markus 4
4
asa 4
ŋuɽun ŋun ŋɩlɩbo ŋeḏi gwiji gwe ḏɩri
mṯ. 13:1-23, lk. 8:4-15
1nuaɽu nualɩmi liji mɩna gɩṯo kɩmerɩmer ge ḏɩrawe, nan liji aɽuwaḏa lutu kəbe nuəḏi kwu murkab ganu nuje ŋau elo. na liji wei lijo ga kwɩnyəm kɩmerɩmer elo. 2nulalɩmi ŋuɽuna ŋutu ŋun ŋɩlɩbo, nuluməḏɩjo dino gi ḏalɩmia ḏuŋun nuleicɩno, 3ḏiŋɩnɩl, gwiji gwe ḏɩri mədu gi ḏauuna ŋwon ŋwe. 4gwune auunu ŋwe, na kworo ideḏe gi ṯaṯ elo, na nyiɽuwə nye kanyin wila naleʼe. 5na kworo ideḏe ŋworlol ganu ŋwun ŋwate ŋwəṯi gwɩnyəme gwutu no, nalobɩḏa coucou gi gwune gwɩnyəm gwate gwijo gwutu no. 6na gwune na anyin abuḏa nalmimɩni gi gwune ŋwate ŋwəṯi dro no, naluḏe. 7na kworo ideḏe gi jugi ganu; na jugi obɩḏa nalɩɽikəje ŋwuɽa, nate nallɩŋe no. 8na kworo ideḏe kwɩnyəm ganu gwun gwiŋir, nalobɩḏa nalbuḏe nallɩŋe nyaɽe, na kworo lɩŋeḏa nyaɽe nyirebɩna, na kworo nyiwourəno na kworo nyibuḏo nanu. 9nuleicɩno, gwun gwəṯi nəni neḏi diŋɩna, ŋwudiŋɩnɩ. 10na gwune juga gwetɩḏo, na liji lun luɽeico galo na calɩmis jun jiro di na gwuttən nalɽoṯəḏɩjo ŋuɽun ŋe ŋun ŋɩlɩbo. 11nuluməḏɩjo nuleicɩno, ŋɩmajilḏəḏə nyalɩŋe ŋuɽuna ŋeḏi ŋele ŋeḏi elo ŋun ŋɩlɩbo, namɩni lun lɩṯanu ŋagin ŋiro ŋun ŋɩlɩbo.
12gi gwune naṯɩlḏiḏɩŋa ga nate nalaŋu no,
naṯɩldiŋɩni nalmɩni ate nalilɩŋe no,
i lawɩrla ga ŋuɽun ŋagin ŋun ŋɩki ŋalɩnḏuḏɩjo ganu.
13nuluməḏɩjo nuleicɩno, nya late lilɩŋiḏi ŋuɽuna ŋeno ŋun ŋɩlɩbo na? na nyamɩni lɩŋe ŋuɽuna ŋəḏi ŋun ŋɩlɩbo galakwe? 14gwiji gwe ḏɩri gwaṯauuni ŋuɽun ŋe ŋeḏi elo. 15na leno liro lun laṯɩje gi ṯaṯ elo kalo gun gaṯɩn ŋuɽun je ŋe ḏauuna; na ḏa lɩmadiŋɩm ŋuɽuna, nani seiṯan weləḏa ganu cou nulapa ŋuɽuna ŋun ŋauunu ŋe gi dugwor ganu dagin. 16na dino leno liro lun lauuninu ŋworlol ganu: na ḏa lɩmadiŋɩni ŋuɽuna, nalɩməṯəḏo ḏidila ḏe ganu. 17nate naṯɩləṯi dro no, naṯɩlijiga mɩce; namɩni gwune na ḏɩḏia wila na ḏiḏagɩɽina ḏan ŋuɽun ŋeḏi elo, nalobɩlkejo cou. 18na liro kaja lun lauuninu gi jugi ganu: leno liro lun laṯɩdiŋɩni ŋuɽuna, 19namɩni ŋuɽun ŋeḏi gɩḏilio keno, na ḏinyinyiməḏeico ḏeḏi dutiḏo ŋɩḏio, na ḏibunya ŋɩdio ŋiro kaja, ŋuɽun ŋeno nalɽikəje ŋuɽuna ŋeḏi elo, nate naṯɩllɩŋeḏa nyaɽe no. 20na lun lauuninu kwɩnyəm ganu gwun gwiŋir: leno liro lun laṯɩdiŋɩni ŋuɽuna, nalɩməṯəḏo, nallɩŋe nyaɽe, na kworo lɩŋeḏa nyaɽe nyirebɩna, na kworo nyiwourəno, na kworo nyibuḏo nanu.
ḏalɩmia ḏeḏi lambə na ḏigwude
mṯ. 13:31-35, lk. 8:16-18; 13:18-19
21nuluməḏɩjo nuleicɩno, lambə lapini ləḏini kɩḏi ganu ŋun ŋiro amen i kajagar ganu a? late lapini lagelini kalo ge ḏoɽeḏa ga na? 22gi gwune ŋate ŋɩlɩbɩḏɩnu ŋun ŋate ŋaŋini no, na ŋaṯe ŋikɩɽɩbəḏɩnu ŋun ŋate ŋaɽeleḏɩni no. 23na ḏa gwiji məṯi nəni neḏi diŋɩna ŋwudiŋɩni. 24nuluməḏɩjo nuleicɩno, jil muma nyalər ləḏiŋɩni aŋe. na əlmɩḏ yun yaṯanyayuni ŋɩdio yaje yajilwəɽəṯɩjo mɩna na ŋwajilḏəḏə ŋwutəno. 25na gwun ŋəṯulo ŋilbəḏəṯɩjo na gwun gwate ŋəṯulo no namɩni ŋun ŋəṯulo ŋulapa lugwun.
26nuarno, ŋele ŋeḏi elo ŋiro gi gwune gwiji gwun gwukwuḏi ḏigwuḏe kwɩnyəm; 27naṯuḏɩre gilio naṯudiɽi anyine; na ŋwon obɩḏa nalbuḏe, nate nulɩŋe ŋwubuḏo galakwe no. 28kaja guŋun gwiro gwaṯɩbuḏi ŋwona. gwerre nalbuḏe naldio nəni na dɩrda nalro jei. 29na ḏa ŋwumabɩɽe, nulwone gi gwune ḏɩwona ḏɩmila.
30nuarno, ilarno ŋele ŋeḏi elo ŋiro galakwe? i ilarno ŋiro gi gwune aŋe? 31ŋiro gi gwune ŋaɽe ŋeḏi gwaɽe gwun gwiro kardal, gwune ŋɩkwuḏɩlo ŋɩtieno gi ḏigwuḏe wei; 32na ḏa ŋɩmalkwoi nuobɩḏa nubuḏe nuolene elo gi jaɽe wei jun jəṯi nəni neḏi ŋɽa. nudi dɩrna dɩbuḏo naṯi nyiɽuwə nye kanyin wila naṯɩḏɩre kwubəl gwuŋun.
33nuluməḏɩjo ŋuɽuna ŋutu ŋun ŋɩlɩbo ŋun ŋiro dino kani aldiŋɩni. 34namɩni nate nuuməḏɩjo ŋuɽuna ŋədi ŋun ŋate ŋɩlɩbo no. na gwune jilga calɩmis je juŋun ga kaja nulaŋijo ŋuɽuna wei.
yecu gwuḏuḏɩni ḏɩronia nyɩkwom
mṯ. 8:23-27, lk. 8:22-25
35na gagarage nuleicɩno, ilmuri kɩməmu ŋiro kaja. 36nalwalane gi liji nalape murkab gwe gwun gwijune. na lɩmurkab lun liro kaja lun lɩti lijo dino. 37na ḏɩron obɩḏa dutu, na ŋau upi gworo nalupi murkab nalenyeḏe. 38na ŋu gwiḏɩro kwu murkab ganu gɩdo gwe kiria gun gimɩɽinu ldu. naldiɽio naleicɩno mualɩm gwəri, ŋa gwate gwinəḏije na? ŋa gwarno ilai a? 39nudiɽo nugireṯɩnya ḏɩronia nueico ḏɩrawe no, ji nyɩkwom. na ḏɩron ji nyɩkwom na ŋau auwɩḏe galo. 40nuleicɩno, gwudaro gəko na nyaḏonye dino? nya lore late ləṯi ḏɩməṯo na? 41naldonye bucu, naluməḏɩjo gworo, iyo kweno gwiro aŋe gəko na ḏɩron na ḏɩrawe əṯeijo nani?
Iliyochaguliwa sasa
markus 4: OTR1966
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuba, Otoro New Testament
© British and Foreign Bible Society, 1966.