Luke 2
2
Lebote la Sése
1Va lekɛse le Sésare Ongusete àyumungu va yulu matsɛnge ma Rɔme àtomenge, ndɛ nàlɛle baate botchi mu yɛnde gu kome mandoge ma bɔ. 2Ukome gua mandoge muɛne gua tsomi va Kirinise àtomenge itini cha tsɛnge a Chiri bàsade. 3Baate botchi nibàyɛnde gu kome mandoge ma bɔ. Mutu mutu nàyɛnde gu kome ndoge a ndɛ gu bole bu bàbote ndɛ. 4Suséfe na ndɛ àmate gu musɛnge a Nasarɛte wa va kɛse a Ngalilé, nàyɛnde gu Bɛtelɛme musɛnge wa va kɛse a Sudé, muti ndɛ mutu wa yimbise cha Davide àbade, 5mu ndé bone a Mari mukɛdi a ndɛ wu ndɛ bàde amavɛde mudile, wuwàbade ka na dimi bàyikome na bɔ mandoge. 6Va Suséfe bone a Mari bàbade gu Betelɛme, lekɛse labote letɔde, 7Mari nàbote muane a ndɛ wa tsomi lebagele. Apɔte ndɛ gutsɔ matsaande, nàlase ndɛ va itchidili cha baniame muti bɔ bàsàbage itchige gu nzɔ bandjinze vɛ.
Tome a Nzɛmbi wa gu yulu atose tsaange yiyibuɛ gulidi bakéli babaniame
8Va kɛse a sudé niguàbade na bakéli ba mimbe ma batabe gutsɔ kumu na butsuge. 9Tome Malumbi wa gu yulu àsote va bɔ bàbade, buyimbe bua Malumbi nibuàyingege va pfuɛchi abɔ. 10Avanekaniva tome Malumbi wa gu yulu àlɛle bɔ ndé: «Niagani bɔɔme mɔne. Yogani, mɛ tsaange yiyibuɛ mɛ yidi gu tɔse béne. Baate botchi nibátsakene na ngɔmbe mu tsaange muɛne. 11Gu musɛnge a Davide na butsuge bua lɔlɔ, babuti béne Mupotili. Ndɛ ni Mutu wu Nzɛmbi àsɔle. Ndɛ ni Mufuichi a baate moyi. 12Achinechi ni ilémbe chi béne lekidigele ndɛ. Béne lábakese muane bápote gutsɔ matsaande, balase va itchidili cha baniame.»
13Avanekaniva lebɛdi la batome ba Nzɛmbi ba gu yulu làyade mvualɔvɛ. Lɔ lebugune na tome a Nzɛmbi wuwàtsuame, bɔ nibàkakese Nzɛmbi bo:
14«Malumbi gulidi Nzɛmbi gu kɛti a yulu. Pɔle yibade na baate ba ndɛ tɔnde mu tɔtɔ munemu.»
15Va batome ba Nzɛmbi ba gu yulu bàniage bakéli ba batabe mu gabege gu yulu, bakéli ba batabe nibàlɛle va pfuɛchi abɔ muɛne na bɔ muɛne bo: «Wokani gu Bɛtelɛme leyimɔnani tchambe lelebuɛ leleyidi gone, le Malumbi aléli bése a béne.» 16Tinatine bakéli ba batabe bàyɛnde, nibàbakese Mari bone a Suséfe na muane balase vatsɔ itchidili cha baniame. 17Va bakéli ba batabe bàmɔne muane, bɔ nibàyole musame a maambe màbàyambelenge mu muane muɛne. 18Baate botchi bàbàyoge maambe ma bakéli ba batabe bàyambele, nibàgémbe. 19Tɔ Mari nàkɛlenge maambe muɛne motchi ndile gutsɔ mutéme. Ndɛ nàbangelenge mɔ makɛse motchi. 20Avanekaniva bakéli ba batabe bàgabege nakakese, nayimbese Nzɛmbi mu maambe ma bɔ bàyoge na bɔ bàmɔne, na buni mɔ màkuagne tchitse na ma tome a Nzɛmbi wa gu yulu àlɛle bɔ.
Sade gua Sése chake, na loge ndɛ ndoge
21Vayulava bàbote muane muɛne, tsuge tsaambe iviɔge, mula pɔɔmbe, nibàsade ndɛ chake. Avanekaniva bàloge ndɛ ndoge bo Sése. Ayéne ni ndoge yi tome a Nzɛmbi wa gu yulu àlɛle Mari ndɛ ki dimi pamɛne vɛ.
Suséfe bone a Mari babɛge Sése gu nzɔ Nzɛmbi gu Sérusalɛme
22Vayulava bàmane muane chake sade na loge ndɛ ndoge, Suséfe bone a Mari nibàsade mukungi wa tɛndele Mari niute, ngane a bu mangidi ma Muyise malɛle. Bɔ nibàbéte Sése gu nzɔ Nzɛmbi gu Sérusalɛme mu muɛse ndɛ gulidi Nzɛmbi. 23Ngane a bu bàkome gutsɔ mabige ma Nzɛmbi bo: «Muane wotchi wa lebagele wa lebote latsomi, buédi bàkavɛde ndɛ gulidi Malumbi mu sade isale chɛndi.» 24Bɔ bàbɔnge makonde mɔli, nibàvɛde lelage mu tɛndele niute a Mari ngane a bu mangidi ma Nzɛmbi malɛle. 25Gu musɛnge a Sérusalɛme niguàbadenge na muséli a Nzɛmbi wubàtɛdenge Chiméyo. Mutu muɛne maambe mamayɛbene àbadenge na mɔ namoni Lenioni la Nzɛmbi làbade na ndɛ, ndɛ nàtalenge lebote la Mupotili a baate. 26Lenioni la Nzɛmbi nilàlɛle ndɛ ndé: «Wɛ chipakuade wɛ Mupotili a baate pamɔne vɛ.» Mutu wu Nzɛmbi àsɔle, Kumu. 27Lenioni la Nzɛmbi lebɛge Chiméyo gu nzɔ Nzɛmbi, Mari bone a Suséfe nibàvɛde muane gulidi ndɛ mu sade ngane a bu mabige ma Nzɛmbi màlɛlenge mu muane muɛne. 28Ndɛ bɔnge muane vatsɔ miɔge miɛndi, nàkakese Nzɛmbi ndé:
29«Kumu pɛngini yi wɛ sàde gulidi
baate yimakuagne, kibɔnge muséli a wɛ,
akuade na pɔle ngane a bu mabige mawɛ malɛle.
30Muti mise mɛɛme mamoni Mupotili.
31Mupotili muɛne niwu wɛ sàde pɛngini
gulidi baate botchi.
32Chɔ ni iyalele chichikásade ti baate
ba bulɔnge botchi bayabe wɛ.
Iyalele muɛne nichichikáyimbese bichi Ichirayɛle baate bawɛ.»
Chiméyo alébele Mari mu maambe mámákáyade
33Suséfe bone a Mari nibàgémbe mu maambe ma Chiméyo àlɛle mu muane muɛne. 34Chiméyo àvɛde Suséfe bone a Mari misaange, nàlɛle nguɛndi Mari ndé: «Nzɛmbi atchindigi muane muɛne ndile gu kɛgese bichi Ichirayɛle. Chɔ ni ilémbe cha Nzɛmbi chichikátsuale page va pɛngidi a baate. Ndɛ náfuise moyi wa mubunamubu gulidi bichi Ichirayɛle bábákáchilele maambe mɛndi.» 35Ndɛ nápandele maambe mamasuɛme gutsɔ mitéme mia baate. Tɔ wɛ nguɛndi Mari, wɛ mutéme nánɛmene ngane a wo leyɛnge batubi wɛ.
Ane akakese Nzɛmbi mu lepɔtege la bichi Ichirayɛle
36Gu nzɔ Nzɛmbi niguàbade na mubigi a maambe wa mukaase ndoge a ndɛ Ane. Muane a Fanuɛle, wa yimbise cha Asɛre. Ndɛ àbade amanune gualotele. Ndɛ yɛnde gu lekuɛle ki asasade makuɛle na babagele vɛ. Bone mulumi a ndɛ bàtsagele ndile biléme tsaambe. 37Mulumi a ndɛ àkuade, ndɛ nàsale bukuili. Ndɛ àbade ka na makumi pɔɔmbe ma biléme na biléme bina. Ndɛ àsàpolenge gu mbɛdi vɛ. Ndɛ bàdenge ndile gutsɔ nzɔ Nzɛmbi, nasalelenge Nzɛmbi, na minenge kugi, nàbɔndenge butsuge na niange. 38Ndɛ na ndɛ asote, akakese Nzɛmbi, nàyambelenge na baate botchi bàbàtalenge Mupotili a bichi Ichirayɛle.
Suséfe bone a Mari na muane bagabege gu Nasarɛte
39Suséfe bone a Mari bàmane sade maambe motchi ngane a bu mabige ma Nzɛmbi malɛle, nibàgabege na Sése gu Nasarɛte bole bua bɔ bua va kɛse a Ngalilé. 40Muane muɛne àbogenge ndile busu a busu. Ndɛ bàde atémbe, na buyédi mvuabɔvɛ. Misaange mia Nzɛmbi miàbadenge na ndɛ.
Sése atɔse lekumi la biléme na biléme biɔli, naningele gu nzɔ Nzɛmbi
41Iléme chotchi taate a Sése na nguɛndi bàyɛndenge gu Sérusalɛme gu mukungi a pake. 42Sése àtɔse lekumi la biléme na biléme biɔli, Mari bone a Suséfe nibàyɛnde na ndɛ gu mukungi a Pake. Muti ndɛ bàde muyikele a bɔ. 43Mukungi a pake àfuade, Suséfe bone a Mari nibàgabege gu Nasarɛte. Tɔ bɔ bàsayabe bo muane aséli gu Sérusalɛme vɛ. 44Va bɔ bàyɛndenge, nibàviɔse mose wotchi na letase labo bombe Sése bone a bambɛgi ba muniale alidi. Suséfe bone a Mari bàsage muane vatsɔ pfuɛchi bangage, na bambɛgi ba bɔ, 45bàsàbakese ndɛ vɛ. Avanekaniva bɔ bàgabege gu Sérusalɛme mu sage ndɛ. 46Tsuge yɔli yiviɔge, mula mutate, bɔ nibàbakese ndɛ gu nzɔ Nzɛmbi, atsagele va pfuɛchi balongichi na basupili ba mabige ma Nzɛmbi. Ndɛ yoge maambe ma bɔ bàyàmbelenge, nàdumunge bɔ mandjide. 47Baate botchi bàbàyogenge ma ndɛ yambelenge, nibàgémbenge mu buyédi bu ndɛ bàde na bɔ na mu ndɛ kàselenge mandjide ma balongichi na basupili ba mabige ma Nzɛmbi. 48Va nguɛndi na taate a ndɛ bamɔne ndɛ, nibàgémbe. Nguɛndi Mari nàlɛle ndɛ ndé: «A muane a mɛ, wɛ muki wɛ chidi bése tchambe la mulinge wunewu? Bése a taate a wɛ mitéme bédi ndile ka va gili a gili nasage wɛ.» 49Ndɛ nàkale bɔ ndé: «Béne mɛ muki lasage, béne lesayébi ti mɛ ka isale cha taate a mɛ mɛ sade vɛ?» 50Tɔ taate a ndɛ na nguɛndi bàsàtchikese maambe ma ndɛ lɛle bɔ vɛ. 51Avanekaniva Sése àgabege bone a nguɛndi na taate a ndɛ gu Nasarɛte. Ndɛ yogelenge bɔ makɛse motchi. Nguɛndi Mari nàkɛlenge maambe muɛne motchi gutsɔ mutéme a ndɛ. Ndɛ nàbàngelenge maambe muɛne makɛse motchi. 52Sése nàbogenge busu a busu na buyédi bua Nzɛmbi, ndɛ nàbadenge na maambe mamabuɛ va busu bua Nzɛmbi na va mise ma baate.
Iliyochaguliwa sasa
Luke 2: NZB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES