ሉቃ̈ሳ 4
4
ሴ̈ጣኖ ዬሱ̈ሳ ፋታ̇ኒዴ
ማ̈ቶ̈ሳ 4፡1-11፤ ማ̈ርቆ̈ሳ 1፡12-13
1ዬሱ̈ሲ ጌ̈ሻ̇ ኣያ̇ናባር ኩማሪ ዮርዳ̈ኖ̈ስ ዋ̈ን ላፋፖ ማ̈ቂ̇ኖንዲፌ̈ኒ ጌ̈ሻ̇ ኣያ̇ና̈ዲ ኢያ ቲ̈ናር ባራሃ ኤኪ̇ ሉኪ̇ዴ። 2ኢ ኢና ኦይዲ̇ ታጳ̇ ቃም ሴ̈ጣናባር ፋታ̇ኒንቲ̇ዴ። ዪን ቃማ̇ን ጋርታ̇ ኢ ኣባካር ሞ̈ካ̇ይ ጋምኢን ዉርሲ ጋልዳ̇ ጋፊ ኢያ ዎዴ። 3ኢናፖ̇ ሴ̈ጣኖ ኢ̈ኮ “ኔ ጾ̈ሳ̇̇ ናእኮ ዓና̇ ሹቺ̇ን ‘ሶ̈ላ̇ ማ̈ቃ̇ቤ’ ጋ̈ራ ኪ̈ታ̇ባሳ?” ጌይዴ።
4ዬሱ̈ሲ ኢ̈ኮ “ ‘ኣሲ ሼምፓባር ዶኢዛ̈ዲ ፊ̈ሻባር ሙታ̇ ጊዳካ̇ዬ’ ጋ̈ር ጻ̈ፊንቲ̇ኔ” ጋ̈ር ማሂዴ።
5ኢናፖ̇ ሴ̈ጣና ኢያ ሾክ ጌይኖ ፔቲ̇ ቤሳ̇ ጋልዳ ኬሳ̇ሪ ዓት ዪንዳ ኢና ሳ̈ዝ ኤ̈ሻ̇ ዎይ ጋልዳ ዎ ጋዳን ዎይ ኢያ ቤይሳሪ፥ 6“ዪን ጋዳን ጋርታ̇ ዎ ካ̈ቲንታ̇ን ሲልጣ̈ናኬ ኢንታ ቦንቻ̇ ዎይ ታ̈ብ ኢሚ̇ንቲ̇ኔ። ታ̈ናር ቴ ዶሲኖ̈ቦ ኢማ̇ንዳ ዳንዳኢዛኮታ̇ቦ ቴ ኔ̈ብ ኢማ̇ንዳ̇። 7ዪዚ ኔ ታ̈ብ ዪርክ ጋ̈ር ሞ̈ኪንቴጌይን ዓ̈ ዎይ ኔ̈ብ ማ̈ቂ̇̈ሬ” ጌይዴ።
8ዬሱ̈ሲ ኢ̈ኮ “ ‘ኔ ጾ̈ሳ̇̇̈ ኔ ጎዳ̈ብ ሞ̈ኪንታ̇ቤ! ኢ̈ብ ሙታ̇ ጎሽታ̇ቤ!’ ጋ̈ር ጌ̈ሻ̇ ማጻ̈ፋ ጋልዳ ጻ̈ፊንቲ̇ኔ” ጋ̈ር ማሂዴ።
9-11ኢናፖ̇ ዬሩሳ̈ላማ ጾ̈ሳ̇̇ ኬ̈ ኩስቲ̇ን ጋልዳ ኢያ ኤሳ̇ሪ “ ‘ኔ̈ና ና̈ጋምፔ̈ኒ ኪ̈ታንቻ̇ን ኔኮታ̇ቦ ኪ̈ቲ̇̈ሬ፤ ኔ ሹች ጋልዳ̇ ኬዳ̇ር ኔ ቶሂን ሜቃካ̇ይፌ̈ኒ ኢንቲ̇ ፌ ኩሺን ጋል ኣፋ ኔ̈ና ኤኪ̇̈ሬ’ ጋ̈ር ጌ̈ሻ̇ ማጻ̈ፋ ጋልዳ ጻ̈ፋካ̇? ዪዚ ኔ ጾ̈ሳ̇̇ ናእኮ፥ ዓንዳ̇ፖ ቶ̈ራ ዶ̈ጛር ሶ̈ባቤ” ጌይዴ። 12ዬሱ̈ሳር ማሂ̈ርዶሪ “ ‘ጎዳ ኔ ጾ̈ሳ̇̇ ፋታ̇ናፔ̇’ ጌይንቲ̇ኔ” ጋ̈ር ማሂዴ።
13ሴ̈ጣና ዎይ ባዝባር ኢያ ፋታ̇ኒ ዉርሲ̇ኖፖ̇ ዓኒ ዪኒ̇ ፌ̈ኖ ሜላ ፌ̈ብ ማ̈ቂ̇ዝ ቃም ዲጚዝ ዲራ̈ስ ኢ̈ፖ̇ ዴሽ ጌይዴ።
ዬሱ̈ሲ ጋሊላ ጋዳ̇ ታማ̈ርሲ ኤ̈̇ዴ
ማ̈ቶ̈ሳ 4፡12-17፤ ማ̈ርቆ̈ሳ 1፡14-15
14ዬሱ̈ሲ ጌ̈ሻ̇ ኣያ̇ና ዎልቃ̇ባር ጋሊላ ጋዳ̇ ማ̈ቂ̇ዴ፤ ኢ ኦ̈ሳዳሬ ኢና ዎ ጋዳን ጋርታ̇ ዎይ ሲስኪ̇ንቲ̇ዴ። 15ኢ ኣይሁድ ዎ̈ሳ ኬ̈ ጋርታ̇ ታማ̈ርሳ̇ምባራ ኣሲ ዎይ ኢያ ኣንጂዴ።
ና̈ዝሬ̈ት ካታማ ጋርቶ ኣሳን ዬሱ̈ሳ ኢጺ̇ዴ
ማ̈ቶ̈ሳ 13፡53-58፤ ማ̈ርቆ̈ሳ 6፡1-6
16ኢናፖ̇ ፌ ዲጪ̇ኖ ካታሚን ና̈ዝሬ̈ት ጋርታ̇ ዬ̈ሪ ቲ̈ናፖ ፌ ኦ̈ዚንዲፌ̈ኒ፥ ሳምባታ ጋላስ ኣይሁድ ዎ̈ሳ ኬ̈ ጋርታ̇ ጌላሪ ጌ̈ሻ ማጻ̈ፋ ናባ̇ባንዳ̇ብ ዲንዳር ኤቂ̇ዴ።
17ናባ ኢሳ̈ሲ ጻ̈ፊኖ ማጻ̈ፋ ኢ̈ብ ኢሚ̇ንቲ̇ን ኢ ማጻ̈ፊን ቢላ̇ራምባ̇ራ፥
18“ጎዳ ኣያ̇ና ታ ጋልዳ ዎ፥
ዎርባያንቦ ጾ̈ሳ̇̇ ዎጛላ ታማ̈ርሳ̈ምፔ̈ኒ፥
ታ̈ና ማራ̇ጺኔ።
ቃቺንቲ̇ኖንቦ ቢሊንታ̇ዚንዶ፥
ኣ̈ፍ ዎባ̇ን ቤቃ̇ዚን ሶ̈ላምፔ̈ኒ፥
ጮቃ̇ኒንቲ̇ኖን ናጻ ኬሳ̇ምፔ̈ኒ፥
19ጎዳ ፌ ዎርዣ ፋዝ ላይን ዬሊ̇ኖን
ሶ̈ላምፔ̈ን ታ̈ና ኪ̈ቲ̇ኔ” ዪዝ ጋ̈ዝ ቤሲ̇ን ዲጚዴ።
20ኢናፖ̇ ማጻ̈ፊን ቁራሪ#4፡20 ሚን ዪኒ̇ ኬልባር ዎ ዓቶ ማጻፋፌ̈ን ጊዳካ̇ይዶን ጋማ ጋልዳ ጻፊንቲ̇ኖኮታ̇ቦ ቁርቃር ጋዲ̇ሬ። ናባ̇ባንዳብ ኮያሪ ቁርቂኖን ቢላ̇ር ናባ̇ቢሬ። ና ጾ̈ሳ̇ ኬ̈ን ጋርታ̇ ኦ̈ዝ ና̈ሳ̈ቦ ማሂ ኢማ̇ሪ ዶኢዴ። ኢና ዎ ኣሳን ዎይ ኮት ዎታ̇ር ኢያ ቤቃ ኤ̈̇ዴ። 21ኢያሬ ኢንታ̇ኮ “ዪና̇ ዪንቲ̇ ዪንታ̇ ዋይንባር ሲስኪ̇ኖ ጾ̈ሳ̇̇ ቃ̈ሊን ዓታ̇ብ ፎቲንታ̇ዴ” ጌይዴ። 22ዎይ ኣሳን ኢ̈ባዝ ኮሼ̇ ጌዪ ሶ̈ሊንቲ̇ዴ። ኢ ኖ̈ኒታ̇ፖ ኬስኪ̇ዝ ኮሻ̇ ቃ̈ሊንባራ ጋራ̇ሚንታ̇ሪ “ዓ ዮ̈ሴ̈ፋ ናኣ̈ዳባያ?” ጌይዴ። 23ኢያር ኢንታ̇ኮ “ ‘ጋ̈ላ̇ ኤሪዛ̈ዶ! ኔ ኔ ቆሚ̇ን ፋኔ! ጋ̈ዝ ሚሳ̇̈ሊን ዪንቲ̇ ታ ጋልዳ ሶ̈ላዚን ታ̈ኒ ኤራ̈ሬ’ ማ ዪንቲ̇ ታ̈ኮ ‘ኔ̈ኒ ቂፊርና̈ሆ̈ማ ጋዳ̇ ኦ̈ኔ ጌይን ኑ ሲስኪ̇ኖንዶ̇ ዓት ኔ ዲጪ̇ኖ ካታሚን ጋርታ̇ ዓንዳ̇ ኦ̈ቤ’ ጌይዝዳ” ጌይዴ።
24“ቴ ዪንታ̇ክ ኪን ጋ̈ሬ፤ ናቢ ፌ ዲጪ̇ኖ ጋዳ̇ ቦንቺ̇ንቲባ̈ሴ። 25ሲስኪ̇ብቴ̇ ቴ ዪንታ̇ብ ኪን ሶ̈ላስቶ̇፤ ናባ ኤ̈ላ̈ሳ ኬል̇ባራ ዓይዚ̇ ላይኬ ሌሂ ኣጋና ኢሪ ኬዳካ̇ይ ኣቲ̇ን ጋዲን ጋርታ̇ ሲጛ ጌሊንዶ̈ን ዪና̇ ኢዝ ኬሊ̇ንባራ ኢስሬ̈ላ ጋዳ̇ ኣስኒ ዓይቂ̇ኖ ዎይሊን ማጫ̇ን ዎዶ̈ኒ፥ 26ኤ̈ላ̈ሲ ሲዶ̈ና ካታሚን ላፍ ሳራ̈ጲታ̇ ጋ̈ዝ ቤሲ̇ን ጋል ዎ ኣስኒ ዓይቂ̇ኖ ፔቲ̇ ማጪ̇ን ኣ̈ል ሙታ̇ ኪ̈ቲንታ̇ር ሉኪ̇ዶ̇ኬ ሜላ ኦ ኣ̈ልካር ሉካካ̇ዬ። 27ናባ ኤልሳ ኬል̇ባራሬ ኢስሬ̈ላ ጋዳ̇ ሹያ ዓርጋባር ማዝ ዎይሊን ኣስ ዎዶ̈ኒ፥ ኢንታ̇ ጋርታፖ̇ ሶ̈ራ ጋዳ̇ፖ ዬይኖ ኒማ̈ን ጌይዝ ና̈ሳ ሙታ̇ ፋጺዶ̇ኬ ሜላ ፋጺኖ ኦ̈ናካር ባዬ̇” ጌይዴ። 28ኣይሁድ ዎ̈ሳ ኬ̈ ጋርታ̇ ዎ ኣሳን ዎይ ዪኖ̇ ሲስካ̇ሪ ጎይልባር ቡርቂ̇ዴ። 29ኢንቲ̇ ዎይ ፌ ዶኢኖ ቤሳፖ̇ ዲንዳሪ ዬሱ̈ሳ ካታሚንፖ̇ ቡጊድ ኬሲ̇ዴ፤ ጎርጎራ ኢያ ሱጊ ጋጋ ሚሻንዳ̇ብ ኮያሪ ፌ ካታሚን ኤቂ̇ኖ ኢንዲ̇ን ሲ̈ንን ጋልዳ̇ ኤኪ̇ ሉኪ̇ዴ። 30ዎቲናካሬ ኢ ኢንታ ጊዲ̇ንባር ኣ̈̇ ሉኪ̇ዴ።
ዬሱ̈ሲ ፔቲ̇ ና̈ሳ ጋልዳፖ ኢ̈ታ ኣያ̇ና ኬሲ̇ዴ
ማ̈ርቆ̈ሳ 1፡21-28
31ኢናፖ̇ ጋሊላ ጋዳ̇ ዎ ቶ̈ራ ቂፊርና̈ሆ̈ም ጋ̈ዝ ካታሚን ጋርታ̇ ሶ̈ቢዴ። ኢና ሳምባታ ቃምባራ ዎርዣ ታማ̈ርሲ ኤ̈̇ዴ። 32ኢ ሶ̈ላዚንዳ̇ ጴች ሲልጣ̈ና ዎ ኣስፌ̈ኒ ማ̈ቂ̇ኖኮታ̇ቦ ኢ ታማ̈ርሳዝ ቲሚርቲ̇ንባር ኣሳ ዎይ ጋራ̇ሚንቲ̇ዴ።
33ኣይሁዳን ዎ̈ሳ ኬን ጋርታ̇ ኢ̈ታ ኣያ̇ናባር ኤ̈ንቲ̇ኖ ፔቲ̇ ኣሲ ዎዶ̈ን ና̈ሳ ዪ̈ዲ ጴች ዉይሳሪ፥ 34“ኣን ና̈ዝሬ̈ት ዬሱ̈ሶ! ኑ̈ናኬ ኔ̈ናክ ኣብዚ ዎል ዬል̈ራ? ኔ ኑ̈ና ይሳ̇ንዳብ ዬይና? ኔ ኦ̈ናኮ ቴ ኔ̈ና ኤራ̈ርሽዋ፤ ኔ̈ኒ ጾ̈ሳ̇̇ ጌ̈ሻ̇ዳ ባያ” ጌይዴ።
35ዬሱ̈ሲ ኢ̈ኮ “ዚምዶኣብ! ና̈ሳ ዓ̈ ጋልዳ̇ፖ ኬስካ̇ቤ!” ጋ̈ር ቆዲ̇ን ኢ̈ታ ኣያ̇ና̈ዲ ና̈ሳ ዎርዣ ቲ̈ን ቶጛሪ ኢ̈ታ ባዝ ኣባካር ዬልካ̇ይዶ̈ር ኣሻ̇ር ኬስኪ̇ዴ። 36ኣሳን ዎይ ጋራ̇ሚንታ̇ሪ ዎልዎልኣ “ዓኒ̇ፌ̈ኖ ቲሚርቲ̇ን ዎዛራ? ሲልጣ̈ናባርኬ ዎልቃ̇ባር ኢ̈ታ ኣያ̇ናን ኪ̈ቲን ኢንታ̇ር ኬስኪ̇ሪ!” ጌይዴ። 37ኢ ኦ̈ሳ ጴቻ̇ ኢና ዎ ቤሳ̇ን ጋርታ̇ ዎይ ሲስኪ̇ንቲ̇ዴ።
ዬሱ̈ሲ ማኖ ዎይሊን ኣስ ፋዴ
ማ̈ቶ̈ሳ 8፡14-17፤ ማ̈ርቆ̈ሳ 1፡29-34
38ዪኒ̇ፖ ዓኒ ዬሱ̈ሲ ኣይሁዳን ዎ̈ሳ ኬ̈ፖ̇ ኬስካ̇ሪ ሲሞ̈ና ኣ̈ል ጌሊዴ። ሲሞ̈ና ባይሲማ ጋላ̇ባር ሶ̈ላር ማጋራ ዬሊን ማ ሱርቂ̇ንዶ̈ን ኢዞ ፋምፔ̈ኒ ኢንቲ̇ ኢያ ጌሺዴ። 39ኢዛ ሱርቂ̇ኖ ቤሲ̇ንኮ̇ ኡካ̇ር ዪርክ ጋ̈ሪ ዓርጊን ቆዲ̇ን ኢዛር ኤሊ̇ባር ፋጻር ዲንዳ̇ር ኢንታ̇ብ ቡና ባሽካ̇ ዎ̈ሲንት ኤ̈̇ዴ። 40ኣዋ̈ፊ ጌላንዳብ ዎታዚምባራ ዱማ ዱማ ዓርጋባር ማኖ ኣሳን ዎይ ኢ̈ክ ኤካ̇ር ዬይን ኢያሬ ዎይን ጋልዳ ፌ ኩሺን ጋዳ̇ር ኢንታ̇ ፋዴ። 41ኢ̈ታ ኣያ̇ናንሬ “ኔ̈ኒ ጾ̈ሳ̇̇ ናኣዳ ባያ” ጌዪ ዉይሲሙታ̇ ዎይሊን ኣሳን ጋልዳ̇ፖ̇ ኬስኪ̇ዴ። ኢ ክርስቶ̈ሳ ማ̈ቂ̇ኖን ኢንቲ̇ ኤሪኖኮታ̇ቦ ፔቲ̇ ባዝ ኣባክ ሶ̈ላካ̇ይፌ̈ኒ ቆዳ̇ር ኢንታ̇ ካዪዴ።
42ሳ̈ዚ ዎንታ̇ምባራ ዬሱ̈ሲ ኢናፖ ኬስካ̇ሪ ኣሲ ባዮ̇ ፔቲ̇ ቤስ̇̇ ሉኪ̇ዴ። ዎርዣ ኢያ ኮዪ̈ርዶሪ ኢ ዎ ቤሲ̇ን ሉካ̇ር ኢያ ዲጚኖፖ̇ ዓኒ፥ ኢ ኢንታ ላፋፖ ሉካካ̇ይፌ̈ኒ ኢያ ጌሺዴ። 43ኢያር ኢንታኮ “ታ̈ኒ ሜላ ካታማን ጋርታ̇ር ሉካ̇ራ ጾ̈ሳ̇̇ ካ̈ቲቲ ዎጛላ ሳባ̇ካንዳ̇ብ ኮሻ̈ሬ፤ ጾ̈ሲ̇ ታ̈ና ኪ̈ቲ̇ኖንዳሬ ኢዝቦ” ጌይዴ። 44ኢ ዪሁዳ ጋዳ̇ ዎ ኣይሁድ ዎ̈ሳ ኬን ጋርታ̇ ዎይ ቢሪንቲ̇ ሳባ̇ኪዴ።
Iliyochaguliwa sasa
ሉቃ̈ሳ 4: ኦጫ̈ቃማ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia