkinɛ-e, aŋ yeranɛ ȧsuma tɔŋ yi kǝfȧk tǝfȧnt, kȧmȧ ȧte ɔnȧbi ɔ pa tǝ lasǝr kǝpa, Aŋ yerȧnɛ ȧsuma ta mi, ɔwa ta kafɔl kȧmi aŋ fak tǝfant. 36kaŋ yirȧ aŋ kǝlȧnɛ kɔ ri. 37Rokɔm ka rȧbomp rɔŋ aŋ bot mȧgbal ama tɔri ȧte a gbanthir kɔ, mǝ pa, YISƆS KƆNƆ ƆWE ƆBȦY KA AŊYUDA. 38Ka a tȧŋ tȧŋ ri rǝ tǝnt tǝpǝŋkinɛ yi kɔnɔŋȧŋ, akey ŋarǝŋ, ukin ka kȧdiyɔ, ukin ka kȧmɛrɔ. 39Ɔwa aŋa thas ri aŋ nals kɔ aŋ fil fil tabomp taŋ, 40kaŋ pa, Munɔ ɔwe mǝ lǝsǝr naŋ ȧŋseth ŋa Kuru, ɔwa mǝ kȧl tǝmǝr ŋi ka mǝrei mǝsas-e, kisisnɛ. Bepi mǝ yi ɔWan ka Kuru-e, wur, mǝ thor ka akǝnt kǝpǝŋkinɛ. 41Ya pǝ yi sɔ aŋkərbomp kǝtɔŋ ka aŋfode yi aŋkarmɔkɔ yi aŋbȧki aŋ sel kɔ, aŋ pa, 42Ɔ la kisis alɔm, kɛrɛ ɔ gbǝli hɛ kisisnɛ. Bepi ɔ yi ɔbȧy ka aŋIsrɛl-e, ta ɔ thor ka akǝnt kǝpǝŋkinɛ ka-ake kȧmȧ sǝ lanɛ kɔ. 43Ɔ pǝlǝnɛ Kuru; ta ɔ tafi kɔ ka-ake bepi ɔ yema kɔ-e, kotȧy-e ɔ pa, Minɛ yi ɔWan ka Kuru. 44Aŋkey sɔ aŋa a tȧŋ ka atǝnt tǝpǝŋkinɛ yi kɔnɔ aŋ kanɛ kɔ ȧsim tati sɔ.
45Ɔwa kǝtǝp ka aŋhawa aŋa bekȧ tamthǝrukin kǝkɔ ka aŋhawa aŋa bekȧ tamthǝrɛŋanlɛ asum aŋ yi ka ȧŋthɔf bɛ. 46Kɛrɛ mɔlɔ ma aŋhawa aŋa bekȧ tamthǝrɛŋanlɛ-e, Yisɔsȧŋ ɔ sel ɛrɔŋ lɛɔ, ɔ pa, Ila, Ila, lama sabakthani? Ȧtȧ a tepa kǝpa, Kuru ka mi, Kuru kȧmi, kɔyɛŋ mǝ tey mi-e? 47Alɔm aŋa tǝma ri-e, maŋ tǝl ti-e, aŋ pa, Ɔlaŋgba ɔwe ɔ tela Ilaya. 48Ka wuni kin ɔ gbukɛ ka ɔlɛmp wati, ɔ gbasi asponge, ɔ lasǝr ŋi yi afinika, kɔ bot ŋi ka kǝthȧnkɛ ɔ sɔŋ kɔ tǝ kǝmun. 49Aŋlɔm aŋ pa, Tey thɔŋ, ta sǝ kǝli bepi Ilaya ɔ tǝ re kisis kɔ. 50Yisɔsȧŋ ma ɔ po wurɔ sɔ rim rǝbɔli rǝkɔm-e, ɔ ternɛ. 51Kǝla, ȧŋkunkla ŋa ȧŋseth ŋa Kuru aŋ pima kǝtǝp rokɔm haŋ kǝbek roratha. Aŋthɔf aŋ yɛr, ɔwa masar mǝ gbaya, 52ɔwa taboma tǝ kanthɛ, ɔwa aŋfǝm ŋa Kuru agbȧthi aŋa sa po fi aŋ yokanɛ. 53Kǝdarǝŋ ka kȧyokanɛ kɔŋ-e, aŋ wur ka taboma ta ŋaŋ aŋ kɔnɛ ka kȧpet kǝsǝm, kaŋ tɔrinɛ rǝ afǝm agbȧthi. 54Ɔkaptin yi ŋaŋ aŋa yi yi kɔnɔȧŋ aŋa bumǝr Yisɔsȧŋ, maŋ nənk kayɛr ka aŋthɔf-e yi mȧtȧy ama yɔnɛ-e, aŋ nesa ɔthasǝr aŋ pa, Tɛntɛnɛ ɔwe ɔ yi ɔWan ka Kuru. 55Afǝm abom agbȧthi aŋ yi ri aŋa po tȧŋ Yisɔsȧŋ kǝwur ro Kalili, tǝ kǝyɔna kɔ, aŋ tǝma ɔbɔli poŋ aŋ kǝli. 56Meri ɔwe ro Makdala ɔ yi kǝtɔŋ ka ŋaŋ yi Meriȧŋ ɔkara ka Yemǝs yi Yoses, dɛ yi ɔkara ka aŋwuth ŋa Sɛbidi.
57Ɔwa ma rȧfɔy rǝ po bek-e, uyola ɔ wur ro Arimathia ɔ der, ȧŋes ŋɔŋ aŋ yi Yosɛf, kɔnɔ sɔ ɔ yi ukarande ka Yisɔs. 58Ɔ kɔnɛ ka Paylet ɔ thola kabel ka Yisɔs. Ka Paylet ɔ yamari kȧmȧ a sɔŋ kɔ kɔ. 59Ka Yosɛf ɔ gbasi kȧbel-e, ɔ rapǝr kɔ kotha kǝfera kǝgbǝraŋ, 60kɔ bot kɔ ka kȧboma kɔŋ kǝfu ȧke a bɛs rǝ agbalaŋ, a bǝnkli ȧsar ȧbana ka kadare ka kȧboma, kɔ kɔnɛ. 61Meri ɔwe ro Makdala yi Meri ulɔm aŋ yi ri, kaŋ yirȧ aŋ lomanɛ kȧboma.
62Ka rabǝth ara tand ȧŋrey ŋa kabɛnɛnɛ, aŋkərbomp kǝtɔŋ ka aŋfode ȧbana yi aŋFarisi aŋ thoŋklanɛ dɛr rɔkin ka Pailatȧŋ, aŋ pa, 63Pa, sǝ kala ȧmerȧ kǝpa ɔwuni tɔns tȧy ɔwɔŋ ma ɔ yi ras ukǝli-e, ɔ pa, Kǝdarǝŋ ka mǝrei mǝsas-e i ti kȧl yokanɛ. 64Tiyȧŋ yamari kȧmȧ a bumǝr kȧboma haŋ ȧŋrey aŋa bekȧ mǝsas, ta thani aŋkarande ŋɔŋ aŋ der tȧtȧk kȧmȧ aŋ keya kɔ, ɔwa aŋ pa ka aŋfǝm, Ɔ po yokanɛ ka rafi; ɔwa kayɛtha kǝlǝpsɔ kǝ tǝ yi kǝlǝs kǝthasi katɔtɔkɔ. 65Ka Pailatȧŋ ɔ pa ro ŋaŋ, Nǝ ba ubumǝr. Kɔnɛ nu nǝ bȧksǝr ki nu mɔ mǝ nǝ tȧrȧ. 66kaŋ kɔnɛ aŋ bȧksǝr kȧboma, aŋ mathlɛ aŋsar, ɔwa ȧŋbumǝr aŋ yi ri sɔ.
Iliyochaguliwa sasa
Mathiu 27: TMNNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Themne New Testament © The Bible Society of Sierra Leone, 2009.