Eksodo 13
13
Omuvelleella mwaana aamullopwana awaamba wa Apwiya
1Apwiya yaallota wa Mose wi, 2#Num 3.13; Luk 2.23“Waavelleelle anamwani aallopwana awaamba attheene wa miyaano. Variyari va Aisraele, arive mwaana aamullopwana awaamba a muthu apaalle a enama, tti aaka.”
Ehakallallo ya Buledi Oohikhalla ni Yisiti
3Vano Mose ahaalleella athu wi, “Muupuwelleke nllapo nno mwakhumalleenyu o Iguputo, mu ellapo ya okaporo kaambiiwa Apwiya yahuukhumihani ni nnatta niwa namasiva. Muhiche erive ello yookhalla ni yisiti. 4Ollello, nllapo na okhuma wanyu mu Iguputo, tti na mu mweeri wa Abibu. 5Apwiya yaallupella wa makhollwaanyu wi eneerewuuvahani ellapo ya Akanani, Ahiti, Aamori, Ahivi ni Ayebusi. Ellapo yeeyo tti yooddalla ni mukaka ni enwi. Yuuvollochihani mu ellapo yeeyo, musungeke ehakallallo yeella mu mweeri yoolla. 6Wa mallapo matthanu ni meelli, mumucheke buledi oohikhalla ni yisiti nave va nllapo naneetthanu ni piillinno vikhalleke ehakallallo yowaallapella Apwiya. 7Mumucheke buledi oohikhalla ni yisiti wa mallapo matthanu ni meelli. Vihikhalle buledi ookhalla ni yisiti apaalle yisiti mu echigawaanyu ettheeneeyo. 8Va ehakallallo yeeyo mwaatthopoollelleke aniinyu wi, ‘Nineera ddittheddenenndda ekaamba ya nnddo Apwiya yaneerelliiwa navenyaahu o Iguputo.’ 9Ehakallallo yeella enaakhalle wonanko echizindikiro yoomakiwa va nnatta nanyu apaalle yawuupusella yoomakiwa vayuuchini vanyu wi malamulo a Apwiya khewa evenyaka vayanoni vanyu kaambiiwa olliye ahuukhumihani o Iguputo ni nnatta naye namasiva. 10Musungeke ehakallallo yeella va enthawi yawi ddiidda muyakha ni muyakha.
Omoopolla mwaana aamullopwana awaamba
11“Apwiya eneerewuuvollochihani mu ellapo ya Akanani eyo yallupenlliiwa wa nyuwaano ni makhollwaanyu. Yuuvahani ellapo, 12#Eks 34.19,20; Luk 2.23mumuvelleelleke wa Apwiya arive nankhoro awaamba. Anankhoro awaamba a eziweto ddanyu tti a Apwiya. 13Koma mwaanabulu aamullopwana awaamba, mumoopolleke voomwaakakhanihani ni mwaanaankhosa. Koma mwahipaallaka omoopolla, mumunyokotholleke nikohi. Mumoopolleke arive mwaana aamullopwana awaamba. 14Muhoollo, aniinyu yuukohani wi, ‘Ethiyo ddenndda ddinattaphullella tini?’ Vano nyuwaano muwaakhulle wi, ‘Apwiya yaanikhumiha o Iguputo, mu ellapo ya okaporo ni nnatta niwa namasiva. 15Farao ummihalle murima, aanikhootiha ovenyawo. Vano Apwiya yaamwiipha arive mwaana aamullopwana awaamba a Aiguputo attheene, athu ni a eziweto. Sika ekaamba ya yeella, arive nankhoro a enama awaamba ninnamuvelleella wa Apwiya. Koma aniihu aallopwana awaamba ninnawoopolla.’ 16Yeella enaakhalle yawuupusella, wonanko echizindikiro yoomakiwa va nnatta nanyu apaalle vayuuchini vanyu kaambiiwa Apwiya yaanikhumiha o Iguputo ni nnatta niwa namasiva.”
Opoto amurapo ni amunllo
17Farao awaakhullelle Aisraele wi evenyewo, Mulluku khaawaahoollelle wi eyeelle ettilla yooya o ellapo ya Afilisti naari ettilla yeella yaari yoophadda. Vawi Mulluku aallota wi, “Nginapaalla wi athu yaalla esinthe maganizwiiwa wi ehokollweellewottho o Iguputo, yaakumanaka ni ekhoto.” 18Munipuroni mwiwa Apwiya yaaweeriha wi eyeelle ettilla yoorekama ya mu echipululu yooya o Enyanja Yoofiira. Mutthemwenemmo Aisraele yaari ekhozekenlle dda ekhoto.
19 #
Gen 50.25; Yos 24.32 Mose aakusa makhuva a Yosefe, ekaamba yawi Yosefooyo aari aallupellihalle khalle Aisraelaalle voollotani wi, “Ddawoona, Mulluku aneerewuuweherani phaama nave vano muneerotukhulla makhuvaaka mwaatthaamaka wuno.”
20Aisraele yaavenyawo o Sukoti, eya yatthipella misasa ddiwa o Etamu, mukhwipi mwa echipululu. 21Enthawi yootthaana Apwiya yaanaahoollella ni opoto amurapo nave enthawi ya mahiiyu, yaanaahoollella ni opoto amunllo, waamolleella ettilla wi yeeteke otthaana ni mahiiyu. 22Sika enthawi ddittheddene opoto amurapo aanaahoollella athu otthaana nave opoto amunllo aanaahoollella mahiiyu.
Iliyochaguliwa sasa
Eksodo 13: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.