markus 12
12
asa 12
ŋuɽun ŋun ŋilɩbo ŋeḏi jɩneina
mṯ. 21:33-46, lk. 20:9-19
1nuluməḏɩjo ŋuɽuna ŋun ŋɩlɩbo: gwiji gwijo gwete gwugɩḏi jɩneina jun jiro gi ḏuɽuṯ, nulwaləḏɩjo, nukwuri lɩbuɽulo leḏi dɩlaḏa nyaɽe, nuoḏa upiya yolelo, nuapa liji nulgelene gi jɩneina ganu ki nuwele kamɩrɩgen ŋiro kaja. 2na gwune na gaja ro ge ḏuṯa nuwəje wainya gi liji lun laṯape ŋɩru gwalapijo nyaɽe kworo nyeḏi jɩneina. 3nalməṯo nalpi nalwəje di de duḏu ganu. 4nuaɽu nuwəje wainya gwun gwiro kaja naləri ŋɩdɩgino nuro dəɽi kɩɽelo. 5nuaɽu nuwəje gwiro kaja nalɽinye, nuaɽu nulwəje lutu nalɩpi kworo nalmɩni ɽinye kworo. 6na ŋaɽe ŋuŋun ṯani ŋetɩḏo ŋɩmuwəje gɩdo nuarno lanəji ŋaɽe ŋinyi. 7namɩni iiji ləwei lun laṯape ŋɩru naluməḏəṯe laginŋu nalarno, kweno gwiro gwun gwaɽenyeḏe ŋɩdi. ilwele ilɽinye. na ŋɩdi ŋaro ŋage. 8nalməṯo nalɽinye nalɩŋituḏe gi jɩneina ganu 9gwele gwe jɩneina jun jiro gi ḏuɽuṯ gwar gwarre galakwe? ŋu gwila lulɽinye lun laṯape ŋɩru julḏəḏə liji liro kaja. 10nya late ləgɩri ŋuɽuna ŋeno ŋun ŋulinu kɩḏam geḏi elo,
gɩdol gun gɩdonyilo lun luṯo
ŋɩmaro lɽa leḏi gɩḏul;
11ŋeno ŋɩwiḏi ḏi gwele
na ŋijobejega ṯuṯ gi jei ganu jage na?
12nalbunyi gwalməṯo nalmɩni ḏonye liji, nallɩŋe nalarno ŋu gwuməḏəṯi ŋuɽuna lagin ŋun ŋun ŋɩlɩbo. nanwalane nalwele.
ŋuɽun ŋeḏi ṯulba ḏeḏi gesar
mṯ. 22:15-22, lk. 20:20-26
13nalkuwa kworo lun liro lɩbarɩsi na leḏi ərudus nalwele landiŋɩna ŋuɽuna ŋəri ŋun ŋunuməḏo ŋɩki. 14nəlwila lugwun naleicɩno, mualɩm gwəri, analɩŋiḏi ŋa gwiro gwerkwe ŋanḏonyɩḏa gwiji gwetɩdo no, ŋa gwate gwanəmɩnyene gwete kworo no, naṯalmɩni alɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe. ŋiŋir animeḏɩjo gesarŋ ṯulba? ŋa gwarno ḏanouwɩrico a? 15ŋa gwarno ḏanɩmeḏɩjo i ḏanaḏidonye a? namɩni ŋu gwilɩŋiḏi ləṯi ŋuɽuna ganu ŋittən, nuleicɩno, gwudaro gəko ninyiliḏeije? əpɩjinyil ruba nyinaŋu, 16nalapijo, nuleicɩno, lɽa ləṯe liro le na ŋwule? naleicɩno, gweḏi gesar ŋwiro. 17nal yecu uməḏɩjo nuleicɩno, ḏəḏɩl gesarŋ ŋɩdio ŋeḏi gesar, nyalmɩni ḏəḏə eloŋu ŋeḏi elo. nalobaga ṯuṯ lugwun.
ŋuɽun ŋeḏi diɽo gi ḏaiya
mṯ. 22:23-33, lk. 20:27-40
18nalwila lugwun kworo lun liro lisadugi lun leṯarno ḏiḏiɽo gi ḏaiya ḏate. nalɽoṯəḏɩjo naleicɩno, 19mualɩm gwəri, musa gwulijije dino, ḏa megin gweḏi gwijiŋa mai mawalane kwa gwuŋun gwate gwəṯi nyaɽe no, gwan megin ɽenyeḏe gwalgwilɩŋe nyaɽe jiri je jeḏi megin. 20na ləmɩnyo lijo kwoɽoṯəɽɩl lun liro ŋɩmaga. na gwun gwiro lɽa nuago gwa, 21nuai nate nulɩŋe nyaɽe no. nan megin ɽenyeḏe nuaɽu nuai nate nulɩŋe nyaɽe no. nan megin gwun gwiro nimɩro ṯəɽɩl aɽu nuarre dino. 22na leno liro kwoɽoṯəɽɩl nalago nate nanəṯi nyaɽe no, na gɩdo na gwa ai dino. 23kaja ge ḏidiɽo na ḏa lɩmadiɽo wei, gwa gwaro gwəṯe? gi gwune gwagilo luŋa wei kwoɽoṯəɽɩl. 24nal yecu wɩrlijo ŋuɽuna nuleicɩno, nyaŋa ŋanyalḏuji gi gwune nya late lilɩŋiḏi gɩḏam i ŋɩma ŋeḏi elo na? 25na ḏa liji lɩmadiɽi gi ḏaiya late lanago no na late lanəgini no, nalmɩni ro gi liji leḏi kanyin. 26na gwan liji lun laiyo naldiɽi gi ḏaiya, nya late ləgɩri kɩḏam geḏi musa, na galakwe na elo uməḏɩjo gwaɽe gwe, nueicɩno, nyi gwiro elo gweḏi ibraim, na elo gweḏi isak, na elo gweḏi yagub na? 27ŋu gwate gwiro elo gweḏi liji lun laiyo no numɩni ro elo gweḏi lun lɩmiḏo. gi gwune dino nyaŋa ŋanyalḏuji kaja.
ḏiɽoṯeḏa ga ḏeḏi ŋuɽun ŋun ŋigelijɩlo elo musaŋ ŋun ŋɩnəno
mṯ. 22:34-40
28na gwete gweḏi jalgaṯɩm nuwila nudiŋɩni luməḏəṯo nulɩŋe luwɩrlijulo yecu ŋuɽuna ŋiŋir, nuɽoṯəḏɩjo nueicɩno, ŋuɽun ŋɩrṯa ŋun ŋiro lɽa kworo gwun gwigelijɩlo elo musaŋ? 29na yecu wɩrlijo ŋuɽuna nueicɩno, ŋuɽun ŋun ŋiro lɽa ŋiro dino, diŋɩnɩl liji leḏi isreiyil, gwele gwun gwiro elo gwage gwiro gwele ŋwetɩdo. 30arram ŋa gwəmɩnyi gwelɩnya gwun gwiro elo gwuŋa ḏugwor ḏe ḏuŋa wei, na gwulo gwe gwuŋa wei, na ŋadɩgɩɽe ŋe ŋuŋa wei, na ŋɩma ŋe ŋuŋa wei, 31na ŋuɽun ŋun ŋugwujo gworo ŋiro dino, arram ŋa gwəmɩnyi gwiji gwun gwijaḏanyagwe ga gwiro gi gwune ŋanəmɩnyi gwula gwuŋa. ŋuɽun ŋate ŋede ŋɩbuṯano kworo kweno no. 32na gaṯɩm eicɩno, gwerkwe mualɩm gwi, ŋa gwuməḏi muma. elo gwiro gwetɩdo gwate gwede no numɩni ro kuwei, 33na ḏəmɩnyo ŋuŋu ḏugwor ḏe wei, na ḏidiŋɩna ḏe wei, na ŋɩma ŋe wei, na ḏəmɩnyo gwun gwajaḏanyagwe ga gwiro gi gwulo gwuŋa, ŋuɽun ŋeno ŋiŋirano ŋɩdi ŋun ŋəṯalape ŋwobo na naŋijeije na gi ḏiḏugijo. 34gwune na yecu aŋu manuwɩrlɩjo ŋuɽuna dino ŋədɩgiɽe ŋe ŋuŋun, nueicɩno, ŋa gwate gwo uro kaja ŋele ŋeḏi elo no. na ŋɩno gɩdo na gwiji ete gwanɽoṯəḏɩjo no.
kɩrisṯo gwun gwiro ŋaɽe ŋeḏi ḏauuḏ
mṯ. 22:41-46, lk. 20:41-44
35na gwune alɩmilo yecu kwu dunu gweḏi elo gwun gwubuḏo nuleicɩno, galakwe na jalgaṯɩm arno kɩrisṯo gwiro ŋaɽe ŋeḏi ḏauuḏ? 36namɩni ḏauuḏŋu nuarno gwuɽɩwə gwe gwun ŋwɩpiḏo pɽul,
gwele gwun gwiro elo gweico gwelɩnya gwi no,
jiga gi ḏi ḏinyi ḏun ḏiro ḏiŋir
kəbe nyiŋele liji lun lɩkiḏiḏianyale ŋwara ganu ŋwuŋa.
37ḏauuḏŋu gwaṯɩleico gwele gwun gwiro elo, namɩni gwiro ŋaɽe ŋuŋun galakwe? na liji lutu diŋɩni ŋuŋu naldile ganu.
yecu gwudɩminu liji ga gwan jalgaṯɩm
mṯ. 23:1-36, lk. 11:37-54; 20:45-47
38nuluməḏɩjo ḏalɩmia ḏuŋun nuleicɩno, jil muma jalgaṯɩm jun jaṯəmɩnyi jawele alkani jiria jun jola, nalarno lal liji mɩɽənyo gi cu. 39na jaṯəmɩnyi jajiga gi jɩḏoɽ jun jiŋɩrano gi lɩdunu leḏi elo, na kalo gun giŋirano kɩmuri. 40luŋa lun laṯenya la ŋɩdio ŋagin lun liro linino, naṯɩluməḏɩjo eloŋu gɩttən kani a liji aŋu, nalakɩminene ḏakɩmino ḏɩbuṯano.
ḏidəḏo ḏeḏi gwa gwun gwiro gwinino
lk. 21:1-4
41na yecu gwɩdeiji gala ganu gun gaṯɩn liji ŋele əlŋɩrucə nunaŋu liji lutu gwune winɩlo əlŋɩrucə ye kwaŋ gwun gwatɩniŋele əlŋɩrucə. na lun ləṯi ŋɩdio ŋutu ŋalŋiwini ŋutu. 42na gwa wila gwun gwiro gwinino gwun gwate gwəṯi ŋɩdio no nuwini lɩmilim le lɩttən. 43nuəmɩḏa calɩmis juŋun nuleicɩno, gwerkwe ganu, nyi gweiceijɩno, gwa kweno gwun gwiro gwinino gwun gwate gwəṯi ŋɩdio no, ŋɩmuŋiwini ŋwutəno gi liji wei lun ŋiwinɩlŋe kwaŋ gwun gwatɩniŋele alŋɩrucə. 44gi ḏutiḏo ŋɩdio ŋagin luŋa wei ŋalŋiwinɩjo, namɩni gwa kweno gwun gwate gwəṯi ŋɩdio no nuŋwini wei ŋun ŋəṯulo.
Iliyochaguliwa sasa
markus 12: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.