Jone 8
8
Ko pauvezatema reko
1Ni sea kiadamu ta keta vaitake pade kasi, melai Jisu ta ota peatake Olive Ore sama Sopu kale, ni vota ota raneake sai. 2Ni omadeu lekito koko raneo kale inio vota o vaitake Jelepade kasi. Sai nio sea matu padopadoilo ta mata kevai uburake vo, nio vota ota papuake ni o taniekake nianiiekimo se. 3Ni se Mosese ko Bazu kekai nianiiekatani maba poso ni se Parese madu ta ke kati olake kama pado ko pauvezatema reko ni ke lojoekake ko sea kiadamu ko ubutiania. 4Ni seta eri va kikelake vo Jisu, “Tanala, komia reko ta kekai potoa koko ereka keru ko pauvezato. 5Ni eṉeko Bazu kale vo Mosese o ṉelai bazuekema kale ta soama reko ta ṉe daiko ko lado kale tu ko vou. Melai ṉota noi nio kiṉola?” kikelake. 6Seta so kikelake tu seta ke madoevo, tu seta kevai zuakaeko ko titizato kikelake sole. Melai Jisu ta ota loquloqutake puliama pesio sate ni ota rikitake miduku topi voko ṉase kale ama seseu kale. 7Ni sai kebeta lojoa keru inio seta ke kuimakuimaevake vo, nio vota o aunariake ni eri kiolake sekasi, “Vo me azo puliama sarueko sala ta kuleto o taiko ko lado kale,” kiolake. 8Ni vota mata ota tova loquloqutake ni ota rikitake miduku topi. 9Ni so keru seke viqa keru koa pesio poso, nio sea kiadamu ta keta tuluaziake padopado zolailo kale, qoleqole amu ta kuleto ni se vairuvairu amu ta koko tova. Ni o kiada Jisu ta ke vaevake sai, ni koa reko ta sai kobeta lojoake. 10Ni vota o aunariake ni eri kiolake kokasi, “Ṉoiza, lai ta se, kala ta obe titiziṉa ṉo, ma pui kio?”
11“Puliala, tanala,” kikolake.
Nio Jisu ta o kati tiorikake ko, “Uri, aṉa melai pui aṉai kuirika ṉo, melai ola ni pui mata tova sarueko ṉo elou,” kiolake.
Jisu ta peuru ma peuru ko zakaremu
12Ni Jisu ta mata eri kiolake sea maba madu kasi, “Aṉata peuru ma peuru ko zakaremu lala. Vo o luluelo ala aṉa ta o ṉeamukou ko saevo ko zakaremu ni vota pui opa taliovou kutumana kale,” kiolake.
13Ni se Parese matiu ta eri kikelake vokasi, “Ṉota ṉo bazuiva ṉo ṉavi, ta so ṉo kiṉolani ta pui tuvevo avo,” kikelake. 14Ni Jisu ta o mati tiorikake, “Abe bazuilou a ṉavi melai, aṉa kialani ta tuvetuve avo, ako aṉata aqai nianiia sai aṉa a quevikoi kazo ni aqai nianiia sai aṉa a ziovoa koi sole. Meta pui meqai nianiia sai aṉa a quevikoi kazo ni pui meqai nianiia sai aṉa a ziovoa koi. 15Meta me ereka ko titizato maba ko erekako titizato kale, melai aṉata puliala a ditiziva ko meme erekako titizato kale. 16Melai aṉata a ditizata tea, aṉako titizato ta tuvevo ama ikio, ako kokale ta aṉata pui a qiada kalala; ako aṉavo Mama vo o soroeleni aṉa ta aṉa sase tu vota o tauvelo sole. 17Me Mosese o katimelema Bazu kale ta ko rikiziovi ko omuqa kidi qokai bazutako quli ta tuvevo ama, kikove. 18Ni koa Bazu ko lulueko kale avo inio aṉata ada bazuiva a ṉavi, ni aṉavo Mama vo o soroeleni aṉa melai olai bazuta,” kiolake. 19Nio seta eri kikelake, “Lai ta vo ṉovo mama?”
Ni Jisu ta eri kiolake, “Meta pui melai nianiia aṉa ni pui mevai nianiia aṉavo Mama. Meta lula melai nianiia aṉa tea meta mevai nianiio nio mata aṉavo Mama,” kiolake vo Jisu.
20Jisu ta o kasekake koa kiadama quli vo o nianiiekate keru Jelepade kale, sai pikazato ko teamuteamu ke vaekakoi zama zaekale. Ni puliala se lotu tanatanamu azo se kekai kaikuapani voko nianiiekato ta o noqoevake vo ako voko taku ta pui nio ko baroake sole.
Jisu ta o kuevi aukale azo
21Nio Jisu ta mata eri kiolake sekasi, “Aṉata a vaemelou ni ada ziovou, ni meta me vaililou aṉa, melai meta pui meba lelou aṉa ni meda vouvou meko sarueko poso sate. Meta maba pui meba roveovou zio sai aṉa a ziovoa koi,” kiolake.
22Nio se Jiu ama tanatanamu ta eri kikelake ke ṉavio kude, “Vota o kaseka ta, ‘Meta pui meba roveovou zio sai aṉa a ziovoa koi’ kiola ta o ṉavi ota vouvailou kiola inio kio?” kikelake.
23Ni Jisu ta o mati tiorikake, “Meta koi miduku kalea mela, melai aṉata a quevini lala aukale azo. Meta komia peuru ma peuru kalea mela, melai aṉata pui komia peuru ma peuru kalea lala. 24Sokale avo inio aṉata a bazuemela ta meta meda vouvou meko sarueko poso sate. Ako meta pui me duvevo puekou ko ‘Aṉa inio ko Aṉa lala’#8:24 Ana inio ko aṉa lala: Komi ta vo Baṉara ko ni vo ova kasekema vo Mosese Ekisodasi buka kale (Ekisodasi 3:14). kio, ta meta meda vouvou meko sarueko poso sate,” kiolake.
25Sole “Lala ṉa inio ko ṉo?” va kikelake. Ni Jisu ta o mati tiorikake, “Kulekuleto aṉa melati kiavevo ko tisoiko. 26Kubo quli kio aṉata a melai kuirikou me ko sarueko kale avo. Melai vo o soroeleni aṉa ta kerula kala, ni aṉata ama kaseka se peuru ma peuru kale ama maba poso ko quli aṉa a viqema vokasi,” kiolake.
27Melai seta pui kepa vakakuke ta vo Baṉara inio voa Mama vo omai bazueveni se. 28So sole Jisu ta eri kiolake sekasi, “Meme zolaelou keru aṉa maba a eveni lala nio meta meqai nianiiovou ko ‘Aṉa inio ko Aṉa lala’ kio. So inio meta meqai nianiiovou ko aṉata pui a ereka a qiada kama quli, melai kota aṉavo Mama olai nianiiekikema aṉa tu a qaseko nio kimevou. 29Ni vo o soroeleni aṉa ta pui o vaela aṉa a qiada, melai vota aṉa sase, ako aṉata a ereka vo ko zolevako quli kiada keru sole,” kiolake.
30Ni kubo madu sai ke viqeni Jisu kiovevo ta ke tuvevo puevake vo.
Ruparupasi amu ni mabaku poso
31So sole Jisu ta eri kiolake se Jiu amu kasi seke tuvevo puekeni voko pesio, “Meta tuvevo avole me zorikou aṉako nianiiekato inio meta aṉako tuvevo ama disaipeli poso mela me elou, 32ni meta meqai nianiiovou ko tuveano, nio koa tuveano ta ko rupasimelou me,” kiolake.
33“Eṉeta Ebarahami ko vikuvikula ṉela inio, ni eṉeta pui mabaku ṉela. Nio loma ikio koko kalo ko ‘Meta me rupasiovou’ ka kiṉolako?” kikelake.
34Nio Jisu ta eri kiolake sekasi, “Tuvevo avole aṉata a bazuemela me, vo o erekani ko sarueko poso ta sarueko vo mabaku. 35Vo mabaku ta pui saidi ko ataataiti kale ala opa elou kiada keru, melai vo meqora inio noqola kala koa saidi kale. 36So sole vo Meqora ta o rupasimelou me, inio meta tuvevoa ruparupasia mela me elou. 37Aṉata a melai nianiia meta vo Ebarahami ko vikuvikula mela inio kio, melai meta mebe la abamata tu me vouvaelo aṉa, ako meta pui meba ṉeamukou aṉako nianiiekato sole. 38Aṉata a qaseka ko quli a Mama ola kasekema quli, melai meta mebeta erekala vo mevo mama melati kiovevo,” kiolake.
39Nio seta ke vati tiorikake vo, “Eṉevo mama ta Ebarahami tivoine,” kikelake. Nio Jisu ta eri kiolake, “Tuvevo avole meta Ebarahami ko meqora poso mela tea, meta me lulueko inio ereko vo o erekema sidopu. 40Kiadama quli ko aṉa a melai bazuekako ta koa tuveano lula aṉa a viqako vo Baṉara kasi azo, melai meta mebe la abamata aṉa tu me vouvaelo kimela. Ebarahami ta pui opa ka zariovi koa kalo! 41Meta mebe ereka inio ko quli mevo mama o erekako quli,” kiolake.
“Baṉara inio omadeu pado eṉevo Mama, eṉe inio voko tuvevo ama meqora poso ṉela, pui buniu meqora ṉela,” kikelake.
42Nio Jisu ta eri kiolake sekasi, “Tuvevo avole Baṉara inio mevo mama tea, meta me roquelo inio aṉa, ako aṉata a quevi Baṉara kasi azo, ni erisaṉa aṉata koi. Aṉata pui aba kuevi a ṉaviko vatolo kale, melai vo inio o soroeleni aṉa. 43Noi sole inio meta pui me baqumuka aṉa kialani? Tuvevo avole meta pui me baqumuka ko, ako meta meda lupaova didieko aṉako bazubazu sole. 44Meta vo Setani ko meqora poso mela inio, nio meta meqa zaria lulueko voa mama ko vatolo. Koko tanitanila keru azo vota o vouvaeke ko maba. Ni vota pui o vinaiva tuveano kale, ako vo tona ta puliama tuveano sole. So keru vo o lipalipata keru vota okai pesia maba o ṉaviko pesio ako vota kiadama lipalipato ko raki sole. 45Melai aṉata a melai bazueka ko tuveano, ni sekale meta pui tuvevo me ila aṉa. 46Lala me azo ta olai kuirikani aṉa ko sarueko? Puliala! So sole noi sole inio meta pui me duvevo puela aṉa, so keru aṉa a melai bazueka keru ko tuveano? 47Vo Baṉara vo maba ta o viqa vo Baṉara ko pesio. Meta pui Baṉara ko mela sole pui meba tava viqou voko pesio,” kiolake.
Jisu ni Ebarahami
48Nio se Jiu ama tanatanamu ta eri va kikelake vo Jisu, “Eṉe kiṉelani ta tuvevo ikio, ṉota utube ala Sameriala maba ṉa ni oṉai onobatani ṉa kala ziolo!” kikelake.
49Nio Jisu ta o mati tiorikake se, “Aṉata puliama ziolo salala, aṉata a rauraeva a Mama, melai meta me zarazaraela aṉa. 50Aṉata pui a vailika a ṉaviko raurailo mekasi. Melai vo o vailikani ko mekasi ta inevoana, ni vo inio vo o titizato ala. 51Tuvevo avole aṉata a bazuemela me, vo o zoriko ala aṉako bazubazu ta pui opa vouvou,” kiolake.
52Nio ko quli ke viqake se Jiu ama tanatanamu nio eri kikelake vokasi, “Vairutu ta maba ṉe duvevo pueṉa ta ṉota kama pado ziolo salaṉa! Ebarahami ta lula ota vovi, ni se poropita madu melai lula keta vovi, melai ṉota eri kiṉola, ‘Vo ota la zoriko ala aṉako bazubazu ta pui opa vouvou,’ kiṉola! 53Eṉevo taite Ebarahami ta lula ota vovi; noi sole inio ṉoda va paloaso vo Ebarahami kiṉola? Ni se poropita madu melai lula keta vovi. Nonia kerukeruilo inio ṉo evani ṉo ṉavi?” kikelake.
54Ni Jisu ta o mati tiorikake, “Aṉata a rauraiva a ṉavi tea, aṉako raurailo ta kalo pide ama ikio. Melai vo o rauraelani aṉa ta a Mama inio, vo mevo Baṉara va kimelani. 55Meta maba pui me baqumuva vo, melai aṉata avai nianiia vo. Melai aṉata pui avai nianiia kiala tea, aṉata kala lipalipa kalala inio, me jari. Melai aṉata avai nianiia vo ni a zorika voko bazu. 56Mevo taite Ebarahami ta ota zolei so keru vo o paqumuke keru ta vota o kelou aṉako kilo miduku kale. Ni vota o keve ko ni ota zoleike,” kiolake.
57Ni se Jiu amu ta eri kikelake vokasi, “Ṉota matu vairua laṉa, pui nio sike toni sabere ṉo eva, melai nio ṉota ṉo veve vo Ebarahami kiṉola kio?” kikelake.
58Nio Jisu ta eri kiolake sekasi, “Aṉata a bazuemela me tuvevo avole. Puliako Ebarahami alilo ta ‘Aṉa inio,’” kiolake.
59Sai nio seta ke niaquekake ko lado ni ke taivo kikelake, melai Jisu ta taukavole ota daipaike ni ota saqorake Jelepade kale azo.
Iliyochaguliwa sasa
Jone 8: BLBNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in the Bilua language, Solomon Islands © The Bible Society of the South Pacific, 1995.