markus 2
2
asa 2
gwiji gwun gwumɩde ganu mɩdeḏ məmɩḏe
mṯ. 9:1-8, lk. 5:17-26
1nujiga ŋwamon ŋwədi nuṯɩmi kabranaum mɩna, na liji diŋini gwo dunu. 2nalaɽuwaḏa ldu lutu, na galo eṯe kouwɩr na gidəno, naṯuluməḏɩjo ŋuɽuna. 3na liji kwoɽo apa gwiji aɽagar ye gwun gwumɩde ganu mɩdeḏ, 4na galo ete gun galgəḏɩje lugwun gi gwune liji lijo girɩpi. nalabo kwu dunu elo naliŋɩrṯe naləḏɩjo əlbɩriḏo yun yiḏɩrɩne gwiji gwun gwumɩde ganu mɩdeḏ. 5gwune na yecu aŋu ḏɩməṯo ḏagin nuuməḏɩjo gwiji gwun gwumɩde ganu mɩdeḏ nueicɩno, ŋaɽe ŋinyi, ŋuɽun ŋuŋa ŋun ŋɩki ŋɩmaganiḏuḏɩjo ganu. 6nalijiga liji le lun liro jalgaṯɩm kworo laṯuməḏɩni gi dugwor ganu dagin nalarno, 7gwudaro gəko na gwiji kweno umə dino ḏɩḏenɩḏia ḏe? əḏi gwiro gwəṯi ŋɩma gwaḏuḏe ganu ŋuɽun ŋun ŋɩki, elo gwədu gwetɩdo na? 8na yecu lɩŋe kwuɽɩwə gwuŋun luməḏɩnu dino gi dugwor ganu dagin, nuleicɩno, gwudaro gəko na nyauməḏɩni dino gi dugwor ganu dalo? 9aŋ gwiro gwouwɩrəno ganu; gi ḏuməḏɩjo gwiji nyieicɩno ŋuɽun ŋuŋa ŋun ŋɩki ŋɩmaganiḏuḏɩjo ganu i gi ḏeicɩno, diɽu ŋape əlbɩriḏo yuŋa ŋele a? 10na kani nyalɩŋe nanyarno ŋaɽe ŋeḏi liji ŋəṯi ŋelɩnya ŋɩne kɩḏilio ŋaḏuḏe ganu ŋuɽun ŋun ŋɩki, nuuməḏɩjo gwiji gwun gwumɩde ganu mɩdeḏ nueicɩno, 11diɽu ŋaɽe əlbɩriḏo yuŋa ŋele dunu lugwuŋa. 12nudiɽi, nuape əlbɩriḏo yuŋun nuwele gi jei ganu jeḏi liji wei. na luŋa wei nalobaga ṯuṯ nalorṯeḏa eloŋu naleicɩno, anate nimanaŋu ŋuɽuna ŋiro gi gworo kweno ḏuṯ no.
ḏamiḏa ḏeḏi lawi
mṯ. 9:9-13, lk. 5:27-32
13nuwele gɩṯo gi ḏɩrawe mɩna, na liji wei wila lugwun nulalɩmi. 14gwune nuwele ṯaṯ ganu nuaŋu lawiŋu gwun gwiro ŋaɽe ŋeḏi alba nujiga kalo gun gaṯunɩmeje ṯulba, nueicɩno, gwujani. nudiɽi nugwujane.
15na gaga gun gijuge dunu gweḏi lawi gi ḏiṯa, na liji luṯu lun laṯɩmeje ṯulba na lun lɩki nalijiga yecuŋale na calɩmis huŋun; gi gwune calɩmis jo jutu, nalgwujane. 16na gwune na jalgaṯɩmŋa lɩbarɩsi le aŋu gwiṯɩlo liji le lun laṯɩmeje ṯulba na lun lɩki, naluməḏɩjo calɩmis juŋun, naleicɩno, gwudaro gəko nalʼe nalyu liji le lun laṯɩmeje ṯulba na lun lɩki? 17gwune na yecu diŋɩni nuleicɩno, liji lun liŋir nanu late laṯɩbunyi lakima no, namɩni liro lun leḏeḏo nanu. nyi gwate gwuwiḏi lilorniḏe lun liŋir no, namɩni liro lun lɩki.
ḏiɽoṯeḏa ḏeḏi ḏɩməṯo əbuṯo
mṯ. 9:14-17, lk. 5:33-39
18na calɩmis jeḏi yuwana na jeḏi lɩbarɩsi nalməṯo əbuṯo, na liji wila ḏi yecu naluməḏɩjo naleicɩno, gwudaro gəko na calɩmis jeḏi yuwana na jeḏi lɩbarɩsi natɩlməṯo əbuṯo, namɩni juŋa nate nalməṯo əbuṯo no? 19nal yecu eicɩno, kaja ge ḏaga lɩmeḏin leḏi gwiji gwe ḏaga ləṯi ŋɩma ləməṯo əbuṯo ḏa gwiji gwe ḏaga gwumaje a? ḏa gwiji gwe ḏaga gwumaje late ləməṯo əbuṯo no. 20namɩni ŋwamon ŋwaje ŋwila ŋwun ŋwauŋ gwiji gwe ḏaga ape, na lamon lono ləməṯo əbuṯo.
21na dino gwiji gwate gwete gwun gwouɽu giria gun giya gugukɩɽe gworo gwun gwuɽun no, na giria gun giya gaŋɩrṯa gworo ganu gwun gwuɽun, na giria gaŋɩrṯaḏane ganu; 22na gwate gwete gwun gwadoije ŋɩmidiə ŋun ŋiya gi jurəḏ jun juɽun no, gi gwune ŋwaki jurəḏo na ŋɩmidiə ḏuḏe galo no jurəḏ jake, namɩni lədoije ŋɩmidiə ŋun ŋiya gi jurəḏ jun jiya.
ḏiɽoṯeḏa ḏeḏi dɩmino ḏeḏi lamon le sabiṯ
mṯ. 12:1-8, lk. 6:1-5
23gi lamon le sabiṯ yecuŋa calɩmis je juŋun nalwele gi dɩri ganu, na calɩmis juŋun akɩra ŋwona. 24na lɩbarɩsi eicɩno, eʼe, gwudaro gəko na calɩmis juŋa naṯɩlarre ŋun ŋɩtumuḏu gi lamon le sabiṯ? 25nuleicɩno, nya late ləgɩri ŋuɽuna ŋun ŋarrɩlo ḏauuḏ gi gwune iṯi jaŋu, na liji lun lijille na? 26galakwe nuəḏi kwu dunu gweḏi elo kaja kono abiyaṯar gwiro gwele gweḏi jɩsis nuʼe gia gun gaṯɩlgegile, gun gitumuḏu gi liji naṯɩmɩni jɩsis e cucun, nuḏəḏə liji dino lun lijille? 27nueicɩno, lamon le sabiṯ lɩŋelinɩjo liji, namɩni gwiji gwate gwugelɩnu gwan lamon le sabiṯ no. 28na ŋiro dino ŋaɽe ŋeḏi liji ŋiro gwele gweḏi lamon le sabiṯ dino.
Iliyochaguliwa sasa
markus 2: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.