Levitiko 5
5
Ezisanzo dda mikutho ddoopepesella machimo
1“Muthu iithaniwa o nthato namillatu, enamullupelliha wi allote dda omboni oonilleeye apaalle anadduwelleeye, olliyooyo akhoota oovelleella ombonooyo, muthu yooyo tti oophwanella ollakiwa. 2Muthu attannya erive ello yooripihiwa wonanko enama yamuhakani apaalle yooweta yookhwa apaallettho ddawaapadda ddookhwa anniiripiha moohidduwella nave oochimwa. 3Muthu attannya orive mutundu wa ddooripihiwa dda muthu nave voottannyanimvo anniiripiha moohidduwella, vatulli viwa adduwella nnddo eerilleeye, muthooyo tti oochimwa. 4Muthu achimwa voollupellani mwawaakuva wi aneereweera ello yoonanara apaalle yaphaama, orive ollupella nko muthu aneereeye moohidduwella ddookatamiha dda ollupellanko, vatulli viwa adduwella nnddo eerilleeye, muthooyo tti oochimwa.
5“Muthu achimwa va emodda ya ddiromolliwenndda, awulule nichimo nayenno. 6Sika awe wi avelleelle wa Apwiya mukutho, ekaamba ya nichimo nayenno. Mukuthweene okhalle wa enkhosa yaamutthiyana apaalle epuri yaamutthiyana. Mwawi ddiidda mullupa mukutho aheraatthi mukutho woopepesella machimo ekaamba ya nichimo na muthooyo nave aneerokhululukelliwa.
7“Koma muthu aahikhallana enkhosa apaalle epuri, akuse manddiya meelli apaalle mawunda meelli wi ddikhalle mukutho woovelleelliwa wa Apwiya woopepesella machimo. Emodda ekhalle mukutho woopepesella machimo nave emoddeeyo ekhalle mukutho wooshellelliha. 8Aweena wa mullupa mukutho nave mullupa mukuthooyo aambe ovelleella epallame yoopepesella machimweeyo. Ayinyokotholle nikohi koma ahiyiphadde muru, 9nave amidde nikhame nimodda na epallameeyo mukhwipi mwa nikuwa. Nave attannyihe epallameeyo vasirini va nikuwanno wi nikhame noohallanno neetellelle vakhwipi va nikuwa. Yooyo sika mukutho woopepesella machimo. 10Nave aheraatthi epallame emoddeeyo wi ekhalle mukutho wooshellelliha, voothwarihani mutethwiiwa. Mwawi ddiidda aheraatthi mukutho woopepesella machimo ekaamba ya nichimo na muthooyo nave aneerokhululukelliwa.
11“Koma muthu aahikhallana manddiya meelli apaalle ekhunda piilli, awe ni othu waphaama wookwakhwana kilogaramu nimodda wi okhalle mukutho woopepesella nichimo nno aneerilleeye. Ahihellemo makhura apaalle lubani* kaambiiwa yooyo tti mukutho woopepesella machimo. 12Vano aweena wa mullupa mukutho othooyo nave mullupa mukuthooyo avahullevo nnatta nimodda wooniha wi mukutho muttheenooyo woovelleelliwa wa Apwiya nave awushellellihe vanikuwani ni mikutho ddittheddene ddawoosiwa viikho ddoovelleelliwa wa Apwiya. Yooyo tti mukutho woopepesella machimo. 13Mwawi ddiidda aheraatthi mukutho woopepesella machimo ekaamba ya nichimo na muthooyo nave aneerokhululukelliwa. Vano ddoohalla ddikhalle dda mullupa mukuthooyo, wonanko mmo eneerelliiwa ni mikutho dda othu.”
Mukutho woolliva
14Apwiya yaallota ni Mose wi, 15“Muthu eera ddeko moohiroromelleya, voohivelleellani ddeko ddoopatuleya ddoophwanella ovelleella wa Apwiya koma moohidduwella, avelleelle wa Apwiya mukutho woolliva ekaamba ya nichimo nayenno. Mukuthweene okhalle nankhoro a enkhosa yoohirakalla nave mutengo wa enkhoseeyo okhalle wa makobiri manchichi, voothwarani yoolingella yoopatuleya. Yooyo sika mukutho woolliva. 16Vano muthooyo allive ddoopatuleya nnddo ahiddivelleelleeye nave oonjererevo yaneetthanu nave avelleelle wa mullupa mukutho. Mwawi ddiidda mullupa mukuthooyo aheraatthi mukutho woolliva ekaamba ya machimo a muthooyo voovelleellani mukutho wa nankhoro a enkhosa nave muthooyo aneerokhululukelliwa.
17“Muthu achimwa vaweerani moohidduwella ello yoovaanyihiwa ni malamulo a Apwiya, muthu yooyo oochimwa nave tti oophwanella ollakiwa. 18Aweena wa mullupa mukutho nankhoro a enkhosa yoohirakalla nave mutengwiiwa okhalle wookwakhwana mutengo wookeraattheya wa enama ya mukutho woolliva. Mwawi ddiidda mullupa mukuthooyo aheraatthi mukutho woolliva ekaamba ya nichimo na muthooyo nave oneerokhululukelliwa. 19Yooyo sika mukutho wa olliva, ekaamba yawi muthooyo oochimwa vamiitthoni va Apwiya.”
Iliyochaguliwa sasa
Levitiko 5: MW2019
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Elhomwe © The Bible Society of Malawi, 2019.