maṯa 22
22
asa 22
ŋuɽun ŋun ŋɩlɩbo ŋeḏi gɩmuri geḏi ḏaga
1nal yecu aɽu nulwɩrlijo ŋuɽuna ŋun ŋɩlɩbo, nuleicɩno, 2ŋele ŋeḏi kanyin ŋiro gi gwele gwete gwugico ŋaɽe ŋuŋun ŋun ŋiro gwəmɩnyo gɩmuri ge ḏaga. 3nuwəje lɩwainya luŋun aləmɩḏe lun ləmɩḏɩlo kalo geḏi ḏaga, nalmɩni ate naləmɩnyi lila no. 4nuaɽu nuwəjo lɩwainya liro kaja nuleicɩno, eicɩl lun ləmɩḏɩlo no, eʼe, nyi maŋele ŋɩdio ŋe ḏiṯa muma, na nyɩḏri nyinyi na nyun nyiɽona nyimaɽinyini na ŋɩdi wei ŋɩmaḏaḏaṯe wɽi, wilal gi ḏaga. 5nalmɩni ate nalnəji ŋuɽuna ŋuŋun no nuwele, gwete gi ḏɩri ḏuŋun, na gwiro kaja nuwele gi ḏeḏila ŋɩdio ŋuŋun. 6na lun lɩṯanu nalməṯo lɩwainya luŋun nalɩnḏagiɽɩni nalɩɽinye. 7gwune na gwele diŋɩni, nuɽe ganu; nuwəje ajana yuŋun alɩɽinye lun lijinyɩḏo, alnuni amɩrɩgena ŋagin. 8nueico lɩwainya luŋun no, ḏaga ḏɩmaḏaḏaṯe, namɩni lun ləmɩḏɩlo late lɩdeleḏo no. 9na dino nyele gi daṯ na liji wei lun lanyalbuja əmɩḏalo alwila gi ḏaga. 10na lɩwainy leno tuḏə gi daṯ nulgwuluḏɩjo wei lun limalɩbuja, lun lɩki na lun lɩŋir; nalenyeḏe kɩmuri. 11na gwele əḏi nuŋalaḏe gi liḏo, nuaŋu ŋɩnəwei gwiji gwate gwukanu giria ge ḏaga no, 12nueicɩno, maḏəri, galakwe ŋa gwəḏi ŋɩne ŋa gwate gwəṯi giria ge ḏaga no? nuje nyɩkwom. 13na gwele eico jaḏama no, kaiyil ŋwara na di, nyape nyagwuwini kirɩm kɩluḏo. na ŋɩnəwei ḏərio gwula ḏaje na ḏiʼino gi jɩŋaḏ; 14gi gwune lo lutu ləmɩḏɩni, namɩni lo lɩti lɩməṯɩnu.
ŋuɽun ŋeḏi ṯulba ḏeḏi gesar
mks. 12:13-17, lk. 20:20-26
15na lɩbarɩsi naluməḏəṯe laginŋu galakwe alumə aldiŋɩni ŋuɽuna ŋədi ŋun ŋunuməḏo ŋun ŋɩki. 16nalwəje calɩmis jagin lugwun lijiŋale leḏi ərudus naleicɩno, mualɩm gwəri, analɩŋiḏi ŋa gwiro gwerkwe, naṯalɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe na gwo gwanḏonye gwetɩdo no, na gwo gwanəmɩnyene gwete kworo. 17na uməḏɩjije dino; ŋa gwuməḏɩnu ŋa gwarau? ŋiŋir anɩməḏɩjo gesarŋ ṯulba? ŋa gwarno ḏanouwɩrico a? 18namɩni yecu lɩŋe ḏirdeijo ganu ḏagin nuleicɩno, gwudaro gəko ninyiliḏeije, nyaŋa lun ləṯi ŋuɽuna ganu ŋɩttən? 19aŋijɩnyil əlŋɩrucə yeḏi ṯulba. naləpijo ruba. 20nuleicɩno, lɽa ləṯe liro na ŋwule? 21naleicɩno, ŋweḏi gesar ŋwiro. nuleicɩno, ḏəḏɩl gesarŋ ŋɩdio ŋeḏi gesar, nyalmɩni ḏəḏo eloŋu ŋeḏi elo. 22gwune naldiŋɩni ŋuɽuna ŋeno nalobaga ṯuṯ, nanwalane nalwele lagin.
ŋuɽun ŋeḏi diɽo gi ḏaiya
mks. 12:18-27, lk. 20:27-40
23na lamon leno nalwila lugwun kworo lun liro lisadugi lun laṯarno ḏidiɽo gi ḏaiya ḏate, nalɽoṯəḏɩjo, 24naleicɩno, mualɩm gwəri, musa gwarno, ḏa gwete gwɩmai gwate gwatɩn nyaɽe no, namɩni megin ɽenyeḏe kwa gwuŋun gwalgwilɩŋe nyaɽe jiri je jeḏi megin. 25na lijo lagəri kwoɽoṯəɽɩl lun liro ŋɩmaga. na gwun gwiro lɽa nuago gwa nuai; nate nulɩŋe nyaɽe no, na megin ɽenyeḏe kwa gwuŋun. 26na dino gwun gwiro nɩmɩro nɩttən na gwun gwiro ṯəɽɩl nyoŋon kəbe gwun gwiro kwoɽoṯəɽɩl. 27na gɩdo wɽi na gwa ai dino. 28na ŋiro dino, kaja ge ḏidiɽo gwa gwaro gwəṯe gi liji lun liro kwoɽoṯəɽɩl gi gwune gwagilo wei? 29nal yecu wɩrlijo ŋuɽuna nuleicɩno, ŋɩki lagalo gi gwune nya late lilɩŋiḏi gɩḏam na ŋɩma ŋeḏi elo no. 30gi gwune gi ḏidiɽo ḏe liji lun laiyo late lanago na lanəgini no, nalmɩni ro gi liji leḏi kanyin. 31namɩni gwan ḏidiɽo ḏe liji lun laiyo, nya late ləgɩri ŋuɽuna ŋun ŋeiceijiŋe elo ŋun ŋarno, 32nyi gwate gwiro elo gweḏi ibraim, na elo gweḏi isak na elo gweḏi yagub na? elo gwate gwiro elo gweḏi liji lun laiyo no, namɩni gweḏi liji lun lɩmiḏo. 33na gwune na liji ḏiŋɩni ŋeno nalobaga ṯuṯ gi ḏalɩmia ḏuŋun.
ḏiɽoṯeḏa ga ḏeḏi ŋuɽun ŋun ŋigelijɩlo elo musaŋ ŋun ŋɩnəno
mks. 12:28-34
34gwune na lɩbarɩsi diŋɩni galakwe maḏuḏɩni lisadugi ŋuɽun ŋe kəbe nalje nyɩkwom, nalaɽuwaḏa ldu. 35na gwete lagin nuɽoṯəḏɩjo, nuiḏeije nueicɩno, 36mualɩm gwi, ŋɩrṯa ŋiro ŋun ŋɩnəno ŋuɽun ŋun ŋigelijɩlo elo musaŋ? 37na yecu eicɩno, arram ŋa gwəmɩnyi gwelɩnya gwun gwiro elo gwuŋa ḏugwor ḏe ḏuŋa wei, na gwulo gwe gwuŋa wei, na ŋaḏɩgiɽe ŋe ŋuŋa wei. 38ŋuɽun ŋeno ŋiro ŋun ŋɩnəno na ŋun ŋiro lɽa kworo kweno. 39na ŋuɽun ŋun ŋugwujo gworo ŋiro dino, arram ŋa gwəmɩnyi gwiji gwun gwijaḏanyagwe ga gwiro gi gwune ŋanəmɩnyi gwula gwuŋa. 40ŋuɽun ŋeno ŋɩttən ŋəṯi ŋuɽuna wei ŋun ŋigelijɩlo elo musaŋ na ŋeḏi nebɩŋa.
ḏiɽoṯeḏa ga ḏeḏi kɩrisṯo
mks. 12:35-37, lk. 20:41-44
41gwune na lɩbarɩsi aɽuwaḏe ldu, nal yecu ɽoṯəḏɩjo, 42nuleicɩno, nyaluməḏɩnu nanyarau gwan kɩrisṯo? ŋaɽe ŋəṯe ŋiro? naleicɩno, ŋiro ŋaɽe ŋeḏi ḏauuḏ. 43nuleicɩno, na dino galakwe gəko na ḏauuḏ gwuɽɩwə gwe nueico gwele, 44nuarno,
gwele gwun gwiro elo gweico gwelɩnya gwi no,
jiga gi ḏi ḏinyi ḏun ḏiro ḏiŋir
kəbe nyiŋele liji lun lɩkiḏiḏianyale ŋwara ganu ŋwuŋa?
45na ḏino na ḏa ŋɩma ḏauuḏ eico gwele; na galakwe gəko nuro ŋaɽe ŋuŋun? 46na gwatɩn gwetɩdo gwəṯi ŋɩma gwawɩrlijo ŋuɽuna ŋəḏi no, na uro kaja kono gwatɩn gwetɩdo gwubɩɽe lɽa ganu gwuɽoṯəḏɩjo ga ŋuɽun ŋe ŋəḏi no.
Iliyochaguliwa sasa
maṯa 22: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.