luka 21
21
asa 21
milim gweḏi gwa gwun gwiro gwinino
mks. 12:41-44
1nubaŋelo nuaŋu liji lun ləṯi ŋɩdio ŋutu laṯɩwini ŋɩdi ŋe ŋagin kwaŋ gwun gwatɩniŋele əlŋɩrucə. 2nuaŋu dino gwa gwun gwiro gwinino gwun gwate gwəṯi ŋɩdio no, nuwini lɩmilim le lɩttən ŋɩnəwei, 3nuarno, gwerkwe nyi gweiceijɩno, gwa kweno gwun gwiro gwinino gwun gwate gwəṯi ŋɩdio no, nuwini ŋwutəno gi liji wei, 4na gi ḏutɩḏo ŋɩdio ŋagin leno wei ŋalŋiwinɩjo eloŋ ŋɩdi ŋuŋun, namɩni ŋu ŋun ŋate ŋəṯulo no, nuŋwini wei ŋun ŋəṯulo.
yecu gwuməḏi ŋuɽuna ŋan ḏɩkeḏa ḏeḏi dunu gweḏi elo na gaja gun gɩṯɩmige gɩḏilio, gwerre ganu ŋate ŋɩmila no
mṯ. 24:1-31, mks. 13:1-27
5na gi gwune uməḏɩlo kworo gwan dunu gweḏi elo gwun gwubuḏo, galakwe gwuṯinu nyɩdol nye nyiŋir na ŋɩdi ŋun ŋɩḏəḏɩlo, nuleicɩno, 6ŋeno ŋun ŋəŋaḏanyalo, ŋwamon ŋwaje ŋwila gɩdol ŋate ganje kworo elo ŋun ŋate gake no. 7naluməḏɩjo ga dino naleicɩno, mualɩm gwəri, namɩni ŋuɽun ŋeno ŋar ŋaje jaḏo? na ŋɩrṯa ŋar ŋaje ŋəŋino ŋun ŋijaŋijo gworo kwe? 8nuarno, jil muma, nya lo laḏuḏe; gi gwune lila lutu jiri je jinyi, larno nyi gwiro, na gaja go gɩṯo. lo lanyalgwujane. 9na ḏa nyalmadiŋɩni ḏɩrra ḏe na ḏuɽuḏɩno ganu ḏutu, nya lo laḏonye. arram ŋɩdi ŋeno ŋaŋini gwerre, namɩni ŋeḏi gɩdo ŋate ŋaro cou no. 10nuleicɩno, liji leḏi amɩrɩgen yete leḏiɽo kworo gweḏi amɩrɩgen ŋiro kaja, na ŋele ŋədiɽo ŋele; 11na gwɩnyəm gwaje gwubəga gworki kalo ŋiro kajakaja; na jaŋu jaje, na ŋɩɽainy, na ŋɩdi ŋaje kanyin ŋun ŋaḏonyi liji na ŋuɽun ŋaje ŋəŋino kanyin ŋun ŋɩbuḏo. 12na gwerre ŋuɽun ŋeno wei, lajiməṯo, nalajɩnḏagɩɽini, nalajiḏəḏə luŋaije gi lɩdunu leḏi elo na kɩrkon; nalajigwuloḏa gi jei ganu jeḏi lele na mudirŋa gwan jiri jinyi. 13na ŋuɽun ŋeno ŋajiwɩrlio ga gi ḏɩteijo ga. 14gelil ŋuɽuna gi dugwor ganu dalo, nya lo larno ŋəri ŋɩrṯa ŋiro ŋanalwəɽəṯijo kworo, 15gi gwune nyi gwajiḏəḏə linyu na ḏilɩŋeḏa, na lun lɩkiḏiḏianyale late ləṯi ŋɩma lanuməḏəṯo ŋuɽuna kworo ganu alarno ŋɩki no. 16na nyaŋa leḏəḏɩni babaŋaije nanaŋale, na lɩmegin, na əriḏo na lɩmeḏin, nalajiɽinye kworo, 17na nya ladonyini gi liji wei gwan jiri jinyi. 18namɩni yatɩn yetɩdo kəɽu yalo yanai no. 19ḏɩməṯo ḏe dugwor dalo nyalape lula lalo.
20na ḏa nyalmaŋu urucəlim ma ajana wəɽeico ga, lɩŋiḏil nyarno ḏɩkeḏa ga ḏuŋun ḏo gɩṯo. 21na kaja kono ouwɩricɩlo lun lijo yauḏia alabɩra ŋwurgwom; na lun lijo kɩlɩgi ganu alduḏo, na lun lijo geḏo lo lanəḏi lugwun, 22gi gwune ŋwamon ŋwiro ŋweno ŋweḏi wəɽəṯijo ḏakɩmiḏa, kani aiṯɩmi wei ŋun ŋulinu. 23ŋɩki lagin lun ligwuli na lun liji nyaɽe ŋan ŋwamon ŋweno, gi gwune ŋuɽun ŋaje ŋɩbɩɽe gworki ga kwɩnyəm, na ḏɩɽeḏa ganu cicer gi liji leno. 24nalijinye ŋwuwio ŋe ŋeḏi kɩwiḏ, lagwuluḏɩni laro lɩwainy gi liji leḏi jɩmɩrɩgen nanu wei, na urucəlim gwəduṯəḏɩni ga liji lun liro ga dino, kəbe na gaja geḏi liji lun liro ga dino gaṯɩmi.
25na ŋuɽun ŋaje ŋəŋɩno kanyin na kuwə na ŋwudum, na ga kwɩnyəm ŋuɽun ŋaje ŋɩbɩɽe gi liji leḏi jɩmɩrɩgen wei ḏobeḏa ḏe ga ṯuṯ, gi gwune ḏɩrawe na ḏupio ŋau gworo naləri gwula. 26na dugwor deḏi liji dɩmal ŋɩḏe ɽinye ḏər, gi gwune leṯeijo ŋɩdio ŋun ŋaje ŋila kɩḏɩlio, gi gwune ŋɩma ŋeḏi kanyin ŋubəga. 27na kaja keno laŋu ŋaɽe ŋeḏi liji ŋaɽuwa gi jəbiɽu ŋɩma ŋe na ḏoɽeḏa ḏe ḏutu. 28na ḏa ŋɩdi ŋeno ŋɩmiḏeije ga ŋɩmaŋino dino, nyamɩni baŋelo, nyabuje ŋwuɽa ŋwalo elo, gi gwune ḏɩkədəḏɩnə ga ḏalo jili je ḏaje gɩṯo.
arram liji ləṯigirini
mṯ. 24:32-35, mks. 13:28-31
29nuluməḏɩjo ŋuɽuna ŋun ŋɩlɩbo nuleicɩno, aŋəḏɩl gwuwɩḏa na jaɽe wei. 30ḏa jɩmare jɩmane janyalaŋu nanyalalɩŋe gi lulo lalo ŋwuram ŋwo gɩṯo. 31na ŋiro dino nyaŋa, ḏa nyalmaŋu ŋɩdio ŋeno ŋun ŋəŋinu, nyamɩni lɩŋe nyarno ŋele ŋeḏi elo ŋo gɩṯo. 32gwerkwe nyi gweiceijɩno, liji leḏi gwunne late lanete no kəbe na ŋuɽun ŋeno ṯɩmi wei. 33anyin na gwɩnyəm lete namɩni ŋuɽun ŋinyi ŋate ŋete no.
34nyamɩni ji muma, i kaja gədi dugwor dalo dəni ḏuwəḏə ḏe, na ḏɩrləlo, na ŋuɽun ŋun ŋutu ganu ŋe ḏɩmiḏa ḏeḏi gɩḏilio, na lamon ləwei lajiṯɩminane girimu. 35na lila gi ḏigɩɽijo gi liji lun lijiga kɩḏɩlio wei. 36girinɩl nyuməḏɩjo eloŋu bubruṯ, kani nyəṯi ŋɩma nyobɩḏɩni ŋɩdi ŋeno wei ŋun ŋila, nyaḏuḏɩni gi jei ganu jeḏi ŋaɽe ŋeḏi liji.
37na anyine nualɩmiḏe kwu dunu gweḏi elo gwun gwubuḏo, na gilio nudu nujiga gi lɩrgwom lun lan seitun. 38na liji wei naṯɩlila lugwun mimɩni gilio kwu dunu gweḏi elo gwun gwubuḏo gwalḏeŋɩnejo.
Iliyochaguliwa sasa
luka 21: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.