ମାଥିଉ 10
10
ଯୀଶୁ ବାରଜାଣ୍ ଚେଲାହିର୍
(ମାର୍କ. ୩:୧୩-୧୯; ଲୁକ. ୬:୧୨-୧୬)
1ଯୀଶୁ ତା ବାରଜାଣ୍ ଚେଲାହିରିଙ୍ଗ୍ ତା ଲାଗାୟ୍ ହିର୍ବାତାନ୍, ଆରେ ବୁତ୍ଆତ୍ମା ପିହିକିଦେଙ୍ଗ୍ ହେୱାରିଙ୍ଗ୍ ଆଦିକାର୍ ହିତାନ୍। ଆରେ ୱିଜୁ ପର୍କାର୍ ରଗ୍ ଆରେ ୱିଜୁ ପର୍କାର୍ ଦୁକ୍ କଷ୍ଟନିକାରିଙ୍ଗ୍ ହାର୍କିଦେଙ୍ଗ୍ ଆଦିକାର୍ ହିତାନ୍। 2ଯୀଶୁ ହେ ବାରଜାଣ୍ତିଙ୍ଗ୍ ବାଚିକିତି ଚେଲାର୍ ତର୍ ଇଲେକେ: ଶିମୋନତିଙ୍ଗ୍ ପିତର ଇଞ୍ଜି ଆରେ ର ତର୍ ହିତାନ୍, ଆରେ ତା ଟଣ୍ଡାହି ଆନ୍ଦ୍ରିୟ, ଜେବଦି ମେହି ଯାକୁବ ଆରେ ତା ଟଣ୍ଡାହି ଯୋହନ୍, 3ପିଲିପ ଆରେ ବାର୍ଥଲମି, ଥୋମା ଆରେ ସିସ୍ତୁଏନ୍ନି ମାଥିଉ, ଆଲ୍ପି ମେହି ଯାକୁବ ଆରେ ଥଦ୍ଦୀୟ, 4ଦେସ୍ତିଙ୍ଗ୍ ହେବାକିନି ଶିମୋନ ଆରେ ଇଷ୍କାରିତିୟ ଯିହୁଦା, ଯୀଶୁଙ୍ଗ୍ ଶାତ୍ରୁ କେଇଦ ଆହିକିତାନ୍।
ବାରଜାଣ୍ ଚେଲାହିରିଙ୍ଗ୍ ପକ୍ତାନ୍
(ମାର୍କ. ୬:୭-୧୩; ଲୁକ. ୯:୧-୬; ୧୦:୪-୧୨)
5କେତ୍ଦିନ୍ ହାଚି ପାଚେ ଯୀଶୁ ବାରଜାଣ୍ ଚେଲାହିରିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ଏପେଙ୍ଗ୍ ବିନ୍ଜାତି ଆରେ ଶମିରଣିୟ ମାନାୟ୍ ମାନି ସହର୍କୁକାଙ୍ଗ୍ ପା ହାଲ୍ମାଟ୍, 6ମାତର୍ ଇସ୍ରାଏଲନି ଲାତ୍ରା ଈଶ୍ୱରତାଙ୍ଗ୍ ଦେହାଆଜିମାଚି ମେଣ୍ଢାଙ୍ଗ୍ ଲାଗାୟ୍ ହାଲାଟ୍। 7ଆରେ, ହାଲୁ-ହାଲୁ ଇବେଣ୍ ୱେଚ୍ଚି ଶୁଣାୟ୍ କିୟାଟ୍, ଈଶ୍ୱର ସାସନ୍ କିନି ରାଜି ଲାଗେ ଆତାତେ। 8ବେମାର୍ ନିକାରିଙ୍ଗ୍ ଉଜ୍ କିୟାଟ୍, ହାଃତାକାରିଙ୍ଗ୍ ନିକାଟ୍, ଦୁକ୍କଷ୍ଟ ଲଗାଙ୍ଗ୍ ହାର୍ କିୟାଟ୍, ବୁତ୍ଆତ୍ମାକାଙ୍ଗ୍ ପିହି କିୟାଟ୍। ଏପେଙ୍ଗ୍ ବେକାରେ ପାୟା ଆତାଦେର୍ନା ବେକାରେ ହିୟାଟ୍।
9ଏପେଙ୍ଗ୍ ସୁନା, ରୁପା କି ତାମ୍ବା ଡାବୁଙ୍ଗ୍ ଇଟ୍ନି ଜାଲିଆ ଅମାଟ୍, 10ଏପେଙ୍ଗ୍ ହାନିହିଙ୍ଗ୍ ମଣା କି ହେନ୍ଦ୍ରାପାଟା ରଞ୍ଜାଙ୍ଗ୍ତାଙ୍ଗ୍ ଆଗ୍ଡ଼ା ପାଣ୍ଡାୟ୍ କି ବେଡ୍ଗା ପା ଅମାଟ୍। ଇନେସ୍କି ଏପେଙ୍ଗ୍ ଇନେରିଙ୍ଗ୍ ହାର୍ କିନାଦେର୍ ହେୱାର୍ ମି ଦର୍କାର୍ ଆନାକା ହିଦ୍ନାର୍।” 11ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏଚେପାଦ୍ନା ଏପେଙ୍ଗ୍ ଇମ୍ଣି ସହର୍ କି ନାସ୍କୁକାଙ୍ଗ୍ ହାନାଦେର୍, ହେବେ ର ହେବାକିଦ୍ନି ମାନାୟ୍ତିଙ୍ଗ୍ ଦାହାଟ୍, ହେବେ ଗତାଙ୍ଗ୍ଲେକେ ଆଜି ତାଞ୍ଜ ମାନାଟ୍। ଇନେସ୍କି ହେ ବାହା ପିସ୍ତି ହାନିପାତେକ୍। 12ଏଚେପାଦ୍ନା ଏପେଙ୍ଗ୍ ଇଞ୍ଜ ହଣିହିଙ୍ଗ୍ ହେ ପରିବାର୍ତିଙ୍ଗ୍ ଈଶ୍ୱର ଆଶ୍ରିବାଦ୍ କିୟେନ୍ ଇଞ୍ଜି ୱେଚାଟ୍। 13ଯଦି ହେ ପରିବାର୍ନି ମାନାୟାର୍ ମିଙ୍ଗେଙ୍ଗ୍ ହେବା କିଦ୍ନାର୍, ଲାଗିଙ୍ଗ୍ ମି ପରିବାର୍ ଆଶ୍ରିବାଦ୍ ଗାଟାଆନାତ୍। ଯଦି ହେ ପରିବାର୍ ମିଙ୍ଗେଙ୍ଗ୍ ହେବା କିଦ୍ୱିତିସ୍ ମି ଆଶ୍ରିବାଦ୍ ହେୱାର୍ ପାୟା ଆଉର୍। 14ଆରେ ମିଙ୍ଗେଙ୍ଗ୍ ହେୱାର୍ ଆସ୍ତିୱିତିସ୍, ଆରେ ମି ବେଣ୍ ୱେନ୍ୱିତିସ୍, ହେ ଇଞ୍ଜାଙ୍ଗ୍ କି ହେ ସହର୍ତାଙ୍ଗ୍ ହସିହାନିହିଙ୍ଗ୍ ମି କାଲ୍ ପାନାନି ଦୁଡ଼ି ଡ଼ାତାଟ୍।” 15ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ବିଚାର୍ ଦିନ୍ ନାଞ୍ଜିଙ୍ଗ୍ ସଦୋମ ଆରେ ଗମୋରା ସହର୍ ଦଣ୍ଡ୍ତାଙ୍ଗ୍ ହେ ସହର୍ନି ମାନାୟାରିଙ୍ଗ୍ ଈଶ୍ୱର ବେସି ଦଣ୍ଡ୍ ହିନାନ୍।”
ଚେଲାର୍ ଦୁକ୍ ପାୟାଆନି ବିଷୟନି କାତା
(ମାର୍କ. ୧୩:୯-୧୩; ଲୁକ. ୨୧:୧୨-୧୭)
16ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ହୁଡ଼ାଟ୍, ବୁର୍କାଙ୍ଗ୍ ବିତ୍ରେ ମେଣ୍ଢାକାଙ୍ଗ୍ ହେଲାଇ କିତିଲେକେ ଆନେଙ୍ଗ୍ ମିଙ୍ଗେଙ୍ଗ୍ ବାର୍ତ ପକ୍ତାନାଙ୍ଗା। ଲାଗିଙ୍ଗ୍ ଏପେଙ୍ଗ୍ ରାଚ୍ ଲେକେ ବୁଦି ଆରେ ପାର୍ୱା ଲେକେ ସାଦୁ ଆଡ। 17ଇଦାଙ୍ଗ୍ କାଜିଙ୍ଗ୍ ମାନାୟ୍ତାଙ୍ଗ୍ ସାବ୍ଦାନ୍ ଆଜି ମାନାଟ୍। ଇନେସ୍କି ହେୱାର୍ ମିଙ୍ଗେଙ୍ଗ୍ ବିଚାର୍କିନି ବାହାତାକେ ଅଜି ନିଲି କିଦ୍ନାର୍ ଆରେ ହେୱାର୍ ଯିହୁଦିର୍ ପାର୍ତାନା ଇଞ୍ଜ କର୍ଡା ହୁଦାଙ୍ଗ୍ ଟ୍ରାକ୍ତାନାର୍। 18ଏପେଙ୍ଗ୍ ନାଙ୍ଗେଙ୍ଗ୍ ପାର୍ତିକିନି କାଜିଙ୍ଗ୍, ଦେସ୍ ସାସନ୍ କିନି ମାନୟ୍ତାକେ ଆରେ ରାଜା ମୁମ୍ଦ ବିଚାର୍ନା ଆଦେଙ୍ଗ୍ ଟିୟା ଆନାଦେର୍। ହେଲେକେ ହେୱାର୍ତାକେ ଆରେ ବିନ୍ଜାତିର୍ କାଜିଙ୍ଗ୍ ହାର୍ଦିକାବୁର୍ ଶୁଣାୟ୍ କିନାଦେର୍। 19ମାତର୍ ଏଚେକାଡ଼୍ଦ ହେୱାର୍ ମିଙ୍ଗେଙ୍ଗ୍ ବିଚାର୍ନା କିନି ଇଞ୍ଜ ନିଲି କିଦ୍ନାର୍, ହେପାଦ୍ନା ଏପେଙ୍ଗ୍ ଇନେସ୍କିଜି ୱେଚ୍ନାପ୍ ଇଞ୍ଜି ହେ ବିଷୟତିଙ୍ଗ୍ ଚିନ୍ତା କିମାଟ୍। ହେପାଦ୍ନା ଈଶ୍ୱର ମିଙ୍ଗେଙ୍ଗ୍ ଇନାକା ୱେଚ୍ଚେଙ୍ଗ୍ ମାନାତ୍ ହେ କାତା ୱେଚ୍ଚେଙ୍ଗ୍ ସାଇଜ କିଦ୍ନାନ୍। 20ଇନେସ୍କି ଏପେଙ୍ଗ୍ ବେଣ୍ କିଉଦେର୍। ମାତର୍ ପବିତ୍ର ଆତ୍ମା ମିଙ୍ଗେଙ୍ଗ୍ ବେଣ୍-ବେଣ୍ ୱେଚ୍ଚେଙ୍ଗ୍ ସାଇଜ କିଦ୍ନାତ୍।
21ହେପାଦ୍ନା ଇମ୍ଣି ମାନାୟ୍ ନାଙ୍ଗେଙ୍ଗ୍ ପାର୍ତି କିଦୁର୍, ହେୱାନ୍ ନାଙ୍ଗେଙ୍ଗ୍ ପାର୍ତି କିଦ୍ନି ଟଣ୍ଡାରିଙ୍ଗ୍ ମାର୍ନେ ଅହିକିଦେଙ୍ଗ୍ ପାର୍ତିକିୱି ଟଣ୍ଡାହିର୍ତାକେ ଆହିକିନାର୍। ଆବାର୍ ପା ତା ହିମ୍ଣାକାଙ୍ଗ୍ ହେଲେକେ କିନାର୍। ଆରେ, ହିମ୍ଣାଙ୍ଗ୍ ଆବାଆୟାଙ୍ଗ୍ ବିରଦ୍ତାକେ ନିଙ୍ଗ୍ଞ୍ଜି ହେୱାରିଙ୍ଗ୍ ମାର୍ନେ ଅହ୍ନାର୍। 22ଆରେ, ନାବେ ପାର୍ତି କିତିସ୍ ମିଙ୍ଗେଙ୍ଗ୍ ୱିଜାକାର୍ ଗିଣ୍ କିଦ୍ନାର୍, ମାତର୍ ଇମ୍ଣି ମାନାୟ୍ ନାବେ ହାରିହାରା ପାତେକ୍ ପାର୍ତି କିଜି ମାନାନ୍, ହେୱାନ୍ ରକ୍ଷା ପାୟା ଆନାନ୍।” 23ମାତର୍ ହେୱାର୍ ଏଚେପାଦ୍ନା ମିଙ୍ଗେଙ୍ଗ୍ ର ସହର୍ତାକେ ଦୁକ୍ ହିଦ୍ନାର୍, ହେପାଦ୍ନା ଅଲଗା ସହର୍ତାକେ ହାଲାଟ୍। ଇନେସ୍କି ମିଙ୍ଗେଙ୍ଗ୍ ଆନେଙ୍ଗ୍ ସତ୍ ୱେଚ୍ଚାନାଙ୍ଗା, ଇସ୍ରାଏଲନି ସହର୍କୁକାଙ୍ଗ୍ ଏପେଙ୍ଗ୍ ବୁଲା ଆନାକା ୱିଜ୍ୱି ଆଗେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ୱାନାଙ୍ଗ୍।
24“ଚେଲା ତା ଗୁରୁତାଙ୍ଗ୍ ଗାଜା ଆକାୟ୍। କି ହଲିଆ ତା ମାଲିକ୍ତାଙ୍ଗ୍ ଗାଜା ଆକାୟ୍। 25ଚେଲା ତା ଗୁରୁ ଲେକେ ଆରେ ହଲିଆ ତା ମାଲିକ୍ ଲେକେ ଆଦେଙ୍ଗ୍ ଆଡ଼୍ତିସ୍ ହାର୍। ମାତର୍ ଇଲ୍ ମାଲିକ୍ତିଙ୍ଗ୍ ବାଲ୍ଜିବୁଲ୍ ଶୟତାନ ଇଞ୍ଜି କୁକ୍ତିସ୍, ଆରେ ଇଲ୍ନି ଜେକନିକାରିଙ୍ଗ୍ ତ ଆଦିକ୍ ବାନ୍ୟା ତର୍ଦାଙ୍ଗ୍ କୁକିୟା ଆନାତ୍।”
ଈଶ୍ୱରତିଙ୍ଗ୍ ପାଣ୍ଡ୍ରାଆଡ, ମାତର୍ ମାନାୟାରିଙ୍ଗ୍ ଆକାଇ
(ଲୁକ. ୧୨:୨-୭)
26ଆରେରଗ ଯୀଶୁ ୱେଚ୍ଚାନ୍, “ଏପେଙ୍ଗ୍ ମାନାୟାରିଙ୍ଗ୍ ପାଣ୍ଡ୍ରା ଆମାଟ୍। ଇନେସ୍କି ମାନାୟାର୍ ନଙ୍ଗୟ୍ ପାତେକ୍ ଇମ୍ଣି ବିଷୟ ପୁନ୍ୱାତାର୍ନା, ଈଶ୍ୱର ୱିଜୁ ବିଷୟତିଙ୍ଗ୍ ଚଚ୍ନାନ୍। ଆରେ ମାନାୟାର୍ ଇମ୍ଣି ବିଷୟତିଙ୍ଗ୍ ଡ଼ୁକ୍ଚି ଇଟ୍ନାଙ୍ଗ୍ ଇଞ୍ଜି ବାବିକିନାର୍ ହେ ବିଷୟତିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଚଚିକିଦ୍ନାନ୍। 27ଆନେଙ୍ଗ୍ ମିଙ୍ଗେଙ୍ଗ୍ ଇମ୍ଣାକା ପା ଡ଼ୁକ୍ଚି ୱେଚ୍ଚାନାଙ୍ଗ୍, ହେ କାତାତିଙ୍ଗ୍ ମାନାୟ୍ ଗଉଲିତ ହାଲ୍ଜି ୱେଚାଟ୍। ଆରେ ଇମ୍ଣାକା ପା ଇଲ୍ ବିତ୍ରେ ୱେଚ୍ଚିତି କାତାତିଙ୍ଗ୍ ଏପେଙ୍ଗ୍ ଚାତ୍ ଜପି ହାଲ୍ଜି ମାନାୟାରିଙ୍ଗ୍ ୱେଚାଟ୍।
28ଇମ୍ଣାକାର୍ ଗାଗାଡ଼୍ତିଙ୍ଗ୍ ନଷ୍ଟ କିନାର୍ ହେୱାରିଙ୍ଗ୍ ଏପେଙ୍ଗ୍ ପାଣ୍ଡ୍ରା ଆମାଟ୍। ଇନେସ୍କି ମି ଜିବୁନ୍ତିଙ୍ଗ୍ ନଷ୍ଟ କିଦେଙ୍ଗ୍ ଆଡୁର୍। ମାତର୍ ଗାଗାଡ଼୍ତିଙ୍ଗ୍ ଆରେ ଆତ୍ମାତିଙ୍ଗ୍ ଇ ରିଣ୍ଡେକାଙ୍ଗ୍ ପା ନରକ୍ନି ନାଣିତାକେ ନଷ୍ଟ କିଦେଙ୍ଗ୍ ଆଡ୍ନାନ୍ ହେ ଈଶ୍ୱରତିଙ୍ଗ୍ ପାଣ୍ଡ୍ରାଆଡ। 29ଏପେଙ୍ଗ୍ କଡିହାଡ଼ା ପଟିକାଙ୍ଗ୍ ବାବିକିଜି ହୁଡ଼ାଟ୍। ରିଣ୍ଡି କଡିହାଡ଼ା ପଟିଙ୍ଗ୍ ଅଲପ୍ ଡାବୁକାଙ୍ଗ୍ ପୟିଆନିକ୍, ମାତର୍ ହେ ପଟିଙ୍ଗ୍ ବିତ୍ରେତାଙ୍ଗ୍ ରଞ୍ଜାଙ୍ଗ୍ ପା ପଟି ମେଦ୍ନିତ ଆର୍ଜି ହାଃନାତ୍ ହେଦାଙ୍ଗ୍ ପା ଈଶ୍ୱର ପୁଚାନ୍ନା। ଇନେସ୍କି ହେୱାନ୍ ୱିଜାକାରିଙ୍ଗ୍ ଜାତୁନ୍ ଅନାନ୍। 30ହେଲେକେ ଈଶ୍ୱର ମିଙ୍ଗେଙ୍ଗ୍ ପା ଜାତୁନ୍ କିଦ୍ନାନା। ହେଦାଙ୍ଗ୍ କାଜିଙ୍ଗ୍ କାପ୍ଡ଼ାତାକେ ଏଚେଗଟା ତେମୁଲ୍ ମାନାତ୍ ହେଦାଙ୍ଗ୍ ପା ଈଶ୍ୱର ପୁନାନ୍। 31ହେଦାଙ୍ଗ୍ ଲାଗିଙ୍ଗ୍ ଏପେଙ୍ଗ୍ ପାଣ୍ଡ୍ରା ଆମାଟ୍। ଇନେସ୍କି ପଟିଙ୍ଗ୍ ଦାମ୍ତାଙ୍ଗ୍ ଈଶ୍ୱରତାକେ ମି ଜିବୁନ୍ ଆଦିକ୍।”
ଯୀଶୁଙ୍ଗ୍ ପାର୍ତି କିଦେଙ୍ଗ୍ ଲାଜା ଆମାଟ୍
(ଲୁକ. ୧୨:୮-୯)
32ଯୀଶୁ ଆରେରଗ ୱେଚ୍ଚାନ୍, “ଇମ୍ଣି ମାନାୟ୍ ୱିଜାକାର୍ ଆଗେ ନିଲ୍ଚି ନାବେ ପାର୍ତି କିନାଙ୍ଗା ଇଞ୍ଜି ୱେଚ୍ନାନ୍, ଆନେଙ୍ଗ୍ ପା ନା ସରଗ୍ନି ଆବା ମୁମ୍ଦ ଈଶ୍ୱର ଦୁତ୍କୁ ଆଗେ ୱେଚ୍ନାଙ୍ଗ୍ ଯେ ଇୱାନ୍ ନା ଜାର୍ ଲକ୍। 33ମାତର୍ ଇନେର୍ ପା ମାନାୟ୍ ମୁମ୍ଦ ନିଲ୍ଚି ପାର୍ତି କିଉଙ୍ଗା ଇଞ୍ଜି ୱେଚ୍ନାନ୍, ଆନେଙ୍ଗ୍ ପା ନା ସରଗ୍ନି ଆବା ମୁମ୍ଦ ୱେଚ୍ନାଙ୍ଗ୍ ଯେ ଇୱାନ୍ ନା ଜାର୍ ଲକ୍ ଆକାଇ।”
ଯୀଶୁଙ୍ଗ୍ ପାର୍ତି କିନାକାର୍ ଜିବୁନ୍ ପାୟାଆନାର୍
(ଲୁକ. ୧୨:୫୧-୫୩; ୧୪:୨୬-୨୭)
34ଯୀଶୁ ଆରେରଗ ୱେଚ୍ଚାନ୍, “ଆନେଙ୍ଗ୍ ପୁର୍ତିତାକେ ଶାନ୍ତି ହିଦେଙ୍ଗ୍ ୱାତାଙ୍ଗ୍ନା ଇଦାଙ୍ଗ୍ ମାନ୍ତ ବାବିକିମାଟ୍। ଇନେସ୍କି ନାଙ୍ଗେଙ୍ଗ୍ ପାର୍ତିକିନି କାଜିଙ୍ଗ୍ ମାନାୟାର୍ ମିଙ୍ଗେଙ୍ଗ୍ ଗଣ୍ଡ୍ଗଲ୍ କିଦ୍ନାର୍। 35ଆନେଙ୍ଗ୍ ପୁର୍ତିତାକେ ୱାତି କାଜିଙ୍ଗ୍ ମାନାୟାର୍ ନାବେ ପାର୍ତି କିଦ୍ନାର୍। ମାତର୍ ଇମ୍ଣାକାର୍ ନାବେ ପାର୍ତି କିଦୁର୍ ହେୱାର୍ ପାର୍ତି କିନାକାରିଙ୍ଗ୍ ବିରଦ୍ କିନାର୍। ଇଦାଙ୍ଗ୍ କାଜିଙ୍ଗ୍ ଆବା ହୁଦାଙ୍ଗ୍ ହିମ୍ଣା ଆରେ ଆୟା ହୁଦାଙ୍ଗ୍ କଇ, ଆରେ ହାସୁ ହୁଦାଙ୍ଗ୍ କଡ଼ିଆ ବିରଦ୍ କିବା ଆନାର୍। 36ହେଲେକେ ଇଞ୍ଜାକାର୍ ନେ ତା ଶାତ୍ରୁ ଆବା ଆନାର୍। 37ଇନେର୍ ପା ଆବା କି ଆୟା ନା ତାକେତାଙ୍ଗ୍ ଆଦିକ୍ ଲାଡ୍ କିନାନ୍, ହେୱାନ୍ ନା ଚେଲା ଆଦେଙ୍ଗ୍ ଆଡୁନ୍। ମାତର୍ ଇନେର୍ ମେହିଙ୍ଗ୍ କି କଇଙ୍ଗ୍ ନା ତାକେତାଙ୍ଗ୍ ଆଦିକ୍ ଲାଡ୍ କିନାନ୍, ହେୱାନ୍ ନା ଚେଲା ଆଦେଙ୍ଗ୍ ଆଡୁନ୍। 38ଆରେ ଇନେର୍ ପା କୃଶ ଆସ୍ତି ନା କାଜିଙ୍ଗ୍ ଦୁକ୍କଷ୍ଟ ପାୟିକିୱାଦାଙ୍ଗ୍ ନା ପାଚେ ୱାନାନ୍, ହେୱାନ୍ ନା ଚେଲା ଆଦେଙ୍ଗ୍ ଆଡୁନ୍। 39ଇନେର୍ ଜାର୍ ଜିବୁନ୍ ବାଚାୟ୍ କିଦେଙ୍ଗ୍ ଉପାୟ୍ କିନାନ୍, ହେୱାନ୍ ତା ଜିବୁନ୍ ଆରାଇ କିନାନ୍। ଆରେ ଇନେର୍ ନା କାଜିଙ୍ଗ୍ ଜିବୁନ୍ ହିନାନ୍, ହେୱାନ୍ ତା ଜିବୁନ୍ ବାଚାୟ୍ କିନାନ୍।”
ଯୀଶୁଙ୍ଗ୍ ଇନେର୍ ପାର୍ତିତାଙ୍ଗ୍ ଆହ୍ନାକାର୍ ହେୱାର୍ ପୁରଷ୍କାର୍ ପାୟାଆନାର୍
(ମାର୍କ. ୯:୪୧)
40ଯୀଶୁ ଆରେରଗ ୱେଚ୍ଚାନ୍, “ଇନେର୍ ମିଙ୍ଗେଙ୍ଗ୍ ଆସ୍ତାନାର୍, ହେୱାର୍ ନାଙ୍ଗେଙ୍ଗ୍ ଆସ୍ତାନାର୍। ଆରେ ଇନେର୍ ନାଙ୍ଗେଙ୍ଗ୍ ଆସ୍ତାନାର୍, ହେୱାନ୍ ନାଙ୍ଗେଙ୍ଗ୍ ପକ୍ତିତି ଆବାଙ୍ଗ୍ ଆହ୍ନାର୍। 41ମାପୃ କାଜିଙ୍ଗ୍ ୱେଚ୍ନି ଭବିଷ୍ଯତବକ୍ତାତିଙ୍ଗ୍ ଯଦି ଏପେଙ୍ଗ୍ ଆହ୍ନାଦେର୍, ହେୱାନ୍ ଭବିଷ୍ଯତବକ୍ତା ପାୟା ଆତିଲେକେ ହାମାନ୍ ପୁରଷ୍କାର୍ ଏପେଙ୍ଗ୍ ପା ପାୟାଆନାଦେର୍। ଆରେ, ଇନେର୍ ପା ର ଦରମ୍ ମାନାୟ୍ତିଙ୍ଗ୍ ଆହ୍ନାର୍, ହେ ଦରମ୍ ମାନାୟ୍ ପାୟା ଆତିଲେକେ ହାମାନ୍ ପୁରଷ୍କାର୍ ଏପେଙ୍ଗ୍ ପା ପାୟାଆନାଦେର୍। 42ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ନାଙ୍ଗେଙ୍ଗ୍ ପାର୍ତିକିନି ହିରୁ ଲଗାଙ୍ଗ୍ ପା ନା ଚେଲାଇଞ୍ଜି ଯଦି ର ଗିଲାସ୍ ଏଜୁଙ୍ଗ୍ ଉଣ୍ଡେଙ୍ଗ୍ ହିନାର୍ ହେୱାନିଙ୍ଗ୍ ଈଶ୍ୱର ହାତ୍ପା ପୁରଷ୍କାର୍ ହିନାନ୍।”
Iliyochaguliwa sasa
ମାଥିଉ 10: PEGNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Pengo Parja Bible by The Love Fellowship is licensed under Creative Commons Attribution-ShareAlike 4.0 License.