Éxodo 19
19
Israeletic c'otic ta Sinaí
1Te israeletic c'otic ta jochol taquin q'uinal ta Sinaí. Ja' yoxebalix u sloq'uelic tel ta Egipto abi. 2Te bit'il loq'uic bael ta Refidim, c'otiquix ta bay jochol taquin q'uinal Sinaí. Tey c'o spas scampamentoic a ta bay yelaw te witse. 3Tey mo bael a te Moisés, tey ba sta sba soc a te Diose, yu'un c'alal ta wits ic'ot moel yu'un te Cajwaltique, jich la yal:
—Albeya te alumal te sts'umbal Jacob, ja' te israeletique: 4“Ja'ex awilojic te bitic la jpas ta stojol te egipcioetique, soc te bit'il talex cu'un li' c'alal to, melel cajalex tel cu'un ta sba xic' águila c'oem. 5Jich yu'un teme ya awaiybonic spisil jc'op, soc teme ya awich'bonic ta muc' te trato cu'une, mero lumex me cu'un, te ma'yuc yan lumetic ya spajex,#Dt 4.20; 7.6; 14.2; 26.18; Tit 2.14. melel ja' cu'un spamal te balumilale. 6¡Te ja'exe ajwalilex soc sacerdoteex#Ap 1.6; 5.10. soc ch'ul lum c'oemex ta jtojol!”#1 P 2.9. uta me —xi' te Diose.
7Jich coj tel Moisés ta sc'oponel te mamaletic ich'bilic ta muc' yu'un te lume. Jajch' ta yalel spisil te bila mandal albilix yu'un te Cajwaltique. 8Te israeletic pajal la sjaq'uic:
—Ya jpastic spisil te bila mandal yu'un te Cajwaltique#Ex 24.3; Dt 5.27. —xiic.
Te Moisés la yich'bey bael sc'op te lum ta stojol te Cajwaltique. 9Te Cajwaltic la yal:
—Ya xtalon ta atojol ta pimil tocal. Jich me ya yaiyic stojol te lum te ya xc'opojotic, jich me ya yich'at ta muc' a —xi' te Diose.
Te Moisés la yalbey te Cajwaltic te sc'op te lume. 10Te Cajwaltic jich la yal yu'un:
—Baan chajbana te israeletic yo'tic to soc te pajele. Ac'a slecubtes sbaic, soc ya me sac' sc'u'ic. 11Jich me chapalic ta lec te cha'weje. Melel te cha'weje, ya me xcoon tel ta sitic te lume ta wits Sinaí, jo'on te Ajwalilone. 12Ya me awac'bey señail te bay ya xcomic ta sjoyobal te witse, te ma xc'axic tel tey a te lume. Albeya, ya me yich'ic ta muc' te bila la awalbeye. Ma me xmoic ta wits, soc ma me xnoptsajic ta sjoyobal, melel spisil mach'atic ya xnoptsajic bael tey a ya me xlajic. 13Ma me ayuc mach'a ya yac' bael sc'ab ta wits, ya me yich' milel ta ch'ojel ta ton, o teme t'im ya yaiy xlaj, manchuc me winic o chambalam, ma me xju' ya xcuxin. Te lume ja' to ya xmoic bael ta wits a te c'alal ya x'oc' xulubil#Heb 12.18-20. —xi' te Dios ta stojol te Moisés.
14Te Moisés coj tel ta wits, tal ta xchajbanel te lume. La yac'bey slecubtes sbaic soc la sac' sc'u'ic. 15Te Moisés la yalbey te lume:
—Chajbana laj me abaic ta swenta te cha'weje. Ma laj me xajoin ta wayel te awinamique —xi' te Moisese.
16C'alal sacub q'uinal ta yoxebal c'aal, chicnaj tel tsantsewaletic soc chawuc,#Ap 4.5. soc mero pimil tocal te jul ta sba te witse. Tulan a jajch' ta oq'uel te xulubiletic. Spisil te lum te ay ta scampamentoique, nijq'uic yu'un xiwel. 17Te Moisés la yic' loq'uel te lum ta bay nainemic, ba staic te Diose. Tey comic a ta yet'al wits. 18Spisil ta swolol te wits Sinaí loc' ch'ail tey a, melel te Cajwaltic jich a coj tel te bit'il c'ajc'.#Dt 4.11-12; 5.4. Te ch'aile xtomet nax yac ta moel jichuc xch'ailel horno. Ta sjoyobal te witse tulan a jajch' ta nijq'uel. 19Te sc'op te xulubiletic yac nax ta yich'bel yip te sc'opique. Jajch' ta c'op te Moisese, te Dios la sujt'es jich bit'il sc'op chawuc.
20Te Cajwaltic tey coj tel a ta bay slajibal jol wits Sinaí. Albot te Moisés te ya xmo bael tey a ta ba ay te Diose. Jich mo bael te Moisés. 21Te Cajwaltic, jich la yalbey:
—Coan bael, pasa ta mandal te lume: Ma me xc'axic tel tey a ta bay te señaile. Ma me snop ta yo'tanic te ya sc'an yilonique, teme ayuc bit'il bayaluc ta jtul ya xlajic. 22Te sacerdoteetique ya xju' ya xnoptsajic tel ta jtojol, ya me sc'an neel ya slecubtes sbaic, teme repente tan ya xbajt'ic cu'un —xi' te Cajwaltique.
23Te Moisés la sjac'bey sc'op te Cajwaltique:
—Te lum ma me xju' ya xmoic tel ta wits Sinaí, melel ja'at la awalbon te ya cac'bey señail te bay ya xcomique. Jich yu'un ya me caltic ta jamal te awu'un me te witse —la yut.
24Te Cajwaltic, jich la yal:
—Baan, coan bael, ta patil ya me xtalat soc Aarón. Yan te sacerdoteetic soc te lum ma me xc'axic tel, teme ya xmoic tel ta bay ayone, repente tan ya xbajt'ic cu'un —xi' te Diose.
25Coj tel Moisés, jich jul yalbey te israeletique.
Iliyochaguliwa sasa
Éxodo 19: TZOXCH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Biblia en Tzeltal de Oxchuc y Tenejapa © Sociedad Bíblica de México, A.C., 2001.