luka 19
19
asa 19
saka
1na yecu obene nuwele kɩlɩgi ganu uriya. 2na gwəmɩnyo je gwete gwun gwan saka; gwun gwiro gwele gweḏi liji lun laṯɩmeje ṯulba na ŋu gwutu ŋɩdio. 3nuar gwaŋu yecuŋ gwiro galakwe, numɩni ate nuəṯi ŋɩma no gi gwune liji lijo lutu, na ŋu gwobɩla ganu. 4nueneḏe nudarane nuabo kwida elo kani nuaŋu, gi gwune ŋu gwar gwadare ŋɩnəwei. 5na gwune na yecu wila kalo geḏi gwaɽe, nubaŋelo nuaŋu nuuməḏɩjo nueicɩno, saka, gwuləḏo galo coucou; arram nyi gwaje kwu dunu gwuŋa gwunanyine. 6nugwuləḏo galo coucou numəṯo gwudilo ganu. 7na gwune na liji aŋu nanuməḏəṯelo nalarno, ŋu məḏi kwu dunu gweḏi gwiji gwun gwɩki. 8na saka ḏuḏɩni nueico gwelɩnya gwun gwiro elo no, gwele gwi, nyi gwəḏəḏə liji ŋɩdio ŋinyi kɩḏɩriḏ lun late ləṯi ŋɩdio no, na ḏa nyi mape ŋɩdio ŋeḏi gwiji gwete ŋuɽun ŋe ŋun ŋiro ŋɩwɩɽɩgal ŋilwəɽəṯɩjo ŋwamon ganu kwoɽo. 9na yecu uməḏɩjo nueicɩno, gwunanyine ḏɩkədəḏɩnə ga ḏɩmila kwu dunu kwe; gi gwune ŋu dino gwiro ŋaɽe ŋeḏi ibraim. 10gi gwune ŋaɽe ŋeḏi liji ŋɩmila lulbunyi lulkədə ga lun lɩḏuḏo.
ŋuɽun ŋun ŋɩlɩbo ŋeḏi jɩnei
11na gwune naldiŋɩni ŋuɽuna ŋeno, nuaɽu nuluməḏɩjo ŋuɽuna ŋun ŋɩlɩbo, gi gwune lijo gɩṯo urucəlim, na luŋa nalarno, ŋele ŋeḏi elo ŋaŋinu cou. 12na gi gwune dino, nuleicɩno, gwiji gwete gwun gwiro ŋaɽe ŋeḏi gwele mele kamɩrɩgen yete yun yola ganu nuar gwapa ŋelɩnya kwulo gwuŋun ki nuaɽuwa. 13nuəmɩḏa lɩwainya luŋun di, nulḏəḏə jɩnei di nuleicɩno, apilje ŋɩru kəbe nyiaɽuwa. 14namɩni liji leḏi amɩrɩgen yuŋun gwudonyilo nalwəje liji gɩdo gwaluməḏɩjo, naleicɩno, anaŋa late lɩbunyu gwiji kweno gwaro gwele gwəri no. 15na gwune nuapa ŋelɩnya ki nuaɽuwa nugele ŋuɽuna gwəmɩḏe lɩwainya leno lun lɩḏəḏɩlo əlŋɩrucə, ŋwulɩŋe gwun gwimapa ŋɩru lɩmabaḏaice luŋa wei aŋe. 16na gwun gwiro lɽa wila lugwun nueicɩno, gwele gwəri, jɩnei juŋa jɩmaro di na gwete. 17nueicɩno, wainy gwun gwiŋir, ŋa mape ŋɩru muma, gi gwune apa ŋɩru ŋɩti ŋiŋir duḏi gwele gweḏi jɩmɩrɩgen di. 18na wainy wila gwun gwiro kaja nueicɩno, gwele gwəri, jɩnei juŋa jɩmaro nyəɽɩl. 19nueico dino no, duḏi gwele gweḏi jɩmɩrɩgen ṯoḏɩne. 20nuwila gwun gwiro gɩdo dino, nueicɩno gwele gwəri, eʼe jɩnei juŋa jun jijo lugwi, jikaiejɩlo kiria ganu, 21gi gwune nyi gwuḏonyaŋa, ŋa gwiro gwiji gwun gwuməṯi ŋuɽuna ḏiḏir, ŋaṯalape ŋun ŋate ŋaṯalŋele no, ŋaṯalwone ŋun ŋate ŋɩkwudəlo no. 22nueicɩno. gi linyu luŋa nyi gwaŋakɩmi, wainy gwun gwɩki. ŋa gwilɩŋiḏi nyi gwiro gwiji gwun gwaṯɩməṯo ŋuɽuna ḏiḏir, nilape ŋun ŋate ŋigelɩlo no, nilwone ŋun ŋate ŋɩkwuḏɩlo na? 23gwudaro gəko nate naŋele əlŋɩrucə yinyi gi ṯarabesa gi liji leḏi eḏɩla kəbe ḏi mila nyibuje imabaḏaice gworo no? 24nuuməḏɩjo liji lun lɩḏuḏɩnu, nuleicɩno, wələḏɩl jɩnei nyalḏəḏə gwun gwəṯi jɩnei di. 25naluməḏɩjo naleicɩno, gwele gwəri, gwəṯi jɩnei di. 26namɩni nyi gweiceijɩno, wei lun ləṯi ŋɩdio ŋalɩḏəḏə ŋutəno, namɩni gwun gwate gəṯulo no namɩni ŋun ŋəṯulo ŋulapa lugwun. 27namɩni leno lun lɩkiḏiḏianale lun lɩdonyi nyi gwaro gwele gwagin apɩllo ŋɩne, nyalɽinye gi jei ganu jinyi.
ḏobena ḏeḏi yecu urucəlim ḏiḏamɩḏa ḏe
mṯ. 21:1-11, mks. 11:1-11, ywn. 12:12-19
28gwune na yecu aro dino nudara kɩɽelo nuabo urucəlim. 29na gwune nuji gɩṯo beṯbaji na beṯiniya kalo geḏi lɩrgwom lan seitun, nuwaje calɩmis juŋun jɩttən, 30nuleicɩno, wiḏɩl gi lɩrgwom lono gi jei ganu lagalo. na ḏa nyalmobene nyalabuje ŋəɽigə ŋɩkanano ga ŋate ŋabuḏɩne gwiji elo no; kəduḏəl nyilgwuluḏijo, 31na ḏa gwiji gwədi majinɽoṯəḏɩjo marno nyalarra nanyakəduḏo? nyamɩni eico, ŋibunyu gwele gwun gwiro elo. 32nalwele lun lɩwəjɩnu nalbuje gi gwune eicɩlɩne. 33na gi gwune kəduḏɩlo ŋəɽigə na lun leḏi ŋəɽigo eicɩno, gwudaro gəko na nyəkəḏu ŋəɽigə? 34naleicɩno, ŋibunyu gwele gwun gwiro elo. 35nalgwuluḏɩjo yecuŋ na gwune nagikuwa jiria jagin ŋəɽgə elo nalabuje yecuŋ elo. 36na gi gwune wiḏɩlo nalkɩlije jiria jagin ga gi ṯaṯ elo. 37na gwune naldikaḏa gɩṯo nalar lagwuləḏo ga gi lɩrgwom elo lun lan seitun naliḏeije ga wei lun liro calɩmis ləḏile ganu nalorṯeḏa eloŋu ŋwal ŋwe ŋwɩbuḏo ŋuɽun ŋe wei ŋeḏi ŋɩma ŋun ŋəŋəḏɩlo. 38nalarno,
ḏɩbuḏia ḏaje kwele gwun gwuwiḏi jiri je jeḏi elo;
ḏouwɩɽiḏa ḏaje kanyin, na ḏoɽeḏa kalo gun golenelo.
39namɩni lɩbarɩsi kworo gi loro lun lutu naleicɩno, mualɩm gwəri, kɩrinyəḏi calɩmis juŋa. 40nulwɩrlijo ŋuɽuna nuleicɩno, na ḏa jɩmaje ceno nyɩkwom, namɩni nyɩdol nyəri gwula.
yecu gwəri gwula gwan urucəlim
41na gwune nudika gɩṯo nuaŋu amɩrɩgena nuərɩḏo, nueicɩno, 42na ḏa ŋa gwilɩŋiḏiŋa ŋɩdio ŋe ḏouwɩɽiḏa ḏuŋa gi lamon leno—namɩni ŋɩmalɩbiḏini gi jei ganu juŋa. 43gi gwune ŋwamon gwaje gwila lugwuŋa na lun lɩkiḏiḏianyale naluṯe ḏuɽiwiya ḏun ḏiro ḏimɩle ḏaŋalḏɩwəɽeico ga, nalaŋouwəɽeico ga, nalaŋadɩme muma ŋwumeria nana wei. 44nalaŋakwuri ga kwɩnyəm na nyaɽe nyaɽe lugwuŋa, nalate lanouwɩrico gɩḏolia kworo elo no, gi gwune ŋa gwate gwilɩŋiḏi gaja gun giwilijaŋage elo no. 45nuəḏi kwu dunu gweḏi elo gwun gwubuḏo nulditio lun laṯeḏɩla na lun ŋaṯɩleḏɩla ŋɩno, 46nuleicɩno, ŋulinu, dunu gwinyi gwiro ḏunu gweḏi ḏuməḏɩɽo eloŋu, namɩni manyaduji gimu geḏi luɽam.
47naṯualɩmiḏe ŋwamon wei kwu dunu gweḏi elo gwun gwubuḏo; na jɩsis jun jɩbuḏo na jalgaṯɩm na lele leḏi liji nalbunyi gwalɽinye. 48nalmɩni ate nalbuje ŋuɽuna larre galakwe no; gi gwune liji lijo lutu ligelo nəni ga lar ləḏiŋɩni lugwun.
Iliyochaguliwa sasa
luka 19: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.