Matius 21
21
Rinumikot i Yisus soi Bandar Yorusalim
(Mar. 11:1-11; Luk. 19:28-40; Yaya 12:12-19)
1Di osomokno dii i Yisus om ikoi i tongotulunJo siri Bandar Yorusalim, do nokorikotno ikoi siri Kampung Boitpagi siri kulud#21:1 kulud: kotud roitan do Jaitun, om ponuuno dii i Yisus di duvo tulunJo, 2om bilinaino dii Disido iolo do, “Ongoi koupo silo kampung do gotuvangon tokou, om korikot kou nopo silo, om koontong kou nopo do kaladai di poingkogos om i tanak si somokjo, om ujadai muju nopo iri, om ovitono mongiduvo siti Dogo. 3Nong kivaro nopo mongoduat dikovu, poiloon mujuno do, ‘Kivaro kogunaan di Tuhan#21:3 Tuhan: siri solinan vokon pinotulis do: i sanganujo diti,’ kanto nono disido om mogoogoi isido poovit dikovu,” kadi Yisus.
4Iri nopo kinosuuan di Yisus dii nga porikot diri tinangaran di kinomoi di nabi, i popolombus di tinangaran do Kinoringan pogulu, do irad diti,
5“Patangaronno di tulun siri Siun do irad diti,
‘Antangaino i Raja muju do rumikot sino dikovu
do osuribak i ginavo,
do poinsako do kaladai, irino tanak do kaladai,’
kanto,” kadi nabi.#Antangai Jokoria 9:9.
6Om pampanauno dii iri duvo tulun di Yisus do mongoi siri pantok pinonuuan di Yisus do mongovit di kinomoi Disido diolo. 7Om ovitono dii diolo i kaladai mivaja di tanak, om lopikaino dii diolo di sabung doisido si likud di tongokaladai om sako nogi dii i Yisus. 8Nga okonko aalang-alang i ginuu di tulun pavalad diri tongosabung doisido siri ralan, om kivaro nogi tulun manatas di tongoraan do kaju do polopikon siri ralan iri vajaan di Yisus do mongurumat Disido. 9Om oguu dii i tongotulun sampanau-panau siri gulu om siri touriJo do sonluvapan do mangarajou Disido, kadiolo,
“Usana! Rojoo tokouno i koturunan di Daud.
Kibarakatno i Yisus do rinumikot Isido saralom ngaran do Tuhan.
Usana! Rojoo tokouno i Kinoringan i poingijon soi savat suruga!”
kadi tongotulun.#Antangai Buuk Sinding 118:26.
10Om ontok do rumikot i Yisus siri Bandar Yorusalim, oguu dii tulun songurau-urau do oiranan, om kadiolo, “Isai ilo tulun dilo?” ka.
11Kadi tongotulun do jinumawap, “Isidono i nabi Yisus mantad si Bandar Nasarit siri Vonuvo Golilia,” ka.
Minonunsub i Yisus di Tongotulun Mongojual siri Natad do Valai Sasambayangan Tagajo
(Mar. 11:15-19; Luk. 19:45-48; Yaya 2:13-22)
12Om asuno dii i Yisus siri natad do Valai Sasambayangan Tagajo, om kaantangai dii Disido iri tongotulun do moiboboli siri, om sunsubo dii Disido iolo kasangkat, om pintutuvado dii Disido i tongomija di tongotulun mipalit-palit do siin om i tongotogomon di tongotulun pojual do burungasang. 13Om kaDisido diolo, “Kivaro nokotulis siri Kitab do, ‘Ponguranan do tulun iri valaiKu do valai sasambayangan,’ kadi Kinoringan, nga inombo nogi dii do iradon muju do luvang ijonon di tulun do parampuk,” kadi Yisus.#Antangai Yasaya 56:7; Yoromia 7:11.
14Nga rikotno dii i tulun bolou om i mimpo-kimpo mampanau si Disido siri natad do Valai Sasambayangan Tagajo, om lingasaino dii di Yisus iolo. 15Nga kivaro i tongokotua do tulun Joudi siri, irino i tongokotua di imam om i tongotulun monunuduk do Undang-undang Ugama do Joudi. Om araatan dii iolo do nokoontong di Yisus sabap tumaai#21:15 tumaai: dumangi di kosunduvan do vinaal Disido, om nokorongou nogi di tongotangaanak do sonluvapan mitangar do ka, “Rojoo tokouno i koturunan di Daud,” kadiolo.
16Om kadi tongokotua do tulun Joudi di Yisus, “OrongouNui tangaron dilo tongotangaanak?” ka.
“OrongouKui, nga nakabasa koupo bo gia diri tinangaran siri Kitab do kivaro irad diti pinotulis do,
‘NotudukanNu laid iri tongotangaanak di ongopopoyok
om i tongotangaanak vokon do sumusupo
do mangarajou Dika,’
kadiri nokotulis siri Kitab,”
kadi Yisus.#Antangai Buuk Sinding 8:2.
17Om koopod nopo dii Isido diri, om iduaino dii Disido iolo do mampanau mantad si Bandar Yorusalim do mongoi siri Kampung Boitani, om minodop siri.
Nintulusan di Yisus i Nunuk
(Mar. 11:12-14, 20-24)
18Om korikot nopo dii di minsusuvab, pampanauno dii i Yisus om ikoi i tongotulunJo gumuli kavagu siri Bandar Yorusalim, nga vinitilon dii i Yisus. 19Nga kivaro iso puun nunuk do naantangan Disido do aui osodu mantad siri ralan, om ongoiono dii Disido insamakai nong kituva daa. Nga roun noopo naantanganJo do alabung, nga pitangarno dii i Yisus diri nunuk do, “Mantad maino antangaipo nong monguvakopo,” kaDisido, om rujou nopo dii i nunuk.
20Kaantangaija nopo dii di tongotulunJo do irad diri, turus do nokotigog ikoi, om kanja, “Potingkuro ilo nunuk do turus norujou?” ka.
21Jawap kadi Yisus, “PatangaronKu marong dikovu iti, nong aui opiduvo ino ginavo muju aparsaya do Kinoringan, okoniko korujou kou noopo diti nunuk irad diti vinaalKu, do insan ilopo kulud#21:21 kulud: kotud nong tangaron muju do, ‘Valiuno silo laut,’ ka, nga misti do maliu ilo kulud. 22Om onuu nopo iri pokionuon muju saralom sambayang muju, nga kaanui nong aparsaya kovi do oonuan kou di pokionuon muju,” kadi Yisus.
Pongoduatan di Kuasa di Yisus
(Mar. 11:27-33; Luk. 20:1-8)
23Om ongoino dii i Yisus masu siri natad do Valai Sasambayangan Tagajo, om rikotno dii i tongokotua do tulun Joudi, irino i tongokotua di imam om i tongomoloingon do mongoi sumamung di Yisus. Om ontok diri monuduk i Yisus siri, om pongoduatno dii iolo do, “Onu iti kuasaNu do monunsubKo di tongotulun mongojual siti? Om isai minanaak diti kuasaNu?” kadiolo.
24Om jawapno dii i Yisus diolo do ka, “Ioku nogi nga kivaro pongoduatanKu dikovu. Nong jumawap kou Dogo, ampa nogi poiloonKu ikovu diri nontodon diti kuasaKu. 25Nga isai bato minonuu di Yaya mamatis#21:25 mamatis: mamaptais do tulun? Kinoringan ko tulunpo?” kadi Yisus.
Nga poiupakatno dii iolo do ka, “Nong tangaron tokou do, ‘Mantad do Kinoringan,’ ka, nga tangaron tokou Disido, ‘Nong irad dino, nokuro do au kou aparsaya di Yaya?’ kadino kama Disido. 26Nong jawapan tokou Isido do, ‘Mantad do tulun,’ ka, nga osusa tokou, do alo tongotulun toguu do korosijan tokou sabap panantaman kasangkat do tongotulun do i Yaya nopo nga iso nabi, i popolombus di tinangaran do Kinoringan,” kadiolo.
27Jadi jawapno iolo do, “Taau, aui ikoi nokoilo nong isai minonuu di Yaya,” ka.
Nga kadii di Yisus kavagu, “Ioku nogi nga au Oku popoilo nong onu do kuasa napakaiKu siti,” ka.
I Poiradan do Iso Tulun Kitanak Duvo Kusai
28Nga kadi Yisus diolo, “Potingkurono kaandaman muju nong maja diti soritaKu? Kivaro iso tulun do kitanak duvo kusai, om ongoino dii pitangar iamojo#21:28 amo: apa di tanakjo gulu do kadisido, ‘Oli, ongoipo kumuri soi kabun do anggur tokou maino,’ ka.
29-30Kadii disido, ‘Au koopud oku mongoi,’ ka. Ongoino dii iamojo siri di tanakjo touri,#21:29-30 touri: toudi iri om iri nisuujo daa, nga ompoto noopo disido iamojo do, ‘Oo, mongoi okui,’ ka, nga aui dii minongoi isido. Nga laidi dii nga kopiguli i dii kavagu i ginavo di tanak gulu, om ongoi nogi dii isido siri kabun do kumaraja.
31Na! Saralom diri duvo tanakjo, isaino iri minonumbojo di nisuu diamojo?” kadii di Yisus.
Kadiolo, “I tanak gulu,” ka.
Kadii di Yisus diolo, “PatangaronKu marong dikovu iti, do gaampo ilo momumumpung do sukai om i tongondu sundal kopogulu mantad dikovu masu si Kopomorintaan di Kinoringan. 32Do norikatan kouno dikovu di Yaya do monuduk di ponudukan do oinomod, nga au kovi aparsaya disido. Nga ii nopo momumumpung do sukai om i tongotongondu sundal nga aparsaya diri ponudukanjo. Nga insan antangan mujupo iolo do naparsaya nga au kovi dikovu rumorogo do duso muju om aparsaya disido,” kadi Yisus diolo.
Poiradan di Tulun Minoniwa do Kabun Anggur
(Mar. 12:1-12; Luk. 20:9-19)
33Kadi Yisus kavagu, “Rongoo mujuno iti iso poiradanKu sondiang, do potudukonKu dikovu kavagu. Kivaro iso sanganu do tana do minomukabun do anggur, om pagarono dii disido misoliput, om vaalaijo do pamagaan di tuva do anggur i vinaal mantad do vatu do linuvangan, om pamaal nogi dii isido do tinimbalai pangajagaan di kabun anggur. Om koopod nopo dii iri, om posiwaaino nogi dii disido iri kabun di piipiro tulun, om pakaayai nogi dii disido mongoi soi vonuvo sondiang. 34Om korikot nopo dii i maso do koponguvaan diri anggur, om ponuuno dii i sanganu diri kabun do tongoturiponjo mongoi siri di tulun minoniwa diri kabun do mokianu daa diri tuva di anggur.
35Nga nokorikot nopo dii iri tongoturipon siri kabun anggur om kaantangai dii diri tulun minoniwa di kabun, kuutai dii diolo om loposo dii diolo iri iso turipon, om patajo dii diolo iri iso, om dumpauo dii do vatu iri iso. 36Om ponuuno dii kavagu iri sanganu di kabun di turipon vokon, om oguu nogi dii iti maino mantad diri sinuujo togina do mongoi siri tulun minoniwa. Nga irad om irad diri togina do kivaro iri pinokorualan, om kivaro i pinatai diolo. 37Nga i pongovianno dii, om iri nogi dii i tanak di sanganu di kabun do sinuu mongoi siri di tulun minoniwa, do andasan nopo daa dii di sanganu diri kabun om urumaton diri minoniwa iri tanakjo.
38Ombo iti, do korikot nopo dii iri tanak di sanganu di kabun om kaantangai dii di tulun minoniwa di kabun, om poitatangarno dii iolo do, ‘Ilono tanak di sanganu diti kabun, nga kayo patajo tokou supaya aanu tokou daa iti kabun do isidono iri gumanti manansanganu diti kabun diamojo,’#21:38 diamo: diapa kadiolo. 39Om kuutaino dii diolo, om pataamo dii diolo siri sampaping do pagar, om patajo nogi dii diolo.
40Nga kouli nopo dii i sanganu di kabun, kukuroyon naku dii disido i tongotulun minoniwa di kabun diri?” kadi Yisus.
41Kadii diolo di Yisus, “Sansarawon di sanganu di kabun gosob do napatai i tongotulun taraat, om posiwaaijono kavagu i kabun anggur diri di tulun vokon i rumalan mamaagi di tuva anggur ontok do koponguvaan,” ka.
42Om kadi Yisus kavagu, “Nakabasa kou bo gia di tinangaran siri Kitab do ka,
‘Iri nopo vatu nitaam di mamamaal do valai,
sabap panantaman daa diolo om au aandai,
ombo bala iri do irino vatu sinumiliu do pinonimpuunan do mamaal do valai.
Om irino vinaal do Tuhan
om irino kinoiranan tokou mongontong,’
kadiri tinangaran si Kitab.#Antangai Buuk Sinding 118:22-23.
43Irad nopo dino, mitangar Oku dikovu do au kou porintawon do Kinoringan sabap do au kou maja di kouvanganJo. Nga iri nopo bansa vokon do maja di kouvanganJo om irino porintawonJo. 44[Om isaai nopo kootung do vatu diri om irino orumpisak, om isaai nopo ootungan do vatu diri om irino oromumuk,]” kadi Yisus, do Isidono pinoiradan di vatu.
45Nga ontok di nokorongou i tongokotua di imam om i kumpulan Porisi di poiradan di Yisus, kasangkat nga orotijan diolo i komoion do iolono komoion. 46Om pokitangkap daa dii diolo i Yisus, nga aui kopusu do rumosi urunan di tulun toguu, do komoion di tulun toguu i Yisus do i nabi, i popolombus di tinangaran do Kinoringan.
Iliyochaguliwa sasa
Matius 21: LabukPKV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1995, Wycliffe Bible Translators, Inc. All rights reserved.