Marki 16
16
Yezu yii kaa a n bɔ geren bii
(MAT 28.1-8; LUK 24.1-12; ZAÃ 20.1-10)
1 *Susu ǹ pii bɛ́ á kiɛ̃, Magadalaan Mariya laanka Zaaki ǹ dan Mariya nɛ, ka Salomee ne, bɛn nə́ nyɔɔ gìĩ kɔɔ̃n pii, mà ǹsɛn man woe loe Yezu gere ganaa. 2*Susu ǹ pii a lɛawaa, dimaasi pinaa, baayɛlɛ lɛliɛnɛ, wasa a bɔ tán waáraa, ǹ nə́ woo yala lɛ lɛ-a. 3Maǹ nə́ goã nɔ̀n diɛ kɔn la mà die n die bǐɛ̃ koe ǹsɛn ganaa a kɔlɔ lɛ birikəə̃ a bɔ yala lɛ lɛ kəni?
4A giala, kɔlɔ lɛ gole kɔ á la yii ni. Ǹ bɛ́ ǹ nə́ n yii saa ǹ nə́ ga ǹ mɛn waáraa, ǹ nə́ woo yaa bɛ̀ kɔlɔ lɛ nə́ n birikəə̃ á n bɔ yala lɛ lɛ. 5Ǹ bɛ́ ǹ nə́ wɔ yala lɛ nɛ, ǹ nə́ tɔntɔraa goon yɛ giã-n tán ǹ gusin, dɔnkɛ fu sasa ná a ganaa. Nyɛ́ɛ nə́ ǹ kũ parsiini.
6Sɛnɛ, á tɔ́n pɛ ǹ nɛ: «Ka baran nyɛ́ɛ baa wa, ma á doɛ̃ máa minin nə Nazarɛtin Yezu mɛn dere gɔn ganaa, máa ka n giɛ bɛ lɛ li. A yii wusoo á kaa, a ba kànaa wa. A n da bǎã mɛn nɛ, á ke, ka ga a ganaa. 7#MAT 26.32; MAR 14.28. Ka woo ka pɛ a kialandɛnan lɛn manɛ, ka pɛ Piɛrɛ dɔ nɛ, mà á die woe ǹ nyɛɛnɛ Galilee gána nɛ. Mà ǹ tá re woe yiɛ walan, ka a bɛ́ á pɛ ǹ nɛ lɔn.»
8Nyɛ́ɛ bɛ́ á ǹ kũ, ǹ gɔ̀nɔn yii n bìn diɛ, ǹ nə́ soo ǹ nə́ baa si ǹ nə́ n bɔ yala lɛ lɛ-a. Ǹ boo kɔ́n da min kɔ́n nɛ wa, a giala ǹ nyín soo.
Yezu a din nyaa
(MAT 28.9-10,16-20; LUK 24.13-49; ZAÃ 20.11-23; NDS 1.6-8)
[ 9Yezu yii bɛ́ á wusoo á kaa, a nɔ̀ɔn sɔbaa loo á ǹ bɔ Magadalaan Mariya mɛn ganaa, a na á n din nyaa bɛ lɛ-n bɔrɔ, susu ǹ pii a lɛawaa baayɛlɛ lɛliɛnɛ. 10Min mɛnɛn bɛ́ ǹ nə́ goã kun ka Yezu ni, Mariya woo a laakalaa bɛn manɛ. Ǹ yɔrɔ kɔsiɛmaa nɛ, ǹ nə́ goã wuu pii. 11Sɛnɛ, a bɛ́ á pɛ ǹ nɛ mà asɛ Yezu yɛ, mà a yii á koo sisia, ǹ golee li wa. 12Bɛ kio, Yezu nə́ n din nyaa a kialandɛnaa min paa nɛ yɔrɔ kɔsɔ la, bɛ̀ maǹ zii la woe don kion. 13Bɛn dɔn nə́ n bɔyaa ǹ nə́ daa pɛ ǹ miãn manɛ, sɛnɛ, ǹ golee ǹ dɔn boo li wa.
14Bɛ tumaa kio, Yezu nə́ n din nyaa a kialandɛnaa fulugoon ne, bɛ̀ maǹ màn bii. Ǹ golee Lawa li baã laanka ǹ too kakabaa a la yii-n lɛ na á toa, Yezu yoo ǹ gialaa, a giala min mɛnɛn nə yɛ a yii n koo, ǹ golee bɛn lɛn boo li wa. 15#NDS 1.8. Bɛ kio, á tɔ́n pɛ ǹ nɛ: «Ka wo kanaa paǹ tumaa nɛ, ka Boo Tii Kɔɔ̃n pɛ min din tumaa nɛ. 16Bɛ̀ min mɛn golee li, ka *batɛmu da a ganaa, Lawa á re bɛa dɛnaa kirisibiɛ. Bɛ̀ min mɛn golee li wa, Lawa á re dɔlɔ boe bɛa dɛnaa ganaa. 17Masɛ a goleemali wolen bɛ́ re n doɛ̃ sii a kɔnbɔn mɛnɛn li, bɛn man ka kɛn nɛ: Ǹ tá re nɔ̀ɔnɔn lui ǹ nə ǹ bɔ minin ganaa ka masɛ tɔ nɛ. Ǹ tá re bɔlɔ soreen pii. 18Ta ǹ nə́ miɛ̃ kũ ka ǹ gɔn nɛ, ta ǹ nə́ sèwò màn mi, bɛa re màn kɔ́n zɛnɛɛ ǹ nɛ wa. Ǹ tá re ǹ gɔn diɛ busulən la ǹ Lawa nyankɔ ǹ nɛ, bɛn tá re kaka koe.»
Yezu a wusoo a wo Lawa li boo
(LUK 24.50-53; NDS 1.9-11)
19Wɔa Dɛnaa Yezu bɛ́ á boo da á nya ǹ mɛn waáraa, Lawa saa á woo-n lon ne, á woo giã a din gusin. 20A kialandɛnan nə́ woo Boo Tii Kɔɔ̃n pɛ bǎã yii tumaa nɛ. Wɔa Dɛnaa goã dí nyɛɛ kunun ǹ ni, bɛ̀ a nyaa ka kaãbaa ǹ siin ni, mà ǹ bɛ́ boo mɛn diɛ mà taãn nɛ.]
Iliyochaguliwa sasa
Marki 16: SCE2013
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
San Catholic Edition Bible © Bible Society of Burkina Faso, 2013.