Genesis 38
38
Yuda ni Tamara
1Enthawi yeeyo Yuda ahaahiya asinne aya akhalla wa muthu mmodda a nlloko na Adulamu nnddina naye Hira. 2Wenko Yuda aamoonawo mutthiyana Aakanani, mwaana a Suwa, amutthella. 3Mutthiyanooyo aakusa erukullu nave amuyara mwaana aamullopwana nave aamuvaha nnddina nawi Ere. 4Aakusattho erukullu emodda nave amuyara mwaana aamullopwana nave aamuvaha nnddina nawi Onani. 5Aamuyarattho mwaana aamullopwana mmodda nave aamwinnya nnddina nawi Shela. Shela ayariweeye, Yuda aari akelle o Kezibu.
6Yuda aamwaashera mutthiyana mwanaye awaamboolle Ere, nnddina naye Tamara. 7Koma makhallello oonanara a Ere yahaashiha murima Apwiya, sika yaamwiipha. 8Sika Yuda aamulleella Onani wi, “Okone ni mwaara muha mwanamunnoolle. Onaphwanella ovollowe munipuroni mwaye wi muha mwanamunno akhalle ni anamwani.” 9Koma Onani aadduwella wi anamwanaayo khekhalla aaye. Sika vookonani ni mutthiyanooyo aatathillella vatthi mmiddwaaye wi ahimuyarelle anamwani mwanamunne. 10Eerilleeyenndda ddaamushiha murima Mulluku sika Apwiya yaamwiiphattho Onani. 11Vaavo Yuda aamulleella mvokohaaye Tamara wi, “Hokollweellani wa attiitthiinyu, mwakhalle naamukhwelle wenko ophiyera mwanaka Shela unnuwalle.” Allotille ddenndda kaambiiwa oova wi Shela ttuukhwattho wonanko asinnaalle. Sika Tamara aahokollweella wa attiitthinnya.
12Viviralle enthawi, mwaara Yuda, mwaana a Suwa, aakhwa. Sika vano Yuda amallihalle winlla malirwaayo, olliye ni mukhwaaye Hira Muadulamu, yaaya o Timna woochema enkhosa ddaye. 13Muthu mmodda aamulleella Tamara wi, “Attiitthi a muha mamuno enaya o Timna woochema enkhosa.” 14Vano Tamarooyo aarulla ddoowara ddaye dda onaamukhwellenndde awara ddimodda. Ahiipitthiha ekhovaaye ni ekuwo, aya akeraatthi va ettilla yoovollowella o Enaimu. Muzi wa Enaimu waari mukhwipi mwa musewu wooyeella o Timna. Tamara aadduwella wi Shela aari unnuwalle koma Yuda aari ahinamuvelleelle wi amutthelle olliye. 15Yuda amoonille mutthiyanooyo, aganiza wi tti hule kaambiiwa aari iipitthihalle ekhove. 16Voohidduwellani wi tti mvokohaaye, Yuda aaya vakhwipi va musewu vaari mutthiyanooyo amulleella wi, “Ethiyo ttuukaakhullella wi kikone ni weyaano?”
Mutthiyanooyo aakoha wi, “Munaakivahe tini?”
17Yuda ahaakhulla wi, “Kineerewuurumihella mwanapuri oovenyera munikhollani mwaka.”
Vano Tamarooyo aallota wi, “Ee, kineerewaakhullella mwakinnya echikole wi kiyisunge ophiyera mukirumihelle musaana a epuri.”
18Yuda aamukoha wi, “Ethiyo onapaalla echikole ya mutundu tini?”
Tamara ahaakhulla wi, “Mukinnye emphetaanyu, mukwaanyu ni mutootwaanyu oyo ori m'mattani mwanyummu.” Vano Yuda aavelleella ddittheddenennddo wa Tamara. Sika Yuda aakona ni mutthiyanooyo nave Tamara aakusa erukullu. 19Tamara aaya owaniwa, attaphulla ekuwo iipitthihalleeyena ekhoveelle nave awarattho ddoowara ddaye dda o naamukhwellenndde.
20Vatulli viwa Yuda aamuruma mukhwaayoolle Hira woovelleella mwanapuroolle wi mutthiyanoolle amuhokolloselle echikoleelle. Koma mukhwaayooyo khaamuphwanyillevo mutthiyanoolle. 21Ahaakoha allopwana a wenko wi, “Ethiyo hule akhalla vamusewuni wooyeella o Enaimoolle ari wuuwi?”
Allopwanaayo yaamwaakhulla wi, “Waambeella khalle khavinakhalleke hule vaava.”
22Aahokollweella wa Yuda amulleella wi, “Ngimuphwannye mutthiyanoolle nave athu a wenko yallotille wi ‘Waambeella khalle khavinakhalleke hule vaava.’ ”
23Yuda aallota wi, “Ddeko nnddo akuse ddikhalle ddaaye, woova wi athu enaanittheyeke. Naari ohimuphwannye mutthiyanooyo komave miyaano kaamurumihella mwanapuroolla.”
24Viviralle miyeri miraru, muthu mmodda aamulleella Yuda wi, “Mvokohaanyoolla Tamara oheera wonanko hule nave ookusa erukullu yavahakani.”
Nave Yuda aalamula wi, “Khaweni mwamuphare nave mwamoose viikho wi akhwe.”
25Voomupharani, Tamara aarumiha mawu wa Yuda attiitthinnya a muha mamune wi, “Miyaano kiri ni erukullu ya mwaneena a ddekonndda. Ngaddiweheseseni apaalle nyuwaano ttuumudduwella mwaneena a empheteella ni mukoolla vamoddattho ni mutootoolla.”
26Yuda aaddidduwella ddekonnddo nave aallota wi, “Mutthiyanoolla khachimwalle ello koma kichimwalle tti miyaano. Keerihalle tti miyaano voohimuvelleellani wa mwanaka Shela wi amutthelle.” Sika Yuda khaakonillenattho mutthiyanooyo.
27Ekwakhwanne enthawi yawi Tamara ayare m'mirimani mwaye mwaphwanyeya anapattha. 28Vooyarani, mmodda mwa anamwanaayo aakhumiha muwono. Muzamba aawuphara muwonooyo awumaka ni mukwe woofiira nave aallota wi, “Olla sika awaamba.” 29Koma mwaanooyo aawuhokollosella muwari muwonwaaye, mwawi mwanamunne sika aari aawaamba. Sika vano muzamboolle aallota wi, “Wiitthallelle musewu weekha mwawi ddiidda!” Sika mwaanooyo aaromolliwa Perezi.#38.29 Perezi: Nnddina nenna mu Eheberi ninattaphullella otthalla. 30Vatulli viwa mwanamunne aayariwa ni mukwe woofiiroolle ori llellee m'muwononi. Vano olliyoolla aaromolliwa Zera.#38.30 Zera: Nnddina nenna niniiweya wonanko na Eheberi nno ninattaphullella owala woofiira wa ohinase.
Iliyochaguliwa sasa
Genesis 38: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.