Genesis 28
28
1Vano Isaki aamwiithana Yakobo amudalisa nave aamulamula wi, “Ohimutthelle mutthiyana o Kanani wuno. 2Khawe o Mesopotamiya, owaniwa wa Betuele, attiitthiiwa a amaaywaalla. Wenko wamutthelle mmodda a anamwani aatthiyana a Labani, murokoriwa a amaaywaalla. 3Mulluku Amasiva Mattheene uudalise nave uuvahe edduullu ddinchichi wi okhalle nlloko nuullupalli na mitundu ddinchichi dda athu. 4#Gen 17.4-8Uudalise weyaano ni edduullu ddawo moollikana ni mmo amudaliselleeye Abrahamu wi ekhalle yaawoyaawo ellapo eyo oneereewe okhallekemo, ellapo eyo amuvahilleeye Abrahamu.” 5Sika Isaki aamurumiha Yakobo o Mesopotamiya wa Labani, mwaana a Betuele Muaramu. Labani aari murokoriye a Rebeka, amennya a Yakobo ni Esau.
Esau anamutthella mutthiyana mmoddattho
6Esau ahiiwa wi Isaki aamudalisa Yakobo nave wi Yakobooyo oorumihiwa o Mesopotamiya wi atthelle wenko. Ahiiwattho wi voomudalisanimvo, aamulamula wi ahiwe amutthella mutthiyana a o Kanani. 7Ahiiwa wi Yakobo aawiiwellella attiitthinnya ni amennya nave wi aaya o Mesopotamiya. 8Sika Esau ahoona wi attiitthinnya Isaki kheyaapaalla atthiyana o Kanani. 9Sika vano aaya wa Ishmaele mwaana a Abrahamu nave aamutthellattho Mahalati mwaana a Ismaelooyo, murokoriye a Nebayoti.
Olloha wa Yakobo va Betele
10Yakobo aatimulla olendo ovenyera o Beeresheba, oya o Harani. 11Aphiyalle vanipuroni nimodda,#28.11 vanipuroni nimodda: apaalle nipuro naweella. ahiimella vaavo vawi nndduwa naari nivollowille. Nave aakona vaavo ahameellihalle murwaaye vanllukuni. 12#Yoh 1.51Muullohani ahoona makwelelo oovenyera vatthi ophiyera oddullu nave aawoonattho angelo ewellaka navettho ekitthaka vamakwelelonimvo. 13#Gen 13.14,15Nave Apwiya yahiimella vakhwipi ni#28.13 vakhwipi ni: apaalle va makwelelo. olliye emulleella wi, “Mi tti Apwiya Mulluku a nikhollo nawo Abrahamu ni attiittho Isaki. Ellapo onakoneewemweella kineerewuuvaha weyaano ni edduullu ddawo. 14#Gen 12.3; 22.18Edduullu ddawonnddo ddineerewaata wonanko nthupi na va ellapo yavatthi. Ddineeropallalleyella o ezigawo ddittheddene, woovollowa nndduwa, wookhuma nndduwa, ompoto ni omwera. Nave mitundu ddittheddene dda va ellapo yavatthi ddineerodalisiwa oyeella mwa weyaano#28.14 mitundu…weyaano: apaalle mitundu ddittheddene ddineerekokiveka miyaano wi kiddidalise moollikana ni mmo kuudaliselleemi. ni edduullu ddawo. 15Ngoona, miyaano ngiwa kuuhiya, kineerewuuteteza orive weko oneereewe oyeewo nave kineerewuuhokollosella o ellapo yeella. Ngiwa kuuhiya ophiyera kenre ddittheddene kuulonjezilleeminndda.”
16Yakobo avenyille aallota wi, “Ddawoona, Apwiya eri vaava nave miyaano ngaadduwella.” 17Ahoova nave aallota wi, “Hii, nipuronna tti noottikhiniha! Vaava tti enyumba ya Mulluku navettho tti mullako wooddullu.”
18Sika Yakobo aavenya osaka wene ohinase nave aakusa nlluku ahameellihalleeye murunne aniimesa wi nikhalle nlluku na yawuupuwelliha. Vano aanizoza ni makhura nllukunno. 19Sika aaniromolla nipuronno Betele#28.19 Betele: Nnddina nenna mu Eheberi ninattaphullella, enyumba ya Mulluku. koma vawaamba naromolliwa Luzi. 20Vano Yakobo aallupella wa Mulluku wi, “Mwakhalla ni miyaano nave mwakiteteza phaama voolendonaakoolla navettho mwakivaha ddoocha ni ddoowara, 21navettho mwakihokollosella ni murendelle wa attiitthaaka, muneerokhalla Mullukwaaka. 22Nlluku na yawuupuwelliha kiimesilleeminna ninaakhalle enyumbaanyu nave miyaano kineerowinnyani yaneekhumi ya ddittheddene munaakivaheenyu.”
Iliyochaguliwa sasa
Genesis 28: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.