luka 15
15
asa 15
goŋol gun gɩḏuḏo
mṯ. 18:12-14
1na liji wei lun laṯɩmeje ṯulba na lun lɩki lɩdakaḏəṯi lugwun gwaldeŋɩnejo. 2na lɩbarɩsi na jalŋaṯɩm nanuməḏəṯelo nalarno, gwiji kweno gwəmɩnyu liji lun lɩki naṯɩlʼe. 3nuluməḏɩjo ŋuɽuna ŋeno ŋun ŋɩlɩbo nuleicɩno; 4gwiji gwo gwura lagalo gwun gwəṯi joŋolia ḏuɽi di na ḏa ŋɩmaḏuḏe getɩdo gwate gwaṯɩwaalne gi joŋol jun jiro ḏuɽi ṯoḏɩnekwoɽo na ṯoḏɩnekwoɽo geḏo, naṯuwele gi ḏɩbunya gun gɩḏuḏo kəbe nubuje na? 5na ḏa gumubuja naṯugelino kwudom elo nudile ganu; 6na ḏa mila dunu lugwun naṯuəmɩḏe lɩmeḏin na liji lun ləṯilijaḏe ga nuleicɩno, ildile ganu, nyi gwumabuja goŋolia ginyi gun gɩḏuḏo. 7nyi gweiceijɩno, na ŋiro dino ḏidila ḏaje ḏutəno ganu kanyin dino kwiji gweṯɩdo gwun gwɩki gwun gwuwɩrlo ga ŋuɽun ŋun ŋɩki gi liji lun liro ḏuɽi ṯoḏɩnekwoɽo na ṯoḏɩnekwoɽo lun liŋir lun late lɩbunyu ḏuwɩrla ga no.
ruba gwun gwiḏuḏo
8na gwa gwo gwura gwun gwəṯi. ruba di. na ḏa gwumaḏuḏe gwetɩdo, gwate gwaṯuwɩdi lambə, numuje duno galo nubunyi mɩce kəbe nubuje na? 9na ḏa gwumubuje naṯuəmɩḏe lɩmeḏin na liji lun ləṯilijaḏe ga, nuleicɩno, ildiie ganu. nyi mabuje ruba gwun gwiḏuḏo. 10nyi gweiceijɩno, na ŋiro dino ḏidila ḏaje gi jei ganu jeḏi liji leḏi kanyin kwiji gwetɩdo gwun gwɩki gwun gwuwɩrlo ga ŋuɽun ŋun ŋɩki.
ŋaɽe ŋun ŋɩwɩrla ga
11nuleicɩno, gwiji gwete gwəṯi nyaɽe nyɩttən nyun nyiro ləmɩnyo. 12na ŋun ŋɩtieno uməḏɩjo babaŋ gwuŋun nuelcɩno, baba, kenyɩḏijije ŋɩdio ganu ŋuŋa nyilḏəḏə ŋinyi; nulkenyɩḏɩjo ŋɩdio ganu ŋuŋun. 13na ŋaɽe ŋun ŋɩtieno jiga ŋwamon ŋwədi, nuwəɽeice ŋɩdio ŋuŋun wei ldu, nugele kamɩrɩgen yete yun yola ganu; na ŋɩnəwei nuwəri galo ŋɩdi ŋe ŋuŋun, naṯuape ŋuɽuna ŋɩki. 14na gwune nuduji ŋɩdio ŋuŋun wei na janu je jɩbuḏo kamɩrɩgen yəwei nubunyi ŋuləṯi. 15nuwele nuḏɩra gwete gweḏi amɩrɩgen yəwei, naṯuwəje geḏo gi ḏiʼia juḏuro. 16naṯuar gwenyeje gare guŋun jumuruḏo jun jiṯɩlo juḏur, numɩni ate nan gwetɩdo ḏəḏə no. 17na gwune nulɩŋe gwiro gɩɽilo, nuuməḏɩni nuarno, jaḏam jeḏi baba gwinyi jutu naləṯi ŋɩdio ŋe ḏiṯa ŋutu, nyimɩni je ŋɩme gwar gwal jaŋu. 18nyi gweḏiɽi gwele ḏi baba gwinyi, gwiuməḏɩjo gwieicɩno, bala, nyi mape ŋuɽuna ŋɩki kanyin na lugwuŋa. 19na nyi gwate gwɩdeleḏo gwinyieico ŋaɽe ŋuŋa no. dujinyi gi gwune gaḏam gete guŋa. 20nudiɽi nuwele ḏi baba gwuŋun, namɩni gwune ju gi ṯaṯ uro ŋɩnəwei na baba gwuŋun aŋu nuino, nuoɽe numɩɽenyə, numaṯane ganu. 21ni ŋaɽe uməḏɩjo nueicɩno, baba, nyi mape ŋuɽuna ŋɩki kanyin na lugwuŋa. na nyi gwate gwɩḏeleḏo nyi gwinyieico ŋaɽe ŋuŋa no. 22namɩni baba uməḏɩjo lɩwainya luŋun nuleicɩno, apal lugə coucou lun liŋirano nyaŋaki, nyəḏɩje luɽuŋe gi ḏi ḏuŋun, nyaŋaki jɩwɩḏia ŋwara ŋwuŋun. 23nyapa galajala gun giɽona, nyaḏuge, ilʼe ildile ganu. 24gi gwune ŋaɽe ŋinyi ŋeno ŋaiyo namɩni ŋɩməmɩḏe mɩna, ŋɩḏuḏo namɩni ŋɩmabuḏini. na luŋa nalɩje gi ḏidila ganu. 25namɩni ŋaɽe je geḏo ŋun ŋiro lɽa. gwune nuwila nudaka duno nanu, nudiŋɩni ŋwal ŋweḏi ŋiɽebeḏe na ŋweḏi ḏɩriṯa. 26nuəmɩḏe gaḏama gete nuuməḏɩjo galo ŋuɽun ŋe ŋeno. 27nuuməḏɩjo nueicɩno, magalo gwumila, namɩni baba gwalo gwimaḏuge galajala gun giɽona gi gwune nubuje miŋir nanu. 28nuɽe ganu gworki nuate nuəmɩnyi ŋəḏi no. na baba gwuŋun du nuɽoṯeḏe lugwun gworki. 29nuwɩrlijo babaŋ gwuŋun ŋuɽuna nueicɩno, baba, nyi gwaṯaŋəpijo ŋɩru jɩḏilio ceno jutu, na bubruṯ nyi gwate gwatɩnki ŋuɽuna ŋuŋa no, nate ninmɩni ḏəḏə laɽe lanaldile ganu lɩmaḏəri le no. 30namɩni gwune na ŋaɽe ŋuŋa ŋeno wila ŋun ŋuwɩriḏi galo ŋɩdi ŋe ŋuŋa gi la lun limɩɽiḏi jei ganu, namɩni ḏugijo galajala gun giɽona. 31numɩni uməḏɩjo nueicɩno, ŋaɽe ŋe ŋinyi, alaṯɩje bubruṯ, namɩni ŋɩdi ŋinyi wei ŋuŋa ŋiro. 32namɩni ŋuɽun ŋiŋir nanəḏile ganu nanarre gwobɩɽa, gi gwune magalo kweno gwaiyo namɩni məmɩḏe mɩna, gwiḏuḏo namɩni mabuḏini.
Iliyochaguliwa sasa
luka 15: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.