maṯa 25
25
asa 25
ŋuɽun ŋun ŋɩlɩbo ŋeḏi nyera nyun nyiro di
1na ŋele ŋeḏi kanyin ŋiro gi nyera ḏi, nalape ŋwambə ŋwagin naltu gi ḏobeḏa gwəmɩnyəŋale gwe ḏaga. 2na ṯoḏɩne nyiro jɩɽilo, namɩni ṯoḏɩne nyəṯi ŋaḏɩgiɽenya; 3na nyun nyiro jɩɽilo nalape ŋwambə ŋwagin, nalmɩni ate nalapane ŋila no; 4namɩni nyun nyəṯi ŋaḏɩgiɽenya nalape ŋila ŋwuɽe ŋwe ŋwagin na ŋwambə ŋwagin. 5na kaja ŋun ŋate ŋɩmagi gwiji gwe ḏaga wila cou no, na wei nal ŋwar e jei nalḏɩre. 6na gɩlɩgina ganu naldiŋɩni gwula gwarno, eʼe, gwiji gwe ḏaga gwo gwuwiḏi; tuḏal nyalobeḏeṯe. 7na nyera nyeno wei diɽi naludi ŋwambə ŋwagin. 8na nyun nyiro jɩɽilo naleico nyun nyəṯi ŋaḏɩgiɽenya no, ḏəḏɩjine ŋila ŋalo gi gwune ŋwambə ŋwəri ŋwar ŋwai. 9na nyun nyəṯi ŋadɩgɩɽenya nalwɩrlijo ŋuɽuna naleicɩno, ŋate ŋe ŋijiṯɩmɩjo no, wiḏɩl gi cu nyaleḏɩla ŋalo. 10na kaja gun giwiḏɩlge gi ḏeḏila na gwiji wila gwe ḏaga, na luŋa lun lijo ga muma naləḏi gwijiŋale gwe ḏaga, nalaŋiṯi gibia. 11na gɩdo ganu na nyera wila nyun nyiṯanu dino nalarno, gwele, gwele, iḏijije. 12nulwɩrlijo ŋuɽuna, nuleicɩno, gwerkwe ganu nyi gweiceijɩno, nyi gwate gwilɩŋiḏaje no. 13girinɩl dino, gi gwune nya late lilɩŋiḏi lamon i sa no.
ŋwɽun ŋun ŋɩlɩbo ŋeḏi jɩnei
14gi gwune ŋiro gi gwiji gwun gwar gwele kamɩrɩgen yun yiro kaja, nuəmɩḏe lɩwainya luŋun nulḏəḏə ŋɩḏio ŋuŋun; 15nuḏəḏə gwete jɩnei ṯoḏɩne, na gwiro kaja jɩnei jɩttən na gwiro kaja jɩnei jetɩdo, naṯuḏəḏə gwete gwete gwan ŋɩma ŋuŋun, nuwele. 16na cou gwun gwapo jɩnei ṯoḏɩne nuwele nujɩdi ga nubaḏaica jɩnei ṯoḏɩne jun jiro kaja. 17na dino gwun gwapo jɩnei jɩttən nujɩdi ga dino nubaḏaica jɩnei jɩttən jun jiro kaja. 18namɩni ŋu gwun gwapo jɩnei jetɩdo nuwele nukwuri kwɩnyəm ganu nulbɩji əlŋɩrucə yeḏi gwele gwuŋun. 19na kaja gwola ganu na gwele wila gweḏi lɩwainy ləwei nalḏuɽə əlŋɩrucə. 20nuwila gwun gwapo jɩnei ṯoḏɩne nuəpijo jɩnei ṯoḏɩne jun jiro kaja nueicɩno, gwele gwi, ŋa gwiḏəḏɩnyi jɩnei ṯoḏɩne, na eʼe, nyi mabaḏaica jɩnei ṯoḏɩne jun jiro kaja. 21na gwele gwuŋun eicɩno, ŋa gwiro wainy gwiŋir gwuḏuḏɩnu ga. ŋa gwəpiji ŋɩru muma ŋɩdi ŋun ŋɩti, na nyi gwaŋaduji gwele gweḏi ŋɩdi ŋutu. əḏi gi ḏidila ganu ḏeḏi gwele gwuŋa. 22nuwila dino gwun gwapo jɩnei jɩttən nueicɩno, gwele gwi, ŋa gwiḏəḏɩnyi jɩnei jɩttən, eʼe nyi mabaḏaica jɩnei jɩttən jiro kaja. 23na gwele gwuŋun eicɩno, ŋa gwiro wainy gwun gwiŋir gwuḏuḏɩnu ga, ŋa gwaṯape ŋɩru muma ŋɩdi ŋun ŋɩti; na nyi gwaŋaduji gwele gweḏi ŋɩdi ŋutu. əḏi gi ḏidila ganu ḏeḏi gwele gwuŋa. 24nuwila ḏino gwun gwapo jɩnei jetɩdo nueico gwelɩnya gwuŋun no, gwele gwi nyi gwilɩŋiḏi ŋa gwiro gwiji gwubɩɽe ŋuɽuna, ŋaṯalwone kalo ŋun ŋate gikwurəne no, na ŋalwəɽeice ldu kalo ŋun ŋate gaṯanuɽe no. 25na nyi maḏe, niwele nilbɩji jɩnei juŋa kwɩnyəm ganu. eʼe juŋa jiro. 26na gwele gwuŋun wɩrlijo ŋuɽuna nueicɩno, ŋa gwiro wainy gwun gwɩki gwiro gwuḏuna, ŋa gwilɩŋiḏi nyi ŋaṯɩlwone kalo ŋun ŋate gaṯɩnkwuri no, nilwəɽeice ldu kalo ŋun ŋate gaṯɩnuɽe no, 27ŋiŋirano ŋa gwaŋaŋele əlŋɩrucə yinyi gi tarabesa gi liji leḏi eḏɩla; na ḏa nyi mila nyibuje yinyi yimanbaḏaica gworo. 28na dino apo jɩnei lugwun ŋaḏəḏə gwun gwəṯi jɩnei di; 29gi gwune gwun ŋəṯulo ŋilbəḏəṯɩjo na ŋwuləṯi ŋutu; na gwun gwate ŋəṯulo no namɩni ŋun ŋəṯulo ŋulapa lugwun. 30winɩl wainy gwe gwun gwɩki gwiro kwɩḏon kirɩm kɩluḏo; na ŋɩnəwei ḏərio gwula ḏaje na ḏiʼino gi jɩŋaḏ.
lamon leḏi ḏakɩmiḏa
31gwune na ŋaɽe ŋeḏi liji wila ḏoɽeḏa ḏe ḏuŋun lijiŋale wei leḏi kanyin, nujiga kɩḏoɽ geḏi ŋele ŋe ḏoɽeḏa ḏuŋun; 32na liji leḏi jɩmɩrɩgen wei aɽuwaḏa ldu gi jei ganu lugwun nulkenyə ganu ŋiro gi gwaɽa nukenyə joŋolia juŋun ganu juɽo je. 33nugele joŋolia gi ḏi ḏuŋun ḏun ḏiro ḏiŋir, namɩni juɽo gi ḏi ḏun ḏiro ḏouwɩr. 34na gwele eico liji lun lijo gi ḏiŋir no, wilal nyaŋa lun ləṯi ḏimoreḏa ḏeḏi baba gwi, nyaɽenyeḏe ŋele ŋun ŋigilijijɩlo uro kaja gun gigelɩlge gɩḏilio, 35gi gwune jaŋu jiṯinyi ninyilḏəḏə ŋɩdio ŋe ḏiṯa; ninyi ouḏo e ninyilḏəḏə ŋau nilyu; nyi gwiro gwiḏo ninyilgwuloḏa gidəno, 36nije lɩmuɽino ninyilgaki jiria; nieḏeḏe nanu nɩnyilwilɩjo; nyi gwijo kɩrkon nanyawila lugwi. 37na liji lun liŋir wɩrlijo ŋuɽuna naleicɩno, gwele gwəri, anaŋəḏaŋa jaŋu jiṯaŋa naŋalḏəḏə ŋɩdio ŋe ḏiṯa i ouḏo iṯaŋa naŋalḏəḏə ŋau jaḏo? 38anaŋəḏaŋa ŋa gwiro gwiḏo naŋalgwuloḏa gɩḏəno, i ŋajiga lɩmuɽino naŋalgaki giria jaḏo? 39i anaŋəḏaŋa ŋa gweḏeḏo nanu, i gwijo kɩrkon naŋalwilɩjo jaḏo? 40nal gwele wɩrlijo ŋuɽuna nuleicɩno, gwerkwe ganu nyi gweiceijɩno, gi gwune ŋun ŋərrijanyalo gwete lun lɩtilɩti gi lɩmagəɽi leno namɩni ŋərrɩjinyilo. 41nuleico dino lun lijo gi douwɩɽ no, nyaŋa lun liḏenɩnu, wiḏɩl lugwi, nyele kigo gi gɩḏilio yun yigelɩnu yan iblis na liji luŋun leḏi kanyin; 42gi gwune jaŋu jiṯiŋi nate nuŋwilḏəḏə ŋɩdio ŋe ḏiṯa no; ninyi ouḏo e nate nilnyilḏəḏə ŋau no; 43nyi gwiro gwiḏo nate ninyilgwuloḏa gidəno no; nijiga lɩmuɽino nate ninyilgaki jiria no, nieḏeḏe nanu na nije kɩrkon nate ninyilwilɩjo no. 44nalwɩrlijo ŋuɽuna dino naleicɩno, gwele gwərɩ, anaŋəḏaŋa jaŋu jiṯaŋa, i ouḏo iṯaŋa, i gwiḏo i ŋajiga lɩmuɽino, i gweḏeḏo nanu, i ŋaje kɩrkon jaḏo nate naŋaləpijo ŋɩru no? 45nulwɩrlijo ŋuɽuna nuleicɩno, gwerkwe ganu nyi gweiceijɩno, gi gwune ŋate ŋərrijanyalo gwete lun lɩtilɩti leno no nate ninyilərrɩjo no. 46na luŋa lele gi ḏakɩmino gi gɩḏilio, na lun liŋir gi ḏɩmiḏa gi gɩḏilio.
Iliyochaguliwa sasa
maṯa 25: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.