Luka 16
16
OMUNAMPARA W’OBUYAGA. — OMUHANGO MUBI NA LAZARI OMUHABI.
1Kandi nagambira n’abahemba be ati: Haliga haliho omuntu muhango, ali n’omunampara we; ogwo nibamulega hali wenene nk’akunaganaga ebintu bye. 2Namweta namugambira ati: Nkukuhuliraho ki? Mbe tonda eby’omulimo gwawe, kuba tokisuba kuba munampara wange. 3Aho omunampara natekateka mu mutima gwe ati: Ngire nta, kuba omukuru wange yaniha ha bunampara bwange? Tindi n’agalima, kai kusabiriza nkukorw’ensoni. 4Namanya echo ndakora, abantu bahiche kuntuza mu mazu gabo, ka balanihaho ha bunampara. 5Aho nayeta ab’amabanza g’omukuru we omo omo, nagambira owo kutandika ati: Oli n’ibanza ki lya nineka? 6Ogwo nagira ati: Enzoga z’amazuta igana. Namugambira ati: Yanankura olupapula lwawe, ikara bwangu, oyandike makumi atanu. 7Hatyo nagambira ondi ati: Kai iwe oli n’ibanza ki? Onu ati: Michuro igana z’engano. Namugira ati: Yanankula olupapula lwawe, oyandike makumi munana. 8Mbe omukuru nasima omunampara mubi, obwo yakozire n’obukeruke; kuba abana bo mu nsi bakerukire mu byabo kukira abana b’omusana mu buzarwa bwabo. 9Nena nkubagambira nti: Mwehigire abanwani n’itunga ibi, ka muliburwa, babatuze mu mazu agatahwaho. 10Akugir’omutima mu binoro, aligir’omutima na mu bihango; kai ow’obuyaga mu binoro, ni muyaga na mu bihango. 11Mbe mukaba mutagizire omutima mu bintu by’obuyaga, alibaha ebintu bya kimo n’oha? 12Mukaba mutagizire omutima mu bigeni, alibaha ebili byanu n’oha? 13Tihaliho omwiru akuhicha kukolera abakama babili: kuba hamo akuhataho omo, ondi yamwenda; hamo yahuliraho omo, ondi yamugaya. Timukuhicha kukolera Mungu n’ebintu.
14Abafarizayo, abaliga bali banunu, bakahulira ebyo, nibamusekerera. 15Nabagambira ati: Imwe n’imwe abakwesemeza mu meso g’abantu, nawe si Mungu akumanya emitima zanu; kuba ebikusimw’abantu bikusesemula Mungu. 16Ekilagiro n’abalagi bikabaho kuhika Yohana#16, 16 Lora Matayo 5, 17.; kurug’aho Evanjeli y’obukama bwa Mungu neyolekererwa, na buli akutahamo, akutaho amani#16, 16 Lora Matayo 11, 15.. 17Changuhire muno igulu n’ensi kuhwaho kukira akatonezo kamo ko mu bilagiro kulagara#16, 17 Lora Matayo 5, 18.. 18Buli muntu akwanga omukazi we, akaswera ondi, akusihana; kai akuswera changwa iba, akusihana#16, 18 Lora Matayo 5, 32 na 19, 9..
19Omuntu ogwo yaliga ali muhango, azwere elyenda limutuku n’ahalili, nasemererwa naku zona kulya kuzima. 20Kandi haliga haliho n’omuhabi, izina lye Lazari, ayaliga alambire ha mulyango gwe, asugene ebisunzu, 21yayegongaga kwigusibwa endagarika ezalagaraga h’eliho ly’omuhango ogwo, hataliho wo kumuha; kandi embwa niziza nizilamba ebisunzu bye. 22Mbe kumara omuhabi nafwa, nasagarwa bamalaika ha kifuba cha Ibrahimu#16, 22 Mw’igulu bali nk’omwana akuhumura ha kifuba cha nina.. Kandi n’omuhango wena nafwa, nazikwa mu muliro kuzimu. 23Ka yanagire ameso ge oluguru, aho yaliga ali mu busasi, nalorera Ibrahimu hara, na Lazari ha kifuba che; 24wenene nayeta nagira ati: Tata Ibrahimu, nonsasire, osindike Lazati achumire ensonde y’echara che mu menzi, anirize olulimi lwange, kuba nkusaswa elitasaswa mu muliro munu. 25Ibrahimu namugira ati: Mwana we, izuka okwo wabwene ebizima okilora, kai Lazari amabi atyo; mbe onu hati akuhumuzibwa, kandi iwe okunaranazibwa. 26Kai muli ebyo byona hagati yetu n’emwe haliho elina ihango muno, niho abakwenda kuruga kunu kwiza okwo batakuhicha, kai n’ab’okwo kwiza kunu pai. 27Nagira ati: Mbe hatyo nkukusaba, tata, nomusindike mu nzu ya tata; 28kuba ndi n’abatabani betu batanu, aze kubamanyisya, na bonene bataliza hanu mu buturo bunu bw’ebinaranazo. 29Ibrahimu namugambira ati: Baliyo na Musa n’abalagi; nibahulire abo. 30Wenene ati: Pai, tata Ibrahimu; nawe omo wo mu bafu akabazaho, niho bakutamw’ebiheno byabo. 31Namugambira ati: Bakabura kuhulira Musa n’abalagi, naho omo n’omo wo mu bafu akazoka, tibakwikiriza.
Iliyochaguliwa sasa
Luka 16: KED1946
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
First published in 1946 by the White Fathers. Published online with the permission of the White Fathers.